ಟೆಹ್ರಾನ್ ಹೃದಯಭಾಗದಲ್ಲಿ ಆಕ್ಟೋಪಸ್ ತಲೆ ಕತ್ತರಿಸಿದ ಇಸ್ರೇಲ್! ಖಮೇನಿ ಅಡಗುತಾಣ ಪತ್ತೆಯಾಗಿದ್ದು ಹೇಗೆ? ಅಸಲಿ ರಹಸ್ಯ ಬಿಚ್ಚಿಟ್ಟ IDF

ಖಮೇನಿಯ ಹತ್ಯೆಯು ಕೇವಲ ಅಕಸ್ಮಿಕ ವೈಮಾನಿಕ ದಾಳಿಯಲ್ಲ, ಬದಲಿಗೆ ಇದು ತಿಂಗಳುಗಳ ಕಾಲ ನಡೆದ ಸಂಶೋಧನೆಯ ಫಲವಾಗಿದೆ ಎಂದು ತಿಳಿದು ಬಂದಿದೆ.

ಅಕ್ಯೂರೆಟ್ ಇಂಟೆಲಿಜೆನ್ಸ್: ಐಡಿಎಫ್ ನೀಡಿರುವ ಮಾಹಿತಿ ಪ್ರಕಾರ, ಟೆಹ್ರಾನ್‌ನ ಹೃದಯಭಾಗದಲ್ಲಿರುವ ಖಮೇನಿಯ ಸೆಂಟ್ರಲ್ ಲೀಡರ್‌ಶಿಪ್ ಕಂಪೌಂಡ್ ಒಳಗೆ ಖಮೇನಿ ಅವರು ಇತರ ಹಿರಿಯ ಅಧಿಕಾರಿಗಳೊಂದಿಗೆ ಸಭೆ ನಡೆಸುತ್ತಿರುವ ಬಗ್ಗೆ ನಿಖರ ಮಾಹಿತಿ ಲಭ್ಯವಾಗಿತ್ತು.

ಪ್ರಿಸಿಶನ್ ಸ್ಟ್ರೈಕ್: ಈ ಮಾಹಿತಿಯ ಆಧಾರದ ಮೇಲೆ ಅಮೇರಿಕ ಮತ್ತು ಇಸ್ರೇಲ್ ಜಂಟಿಯಾಗಿ ಅತ್ಯಾಧುನಿಕ ಕ್ಷಿಪಣಿಗಳ ಮೂಲಕ ಪ್ರಿಸಿಶನ್ ಸ್ಟ್ರೈಕ್ ನಡೆಸಿವೆ. ಈ ಬೃಹತ್ ಕಾರ್ಯಾಚರಣೆಯು ಇರಾನ್‌ನ ಉನ್ನತ ನಾಯಕತ್ವವನ್ನೇ ಬುಡಮೇಲು ಮಾಡಿದೆ.

ಐಡಿಎಫ್ ತನ್ನ ಅಧಿಕೃತ ಹೇಳಿಕೆಯಲ್ಲಿ ಖಮೇನಿಯನ್ನುಇರಾನ್ ಎಂಬ ಆಕ್ಟೋಪಸ್‌ನ ತಲೆ ಎಂದು ಕರೆದಿದೆ.

ಇಸ್ರೇಲ್ ಮೇಲೆ ದಾಳಿ ಮಾಡಲು ಇರಾನ್ ಹರಡಿದ್ದ ಭಯೋತ್ಪಾದನಾ ಜಾಲದ ಕೈಗಳನ್ನು ಕತ್ತರಿಸಲು ಅದರ ತಲೆಯನ್ನೇ ಸದೆಬಡಿಯುವುದು ಅನಿವಾರ್ಯವಾಗಿತ್ತು ಎಂದು ಇಸ್ರೇಲ್ ಸಮರ್ಥಿಸಿಕೊಂಡಿದೆ.

