ನಾನಿಲ್ಲದಿದ್ರೆ ಇಸ್ರೇಲ್ ಇರುತ್ತಿರಲಿಲ್ಲ’; ನೆತನ್ಯಾಹುಗೆ ಅಮೆರಿಕ ಅಧ್ಯಕ್ಷ ಟ್ರಂಪ್ ಖಡಕ್ ವಾರ್ನಿಂಗ್! Donald Trump

ಫ್ರಾನ್ಸ್‌ನ ಎವಿಯನ್ ನಗರದಲ್ಲಿ ನಡೆಯುತ್ತಿರುವ ಜಿ7 ಶೃಂಗಸಭೆಯಲ್ಲಿ ಮಂಗಳವಾರ ಮಾತನಾಡಿದ ಟ್ರಂಪ್, ಲೆಬನಾನ್‌ನ ಹಿಜ್ಬುಲ್ಲಾ ಉಗ್ರರನ್ನು ಮಟ್ಟ ಹಾಕಲು ಇಸ್ರೇಲ್‌ನಿಂದ ಸಾಧ್ಯವಾಗದಿದ್ದರೆ, ಆ ಕೆಲಸವನ್ನು ಸಿರಿಯಾ ದೇಶವೇ ನೋಡಿಕೊಳ್ಳಲಿದೆ ಎಂದು ಮಹತ್ವದ ಹೇಳಿಕೆ ನೀಡಿದ್ದಾರೆ. ಅಲ್ಲದೆ, ಲೆಬನಾನ್‌ನಲ್ಲಿ ಇಸ್ರೇಲ್ ನಡೆಸುತ್ತಿರುವ ಸುದೀರ್ಘ ಸೇನಾ ಕಾರ್ಯಾಚರಣೆ ಮತ್ತು ಅಲ್ಲಿ ಸಾಯುತ್ತಿರುವ ಅಮಾಯಕರ ಸಂಖ್ಯೆ ಹೆಚ್ಚುತ್ತಿರುವುದಕ್ಕೆ ಟ್ರಂಪ್ ತೀವ್ರ ಅಸಮಾಧಾನ ಹೊರಹಾಕಿದ್ದಾರೆ.

ಸಿರಿಯಾದ ನೂತನ ಅಧ್ಯಕ್ಷ ಅಹ್ಮದ್ ಅಲ್-ಶರಾ ಅವರ ಆಡಳಿತ ವೈಖರಿಯನ್ನು ಮುಕ್ತಕಂಠದಿಂದ ಶ್ಲಾಘಿಸಿದ ಟ್ರಂಪ್, ಶರಾ ಅವರು ಸಿರಿಯಾದಲ್ಲಿ ಅದ್ಭುತವಾಗಿ ಕೆಲಸ ಮಾಡುತ್ತಿದ್ದಾರೆ. ಸುತ್ತಮುತ್ತಲಿನ ಎಲ್ಲರನ್ನೂ ಕೊಲ್ಲದೆ ಇಸ್ರೇಲ್‌ಗೆ ಹಿಜ್ಬುಲ್ಲಾ ವಿರುದ್ಧದ ಯುದ್ಧವನ್ನು ಮುಗಿಸಲು ಸಾಧ್ಯವಾಗದಿದ್ದರೆ, ಆ ಕೆಲಸವನ್ನು ಸಿರಿಯಾ ಮಾಡಲಿದೆ. ಅಧ್ಯಕ್ಷ ಶರಾ ಅವರಿಗೆ ಹಿಜ್ಬುಲ್ಲಾ ಕಂಡರೆ ಆಗುವುದಿಲ್ಲ, ಅವರೇ ಅದನ್ನು ಹದ್ದುಬಸ್ತಿನಲ್ಲಿಡುತ್ತಾರೆ ಎಂದರು.

