ಆಗಸದಲ್ಲಿ ಪ್ಯಾರಾಚೂಟ್​ಗೆ ಡಿಕ್ಕಿ ಹೊಡೆದು ಸೀಳಿಕೊಂಡು ಹೋದ ವಿಮಾನ! ಮುಂದೇನಾಯ್ತು? ಇಲ್ಲಿದೆ ರೋಚಕ ವಿಡಿಯೋ... Plane Hits Paraglider Mid Air

Plane Hits Paraglider Mid Air : ಆಸ್ಟ್ರಿಯಾದ ಆಲ್ಪ್ಸ್ ಪರ್ವತ ಶ್ರೇಣಿಯಲ್ಲಿ 44 ವರ್ಷದ ಅನುಭವಸ್ಥ ಮಹಿಳೆ ಸಬ್ರಿನಾ ಅವರು ಪ್ಯಾರಾಗ್ಲೈಡಿಂಗ್ ಮಾಡುವಾಗ ಆಕಾಶದಲ್ಲೇ ಸಣ್ಣ ವಿಮಾನವೊಂದು ಪ್ಯಾರಾಚೂಟ್​ಗೆ ಡಿಕ್ಕಿ ಹೊಡೆದಂತಹ ಆಘಾತಕಾರಿ ಘಟನೆ ನಡೆದಿರುವುದಾಗಿ ನ್ಯೂಯಾರ್ಕ್ ಪೋಸ್ಟ್ ವರದಿ ಮಾಡಿದೆ.

ಉತ್ತರ ಆಸ್ಟ್ರಿಯಾದ ಪ್ರಸಿದ್ಧ ಪ್ರವಾಸಿ ತಾಣವಾದ ಸ್ಮಿಟ್ಟೆನ್‌ಹೋಹೆ ಪರ್ವತದ ಬಳಿ ಶನಿವಾರ (ಮೇ 23) ಮಧ್ಯಾಹ್ನ ಈ ಘಟನೆ ನಡೆದಿದೆ. ಸಬ್ರಿನಾ ಅವರು ಕ್ಯಾಮೆರಾ ಆನ್ ಮಾಡಿಕೊಂಡು ಹಾರಾಡುತ್ತಿದ್ದಾಗ ಪ್ರವಾಸಿ ವಿಮಾನವೊಂದು ಅವರ ತಲೆಯ ಕೆಲವೇ ಅಡಿಗಳ ಮೇಲಿಂದ ಪ್ಯಾರಾಗ್ಲೈಡರ್‌ನ ಮೇಲ್ಛಾವಣಿಯನ್ನು (ಕ್ಯಾನೋಪಿ) ಸೀಳಿಕೊಂಡು ಹೋಗಿದೆ. ವಿಮಾನ ಡಿಕ್ಕಿಯಾದ ರಭಸಕ್ಕೆ ಅವರು ನಿಯಂತ್ರಣ ಕಳೆದುಕೊಂಡು ವೇಗವಾಗಿ ಭೂಮಿಯತ್ತ ಗಿರಗಿರನೆ ತಿರುಗುತ್ತಾ ಬೀಳತೊಡಗಿದರು. ತಕ್ಷಣವೇ ಸಮಯಪ್ರಜ್ಞೆ ಮೆರೆದ ಸಬ್ರಿನಾ, ತುರ್ತು ಪ್ಯಾರಾಚೂಟ್ (ಎಮರ್ಜೆನ್ಸಿ ಶೂಟ್) ಅನ್ನು ತೆರೆಯುವಲ್ಲಿ ಯಶಸ್ವಿಯಾಗಿ ಪ್ರಾಣಾಪಾಯದಿಂದ ಸುರಕ್ಷಿತವಾಗಿ ಪಾರಾಗಿದ್ದಾರೆ.