ಖಮೇನಿ ಹತ್ಯೆಯಾದರೂ ಇರಾನ್ ಮೇಲಿನ ದಾಳಿ ನಿಲ್ಲುವುದಿಲ್ಲ ಎಂದು ಇಸ್ರೇಲ್ ರಕ್ಷಣಾ ಸಚಿವ ಇಸ್ರೇಲ್ ಕಾಟ್ಜ್ ಗುಡುಗಿದ್ದಾರೆ. ಇರಾನ್ ಆಡಳಿತದ ಪ್ರತಿಯೊಂದು ಗುರಿಯನ್ನೂ ನಾವು ಧ್ವಂಸಗೊಳಿಸುತ್ತೇವೆ ಎಂದು ಹೇಳಿದ್ದಾರೆ. ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರು ಇರಾನ್ ಜನತೆಗೆ ಕರೆ ನೀಡಿದ್ದು, ಈ ಕ್ರೂರ ಆಡಳಿತದ ವಿರುದ್ಧ ಹೋರಾಡಿ, ನಿಮ್ಮ ದೇಶದ ನಿಯಂತ್ರಣವನ್ನು ನೀವೇ ತೆಗೆದುಕೊಳ್ಳಿ ಎಂದು ಪ್ರಚೋದಿಸಿದ್ದಾರೆ.‘

ಅಮೇರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಈ ಕಾರ್ಯಾಚರಣೆಯನ್ನು ಸಂಪೂರ್ಣವಾಗಿ ಬೆಂಬಲಿಸಿದ್ದಾರೆ. ಇರಾನ್ ಯಾವುದೇ ರೀತಿಯ ಪ್ರತೀಕಾರದ ದಾಳಿ ನಡೆಸಿದರೆ ಅದರ ಪರಿಣಾಮ ಎದುರಿಸಬೇಕಾಗುತ್ತದೆ ಎಂದು ಎಚ್ಚರಿಸಿದ್ದಾರೆ. ಆದರೆ, ಇರಾನ್ ಈಗಾಗಲೆ ಕುವೈತ್, ಕತಾರ್, ಇರಾಕ್ ಮತ್ತು ಸೌದಿ ಅರೇಬಿಯಾದಲ್ಲಿರುವ ಅಮೇರಿಕಾ ನೆಲೆಗಳ ಮೇಲೆ ಕ್ಷಿಪಣಿ ಮಳೆ ಸುರಿಸಲು ಆರಂಭಿಸಿದ್ದು, ಪರಿಸ್ಥಿತಿ ಕೈಮೀರಿ ಹೋಗುತ್ತಿದೆ.

ಖಮೇನಿ ಕೇವಲ ಇಸ್ರೇಲ್ ಶತ್ರುವಾಗಿರಲಿಲ್ಲ, ಅವರ ಕೈಗಳಿಗೆ ಜಗತ್ತಿನಾದ್ಯಂತ ಸತ್ತ ಅನೇಕ ಅಮಾಯಕರ ರಕ್ತ ಅಂಟಿತ್ತು ಎಂದು ಇಸ್ರೇಲ್ ಗಂಭೀರ ಆರೋಪ ಮಾಡಿದೆ. ಭಯೋತ್ಪಾದನಾ ಜಾಲದ ದಶಕಗಳ ಅಧ್ಯಾಯವನ್ನು ಈ ಒಂದು ದಾಳಿ ಕೊನೆಗೊಳಿಸಿದೆ ಎಂದು ಮಿಲಿಟರಿ ತಜ್ಞರು ವಿಶ್ಲೇಷಿಸುತ್ತಿದ್ದಾರೆ.

ಇರಾನ್ ಈಗ ತನ್ನ ಮರೆಯಾಗಿರುವ ಬಂಕರ್‌ಗಳಿಂದ ಪ್ರತಿದಾಳಿ ನಡೆಸಲು ಸಜ್ಜಾಗುತ್ತಿದೆ. ಮಧ್ಯಪ್ರಾಚ್ಯದ ಪ್ರತಿಷ್ಠಿತ ನಗರಗಳಾದ ದುಬೈ ಮತ್ತು ಅಬುಧಾಬಿಯಲ್ಲೂ ಭೀತಿ ಆವರಿಸಿದೆ. ಈ ಯುದ್ಧದ ಜ್ವಾಲೆ ಎಲ್ಲಿಗೆ ಹೋಗಿ ಮುಟ್ಟುತ್ತದೆ ಎಂಬುದು ಈಗ ಮಿಲಿಯನ್ ಡಾಲರ್ ಪ್ರಶ್ನೆಯಾಗಿದೆ,(ಏಜೆನ್ಸೀಸ್).