ಇರಾನ್ ಆಡಳಿತ ಪತನದ ಹಾದಿಯಲ್ಲಿದೆಯೇ? ಹೊರ್ಮುಜ್ ಜಲಸಂಧಿ ತೆರೆಯಿರಿ ಎಂದು ಟ್ರಂಪ್ ಬಳಿ ಕೇಳಿಕೊಂಡಿತೇ ಟೆಹ್ರಾನ್! Donald Trump

ಮಂಗಳವಾರ ಬೆಳಿಗ್ಗೆ ತಮ್ಮ ಟ್ರೂತ್ ಸೋಶಿಯಲ್ ಖಾತೆಯಲ್ಲಿ ಬರೆದುಕೊಂಡಿರುವ ಡೊನಾಲ್ಡ್ ಟ್ರಂಪ್, ಇರಾನ್ ಈಗ ತಾನೇ ನಮಗೆ ಮಾಹಿತಿ ನೀಡಿದೆ, ಅವರು ಸಂಪೂರ್ಣ ಕುಸಿತದ ಹಾದಿಯಲ್ಲಿದ್ದಾರೆ. ತಮ್ಮ ನಾಯಕತ್ವದ ಪರಿಸ್ಥಿತಿಯನ್ನು ಸರಿಪಡಿಸಿಕೊಳ್ಳುವವರೆಗೆ ಹೊರ್ಮುಜ್ ಜಲಸಂಧಿಯನ್ನು ಆದಷ್ಟು ಬೇಗ ತೆರೆಯುವಂತೆ ಅವರು ನಮಗೆ ವಿನಂತಿಸಿದ್ದಾರೆ. ಅವರು ಅದನ್ನು ಮಾಡಲು ಶಕ್ತರಾಗುತ್ತಾರೆ ಎಂದು ನಾನು ನಂಬುತ್ತೇನೆ ಎಂದು ತಿಳಿಸಿದ್ದಾರೆ.

ಸೋಮವಾರವಷ್ಟೇ ಟ್ರಂಪ್ ಅವರು ತಮ್ಮ ರಾಷ್ಟ್ರೀಯ ಭದ್ರತಾ ತಂಡದೊಂದಿಗೆ ಇರಾನ್ ಸಲ್ಲಿಸಿರುವ ಹೊಸ ಸಂಧಾನ ಪ್ರಸ್ತಾವನೆಯ ಬಗ್ಗೆ ಸುದೀರ್ಘ ಚರ್ಚೆ ನಡೆಸಿದ್ದರು. ವಿಶ್ವದ ತೈಲ ಪೂರೈಕೆಯ ಐದನೇ ಒಂದು ಭಾಗದಷ್ಟು ಸಾಗಣೆಯಾಗುವ ಈ ಮಾರ್ಗವನ್ನು ತೆರೆಯಲು ಇರಾನ್ ಕೆಲವು ಷರತ್ತುಗಳನ್ನು ವಿಧಿಸಿತ್ತು. ಆದರೆ, ಈ ಪ್ರಸ್ತಾವನೆಯು ಅಮೆರಿಕದ ರೆಡ್ ಲೈನ್ ಅಥವಾ ಕಟ್ಟುನಿಟ್ಟಿನ ನಿಯಮಗಳನ್ನು ಮೀರಿಲ್ಲ ಎಂದು ಟ್ರಂಪ್ ಅತೃಪ್ತಿ ವ್ಯಕ್ತಪಡಿಸಿದ್ದಾರೆ.

ಶ್ವೇತಭವನದ ವಕ್ತಾರೆ ಕ್ಯಾರೋಲಿನ್ ಲೀವಿಟ್ ಈ ಬಗ್ಗೆ ಪ್ರತಿಕ್ರಿಯಿಸಿ, ಅಧ್ಯಕ್ಷರು ತಮ್ಮ ಭದ್ರತಾ ತಂಡದೊಂದಿಗೆ ಸಮಾಲೋಚನೆ ನಡೆಸುತ್ತಿದ್ದಾರೆ. ಫಲಿತಾಂಶದ ಬಗ್ಗೆ ಈಗಲೇ ಏನನ್ನೂ ಹೇಳಲು ಸಾಧ್ಯವಿಲ್ಲ, ಆದರೆ ಶೀಘ್ರದಲ್ಲೇ ಅಧ್ಯಕ್ಷರಿಂದಲೇ ನೀವು ನೇರವಾಗಿ ಕೇಳಲಿದ್ದೀರಿ ಎಂದು ಸಸ್ಪೆನ್ಸ್ ಉಳಿಸಿದ್ದಾರೆ.

