300 ರನ್... ಇದೇ ಕಾರಣಕ್ಕೆ ಸೋತೆವು; ಭಾರತ ವಿರುದ್ಧ ಸೋಲುಂಡ ಬೆನ್ನಲ್ಲೇ ಕಿವೀಸ್​ ಕ್ಯಾಪ್ಟನ್​ ಅಚ್ಚರಿ ಹೇಳಿಕೆ

IND vs NZ T20: ನಿನ್ನೆ (ಜ.24) ರಾಯ್​ಪುರದಲ್ಲಿ ನಡೆದ ಭಾರತ ಮತ್ತು ನ್ಯೂಜಿಲೆಂಡ್ ನಡುವಿನ ಐದು ಪಂದ್ಯಗಳ ಟಿ20 ಸರಣಿಯ ಎರಡನೇ ಪಂದ್ಯದಲ್ಲಿ ಸೂರ್ಯಕುಮಾರ್ ಯಾದವ್ ಪಡೆ 7 ವಿಕೆಟ್​ಗಳ ಭರ್ಜರಿ ಗೆಲುವನ್ನು ದಾಖಲಿಸಿತು. ಈ ಪಂದ್ಯದಲ್ಲಿ ಕಿವೀಸ್​ ಪರ ನಾಯಕ ಸ್ಯಾಂಟ್ನರ್ ಅವರ ಸ್ಫೋಟಿಂಗ್ ಬ್ಯಾಟಿಂಗ್ ಶ್ರಮ ಕಡೆಗೂ ಫಲಿಸಲಿಲ್ಲ. ​

ಪಂದ್ಯ ಸೋತ ಬೆನ್ನಲ್ಲೇ ಬೇಸರದಿಂದ ಮಾತನಾಡಿದ ನ್ಯೂಜಿಲೆಂಡ್ ನಾಯಕ, "ನಮ್ಮ ಬೌಲರ್‌ಗಳು ಭಾರತೀಯ ಬ್ಯಾಟರ್‌ಗಳನ್ನು ಕಟ್ಟಿಹಾಕುವಲ್ಲಿ ಎಡವಿದರು. ಇನ್ನೂ ಹೆಚ್ಚು ಪರಿಣಾಮಕಾರಿಯಾಗಿ ಬೌಲಿಂಗ್ ಮಾಡಬೇಕಾಗಿತ್ತು. ಬ್ಯಾಟಿಂಗ್‌ನಲ್ಲಿಯೂ ಆಕ್ರಮಣಕಾರಿಯಾಗಿ ಆಡಬೇಕಿತ್ತು. ಟೀಮ್ ಇಂಡಿಯಾಗೆ 200 ರನ್​ಗಳ ಬದಲಿಗೆ 300 ರನ್​ಗಳ ಬೃಹತ್​ ಗುರಿಯನ್ನು ಕೊಟ್ಟರೂ ಸಾಲದು" ಎಂದು ನಗುತ್ತಲೇ ಹೇಳಿದರು.

"ಭಾರತ ತಂಡದಲ್ಲಿ ಉತ್ತಮ ಬ್ಯಾಟಿಂಗ್ ಆಳವಿದೆ. ಪಿಚ್ ಬ್ಯಾಟಿಂಗ್‌ಗೆ ಅನುಕೂಲಕರವಾಗಿತ್ತು. ಆದ್ದರಿಂದ ಟೀಮ್ ಇಂಡಿಯಾ ಬ್ಯಾಟ್ಸ್‌ಮನ್‌ಗಳು ಮೊದಲ ಎಸೆತದಿಂದಲೇ ಉತ್ತಮ ಇನ್ನಿಂಗ್ಸ್​ ಆಡಿ, ಹೆಚ್ಚುವರಿ ರನ್​ ಗಳಿಸಿದರು. ನಮ್ಮ ತಂಡಕ್ಕೆ ಇನ್ನೂ ಕೆಲವು ಪ್ರಮುಖ ಆಟಗಾರರ ಅವಶ್ಯಕತೆಯಿದೆ. ಟಿ20 ವಿಶ್ವಕಪ್ ಆರಂಭಕ್ಕೂ ಮುನ್ನ ನಮ್ಮ ತಂಡದ ಆಟಗಾರರೆಲ್ಲರೂ ಫಾರ್ಮ್‌ನಲ್ಲಿರಬೇಕೆಂದು ನಾವು ಬಯಸುತ್ತೇವೆ" ಎಂದರು.

ಟಾಸ್ ಗೆದ್ದು ಮೊದಲು ಬೌಲಿಂಗ್ ಆಯ್ಕೆ ಮಾಡಿಕೊಂಡ ಟೀಮ್ ಇಂಡಿಯಾ, ಕಿವೀಸ್​ ಪಡೆಗೆ ಬ್ಯಾಟ್ ಮಾಡುವಂತೆ ಆಹ್ವಾನಿಸಿತು. ಅಂತೆಯೇ, ಬ್ಯಾಟ್​ ಮಾಡಿದ ನ್ಯೂಜಿಲೆಂಡ್​ 20 ಓವರ್​ ಅಂತ್ಯಕ್ಕೆ ಆರು ವಿಕೆಟ್‌ಗಳ ನಷ್ಟಕ್ಕೆ 208 ರನ್​ಗಳನ್ನು ಗಳಿಸಿತು. ಈ ಬೃಹತ್ ಗುರಿಯನ್ನು ಬೆನ್ನತ್ತಿದ ಟೀಮ್ ಇಂಡಿಯಾ, ಕೇವಲ 15.2 ಓವರ್‌ಗಳಲ್ಲಿ ಮೂರು ವಿಕೆಟ್‌ ನಷ್ಟಕ್ಕೆ 209 ರನ್​ಗಳನ್ನು ಸುಲಭವಾಗಿ ತಲುಪಿತು. ತಂಡದ ಪರ ಸೂರ್ಯಕುಮಾರ್ ಯಾದವ್​ (37 ಎಸೆತ​, ಅಜೇಯ 82 ರನ್​), ಇಶಾನ್ ಕಿಶನ್​ (32 ಎಸೆತ, 76 ರನ್​) ಮತ್ತು ಶಿವಂ ದುಬೆ (18 ಎಸೆತ, ಅಜೇಯ 36 ರನ್​) ಉತ್ತಮ ಇನ್ನಿಂಗ್ಸ್​ ನೀಡಿದರು,(ಏಜೆನ್ಸೀಸ್).