ವಿಮಾನಸೇವೆ ಅಪ್​ಡೇಟ್​: ಮಧ್ಯಪ್ರಾಚ್ಯ ಯುದ್ಧದ ನಡುವೆಯೂ ಕೆಲ ವಿಮಾನ ಸೇವೆಗಳು ಆರಂಭ, ಇಲ್ಲಿದೆ ಮಾಹಿತಿ... Iran vs Israel War

Iran vs Israel War : ಇಸ್ರೇಲ್​-ಅಮೆರಿಕ ಹಾಗೂ ಇರಾನ್​ ನಡುವಿನ ಯುದ್ಧದ ಮಧ್ಯೆ ಗಲ್ಫ್​ ರಾಷ್ಟ್ರಗಳಲ್ಲಿ ಸಿಲುಕಿರುವ ಭಾರತೀಯರನ್ನು ವಾಪಸ್​ ತವರಿಗೆ ಕರೆತರಲು ವಿಮಾನಯಾನ ಸಂಸ್ಥೆಗಳು ಅಗತ್ಯ ವ್ಯವಸ್ಥೆಗಳನ್ನು ಮಾಡುತ್ತಿರುವುದಾಗಿ ಪಿಐಬಿ ಇಂದು (ಮಾರ್ಚ್​ 03) ವರದಿ ಮಾಡಿದೆ. ಇಂದು ಹಲವಾರು ವಿಮಾನಯಾನ ಸಂಸ್ಥೆಗಳು ಮಧ್ಯಪ್ರಾಚ್ಯಕ್ಕೆ ಸೀಮಿತ ವಾಣಿಜ್ಯ ಸೇವೆಗಳನ್ನು ಪುನರಾರಂಭಿಸಲು ಶುರು ಮಾಡಿವೆ.

ದುಬೈ ವಿಮಾನ ನಿಲ್ದಾಣದ ವೆಬ್‌ಸೈಟ್ ಪ್ರಕಾರ, ಮಂಗಳವಾರ ಬೆಳಗ್ಗೆ ಹಲವಾರು ವಾಣಿಜ್ಯ ವಿಮಾನಗಳು ಹೊರಡಲು ನಿರ್ಧರಿಸಲಾಗಿತ್ತು. ಆದಾಗ್ಯೂ, ಅಧಿಕಾರಿಗಳು, ಪ್ರಯಾಣಿಕರನ್ನು ತಮ್ಮ ವಿಮಾನಯಾನ ಸಂಸ್ಥೆಯು ನೇರವಾಗಿ ಸಂಪರ್ಕಿಸದೆ, ನಿರ್ಗಮನ ಸಮಯವನ್ನು ದೃಢಪಡಿಸದ ಹೊರತು ವಿಮಾನ ನಿಲ್ದಾಣಕ್ಕೆ ಯಾರೊಬ್ಬರು ಹೋಗದಂತೆ ಎಚ್ಚರಿಕೆ ನೀಡಿದರು.

