ದೆಹಲಿ ಸ್ಫೋಟಕ್ಕೆ 'ಸೈತಾನನ ತಾಯಿ' ಬಳಕೆ... ಏನಿದು TATP? ಕಾರು ಸ್ಫೋಟದ ಹಿಂದಿನ ಭಯಾನಕ ಸಂಗತಿ ಇದು... Mother Of Satan

ನವದೆಹಲಿ: ಭಾರತದ ಹೆಬ್ಬಾಗಿಲು, ರಾಜಕೀಯದ ಕೇಂದ್ರ ಬಿಂದು ಹಾಗೂ ಇಡೀ ರಾಷ್ಟ್ರದ ಅಭಿವೃದ್ಧಿಯ ಮೊದಲ ಮೆಟ್ಟಿಲಾಗಿರುವ ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ನವೆಂಬರ್​ 10ರ ಸೋಮವಾರ ಸಂಜೆ ನಡೆದ ಕಾರು ಸ್ಫೋಟ ಇಡೀ ದೇಶದ ಜನತೆಯನ್ನು ಆತಂಕಕ್ಕೆ ದೂಡಿದೆ. ಯಾರದ್ದೋ ಓಲೈಕೆಗಾಗಿಯೋ? ಅಥವಾ ಯಾರದ್ದೋ ಕುಮ್ಮಕ್ಕಿನಿಂದಲೋ? ಕಾರು ಸ್ಫೋಟಿಸಿ, 13 ಮಂದಿ ಅಮಾಯಕರನ್ನು ಬಲಿ ಪಡೆಯಲಾಗಿದೆ. ಈ ಒಂದು ಘಟನೆಯಿಂದ ಅನೇಕ ಸ್ಫೋಟಕ ಮಾಹಿತಿಗಳು ತನಿಖೆಯಿಂದ ಒಂದೊಂದಾಗಿ ಹೊರಬರುತ್ತಿವೆ. ಉಗ್ರರ ಸಂಚಿನ ಬಗ್ಗೆ ಸಿಗುತ್ತಿರುವ ಮಾಹಿತಿ ಕೇಳಿದರೆ ಇಡೀ ದೇಶದಲ್ಲಿ ಅರಾಜಕತೆ ಸೃಷ್ಟಿಸಲು ದೊಡ್ಡ ಮಸಲತ್ತು ನಡೆಯುತ್ತಿತ್ತು ಎಂಬುದು ಬಯಲಾಗುತ್ತಿದೆ. ಇದೀಗ ಮತ್ತೊಂದು ಭಯಾನಕ ಸಂಗತಿ ಬೆಳಕಿಗೆ ಬಂದಿದೆ. ಅದೇನೆಂದರೆ, ದೆಹಲಿ ಸ್ಫೋಟಕ್ಕೆ ಬಳಸಿದ್ದು, 'ಮದರ್​ ಆಫ್​ ಸತಾನ್​' ಎಂಬ ಭೀಕರ ಸ್ಫೋಟಕಗಳನ್ನ. ಮದರ್​ ಆಫ್​ ಸತಾನ್ ( Mother Of Satan )​ ಎಂದರೆ, ಸೈತಾನನ ತಾಯಿ ಎಂದರ್ಥ.

ಹೌದು, 'ಸೈತಾನನ ತಾಯಿ' ಎಂದೇ ಕುಖ್ಯಾತಿ ಪಡೆದ ಅತ್ಯಂತ ವೊಲಟೈಲ್​ (ಬಾಷ್ಪಶೀಲ) ಸ್ಫೋಟಕಗಳನ್ನು ಬಳಸಿ ಕಾರನ್ನು ಸ್ಫೋಟಿಸಲಾಗಿದೆ ಎಂದು ತನಿಖಾಧಿಕಾರಿಗಳು ಶಂಕಿಸಿದ್ದಾರೆ. ಯಾವುದೇ ಡಿಟೊನೇಟರ್​ ಸಹಾಯವಿಲ್ಲದೆ, ಕೇವಲ ಶಾಖದಿಂದಲೇ ಸ್ಫೋಟಿಸುವ ಟ್ರೈಅಸೆಟೋನ್ ಟ್ರೈಪೆರಾಕ್ಸೈಡ್ ( TATP ) ಎಂಬ ಸ್ಫೋಟಕವನ್ನು ಬಳಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಅಂದಹಾಗೆ, ಈ ಮಾರಕ ಸ್ಫೋಟದ ಹಿಂದೆ ನಿಜವಾಗಿಯೂ TATP ಕೈವಾಡವಿದೆಯೇ ಎಂಬುದನ್ನು ಖಚಿತಪಡಿಸಲು ಫೋರೆನ್ಸಿಕ್ ತಜ್ಞರು ಪ್ರಯತ್ನಿಸುತ್ತಿದ್ದಾರೆ. ಆರಂಭದಲ್ಲಿ ಅಮೋನಿಯಂ ನೈಟ್ರೇಟ್ ಬಳಕೆಯಾಗಿದೆ ಎಂದು ಪೊಲೀಸರು ಶಂಕಿಸಿದ್ದರು. ಆದರೆ, ಹೆಚ್ಚಿನ ತನಿಖೆಯ ಬಳಿಕ TATP ಬಳಕೆ ಮಾಡಿರಬಹುದು ಎಂಬ ಅನುಮಾನ ದಟ್ಟವಾಗಿದೆ.

