ಮೀಸೆ ಹುಡುಗಿ ಎಂದು ಟ್ರೋಲ್​ ಮಾಡಿದವರಿಗೆ ಮತ್ತೆ ಉತ್ತರ ಕೊಟ್ಟ ಪ್ರಾಚಿ: SSLC ಬಳಿಕ ಪಿಯುಸಿಯಲ್ಲೂ ಟಾಪರ್! Prachi Nigam

Prachi Nigam : ಈ ಜಗತ್ತು ಯಾವಾಗಲೂ ಬಾಹ್ಯ ಸೌಂದರ್ಯಕ್ಕೆ ಮಾರುಹೋಗುತ್ತದೆಯೇ ಹೊರತು ವ್ಯಕ್ತಿಯಲ್ಲಿರುವ ಅದಮ್ಯ ಪ್ರತಿಭೆಗಲ್ಲ. ಮುಖದ ಮೇಲಿನ ಕೂದಲಿನ ಕಾರಣಕ್ಕೆ ತನ್ನನ್ನು ಅವಹೇಳನ ಮಾಡಿದ ಸಮಾಜಕ್ಕೆ, ತನ್ನ ಅಪ್ರತಿಮ ಬುದ್ಧಿವಂತಿಕೆಯ ಮೂಲಕವೇ ಉತ್ತರ ನೀಡಿದವರು ಪ್ರಾಚಿ ನಿಗಮ್. ಟೀಕೆಗಳಿಗೆ ಎದೆಗುಂದದೆ, ಅಪಹಾಸ್ಯವನ್ನೇ ಯಶಸ್ಸಿನ ಮೆಟ್ಟಿಲುಗಳನ್ನಾಗಿ ಪರಿವರ್ತಿಸಿಕೊಂಡ ಈ ವಿದ್ಯಾರ್ಥಿನಿಯ ಪಯಣ ಇಂದಿನ ತಲೆಮಾರಿಗೆ ಒಂದು ಅತ್ಯುತ್ತಮ ಪಾಠ. ಸೌಂದರ್ಯವು ಕೇವಲ ಚರ್ಮಕ್ಕೆ ಸೀಮಿತವಲ್ಲ, ಅದು ನಮ್ಮ ಸಾಧನೆಯಲ್ಲಿ ಅಡಗಿದೆ ಎಂಬುದನ್ನು ಪ್ರಾಚಿ ಜಗತ್ತಿಗೆ ಸಾಬೀತುಪಡಿಸಿದ್ದಾರೆ.

ಉತ್ತರ ಪ್ರದೇಶದ ಸೀತಾಪುರ ಜಿಲ್ಲೆಯ ಪ್ರಾಚಿ ನಿಗಮ್ 2024ರಲ್ಲಿ ನಡೆದ ಉತ್ತರ ಪ್ರದೇಶದ 10ನೇ ತರಗತಿಯ ಬೋರ್ಡ್ ಪರೀಕ್ಷೆಯಲ್ಲಿ 600ಕ್ಕೆ 591 ಅಂಕಗಳನ್ನು (98.5%) ಪಡೆದು ರಾಜ್ಯಕ್ಕೆ ಟಾಪರ್ ಆಗಿ ಹೊರಹೊಮ್ಮಿ, ರಾಷ್ಟ್ರ ಮಟ್ಟದಲ್ಲಿ ಸುದ್ದಿಯಾದರು. ಆದರೆ, ಆ ಸಮಯದಲ್ಲಿ ಆಕೆ ಗಳಿಸಿದ ಅಂಕಗಳಿಗಿಂತ ಹೆಚ್ಚಾಗಿ, ಸಾಮಾಜಿಕ ಜಾಲತಾಣದಲ್ಲಿ ಕೆಲವರು ಹಾರ್ಮೋನುಗಳ ಬದಲಾವಣೆಯಿಂದಾಗಿ ಆಕೆ ಮುಖದಲ್ಲಿ ಬೆಳೆದ 'ಮೀಸೆ'ಗಾಗಿ ಸಿಕ್ಕಾಪಟ್ಟೆ ಟ್ರೋಲ್ ಮಾಡಿದರು. 

ಪ್ರಾಚಿಯನ್ನು ಅನೇಕ ನೆಟ್ಟಿಗರು "ಮೀಸೆ ಹುಡುಗಿ" ಎಂದು ಕರೆದು ಅಣಕಿಸಿದರು. ಆದರೆ, ಪ್ರಾಚಿ ಮಾತ್ರ ಆ ಮಾತುಗಳಿಂದ ವಿಚಲಿತರಾಗಲಿಲ್ಲ. ಕಣ್ಣೀರು ಸುರಿಸುವುದಕ್ಕಿಂತ ಹೆಚ್ಚಾಗಿ, ಅವರು ತಮ್ಮ ಲೇಖನಿಯನ್ನು ಹರಿತಗೊಳಿಸಿದರು. ಇದೀಗ ಮತ್ತೊಮ್ಮೆ ತಮ್ಮ ಪ್ರತಿಭೆಯಿಂದಲೇ ಪ್ರಾಚಿ ಸುದ್ದಿಯಾಗಿದ್ದಾರೆ.