ಬಶರ್ ಅಲ್-ಅಸ್ಸಾದ್ ಪತನದ ನಂತರ ಸಿರಿಯಾದ ಅಧಿಕಾರ ಹಿಡಿದಿರುವ ಮಾಜಿ ಜಿಹಾದಿ ನಾಯಕ ಶರಾ ಅವರನ್ನು ಉಲ್ಲೇಖಿಸಿದ ಟ್ರಂಪ್, ಆತನೇನು ಸರಳ ವ್ಯಕ್ತಿ ಅಲ್ಲ, ಪರಿಸ್ಥಿತಿಯನ್ನು ಹೇಗೆ ನಿಭಾಯಿಸಬೇಕು ಎಂದು ಅವನಿಗೆ ಚೆನ್ನಾಗಿ ಗೊತ್ತು ಎಂದು ಮಾರ್ಮಿಕವಾಗಿ ಹೇಳಿದ್ದಾರೆ. ಇಸ್ರೇಲ್ ತುಂಬಾ ಸುದೀರ್ಘ ಕಾಲದಿಂದ ಹಿಜ್ಬುಲ್ಲಾ ಜೊತೆ ಹೋರಾಡುತ್ತಿದೆ ಮತ್ತು ಈ ಯುದ್ಧದಲ್ಲಿ ಅತಿಯಾದ ಜನಸಾಮಾನ್ಯರು ಸಾಯುತ್ತಿದ್ದಾರೆ. ಪ್ರಾಮಾಣಿಕವಾಗಿ ಹೇಳಬೇಕೆಂದರೆ, ಹಿಜ್ಬುಲ್ಲಾ ಕಥೆ ಮುಗಿಸಲು ಸಿರಿಯಾಗೆ ಬಿಟ್ಟುಬಿಡಿ ಎಂದು ನಾನು ಇಸ್ರೇಲ್‌ಗೆ ಸಲಹೆ ನೀಡಿದ್ದೇನೆ. ಇಸ್ರೇಲಿಗಿಂತ ಸಿರಿಯಾ ದೇಶವೇ ಈ ಕೆಲಸವನ್ನು ಇನ್ನು ಅಚ್ಚುಕಟ್ಟಾಗಿ ಮಾಡಬಲ್ಲದು ಎಂದು ಟ್ರಂಪ್ ಜಿ7 ವೇದಿಕೆಯಲ್ಲಿ ಹೊಸ ಬಾಂಬ್ ಸಿಡಿಸಿದ್ದಾರೆ.

ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಮತ್ತು ತಮ್ಮ ನಡುವಿನ ಸಂಬಂಧ ಹಳಸಿದೆ ಎಂಬ ವರದಿಗಳ ಬೆನ್ನಲ್ಲೇ ಟ್ರಂಪ್ ತಮ್ಮ ಆಕ್ರೋಶವನ್ನು ಹೊರಹಾಕಿದ್ದಾರೆ. ಲೆಬನಾನ್ ವಿಷಯದಲ್ಲಿ ನೆತನ್ಯಾಹು ಇನ್ನು ಮುಂದೆ ಜವಾಬ್ದಾರಿಯುತವಾಗಿ ನಡೆದುಕೊಳ್ಳಬೇಕಾಗಿದೆ. ನಾನಿಲ್ಲದಿದ್ದರೆ ಇವತ್ತು ಇಸ್ರೇಲ್ ಎನ್ನುವ ದೇಶವೇ ಇರುತ್ತಿರಲಿಲ್ಲ. ಏಕೆಂದರೆ ನಾನು ಇಸ್ರೇಲ್ ಪರವಾಗಿ ಕೈಗೊಂಡ ನಿರ್ಧಾರಗಳನ್ನು ತೆಗೆದುಕೊಳ್ಳಲು ಇತಿಹಾಸದ ಮತ್ಯಾವ ಅಮೆರಿಕ ಅಧ್ಯಕ್ಷರೂ ಧೈರ್ಯ ಮಾಡಿರಲಿಲ್ಲ ಎಂದು ಟ್ರಂಪ್ ಇಸ್ರೇಲ್‌ಗೆ ತಮ್ಮ ಕೊಡುಗೆಯನ್ನು ನೆನಪಿಸಿದ್ದಾರೆ.

ಲೆಬನಾನ್ ಮತ್ತು ಹಿಜ್ಬುಲ್ಲಾ ಬಿಕ್ಕಟ್ಟನ್ನು ಇಸ್ರೇಲ್ ನಿಭಾಯಿಸುತ್ತಿರುವ ರೀತಿ ನನಗೆ ಜಿಡುಗುಟ್ಟು ತಂದಿದೆ. ಈ ಕಾರ್ಯಾಚರಣೆಯನ್ನು ಅವರು ಇಷ್ಟರಲ್ಲೇ ಅತ್ಯಂತ ವೇಗವಾಗಿ ಮುಗಿಸಬೇಕಿತ್ತು, ಆದರೆ ಅವರು ಕಾಲಹರಣ ಮಾಡುತ್ತಿದ್ದಾರೆ ಎಂದು ಟ್ರಂಪ್ ನೇರವಾಗಿ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಅಮೆರಿಕ-ಇರಾನ್ ನಡುವೆ ಶಾಂತಿ ಒಪ್ಪಂದ ನಡೆದ ಬೆನ್ನಲ್ಲೇ, ಈಗ ಇಸ್ರೇಲ್ ವಿರುದ್ಧವೇ ಟ್ರಂಪ್ ತಿರುಗಿಬಿದ್ದಿರುವುದು ಮಧ್ಯಪ್ರಾಚ್ಯದ ಭೌಗೋಳಿಕ ರಾಜಕಾರಣವನ್ನು ಸಂಪೂರ್ಣವಾಗಿ ಬದಲಾಯಿಸುವ ಮುನ್ಸೂಚನೆ ನೀಡಿದೆ,(ಏಜೆನ್ಸೀಸ್).