TATP ಅನ್ನೋದು ಅತ್ಯಂತ ಸೂಕ್ಷ್ಮ ಸ್ಫೋಟಕ. ಯಾವುದೇ ಘರ್ಷಣೆ, ಒತ್ತಡ ಮತ್ತು ತಾಪಮಾನ ಏರಿಕೆ ಸೇರಿದಂತೆ ವಾತಾವರಣದಲ್ಲಿ ಯಾವುದೇ ಒಂದು ಸಣ್ಣ ಬದಲಾವಣೆ ಆದರೆ, ಸಾಕು ಸ್ಫೋಟಕದ ಮೇಲೆ ಓಡುತ್ತಿರುವ ಟ್ರೈಮರ್ ಸ್ಥಗಿತವಾಗಿ ತಕ್ಷಣ ಸ್ಫೋಟ ಸಂಭವಿಸುತ್ತದೆ. ಪ್ರಪಂಚದಾದ್ಯಂತ ಅಕ್ರಮ ಬಾಂಬ್ ತಯಾರಕರು ಈ ಸ್ಫೋಟಕವನ್ನು ವ್ಯಾಪಕವಾಗಿ ಬಳಸುವುದರಿಂದ ಇದನ್ನು 'ಸೈತಾನನ ತಾಯಿ' ಎಂದು ಕರೆಯಲಾಯಿತು. 2017ರ ಬಾರ್ಸಿಲೋನಾ ದಾಳಿ, 2015 ಪ್ಯಾರಿಸ್ ದಾಳಿ, 2017 ಮ್ಯಾಂಚೆಸ್ಟರ್ ಬಾಂಬ್ ದಾಳಿ ಮತ್ತು 2016 ರ ಬ್ರಸೆಲ್ಸ್ ಬಾಂಬ್ ದಾಳಿಯ ಬಳಿಕ ಟಿಎಟಿಪಿ ಸಂಯುಕ್ತದ ಕುರುಹುಗಳು ಕಂಡುಬಂದಿವೆ. ಈ ರೀತಿಯ ಸ್ಫೋಟಕಗಳನ್ನು ತಯಾರು ಮಾಡುವವರು ಭಯೋತ್ಪಾದಕ ಸಂಘಟನೆಗಳಿಂದ ತರಬೇತಿಯನ್ನು ಪಡೆದಿರುತ್ತಾರೆಂದು ನಂಬಲಾಗಿದೆ.

