ಸೇತುವೆಗಳಿಲ್ಲದ, ರೈಲುಗಳಿಲ್ಲದ ದೇಶವಾಗಿ ಬದಲಾಗುತ್ತಾ ಇರಾನ್? ಇಸ್ರೇಲ್ ನೀಡಿದ ವಾರ್ನಿಂಗ್‌ನಿಂದ ಬೆಚ್ಚಿಬಿದ್ದ ಟೆಹ್ರಾನ್! Israel Warning

ಈ ಬಗ್ಗೆ ಮಂಗಳವಾರ ಇಸ್ರೇಲ್ ಮಿಲಿಟರಿ ಬಿಡುಗಡೆ ಮಾಡಿರುವ ಅಧಿಕೃತ ಪ್ರಕಟಣೆಯಲ್ಲಿ, ನಿಮ್ಮ ಸುರಕ್ಷತೆಗಾಗಿ, ಇರಾನ್ ಕಾಲಮಾನ ರಾತ್ರಿ 9:00 ಗಂಟೆಯವರೆಗೆ ದೇಶಾದ್ಯಂತ ರೈಲುಗಳನ್ನು ಬಳಸದಂತೆ ಅಥವಾ ರೈಲಿನಲ್ಲಿ ಪ್ರಯಾಣಿಸದಂತೆ ನಾವು ವಿನಂತಿಸುತ್ತೇವೆ ಎಂದು ಹೇಳಲಾಗಿದೆ. ಇಂತಹ ಸಂಚಾರವು ನಾಗರಿಕರ ಜೀವಕ್ಕೆ ಅಪಾಯವನ್ನು ಉಂಟುಮಾಡಬಹುದು ಎಂದು ಇಸ್ರೇಲ್ ಎಚ್ಚರಿಸಿದೆ. ಇದು ಕೇವಲ ಎಚ್ಚರಿಕೆಯಲ್ಲ, ಬದಲಿಗೆ ಇರಾನ್‌ನ ರೈಲ್ವೆ ಜಾಲ ಮತ್ತು ಸೇತುವೆಗಳ ಮೇಲೆ ಬೃಹತ್ ಪ್ರಮಾಣದ ಕ್ಷಿಪಣಿ ದಾಳಿ ನಡೆಯಲಿದೆ ಎಂಬುದರ ಸ್ಪಷ್ಟ ಸಂಕೇತವಾಗಿದೆ.

ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಇರಾನ್‌ಗೆ ಬುಧವಾರ ಮುಂಜಾನೆ ಇರಾನ್ ಕಾಲಮಾನ 3:30ರವರೆಗೆ ಗಡುವು ನೀಡಿದ್ದಾರೆ. ಹೋರ್ಮುಜ್ ಜಲಸಂಧಿಯನ್ನು ಜಾಗತಿಕ ಹಡಗು ಸಂಚಾರಕ್ಕೆ ಮುಕ್ತಗೊಳಿಸದಿದ್ದರೆ, ಇರಾನ್‌ನ ಪ್ರತಿಯೊಂದು ಪವರ್ ಪ್ಲಾಂಟ್, ಡ್ಯಾಮ್ ಮತ್ತು ಪ್ರಮುಖ ಸೇತುವೆಗಳನ್ನು ಧ್ವಂಸಗೊಳಿಸುವುದಾಗಿ ಟ್ರಂಪ್​ ಎಚ್ಚರಿಸಿದ್ದಾರೆ. ಈ ಗಡುವು ಮುಗಿಯಲು ಕೇವಲ ಕೆಲವೇ ಗಂಟೆಗಳು ಬಾಕಿ ಇರುವಾಗ ಇಸ್ರೇಲ್ ಈ ಎಚ್ಚರಿಕೆ ನೀಡಿರುವುದು ಪರಿಸ್ಥಿತಿಯ ಗಾಂಭೀರ್ಯವನ್ನು ತಿಳಿಸುತ್ತದೆ.

ಮಂಗಳವಾರ ಮುಂಜಾನೆಯೇ ಇಸ್ರೇಲ್ ಇರಾನ್‌ನ ಹಲವು ಗುರಿಗಳ ಮೇಲೆ ಹೊಸ ಅಲೆಯ ದಾಳಿಗಳನ್ನು ಪ್ರಾರಂಭಿಸಿದೆ. ಇದಕ್ಕೆ ಪ್ರತಿಯಾಗಿ ಇರಾನ್ ಕೂಡ ಇಸ್ರೇಲ್ ಮತ್ತು ಕೆಲವು ಕೊಲ್ಲಿ ರಾಷ್ಟ್ರಗಳ ಮೇಲೆ ಕ್ಷಿಪಣಿ ಪ್ರಹಾರ ನಡೆಸಿದೆ. ಅಮೆರಿಕ ಬೆಂಬಲಿತ 45 ದಿನಗಳ ಕದನ ವಿರಾಮ ಪ್ರಸ್ತಾಪವನ್ನು ಇರಾನ್ ತಿರಸ್ಕರಿಸಿದ್ದು, ಯುದ್ಧಕ್ಕೆ ಕೇವಲ ತಾತ್ಕಾಲಿಕ ವಿರಾಮವಲ್ಲದೆ ಶಾಶ್ವತ ಅಂತ್ಯ ಬೇಕು ಎಂದು ಪಟ್ಟು ಹಿಡಿದಿದೆ. ಇದು ಸಂಧಾನದ ಹಾದಿಯನ್ನು ಸಂಪೂರ್ಣವಾಗಿ ಮುಚ್ಚಿಹಾಕಿದೆ.

