ಎಲ್ಲರ ಗಮನ ಸೆಳೆದ ಪ್ರಧಾನಿ ಮೋದಿ ವಾಚ್: ಈ ಕೈಗಡಿಯಾರದ ಬೆಲೆ, ವಿಶೇಷತೆ ಕೇಳಿದ್ರೆ ನಿಮ್ಮ ಹುಬ್ಬೇರುತ್ತೆ! PM Modi ​

ನವದೆಹಲಿ: ತಮ್ಮ ದಿಟ್ಟ ಆಡಳಿತದಿಂದಲೇ ವಿಶ್ವ ಪ್ರಸಿದ್ಧಿಯಾಗಿರುವ ಪ್ರಧಾನಿ ನರೇಂದ್ರ ಮೋದಿ ( PM Modi ), ತಮ್ಮ ಫ್ಯಾಷನ್ ಪ್ರಜ್ಞೆಯಿಂದಲೂ ಆಗಾಗ ಪ್ರಶಂಸೆಗೆ ಒಳಗಾಗುತ್ತಾರೆ. ಅವರು ಧರಿಸುವ ಕುರ್ತಾಗಳ ಜೊತೆಗೆ, ಕೈಗಡಿಯಾರಗಳು ಸಹ ಆಗಾಗ ಗಮನ ಸೆಳೆಯುತ್ತವೆ. ಇದೀಗ ಅವರು ಧರಿಸಿರುವ ಒಂದು ಕೈಗಡಿಯಾರದ ಫೋಟೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿದ್ದು, ಭಾರೀ ಚರ್ಚೆಯಾಗುತ್ತಿದೆ.

ಉಡುಗೆಯಲ್ಲೂ ನಮ್ಮ ಭಾರತೀಯ ಸಂಪ್ರದಾಯವನ್ನು ಪಾಲಿಸುವ ಪ್ರಧಾನಿ ಮೋದಿ ವಾಚ್​ ವಿಚಾರದಲ್ಲೂ ಅದನ್ನೇ ಮುಂದುವರಿಸಿದ್ದಾರೆ. ಸ್ಥಳೀಯ ಉತ್ಪನ್ನಗಳಿಗೆ ಆದ್ಯತೆ ನೀಡಿ ಎಂದು ತಮ್ಮ ಭಾಷಣದಲ್ಲಿ ಸದಾ ಹೇಳುವ ಪ್ರಧಾನಿ, ಅದನ್ನು ಚಾಚೂ ತಪ್ಪದೇ ಪಾಲನೆ ಮಾಡುತ್ತಿದ್ದಾರೆ. ಮೇಕ್​ ಇನ್​ ಇಂಡಿಯಾಗೆ ಹೆಚ್ಚು ಪ್ರಾಮುಖ್ಯತೆ ನೀಡುತ್ತಾರೆ.

ನರೇಂದ್ರ ಮೋದಿ ಅವರು ತಮ್ಮ ಇತ್ತೀಚಿನ ಎಲ್ಲಾ ಸಾರ್ವಜನಿಕ ಕಾರ್ಯಕ್ರಮಗಳಲ್ಲಿ ಜೈಪುರ ವಾಚ್ ಕಂಪನಿಯ ರೋಮನ್ ಬ್ಯಾಗ್ ಎಂಬ ಕೈಗಡಿಯಾರವನ್ನು ಧರಿಸುತ್ತಿದ್ದಾರೆ. ಈ ವಾಚ್​ ಹಲವು ವೈಶಿಷ್ಟ್ಯಗಳನ್ನು ಹೊಂದಿದೆ. ಇದರ ಬೆಲೆ 55 ಸಾವಿರದಿಂದ 60 ಸಾವಿರ ರೂಪಾಯಿವರೆಗೆ ಇದೆ.

ಈ ವಾಚ್​ನ ವಿಶೇಷ ಏನೆಂದರೆ, 1947ನೇ ಇಸವಿಯುಳ್ಳ ಒಂದು ರೂಪಾಯಿ ನಾಣ್ಯವನ್ನು ಗಡಿಯಾರದ ಡಯಲ್‌ಗೆ ಜೋಡಿಸಲಾಗಿದೆ. ಇದರಲ್ಲಿರುವ ಒಂದು ರೂಪಾಯಿ ನಾಣ್ಯವು ಬ್ರಿಟಿಷ್ ಆಳ್ವಿಕೆಯಲ್ಲಿ ಮುದ್ರಿಸಲಾದ ಕೊನೆಯ ನಾಣ್ಯವಾಗಿದೆ. ಇದರ ಒಳಗೆ ನಡೆಯುವ ಹುಲಿಯ ಚಿತ್ರವೂ ಇದೆ. ಈ ವಿನ್ಯಾಸವು ಸ್ವಾತಂತ್ರ್ಯದ ನಂತರ ಭಾರತದಲ್ಲಿನ ಬದಲಾವಣೆಯನ್ನು ಸೂಚಿಸುತ್ತದೆ ಎಂದು ಗಡಿಯಾರ ತಯಾರಕರು ಹೇಳುತ್ತಾರೆ.