ಇರಾನ್​ ಮೇಲೆ ಅಮೆರಿಕ ಹಾಗೂ ಇಸ್ರೇಲ್​ ಜಂಟಿಯಾಗಿ ದಾಳಿ ನಡೆಸಿದ್ದು, ಇದಕ್ಕೆ ಪ್ರತಿಯಾಗಿ ಇರಾನ್​ ಕೂಡ ದಾಳಿ ನಡೆಸುತ್ತಿರುವುದರಿಂದ ಮಧ್ಯಪ್ರಾಚ್ಯದಲ್ಲಿ ಯುದ್ಧದ ಭೀಕರ ಸನ್ನಿವೇಶ ಸೃಷ್ಟಿಯಾಗಿದೆ. ಫೆ.28ರಂದು ಶುರುವಾದ ಈ ಯುದ್ಧ ಈಗಲೂ ಮುಂದುವರಿದಿದೆ. ಮಧ್ಯ ಪ್ರಾಚ್ಯ ರಾಷ್ಟ್ರಗಳಲ್ಲಿರುವ ಅಮೆರಿಕ ಮಿಲಿಟರಿ ನೆಲೆಗಳನ್ನು ಗುರಿಯಾಗಿಸಿಕೊಂಡು ಇರಾನ್​ ವಾಯುದಾಳಿ ನಡೆಸುತ್ತಿದೆ. ಅಲ್ಲದೆ, ಇತ್ತೀಚೆಗೆ ಅಮೆರಿಕ ಜತೆ ಹೆಚ್ಚು ಒಡನಾಟ ಹೊಂದಿರುವ ಯುನೈಟೆಡ್​ ಎಮಿರೇಟ್ಸ್​ ಅರಬ್​ ಮೇಲೆಯೂ ಇರಾನ್​ ತನ್ನ ಕೆಂಗಣ್ಣು ಬೀರಿದೆ. ಈ ಯುದ್ಧದ ಸನ್ನಿವೇಶದಿಂದಾಗಿ ಗಲ್ಫ್​ ರಾಷ್ಟ್ರಗಳಲ್ಲಿ ವಿಮಾನ ಸೇವೆ ಬಂದ್​ ಆಗಿದೆ. ಇದರಿಂದ ಸಾವಿರಾರು ಭಾರತೀಯರು ದುಬೈ ಹಾಗೂ ಬಹ್ರೈನ್​ ಸೇರಿದಂತೆ ಗಲ್ಫ್​ ರಾಷ್ಟ್ರಗಳಲ್ಲಿ ಸಿಲುಕಿಕೊಂಡಿದ್ದಾರೆ. ಇದೀಗ ಅವರನ್ನು ವಾಪಸ್​ ಕರೆಸಿಕೊಳ್ಳಲು ವಿಮಾನಯಾನ ಸಂಸ್ಥೆಗಳು ವಿಮಾನಯಾನ ಸೇವೆ ಆರಂಭಿಸಲು ರೆಡಿಯಾಗಿವೆ.

ಮಧ್ಯಪ್ರಾಚ್ಯದಾದ್ಯಂತ ಅನೇಕ ವಾಣಿಜ್ಯ ವಿಮಾನ ಸಂಚಾರ ಸ್ಥಗಿತಗೊಂಡಿದ್ದರಿಂದ, ತಮ್ಮ ತಮ್ಮ ತವರಿಗೆ ಮರಳುವ ಪ್ರಯಾಣಿಕರ ಸಂಖ್ಯೆ ಹೆಚ್ಚುತ್ತಿರುವುದರಿಂದ ಸೋಮವಾರ (ಮಾ.02) ಸೀಮಿತ ಸಂಖ್ಯೆಯಯಲ್ಲಿ ಸ್ಥಳಾಂತರಿಸುವ ಕೆಲಸ ನಡೆಯಿತು. ಯುನೈಟೆಡ್ ಅರಬ್ ಎಮಿರೇಟ್ಸ್‌ನಿಂದ ಒಂದಿಷ್ಟು ಪ್ರಯಾಣಿಕರು ಹೊರಟರು. ಆದರೆ, ಇದೀಗ ಯುದ್ಧದ ಭೀತಿ ಆವರಿಸಿರುವುದರಿಂದ ವಿಮಾನ ಸೇವೆಗಳಲ್ಲಿ ಭಾರಿ ವ್ಯತ್ಯಯ ಉಂಟಾಗಿದೆ. ವಾಯು ಪ್ರದೇಶ ಮುಚ್ಚಿರುವುದರಿಂದ, ಪರಿಸ್ಥಿತಿಗೆ ತಕ್ಕಂತೆ ವಿಮಾನ ಸೇವೆಗಳನ್ನು ನಡೆಸಲಾಗುತ್ತದೆ.

