ನೇಪಾಳದಲ್ಲಿ ಪ್ರಕೃತಿ ವಿಕೋಪ: ಸಾವಿನ ಸಂಖ್ಯೆ 160ಕ್ಕೆ ಏರಿಕೆ, ನಾಪತ್ತೆಯಾದ 750ಕ್ಕೂ ಹೆಚ್ಚು ಮಂದಿಗಾಗಿ ತೀವ್ರ ಹುಡುಕಾಟ | Nepal Floods

ದುರಂತ ಸಂಭವಿಸಿದ ಕೆಲವು ಗಂಟೆಗಳ ನಂತರ 341 ವಿದೇಶಿಗರು ಸೇರಿದಂತೆ ಸುಮಾರು 403 ಪ್ರವಾಸಿಗರು ನಾಪತ್ತೆಯಾಗಿದ್ದಾರೆ ಎಂದು ಪ್ರವಾಸೋದ್ಯಮ ಸಚಿವಾಲಯ ತಿಳಿಸಿದೆ. ನಾಪತ್ತೆಯಾದ ವಿದೇಶಿಯರಲ್ಲಿ 142 ಭಾರತೀಯರು, ಆಸ್ಟ್ರೇಲಿಯಾ, ಬ್ರಿಟನ್, ಮಲೇಷ್ಯಾ, ನೆದರ್ಲ್ಯಾಂಡ್ಸ್, ಪೋರ್ಚುಗಲ್, ದಕ್ಷಿಣ ಆಫ್ರಿಕಾ, ದಕ್ಷಿಣ ಕೊರಿಯಾ ಮತ್ತು ಅಮೆರಿಕದ ಇತರ ನಾಗರಿಕರು ಸೇರಿದ್ದಾರೆ ಎಂದು ಪ್ರವಾಸೋದ್ಯಮ ಮಂಡಳಿ ಖಚಿತಪಡಿಸಿದೆ.

ನೇಪಾಳದ ಭೋಟೆ ಕೋಶಿ ನದಿಯಲ್ಲಿ ಭೋರ್ಗರೆದ ಪ್ರವಾಹದಿಂದಾಗಿ ರಸುವಾ, ಧಾಡಿಂಗ್ ಮತ್ತು ನುವಾಕೋಟ್ ಜಿಲ್ಲೆಗಳು ತೀವ್ರವಾಗಿ ಹಾನಿಗೊಳಗಾಗಿವೆ. ಕೆಸರಿನಡಿಯಲ್ಲಿ ಸಿಲುಕಿರುವ ಜನರನ್ನು ಹುಡುಕಲು ರಕ್ಷಣಾ ಸಿಬ್ಬಂದಿ ಹರಸಾಹಸ ಪಡುತ್ತಿದ್ದು, ಪ್ರಧಾನಿ ಬಲೇಂದ್ರ ಶಾ ಅವರು ಪರಿಹಾರ ಕಾರ್ಯಕ್ಕೆ ಸರ್ಕಾರದ ಸಂಪೂರ್ಣ ಬೆಂಬಲದ ಭರವಸೆ ನೀಡಿದ್ದಾರೆ. ಇನ್ನು ದುರಂತ ಸಂಭವಿಸಿದ ತಕ್ಷಣವೇ ಭಾರತವು ಮಾನವೀಯ ನೆರವಿಗೆ ಧುಮುಕಿದ್ದು, ಭಾರತೀಯ ವಾಯುಪಡೆಯು 10 ಟನ್ ಪರಿಹಾರ ಸಾಮಗ್ರಿಗಳು ಮತ್ತು ವೈದ್ಯಕೀಯ ಸರಬರಾಜುಗಳೊಂದಿಗೆ ವಿಶೇಷ ಸಾರಿಗೆ ವಿಮಾನವನ್ನು ನಿಯೋಜಿಸಿದೆ. ದುರಂತದಿಂದಾಗಿ ಸಂಪೂರ್ಣ ಜನವಸತಿ ಪ್ರದೇಶಗಳೇ ನಾಶವಾಗಿವೆ.

ಈ ನಡುವೆ ನೇಪಾಳದ ಪ್ರಧಾನಿ ಬಲೇಂದ್ರ ಶಾ ಅವರು ಸ್ಪಂದನೆಯ ಭರವಸೆ ನೀಡಿದ್ದು, ನೀವು ಅನುಭವಿಸಿದ ನೋವು ಮತ್ತು ನಷ್ಟ ಸಣ್ಣದಲ್ಲ. ಆದರೆ ಈ ಕಷ್ಟದ ಸಮಯದಲ್ಲಿ ನೀವು ಒಂಟಿಯಾಗಿಲ್ಲ ಎಂದು ನಾನು ನಿಮಗೆ ಭರವಸೆ ನೀಡಲು ಬಯಸುತ್ತೇನೆ. ಸರ್ಕಾರ ಎಲ್ಲಾ ಸಂಪನ್ಮೂಲಗಳೊಂದಿಗೆ ನಿಮ್ಮೊಂದಿಗಿದೆ ಎಂದು ಸಾಮಾಜಿಕ ಜಾಲತಾಣಗಳ ಮೂಲಕ ತಿಳಿಸಿದ್ದಾರೆ. 

ಇದೇ ಸಮಯದಲ್ಲಿ, ಪ್ರಧಾನಿ ನರೇಂದ್ರ ಮೋದಿ ಅವರು ವ್ಯಕ್ತಪಡಿಸಿದ ಬೆಂಬಲದ ಮಾತುಗಳಿಗೆ ಮತ್ತು ದೇಶಕ್ಕೆ ನೀಡಿದ ಮಾನವೀಯ ಸಹಾಯಕ್ಕಾಗಿ ನೇಪಾಳ ಪ್ರಧಾನಿ ಧನ್ಯವಾದಗಳನ್ನು ತಿಳಿಸಿದರು. ಪ್ರಧಾನಿ ಮೋದಿ ಅವರ ಕರುಣೆಯ ಕರೆ ಹಾಗೂ ತೀವ್ರ ಸಂತಾಪಗಳಿಗೆ ಕೃತಜ್ಞತೆ ಸಲ್ಲಿಸಿದ ಬಲೇಂದ್ರ ಶಾ, ಈ ಕಷ್ಟದ ಗಳಿಗೆಯಲ್ಲಿ ನೇಪಾಳಕ್ಕೆ ನೀಡಿದ ಬೆಂಬಲದ ಮಾತುಗಳನ್ನು ಮತ್ತು ಉದಾರ ಸಹಾಯದ ಕೊಡುಗೆಯನ್ನು ನಾವು ಮನಸ್ಸಾರ ಮೆಚ್ಚುತ್ತೇವೆ. ಈ ಬೆಂಬಲದ ನಡೆಯು ನಮ್ಮೆರಡು ದೇಶಗಳ ನಡುವಿನ ಶಾಶ್ವತ ಸ್ನೇಹದ ಬಾಂಧವ್ಯದ ಸಂಕೇತವಾಗಿದೆ, ಇದನ್ನು ನಾವು ಗೌರವಿಸುತ್ತೇವೆ ಎಂದು ಹೇಳಿದ್ದಾರೆ(ಏಜೆನ್ಸೀಸ್).