ಜಗತ್ತನ್ನೇ ನಡುಗಿಸಿದ ರಷ್ಯಾ ಆಫರ್: ಇರಾನ್‌ನ ಪರಮಾಣು ಶಕ್ತಿ ಮಾಸ್ಕೋಗೆ ಶಿಫ್ಟ್? ಟ್ರಂಪ್ ದಿಗ್ಬಂಧನಕ್ಕೆ ಪುಟಿನ್ ಮಾಸ್ಟರ್ ಪ್ಲಾನ್! Russia-Iran Deal

ಈ ಬಗ್ಗೆ ಕ್ರೆಮ್ಲಿನ್ ವಕ್ತಾರ ಡಿಮಿಟ್ರಿ ಪೆಸ್ಕೋವ್ ಸುದ್ದಿಗಾರರೊಂದಿಗೆ ಮಾತನಾಡಿ, ಅಧ್ಯಕ್ಷ ಪುಟಿನ್ ಅವರು ಇರಾನ್‌ನ ಸಂವರ್ಧಿತ ಯುರೇನಿಯಂ ಅನ್ನು ರಷ್ಯಾಕ್ಕೆ ವರ್ಗಾಯಿಸುವ ಪ್ರಸ್ತಾಪವನ್ನು ವಾಷಿಂಗ್ಟನ್ ಮತ್ತು ಇತರ ಪ್ರಾದೇಶಿಕ ನಾಯಕರಿಗೆ ನೇರವಾಗಿ ತಿಳಿಸಿದ್ದಾರೆ. ಈ ಮೂಲಕ ಇರಾನ್‌ನ ಪರಮಾಣು ಚಟುವಟಿಕೆಗಳ ಬಗ್ಗೆ ಅಮೆರಿಕಕ್ಕೆ ಇರುವ ಆತಂಕವನ್ನು ದೂರ ಮಾಡಬಹುದು ಮತ್ತು ಸಂಘರ್ಷಕ್ಕೆ ಪೂರ್ಣವಿರಾಮ ಇಡಬಹುದು ಎಂದು ಹೇಳಿದ್ದಾರೆ. ಜಗತ್ತಿನ ಅತಿ ದೊಡ್ಡ ಪರಮಾಣು ಶಸ್ತ್ರಾಸ್ತ್ರಗಳನ್ನು ಹೊಂದಿರುವ ರಷ್ಯಾ, ಈ ಸಂಘರ್ಷದಲ್ಲಿ ಮಧ್ಯಸ್ಥಿಕೆ ವಹಿಸಲು ಉತ್ಸುಕವಾಗಿದೆ.

ಇದೇ ವೇಳೆ, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹೋರ್ಮುಜ್ ಜಲಸಂಧಿಯ ಮೇಲೆ ಹೇರಿರುವ ನೌಕಾ ದಿಗ್ಬಂಧನವನ್ನು ರಷ್ಯಾ ತೀವ್ರವಾಗಿ ಖಂಡಿಸಿದೆ. ಇಂತಹ ಕ್ರಮಗಳು ಅಂತಾರಾಷ್ಟ್ರೀಯ ಮಾರುಕಟ್ಟೆಗೆ ಭಾರಿ ಹಾನಿ ಉಂಟುಮಾಡುತ್ತವೆ. ಈಗಾಗಲೇ ಫೆಬ್ರವರಿಯಿಂದ ನಡೆಯುತ್ತಿರುವ ವಾಯು ಮತ್ತು ನೌಕಾ ದಾಳಿಗಳಿಂದಾಗಿ ಜಾಗತಿಕ ಆರ್ಥಿಕತೆ ತತ್ತರಿಸಿದೆ. ದಿಗ್ಬಂಧನವು ಪರಿಸ್ಥಿತಿಯನ್ನು ಮತ್ತಷ್ಟು ಹದಗೆಡಿಸಲಿದೆ ಎಂದು ಪೆಸ್ಕೋವ್ ಎಚ್ಚರಿಸಿದ್ದಾರೆ.

ಭಾನುವಾರ ಇರಾನ್ ಅಧ್ಯಕ್ಷ ಮಸೂದ್ ಪೆಜೆಶ್ಕಿಯಾನ್ ಅವರೊಂದಿಗೆ ದೂರವಾಣಿ ಮೂಲಕ ಮಾತನಾಡಿದ ವ್ಲಾಡಿಮಿರ್ ಪುಟಿನ್, ಮಧ್ಯಪ್ರಾಚ್ಯದಲ್ಲಿ ಶಾಂತಿ ಸ್ಥಾಪಿಸಲು ರಾಜತಾಂತ್ರಿಕ ಪ್ರಯತ್ನಗಳನ್ನು ಚುರುಕುಗೊಳಿಸುವುದಾಗಿ ಭರವಸೆ ನೀಡಿದ್ದಾರೆ. ಇರಾನ್‌ಗೆ ಅನ್ಯಾಯವಾಗದಂತೆ ಮತ್ತು ಅಮೆರಿಕದ ದರ್ಪಕ್ಕೆ ಬಲಿಯಾಗದಂತೆ ನೋಡಿಕೊಳ್ಳಲು ರಷ್ಯಾ ಸಿದ್ಧವಿದೆ ಎಂಬ ಸಂದೇಶವನ್ನು ಪುಟಿನ್ ರವಾನಿಸಿದ್ದಾರೆ.