ಅಮೆರಿಕದ ವಿದೇಶಾಂಗ ಕಾರ್ಯದರ್ಶಿ ಮಾರ್ಕೊ ರೂಬಿಯೋ ಅವರು ಫಾಕ್ಸ್ ನ್ಯೂಸ್‌ಗೆ ನೀಡಿದ ಸಂದರ್ಶನದಲ್ಲಿ ಇರಾನ್‌ನ ಇಂದಿನ ಸ್ಥಿತಿಯನ್ನು ಬಿಚ್ಚಿಟ್ಟಿದ್ದಾರೆ. ಇರಾನ್ ಸಂಧಾನಕಾರರು ಒಪ್ಪಂದಕ್ಕೆ ಬರಲು ನಿಜಕ್ಕೂ ಗಂಭೀರವಾಗಿದ್ದಾರೆ. ಏಕೆಂದರೆ ಅವರು ಸಿಲುಕಿರುವ ಸಂಕಷ್ಟ ಅಂತಹದ್ದು. ಆದರೆ, ಇರಾನ್ ಆಡಳಿತದ ಒಳಗೆ ವಿವಿಧ ಬಣಗಳ ನಡುವೆ ಭಿನ್ನಾಭಿಪ್ರಾಯವಿದೆ, ಇದು ಶಾಂತಿ ಮಾತುಕತೆಗೆ ಅಡ್ಡಿಯಾಗುತ್ತಿದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಅಮೆರಿಕವು ಇರಾನ್ ಬಂದರುಗಳ ಮೇಲೆ ಹೇರಿರುವ ಕಠಿಣ ನೌಕಾ ದಿಗ್ಬಂಧನವು ಕೆಲಸ ಮಾಡುತ್ತಿದೆ ಎಂಬುದು ಶ್ವೇತಭವನದ ನಂಬಿಕೆಯಾಗಿದೆ. ಇರಾನ್‌ನ ಆರ್ಥಿಕತೆ ಹೈರಾಣಾಗಿರುವುದು ಈಗ ಸ್ಪಷ್ಟವಾಗಿ ಗೋಚರಿಸುತ್ತಿದೆ.

ಹೊರ್ಮುಜ್ ಜಲಸಂಧಿಯು ಜಾಗತಿಕ ಇಂಧನ ಭದ್ರತೆಯ ಬೆನ್ನೆಲುಬು. ಎರಡು ತಿಂಗಳಿಂದ ನಡೆಯುತ್ತಿರುವ ಈ ಯುದ್ಧದಿಂದಾಗಿ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ತೈಲ ಬೆಲೆ ಗಗನಕ್ಕೇರಿದೆ. ಒಂದು ವೇಳೆ ಟ್ರಂಪ್ ಹೇಳಿದಂತೆ ಇರಾನ್ ನಿಜಕ್ಕೂ ಶರಣಾಗತಿಯ ಹಾದಿಯಲ್ಲಿದ್ದರೆ, ಮುಂದಿನ ದಿನಗಳಲ್ಲಿ ತೈಲ ಬೆಲೆ ಇಳಿಕೆಯಾಗುವ ನಿರೀಕ್ಷೆಯಿದೆ. ಆದರೆ, ಇರಾನ್‌ನ ನಾಯಕತ್ವದ ಬಿಕ್ಕಟ್ಟು ಮತ್ತಷ್ಟು ಹಿಂಸಾಚಾರಕ್ಕೆ ದಾರಿ ಮಾಡಿಕೊಡುತ್ತದೆಯೇ ಎಂಬ ಭೀತಿಯೂ ಇದೆ.

ಇರಾನ್‌ನ ಪ್ರಸ್ತಾವನೆಯು ಅಮೆರಿಕದ ನಿರೀಕ್ಷಿತ ಮಟ್ಟದಲ್ಲಿಲ್ಲ ಎಂದು ಎಬಿಸಿ ನ್ಯೂಸ್ ವರದಿ ಮಾಡಿದೆ. ಟ್ರಂಪ್ ಸರ್ಕಾರವು ಇರಾನ್‌ನಿಂದ ಸಂಪೂರ್ಣ ಶರಣಾಗತಿ ಮತ್ತು ಪರಮಾಣು ಚಟುವಟಿಕೆಗಳ ನಿಲುಗಡೆಯನ್ನು ಬಯಸುತ್ತಿದೆ. ಇರಾನ್ ನಾಯಕತ್ವದ ಬದಲಾವಣೆಯೋ ಅಥವಾ ಆಡಳಿತದ ಕುಸಿತವೋ ಎಂಬುದು ಮುಂದಿನ ಕೆಲವೇ ಗಂಟೆಗಳಲ್ಲಿ ಸ್ಪಷ್ಟವಾಗಲಿದೆ,(ಏಜೆನ್ಸೀಸ್).