ದೆಹಲಿಯ ಕೆಂಪುಕೋಟೆಯ ಬಳಿ ಕಾರು ಸ್ಫೋಟವಾದ ಸ್ಥಳದಲ್ಲಿ ಹಾನಿಯಾಗಿರುವ ಮಾದರಿಗಳನ್ನು ನೋಡಿದರೆ TATP ಬಳಕೆಯಾಗಿರುವ ಅನುಮಾನ ದಟ್ಟವಾಗುತ್ತಿದೆ. ಈ TATP ತುಂಬಾ ಭೀಕರವಾಗಿದ್ದು, ತನ್ನ ತೀವ್ರತೆ ಮತ್ತು ಪ್ರಬಲ ತರಂಗಗಳಿಗೆ ಹೆಸರುವಾಸಿಯಾಗಿದೆ. ಅಂದರೆ, ಒಂದೇ ಕಡೆ ಸ್ಫೋಟಿಸಿದರು ಕೂಡ ಅದರ ಪ್ರಬಲ ತರಂಗಗಳು ಭಾರಿ ಪ್ರಮಾಣದ ಹಾನಿಯನ್ನು ಹಲವು ಮೀಟರ್​ಗಳವರೆಗೆ ಸೃಷ್ಟಿಸುತ್ತದೆ. TATP ಇರುವಿಕೆಯನ್ನು ಖಚಿತಪಡಿಸಿಕೊಳ್ಳುವುದಕ್ಕಾಗಿ ಘಟನಾ ಸ್ಥಳದಲ್ಲಿ ತನಿಖಾ ತಂಡಗಳಿಗೆ ದೊರೆತಿರುವ ಅವಶೇಷಗಳನ್ನು ವಿಧಿವಿಜ್ಞಾನ ತಂಡಗಳು ವಿಶ್ಲೇಷಿಸುತ್ತಿವೆ. ಕಾರಿನೊಳಗಿನ ಶಾಖದಿಂದ ಅಥವಾ ವಾಹನದ ಒಳಗಡೆಯೇ ಸ್ಫೋಟಕಗಳು ಅಸ್ಥಿರಗೊಂಡಿರಬಹುದು ಎಂದು ತನಿಖೆಗಳು ಸೂಚಿಸುತ್ತವೆ. ಇದಿಷ್ಟೇ ಅಲ್ಲದೆ, ದೊಡ್ಡ ಭಯೋತ್ಪಾದಕ ಕಾರ್ಯಾಚರಣೆಯಲ್ಲಿ ಬಳಸಲು ಸಾಗಿಸುವಾಗ ಆಕಸ್ಮಿಕವಾಗಿ ಸ್ಫೋಟಗೊಂಡಿದೆಯೇ ಎಂಬ ಆಯಾಮದಲ್ಲೂ ಪರಿಶೀಲಿಸಲಾಗುತ್ತಿದೆ.

ಇನ್ನು TATP ತಯಾರಿಸಲು ಬೇಕಾದ ರಾಸಾಯನಿಕಗಳನ್ನು ಶಂಕಿತ ಸೂಸೈಡ್​ ಬಾಂಬರ್​ ಉಮರ್ ನಬಿ ಪಡೆದುಕೊಂಡಿದ್ದು ಹೇಗೆ ಎಂಬುದನ್ನು ಕಂಡುಹಿಡಿಯಲು ತನಿಖಾಧಿಕಾರಿಗಳು ಪ್ರಯತ್ನಿಸುತ್ತಿದ್ದಾರೆ. ಏಕೆಂದರೆ, TATP ತಯಾರಿಸಲು ಸಾಕಷ್ಟು ಪದಾರ್ಥಗಳು ಬೇಕಾಗುತ್ತವೆ. ಹೀಗಾಗಿ ಉಮರ್​ಗೆ ದೊಡ್ಡ ಜಾಲದ ಬೆಂಬಲವಿದೆಯೇ ಅಥವಾ ಸ್ಫೋಟಕವನ್ನು ತಯಾರಿಸುವಲ್ಲಿ ಇತರರು ಕೂಡ ಭಾಗಿಯಾಗಿದ್ದಾರೆಯೇ ಎಂಬುದನ್ನು ತಿಳಿಯಲು ತನಿಖೆಯನ್ನು ತೀವ್ರಗೊಳಿಸಲಾಗಿದೆ. ಇದರ ಜೊತೆಗೆ ಸ್ಫೋಟದ ಮೊದಲು ಉಮರ್‌ನ ಚಲಾನವಲನಗಳು ಹಾಗೂ ಚಟುವಟಿಕೆಗಳನ್ನು ತಿಳಿದುಕೊಳ್ಳಲು ಪೊಲೀಸರು ಮತ್ತು ಕೇಂದ್ರ ತನಿಖಾ ಸಂಸ್ಥೆಗಳು ಡಿಜಿಟಲ್ ಮಾಹಿತಿ ಸಂಗ್ರಹ, ಪ್ರಯಾಣದ ದಾಖಲೆಗಳು ಮತ್ತು ಯಾರೊಂದಿಗೆ ಸಂವಹನ ನಡೆಸಿದ್ದಾನೆ ಎಂಬ ಇತಿಹಾಸವನ್ನು ಪರಿಶೀಲಿಸುತ್ತಿವೆ.

