ರಿವರ್ಸ್​ ಗೇರ್ ಸಾಧ್ಯವಿಲ್ಲ; ಹೊಸ ವಿಬಿ ಜಿ ರಾಮ್ ಜಿ ಕಾನೂನು ಹಿಂಪಡೆಯಲ್ಲ; ಕಿರಣ್ ರಿಜಿಜು | Kiren Rijiju

ನವದೆಹಲಿ: ಕಳೆದ ಅಧಿವೇಶನದಲ್ಲಿ ಸಂಸತ್​ನಲ್ಲಿ MNREGA ಕಾಯ್ದೆಯನ್ನೂ ತಿದ್ದುಪಡಿ ಮಾಡಿ ಹೊಸದಾಗಿ ಜಾರಿಗೆ ತಂದ ವಿಬಿ ಜಿ ರಾಮ್ ಜಿ ಕಾನೂನು ಹಿಂಪಡೆಯಲ್ಲ, ಈಗಾಗಲೇ ದೇಶದ ಮುಂದೆ ಇಟ್ಟಿರುವ ಕಾನೂನನ್ನು ರಿವರ್ಸ್ ಗೇರ್ ಮಾಡಲು ಸಾಧ್ಯವಿಲ್ಲ ಎಂದು ಕೇಂದ್ರ ಸಂಸದೀಯ ವ್ಯವಹಾರಗಳ ಸಚಿವ ಕಿರಣ್ ರಿಜಿಜು ಸ್ಪಷ್ಟಪಡಿಸಿದ್ದಾರೆ.

ಸಂಸತ್​ನ ಬಜೆಟ್​ ಅಧಿವೇಶನಕ್ಕೂ ಮುನ್ನ ನಡೆದ ಸರ್ವ ಪಕ್ಷಗಳ ಸಭೆಯ ಬಳಿಕ ದೆಹಲಿಯ ಸಂಸತ್​ ಭವನದಲ್ಲಿ ಮಾತನಾಡಿರುವ ಅವರು, ಕಾನೂನು ದೇಶದ ಮುಂದೆ ಬಂದ ನಂತರ, ನಾವು ಅದನ್ನು ಪಾಲಿಸಬೇಕು. ನಾವು ರಿವರ್ಸ್​ ಗೇರ್ ಮೂಲಕ ಭೂತಕಾಲಕ್ಕೆ ಹಿಂತಿರುಗಲು ಸಾಧ್ಯವಿಲ್ಲ. ಹಿಂಪಡೆಯುವ ಪ್ರಶ್ನೆಯೇ ಇಲ್ಲ ಎಂದು ಹೇಳಿದ್ದಾರೆ.

ಅಧಿವೇಶನಕ್ಕೆ ಸರ್ಕಾರದ ಆದ್ಯತೆಗಳನ್ನು ನಿಗದಿಪಡಿಸುತ್ತಾ, ಬಜೆಟ್ ವ್ಯವಹಾರದ ಮೇಲೆ ಗಮನ ಉಳಿಯುತ್ತದೆ. ವಿವಿಧ ಪಕ್ಷಗಳ ಸದನದ ನಾಯಕರು ನೀಡಿದ ಸಲಹೆಗಳನ್ನು ನಾವು ಗಮನಿಸಿದ್ದೇವೆ. ನಿಯಮಗಳ ಪ್ರಕಾರ, ಚರ್ಚೆಗಳು ಬಜೆಟ್ ಸುತ್ತ ಮಾತ್ರವಿರಬೇಕು ಎಂದಿದ್ದಾರೆ.

ವರ್ಷದ ಮೊದಲ ಸಂಸತ್ ಅಧಿವೇಶನವಾದ ಬಜೆಟ್ ಅಧಿವೇಶನವು ರಾಷ್ಟ್ರಪತಿಗಳ ಜಂಟಿ ಸಭೆಯ ಭಾಷಣದೊಂದಿಗೆ ಪ್ರಾರಂಭವಾಗಲಿದ್ದು, ಬಳಿಕ ಜನವರಿ 29 ರಂದು ಆರ್ಥಿಕ ಸಮೀಕ್ಷೆಯ ಮಂಡನೆಯಾಗಲಿದೆ. ಫೆಬ್ರವರಿ 1‘ರಂದು ಕೇಂದ್ರ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್ ಕೇಂದ್ರ ಬಜೆಟ್ ಮಂಡನೆ ಮಾಡಲಿದ್ದಾರೆ ಎಂದು ತಿಳಿಸಿದ್ದಾರೆ.

ಅಧಿವೇಶನದಲ್ಲಿ ಕೇಂದ್ರ ಬಜೆಟ್ ಬಗ್ಗೆ ಚರ್ಚಿಸಲಾಗುವ ಶಾಸಕಾಂಗ ಕಾರ್ಯಸೂಚಿಯನ್ನು ಹಂಚಿಕೊಳ್ಳಲಾಗಿಲ್ಲ ಎಂಬ ವಿರೋಧ ಪಕ್ಷಗಳ ಆರೋಪಕ್ಕೂ ಪ್ರತಿಕ್ರಿಯಿಸಿರುವ ಅವರು, ವರ್ಷದ ಮೊದಲ ಅಧಿವೇಶನದಲ್ಲಿ ರಾಷ್ಟ್ರಪತಿಗಳ ಭಾಷಣದ ನಂತರ ಸರ್ಕಾರಿ ವ್ಯವಹಾರಗಳನ್ನು ಹಂಚಿಕೊಳ್ಳಲಾಗುತ್ತದೆ ಎಂದು ಹೇಳಿದ್ದಾರೆ.

20 ವರ್ಷಗಳಷ್ಟು ಹಳೆಯದಾದ ಕಾಂಗ್ರೆಸ್ ನೇತೃತ್ವದ ಯುಪಿಎ ಸರ್ಕಾರದಲ್ಲಿ ಜಾರಿಗೆ ತಂದಿದ್ದ, ಮಹಾತ್ಮ ಗಾಂಧಿಯವರ ಹೆಸರಿನ MNREGA ಉದ್ಯೋಗ ಖಾತರಿ ಯೋಜನೆಯನ್ನು ತಿದ್ದುಪಡಿ ಮಾಡಿ, VB G-RAM-G ಎಂದು ಮರುನಾಮಕರಣ ಮಾಡಿ ಕಳೆದ ತಿಂಗಳ ಚಳಿಗಾಲದ ಅಧಿವೇಶನದಲ್ಲಿ ಸಂಸತ್ತು ಅಂಗೀಕರಿಸಿತ್ತು (ಏಜೆನ್ಸೀಸ್).