ಪಾಕಿಸ್ತಾನದ ಇಸ್ಲಾಮಾಬಾದ್‌ನಲ್ಲಿ ನಡೆದಿದ್ದ ಸಂಧಾನ ಸಭೆಯು ತೀವ್ರ ನಾಟಕೀಯ ಬೆಳವಣಿಗೆಗೆ ಸಾಕ್ಷಿಯಾಯಿತು. ಅಮೆರಿಕದ ನಿಯೋಗದ ನೇತೃತ್ವ ವಹಿಸಿದ್ದ ಉಪಾಧ್ಯಕ್ಷ ಜೆಡಿ ವ್ಯಾನ್ಸ್, ಇರಾನ್‌ನ ಪಟ್ಟು ಸಡಿಲಿಸದ ಧೋರಣೆಯನ್ನು ಕಂಡು ಮಾತುಕತೆಯಿಂದಲೇ ಹೊರನಡೆದಿದ್ದಾರೆ. ಇದರಿಂದಾಗಿ ಕಳೆದ ಒಂದು ವಾರದಿಂದ ಚಿಗುರಿದ್ದ ಶಾಂತಿಯ ಆಸೆಗಳು ಈಗ ಸಂಪೂರ್ಣವಾಗಿ ಕಮರಿಹೋಗಿವೆ.

ಅಮೆರಿಕದ ಸೆಂಟ್ರಲ್ ಕಮಾಂಡ್ ಸೋಮವಾರದಿಂದ ಇರಾನ್‌ನ ಎಲ್ಲಾ ಬಂದರುಗಳ ಮೇಲೆ ಅಧಿಕೃತವಾಗಿ ದಿಗ್ಬಂಧನ ಹೇರಿದೆ.

ಟ್ರಂಪ್ ಪಟ್ಟು: ಇರಾನ್ ಹೋರ್ಮುಜ್ ಜಲಸಂಧಿಯನ್ನು ಮುಕ್ತವಾಗಿ ಬಿಡದಿದ್ದರೆ ನಮ್ಮ ದಿಗ್ಬಂಧನ ಮುಂದುವರಿಯಲಿದೆ.

ಇರಾನ್ ಎಚ್ಚರಿಕೆ: ಅಂತಾರಾಷ್ಟ್ರೀಯ ಜಲಪ್ರದೇಶದಲ್ಲಿ ಹಡಗುಗಳನ್ನು ತಡೆಯುವುದು ಸಮುದ್ರ ದರೋಡೆ. ಇದಕ್ಕೆ ತಕ್ಕ ಪ್ರತಿಫಲ ಉಣ್ಣಬೇಕಾಗುತ್ತದೆ.

ರಷ್ಯಾದ ಈ ಹೊಸ ಪ್ರಸ್ತಾಪವನ್ನು ಅಮೆರಿಕ ಒಪ್ಪಿಕೊಳ್ಳುತ್ತದೆಯೇ ಎಂಬುದು ಈಗಿರುವ ದೊಡ್ಡ ಪ್ರಶ್ನೆಯಾಗಿದ್ದು. ಒಂದು ವೇಳೆ ಇರಾನ್‌ನ ಯುರೇನಿಯಂ ರಷ್ಯಾಗೆ ಹೋದರೆ ಇರಾನ್‌ನ ಪರಮಾಣು ಶಕ್ತಿ ಕುಂಠಿತಗೊಳ್ಳುತ್ತದೆ, ಇದು ಇಸ್ರೇಲ್ ಮತ್ತು ಅಮೆರಿಕಕ್ಕೆ ಸಮಾಧಾನ ನೀಡಬಹುದು. ಆದರೆ, ರಷ್ಯಾ ಮತ್ತು ಇರಾನ್ ನಡುವಿನ ಸಂಬಂಧ ಮತ್ತಷ್ಟು ಗಟ್ಟಿಯಾಗುವುದು ಅಮೆರಿಕಕ್ಕೆ ತಲೆನೋವಾಗಲಿದೆ.

ಪ್ರಸ್ತುತ ಹೋರ್ಮುಜ್ ಜಲಸಂಧಿಯಲ್ಲಿ ಕೇವಲ ಯುದ್ಧ ನೌಕೆಗಳು ಮಾತ್ರ ಕಾಣಿಸುತ್ತಿದ್ದು, ವ್ಯಾಪಾರೀ ಹಡಗುಗಳು ಸಂಚಾರ ನಿಲ್ಲಿಸಿವೆ. ಜಗತ್ತು ಈಗ ಇಂಧನ ಮತ್ತು ಆರ್ಥಿಕ ಬಿಕ್ಕಟ್ಟಿನ ಸುಳಿಗೆ ಸಿಲುಕುವ ಎಲ್ಲ ಲಕ್ಷಣಗಳೂ ದಟ್ಟವಾಗಿವೆ,(ಏಜೆನ್ಸೀಸ್).