ಇದೆಲ್ಲದರ ನಡುವೆ ನವೆಂಬರ್ 10 ರಂದು ನಡೆದ ಘಟನೆಗಳ ಅನುಕ್ರಮವನ್ನು ಅಧಿಕಾರಿಗಳು ಮರು ನಿರ್ಮಿಸಿದ್ದಾರೆ. ಸ್ಫೋಟಕ್ಕೆ ಮೊದಲು ಉಮರ್ ಹಳೆಯ ದೆಹಲಿಯ ಜನನಿಬಿಡ ಲೇನ್‌ಗಳಲ್ಲಿ ದೀರ್ಘಕಾಲ ವಾಹನ ಚಲಾಯಿಸಿದ್ದನು. ಒಂದು ವೇಳೆ ಕಾರಿನಲ್ಲಿ TATP ಇದಿದ್ದು ದೃಢವಾದರೆ, ಸ್ಫೋಟಗೊಳ್ಳುವ ಮೊದಲು ಕಾರಿನಲ್ಲಿ ಸ್ಫೋಟಕವು ಹಲವಾರು ಗಂಟೆಗಳ ಕಾಲ ಹೇಗೆ ಸ್ಥಿರವಾಗಿತ್ತು ಎಂಬುದನ್ನು ಸಹ ತನಿಖೆ ಮಾಡಬೇಕಾಗುತ್ತದೆ. ಸ್ಫೋಟಕ್ಕೆ ಸಂಬಂಧಿಸಿದಂತೆ ಫರಿದಾಬಾದ್‌ನ ಅಲ್ ಫಲಾಹ್ ವಿಶ್ವವಿದ್ಯಾಲಯದ ವೈದ್ಯರಾದ ಶಾಹೀನ್ ಸಯೀದ್, ಮುಜಮ್ಮಿಲ್ ಶಕೀಲ್ ಮತ್ತು ಆದಿಲ್ ರಾಥರ್ ಎಂಬ ಉಮರ್‌ನ ಮೂವರು ಸಹೋದ್ಯೋಗಿಗಳನ್ನು ಬಂಧಿಸಲಾಗಿದ್ದು, ರಾಷ್ಟ್ರೀಯ ರಾಜಧಾನಿ ಪ್ರದೇಶದಾದ್ಯಂತ (ಎನ್‌ಸಿಆರ್) ಸರಣಿ ಸ್ಫೋಟ ನಡೆಸಲು ಯೋಜಿಸುತ್ತಿದ್ದರೇ? ಎಂಬುದನ್ನು ತಿಳಿಯಲು ತೀವ್ರ ತನಿಖೆ ನಡೆಯುತ್ತಿದೆ.

ಶಂಕಿತರು ಬಾಡಿಗೆಗೆ ಪಡೆದ ಮನೆಗಳಿಂದ ಪೊಲೀಸರು ಸುಮಾರು 3,000 ಕೆಜಿ ಸ್ಫೋಟಕಗಳು ಮತ್ತು ಬಾಂಬ್ ತಯಾರಿಸುವ ವಸ್ತುಗಳನ್ನು ವಶಪಡಿಸಿಕೊಂಡಿದ್ದಾರೆ. ಪಾಕಿಸ್ತಾನದ ಜೈಶ್-ಎ-ಮೊಹಮ್ಮದ್​ ಉಗ್ರ ಸಂಘಟನೆ ಭಾರತದಲ್ಲಿ ಸಿದ್ಧಪಡಿಸುತ್ತಿದ್ದ ವೈಟ್​ ಕಾಲರ್​ ಮಾಡ್ಯೂಲ್​ನ ದುಷ್ಕೃತ್ಯದ ವಿನ್ಯಾಸವನ್ನು ದೆಹಲಿ ಸ್ಫೋಟ ಸೂಚಿಸುತ್ತದೆ. ಸಯೀದ್‌ನ ಕಾರಿನಲ್ಲಿ ಒಂದು ರೈಫಲ್ ಮತ್ತು ಮದ್ದುಗುಂಡುಗಳು ಸಹ ಪತ್ತೆಯಾಗಿವೆ. ಆಕೆಯ ಇತ್ತೀಚಿನ ಪಾಸ್‌ಪೋರ್ಟ್ ಪರಿಶೀಲನೆಯು ದೇಶದಿಂದ ಪಲಾಯನ ಮಾಡುವ ಸಂಭಾವ್ಯ ಯೋಜನೆಯು ಕೂಡ ಬಹಿರಂಗವಾಗಿದೆ.