ಇತ್ತೀಚೆಗೆ ಪ್ರಕಟವಾದ 12ನೇ ತರಗತಿಯ ಫಲಿತಾಂಶಗಳಲ್ಲಿ ಶೇ. 91.20 ಅಂಕಗಳನ್ನು ಗಳಿಸುವ ಮೂಲಕ ಪ್ರಾಚಿ ತನ್ನ ಪ್ರತಿಭೆ ಕಾಕತಾಳೀಯವಲ್ಲ ಎಂದು ಸಾಬೀತುಪಡಿಸಿದ್ದಾರೆ. ಪ್ರಾಚಿ ನಿಗಮ್ ಅವರು ವಿಶೇಷವಾಗಿ ಗಣಿತ ವಿಷಯದಲ್ಲಿ 100ಕ್ಕೆ 99 ಅಂಕಗಳನ್ನು ಪಡೆಯುವ ಮೂಲಕ ತಮ್ಮ ಬೌದ್ಧಿಕ ಸಾಮರ್ಥ್ಯವನ್ನು ಸಾಬೀತುಪಡಿಸಿದ್ದಾರೆ. ಉಳಿದಂತೆ ಹಿಂದಿಯಲ್ಲಿ 96, ರಸಾಯನಶಾಸ್ತ್ರದಲ್ಲಿ 95 ಮತ್ತು ಭೌತಶಾಸ್ತ್ರದಲ್ಲಿ 93 ಅಂಕಗಳನ್ನು ಗಳಿಸಿದ್ದಾರೆ. 

ಇಂಜಿನಿಯರಿಂಗ್ ಪ್ರವೇಶ ಪರೀಕ್ಷೆಗಳಿಗಾಗಿ ಅವರು ನಡೆಸಿದ ತೀವ್ರತರವಾದ ಸಿದ್ಧತೆಯೇ ಈ ಉನ್ನತ ಸಾಧನೆಗೆ ಕಾರಣವಾಗಿದೆ. ಅಡೆತಡೆಗಳ ನಡುವೆಯೂ ಶೈಕ್ಷಣಿಕ ಶಿಸ್ತನ್ನು ಕಾಪಾಡಿಕೊಂಡಿರುವ ಇವರು, ಲಕ್ಷಾಂತರ ವಿದ್ಯಾರ್ಥಿಗಳಿಗೆ ಸ್ಪೂರ್ತಿಯಾಗಿದ್ದಾರೆ. ಸತತ ಎರಡು ಬಾರಿ ಅತ್ಯುತ್ತಮ ಫಲಿತಾಂಶಗಳನ್ನು ಗಳಿಸುವ ಮೂಲಕ, ತನ್ನ ವಿರುದ್ಧದ ಎಲ್ಲಾ ಟೀಕೆಗಳಿಗೆ ಮೌನವಾಗಿಯೇ ಪ್ರಾಚಿ ಉತ್ತರ ನೀಡಿದ್ದಾರೆ.

ನಿಸರ್ಗದತ್ತವಾಗಿ ಸಿಗುವ ರೂಪಕ್ಕಿಂತ ನಾವು ಸಾಧಿಸುವ ಪ್ರತಿಭೆ ಮಿಗಿಲಾದದ್ದು ಎಂಬುದನ್ನು ಪ್ರಾಚಿ ನಿರೂಪಿಸಿದ್ದಾಳೆ. ತನ್ನ ಬಾಹ್ಯ ಸೌಂದರ್ಯದ ಬಗ್ಗೆ ಎಳ್ಳಷ್ಟೂ ಕೀಳರಿಮೆ ಇಲ್ಲದೆ, ಸಮಾಜದ ಅಪಹಾಸ್ಯ ಮತ್ತು ಟೀಕೆಗಳಿಗೆ ಕಿವಿಗೊಡದೆ ಅವಳು ತನ್ನ ಗುರಿಯತ್ತ ಗಮನಹರಿಸಿದಳು. ಒಮ್ಮೆ ಪ್ರಥಮ ಸ್ಥಾನ ಪಡೆಯುವುದು ಆಕಸ್ಮಿಕ ಅಥವಾ ಅದೃಷ್ಟವಿರಬಹುದು, ಆದರೆ ಸತತ ಎರಡನೇ ಬಾರಿಯೂ ಅದೇ ಮಟ್ಟದ ಸಾಧನೆ ಮಾಡುವುದು ಅವಳ ಅಚಲ ಪರಿಶ್ರಮ ಮತ್ತು ದೃಢಸಂಕಲ್ಪಕ್ಕೆ ಸಾಕ್ಷಿಯಾಗಿದೆ. ಅಂತಿಮವಾಗಿ, ಮನಸ್ಸಿದ್ದರೆ ಮಾರ್ಗ ಮತ್ತು ದೃಢ ವಿಶ್ವಾಸವಿದ್ದರೆ ಎಂತಹ ಟೀಕೆಗಳನ್ನೂ ಮೀರಿ ಯಶಸ್ಸು ಗಳಿಸಬಹುದು ಎಂಬುದಕ್ಕೆ ಅವಳೇ ಒಂದು ಸ್ಪೂರ್ತಿ, (ಏಜೆನ್ಸೀಸ್​).