ಒಂದೆಡೆ ಶತ್ರು ಪಡೆಗಳು ಆಕ್ರಮಣ ಮಾಡುತ್ತಿದ್ದರೆ, ಇರಾನ್ ಅಧ್ಯಕ್ಷ ಮಸೂದ್ ಪೆಜೆಶ್ಕಿಯಾನ್ ತಮ್ಮ ದೇಶದ ಜನರನ್ನು ಯುದ್ಧಕ್ಕೆ ಸಜ್ಜುಗೊಳಿಸುತ್ತಿದ್ದಾರೆ. ದೇಶವನ್ನು ರಕ್ಷಿಸಲು 1.4 ಕೋಟಿಗೂ ಹೆಚ್ಚು ಇರಾನಿಯನ್ನರು ತಮ್ಮ ಪ್ರಾಣವನ್ನು ಅರ್ಪಿಸಲು ಸಿದ್ಧರಿದ್ದಾರೆ. ನಾನು ಕೂಡ ನನ್ನ ಜೀವನವನ್ನು ಇರಾನ್‌ಗಾಗಿ ತ್ಯಾಗ ಮಾಡಲು ಸದಾ ಸಿದ್ಧನಿದ್ದೇನೆ ಎಂದು ಘೋಷಿಸಿದ್ದಾರೆ. ನಾಗರಿಕರನ್ನೇ ಮಾನವ ಗುರಾಣಿಯನ್ನಾಗಿ ಬಳಸಿಕೊಳ್ಳುವ ಈ ತಂತ್ರವು ಅಮೆರಿಕದ ದಾಳಿಯನ್ನು ತಡೆಯುತ್ತದೆಯೇ ಎಂಬುದು ಈಗ ದೊಡ್ಡ ಪ್ರಶ್ನೆಯಾಗಿದೆ.

ಇಸ್ರೇಲ್‌ನ ಎಚ್ಚರಿಕೆಯು ಇರಾನ್‌ನ ರೈಲ್ವೆ ಹಳಿಗಳು ಮತ್ತು ಸೇತುವೆಗಳನ್ನು ಗುರಿಯಾಗಿಸಿಕೊಂಡಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ. ಇರಾನ್‌ನ ಸೈನ್ಯದ ಚಲನವಲನವನ್ನು ಸಂಪೂರ್ಣವಾಗಿ ಸ್ಥಗಿತಗೊಳಿಸುವುದು ಮತ್ತು ದೇಶವನ್ನು ಕತ್ತಲೆಗೆ ತಳ್ಳುವುದು ಶತ್ರು ರಾಷ್ಟ್ರಗಳ ಮುಖ್ಯ ಉದ್ದೇಶವಾಗಿದೆ. ಈಗಾಗಲೇ ಇರಾನ್‌ನ ಖಾರ್ಗ್ ದ್ವೀಪದ ತೈಲ ಕೇಂದ್ರದ ಮೇಲೆ ದಾಳಿ ನಡೆದಿದ್ದು, ಈಗ ರೈಲು ಜಾಲವು ಮುಂದಿನ ಗುರಿಯಾಗಿದೆ.

ಐದು ವಾರಗಳಿಂದ ನಡೆಯುತ್ತಿರುವ ಈ ಸಂಘರ್ಷವು ಈಗ ತುತ್ತತುದಿಗೆ ತಲುಪಿದೆ. ಒಂದು ವೇಳೆ ಬುಧವಾರ ಮುಂಜಾನೆಯ ವೇಳೆಗೆ ಇರಾನ್ ಶರಣಾಗದಿದ್ದರೆ, ಪಶ್ಚಿಮ ಏಷ್ಯಾದಲ್ಲಿ ಒಂದು ಇಡೀ ನಾಗರಿಕತೆಯೇ ಸರ್ವನಾಶವಾಗುವ ಭೀತಿಯಿದೆ ಎಂದು ಟ್ರಂಪ್ ಈಗಾಗಲೇ ಹೇಳಿದ್ದಾರೆ. ಜಗತ್ತಿನ ಕಣ್ಣು ಈಗ ಇರಾನ್ ಕಾಲಮಾನದ 3:30ರ ಮೇಲಿದೆ,(ಏಜೆನ್ಸೀಸ್).