ಸೋಮವಾರ (ನ.10) ಸಂಜೆ, ಕೆಂಪು ಕೋಟೆ ಬಳಿಯ ಟ್ರಾಫಿಕ್​ ಸಿಗ್ನಲ್​ನಲ್ಲಿ ಬಿಳಿ ಬಣ್ಣದ ಹೂಂಡೈ ಐ20 ಕಾರು ಸ್ಫೋಟಗೊಂಡು 13 ಮಂದಿ ದುರಂತ ಸಾವಿಗೀಡಾದರು. ಅಲ್ಲದೆ, ಈ ಘಟನೆಯಲ್ಲಿ ಸುಮಾರು 20 ಮಂದಿ ಗಾಯಗೊಂಡರು. ಸ್ಫೋಟದ ಪರಿಣಾಮ ಎಷ್ಟು ತೀವ್ರವಾಗಿತ್ತೆಂದರೆ ಹತ್ತಿರದ ಹಲವಾರು ವಾಹನಗಳು ಕೂಡ ಸುಟ್ಟು ಕರಕಲಾದವು. ಅಲ್ಲದೆ, ವಾಹನದ ಬಿಡಿಭಾಗಳು ಚೆಲ್ಲಾಪಿಲ್ಲಿಯಾಗಿ ಬಿದ್ದಿದ್ದವು. ಅಲ್ಲಲ್ಲಿ ಬಿದ್ದಿದ್ದ ಹೆಣಗಳು ಮತ್ತು ಗಾಯಗೊಂಡು ನರಳುತ್ತಿದ್ದ ಮಂದಿಯನ್ನು ನೋಡಿ ಜನರ ಕೂಗಾಟ ಘಟನಾ ಸ್ಥಳವನ್ನು ತಕ್ಷಣವೇ ಅವ್ಯವಸ್ಥೆಯ ಗೂಡನ್ನಾಗಿ ಮಾಡಿತು. ಇಡೀ ಪ್ರದೇಶ ರಕ್ತಸಿಕ್ತವಾಗಿತ್ತು. ಅಂದಹಾಗೆ, ಈ ಸ್ಫೋಟ ಸಂಭವಿಸುವುದಕ್ಕೂ ಮುನ್ನ ಪ್ರಮುಖ ಬೆಳವಣಿಗೆಯೊಂದು ನಡೆದಿತ್ತು. ಇದೇ ಬೆಳವಣಿಗೆ ಭೀಕರ ಸ್ಫೋಟಕ್ಕೆ ಕಾರಣ ಎಂದು ನಂಬಲಾಗಿದೆ. ಏನಾಗಿತ್ತು ಅಂದರೆ, ಸೋಮವಾರ ಸಂಜೆ ಕಾರು ಸ್ಫೋಟ ಆಗುವುದಕ್ಕೂ ಮುನ್ನ ಅದೇ ದಿನ ಬೆಳಗ್ಗೆ ಮೂವರು ವೈದ್ಯರು ಸೇರಿದಂತೆ ಎಂಟು ಜನರನ್ನು ಬಂಧಿಸಿದ ಜಮ್ಮು ಮತ್ತು ಕಾಶ್ಮೀರ ಹಾಗೂ ಹರಿಯಾಣದ ಪೊಲೀಸರು ಬರೋಬ್ಬರಿ 2,900 ಕೆಜಿ ಸ್ಫೋಟಕಗಳನ್ನು ವಶಪಡಿಸಿಕೊಂಡರು. ಇದಾದ ಕೆಲವೇ ಗಂಟೆಗಳಲ್ಲಿ ಅಂದರೆ ಸೋಮವಾರ ಸಂಜೆ ಕಾರು ಸ್ಫೋಟ ಸಂಭವಿಸಿದೆ. ತನ್ನ ಸಹಚರರ ಬಂಧನ ಭೀತಿಯಿಂದ ಆರೋಪಿ ಉಮರ್​ ನವಿ ಕಾರು ಸ್ಫೋಟಿಸಿದ್ದಾನೆ ಎಂಬ ಮಾಹಿತಿಯೂ ಇದೆ, (ಏಜೆನ್ಸೀಸ್​).