ಅಪಘಾತದ ಭೀಕರತೆಯನ್ನು ಬಿಂಬಿಸುವ ವಿಡಿಯೋದಲ್ಲಿ ತುಣುಕಿನಲ್ಲಿ, ವಿಮಾನ ಡಿಕ್ಕಿಯಾದ ತಕ್ಷಣ ಪ್ಯಾರಾಗ್ಲೈಡರ್‌ನ ರೆಕ್ಕೆ ಎರಡು ಭಾಗವಾಗಿ ಸೀಳಿರುವುದು ಕಂಡುಬಂದಿದೆ. ರೆಕ್ಕೆ ಸಂಪೂರ್ಣವಾಗಿ ಹಾನಿಗೊಳಗಾಗುತ್ತಿದ್ದಂತೆ ನಿಯಂತ್ರಣ ಕಳೆದುಕೊಂಡ ಸಬ್ರಿನಾ ಆಕಾಶದಲ್ಲೇ ಗಿರಗಿರನೆ ತಿರುಗುತ್ತಾ ಜೋರಾಗಿ ಕಿರುಚಾಡಿದ್ದಾರೆ. ಆದರೂ ಧೃತಿಗೆಡದೆ, ಪ್ಯಾರಾಚೂಟ್​ನ ಮುಖ್ಯ ಮೇಲ್ಛಾವಣಿ (ಕ್ಯಾನೋಪಿ) ಹರಿದುಹೋಗಿದ್ದನ್ನು ಗಮನಿಸಿದ ಅವರು ತಕ್ಷಣವೇ ತಮ್ಮ ಬಳಿಯಿದ್ದ ತುರ್ತು ಮೀಸಲು ಪ್ಯಾರಾಚೂಟ್ (ರಿಸರ್ವ್ ಪ್ಯಾರಾಚೂಟ್) ಅನ್ನು ಓಪನ್​ ಮಾಡುವಲ್ಲಿ ಯಶಸ್ವಿಯಾದರು.

ಈ ಭೀಕರ ಅಪಘಾತ ನಡೆದಾಗ ವಿಮಾನದಲ್ಲಿದ್ದ 28 ವರ್ಷದ ಪೈಲಟ್ ತನಗೆ ಅಪಘಾತವನ್ನು ತಪ್ಪಿಸಲು ಸಾಧ್ಯವಾಗಲಿಲ್ಲ ಎಂದು ಅಧಿಕಾರಿಗಳಿಗೆ ತಿಳಿಸಿದ್ದಾನೆ. ಅದೃಷ್ಟವಶಾತ್, ಪ್ಯಾರಾಗ್ಲೈಡರ್ ಸಬ್ರಿನಾ ಮತ್ತು ವಿಮಾನದ ಪೈಲಟ್ ಇಬ್ಬರೂ ಯಾವುದೇ ಗಂಭೀರ ಗಾಯಗಳಿಲ್ಲದೆ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ ಎಂದು ಪೊಲೀಸರು ಖಚಿತಪಡಿಸಿದ್ದಾರೆ. ಝೆಲ್ ಆಮ್ ಸೀ ವಿಮಾನ ನಿಲ್ದಾಣದಲ್ಲಿ ಇಬ್ಬರಿಗೂ ತುರ್ತು ವೈದ್ಯಕೀಯ ತಪಾಸಣೆ ನಡೆಸಲಾಗಿದೆ.

ಬಳಿಕ ಈ ಬಗ್ಗೆ ಇನ್‌ಸ್ಟಾಗ್ರಾಮ್‌ನಲ್ಲಿ ಜರ್ಮನ್ ಭಾಷೆಯಲ್ಲಿ ಬರೆದುಕೊಂಡಿರುವ ಸಬ್ರಿನಾ, "ಕೆಲವು ತರಚು ಗಾಯಗಳನ್ನು ಹೊರತುಪಡಿಸಿ ನಾನು ಸುರಕ್ಷಿತವಾಗಿದ್ದೇನೆ. ನಾನಿನ್ನೂ ಇಲ್ಲಿ ಕುಳಿತು ಈ ಪೋಸ್ಟ್ ಬರೆಯುತ್ತಿದ್ದೇನೆ ಎಂಬುದನ್ನು ನನಗೇ ನಂಬಲು ಸಾಧ್ಯವಾಗುತ್ತಿಲ್ಲ ಎಂದು ಆಶ್ಚರ್ಯ ಮತ್ತು ನಿರಾಳತೆ ವ್ಯಕ್ತಪಡಿಸಿದ್ದಾರೆ. ಸದ್ಯ ಈ ಘಟನೆಯ ರೋಚಕ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿದ್ದು, ವಾಯುಪ್ರದೇಶದಲ್ಲಿ ಹಾರಾಡುವಾಗ ಎದುರಾಗುವ ಅಪಾಯಗಳು ಮತ್ತು ತುರ್ತು ಸುರಕ್ಷತಾ ಸಾಧನಗಳ ಪ್ರಾಮುಖ್ಯತೆಯನ್ನು ಜಗತ್ತಿಗೆ ಸಾರುತ್ತಿದೆ, (ಏಜೆನ್ಸೀಸ್​).