ಈ ಗಡಿಯಾರವನ್ನು ಪ್ರತಿದಿನ ಧರಿಸಬಹುದಾದ ಕ್ಲಾಸಿಕ್ ಶೈಲಿಯಲ್ಲಿ ತಯಾರಿಸಲಾಗಿದೆ. ಈ ಗಡಿಯಾರ ನಾಲ್ಕು ರೂಪಾಂತರಗಳಲ್ಲಿ ಲಭ್ಯವಿದ್ದು, ರೋಮನ್ ಮತ್ತು ದೇವನಾಗರಿ ಅಂಕಿಗಳನ್ನು ಹೊಂದಿರುವ ಚಿನ್ನ ಮತ್ತು ಬೆಳ್ಳಿ ಬಣ್ಣದ ಕೇಸ್‌ಗಳನ್ನು ಒಳಗೊಂಡಿದೆ.

ಗೌರವ್ ಮೆಹ್ತಾ ಎಂಬುವರು ಜೈಪುರ ವಾಚ್ ಕಂಪನಿಯ ಸ್ಥಾಪಕರು. ಜೈಪುರ ವಾಚ್ ಕಂಪನಿಯು ವಿಶಿಷ್ಟ ಭಾರತೀಯ ಸ್ಮಾರಕಗಳು, ನಾಣ್ಯಗಳು ಮತ್ತು ಸಾಂಪ್ರದಾಯಿಕ ಲಕ್ಷಣಗಳ ಮಾದರಿಯಲ್ಲಿ ದುಬಾರಿ ಕೈಗಡಿಯಾರಗಳನ್ನು ತಯಾರಿಸುವ ಕಂಪನಿಯಾಗಿದೆ.

ಪ್ರಧಾನಿ ಮೋದಿ ಅವರು ತಮ್ಮ ಕಂಪನಿಯ ವಾಚ್​ ಧರಿಸಿರುವುದನ್ನು ನೋಡಿ ಮೆಹ್ತಾ ಅವರು ಸಂತಸ ವ್ಯಕ್ತಪಡಿಸಿದ್ದಾರೆ. ಭಾರತೀಯರಲ್ಲಿ ಸ್ವದೇಶಿ ಚೈತನ್ಯ ಹೆಚ್ಚುತ್ತಿರುವ ಈ ಸಮಯದಲ್ಲಿ, ಭಾರತದ ಪ್ರಧಾನಿ ನರೇಂದ್ರ ಮೋದಿ ಅವರನ್ನು ನೋಡಿ, ಜೈಪುರ ವಾಚ್ ಕಂಪನಿಯಲ್ಲಿ ನಾವು ತಯಾರಿಸಿದ ಹಾಗೂ ಭಾರತದಲ್ಲೇ ತಯಾರಾದ ಕೈಗಡಿಯಾರವನ್ನು ಆಯ್ಕೆ ಮಾಡಿದ್ದಾರೆ. ಇದು ಯಾರೂ ನಿರೀಕ್ಷಿಸದಷ್ಟು ದೊಡ್ಡ ಅಲೆಯನ್ನು ಎಬ್ಬಿಸಿದೆ ಎಂದು ಮೆಹ್ತಾ ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಂಡಿದ್ದಾರೆ.

ಅಂದಹಾಗೆ, ಈ ಹಿಂದೆ, ಬಾಲಿವುಡ್​ ಹಿರಿಯ ನಟ ಅಮಿತಾಬ್ ಬಚ್ಚನ್, ಎಡ್ ಶೀರನ್ ಮತ್ತು ರಫ್ತಾರ್ ಅವರಂತಹವರು ಮೆಹ್ತಾ ಅವರ ಜೈಪುರ ಮೂಲದ ಕಂಪನಿಯಿಂದ ತಯಾರಿಸಲ್ಪಟ್ಟ ಕೈಗಡಿಯಾರಗಳನ್ನು ಧರಿಸುವ ಮೂಲಕ ಗಮನ ಸೆಳೆದಿದ್ದರು, (ಏಜೆನ್ಸೀಸ್​).