ದೀರ್ಘ ಪ್ರಯಾಣದ ವಿಮಾನಯಾನ ಸಂಸ್ಥೆಗಳಾದ ಎತಿಹಾದ್ ಏರ್‌ವೇಸ್, ಎಮಿರೇಟ್ಸ್ ಮತ್ತು ಬಜೆಟ್ ಏರ್‌ಲೈನ್ ಫ್ಲೈದುಬೈ ಸೀಮಿತ ಸೇವೆಗಳನ್ನು ಘೋಷಿಸಿವೆ. ಫ್ಲೈಟ್‌ರಾಡಾರ್ 24 ಪ್ರಕಾರ, ಸೋಮವಾರ ಮೂರು ಗಂಟೆಗಳ ಅವಧಿಯಲ್ಲಿ ಕನಿಷ್ಠ 16 ಎತಿಹಾದ್ ವಿಮಾನಗಳು ಅಬುಧಾಬಿಯಿಂದ ಹೊರಟು ಇಸ್ಲಾಮಾಬಾದ್, ಪ್ಯಾರಿಸ್, ಆಮ್ಸ್ಟರ್‌ಡ್ಯಾಮ್, ಮುಂಬೈ, ಮಾಸ್ಕೋ ಮತ್ತು ಲಂಡನ್ ಸೇರಿದಂತೆ ಮುಂತಾದ ಸ್ಥಳಗಳಿಗೆ ಹೋದವು. ಆದರೆ, ಇದೀಗ ಬುಧವಾರ ಮಧ್ಯಾಹ್ನದವರೆಗೆ ನಿಯಮಿತವಾಗಿ ನಿಗದಿತ ವಾಣಿಜ್ಯ ಸೇವೆಗಳನ್ನು ಸ್ಥಗಿತಗೊಳಿಸಲಾಗುವುದು ಎಂದು ವಿಮಾನಯಾನ ಸಂಸ್ಥೆ ತಿಳಿಸಿದೆ. ಸೋಮವಾರ ಸಂಜೆ ಆಯ್ದ ಸೇವೆಗಳನ್ನು ಪುನರಾರಂಭಿಸಿದ್ದರಿಂದ ಎಮಿರೇಟ್ಸ್ ಮೊದಲೇ ಬುಕಿಂಗ್ ಮಾಡಿದ ಪ್ರಯಾಣಿಕರಿಗೆ ಆದ್ಯತೆ ನೀಡಿತು. ಫ್ಲೈದುಬೈ ನಾಲ್ಕು ನಿರ್ಗಮನ ಮತ್ತು ಐದು ಆಗಮನ ವಿಮಾನಗಳನ್ನು ನಿರ್ವಹಿಸಿತು. ದುಬೈ ವಿಮಾನ ನಿಲ್ದಾಣಗಳು ದುಬೈ ಇಂಟರ್ನ್ಯಾಷನಲ್ (DXB) ಮತ್ತು ದುಬೈ ವರ್ಲ್ಡ್ ಸೆಂಟ್ರಲ್ (DWC) ನಿಂದ ಕಾರ್ಯಾಚರಣೆಗಳ ಸೀಮಿತ ಪುನರಾರಂಭವನ್ನು ದೃಢಪಡಿಸಿದವು. ಆದರೆ, ಪ್ರಯಾಣಿಕರು ತಮ್ಮ ವಿಮಾನಯಾನ ಸಂಸ್ಥೆಯಿಂದ ನೇರವಾಗಿ ತಿಳಿಸಲ್ಪಟ್ಟರೆ ಮಾತ್ರ ವಿಮಾನ ನಿಲ್ದಾಣಕ್ಕೆ ಪ್ರಯಾಣಿಸಬೇಕು ಎಂದು ಸಂಸ್ಥೆಯು ಒತ್ತಿ ಹೇಳಿತು.

ಗಲ್ಫ್​ ರಾಷ್ಟ್ರಗಳಲ್ಲಿ ಸಿಲುಕಿರುವ ಪ್ರಯಾಣಿಕರನ್ನು ಮರಳಿ ಕರೆತರಲು ಭಾರತೀಯ ವಿಮಾನಯಾನ ಸಂಸ್ಥೆಗಳು ಸೀಮಿತ ಕಾರ್ಯಾಚರಣೆಗಳನ್ನು ಪ್ರಾರಂಭಿಸಿವೆ. ಈ ಕಾರ್ಯಾಚರಣೆಗಳನ್ನು "ಕ್ರಮೇಣ ಸಹಜ ಸ್ಥಿತಿಗೆ" ತರಲು ಇಂಡಿಗೋ, ಸೌದಿ ಅರೇಬಿಯಾದ ಜೆಡ್ಡಾಗೆ ನಾಲ್ಕು ರಿಟರ್ನ್ ವಿಮಾನಗಳನ್ನು ನಿರ್ವಹಿಸುವುದಾಗಿ ಹೇಳಿದೆ. ಇನ್ನು ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ಮಂಗಳವಾರದಿಂದ ಓಮನ್‌ನ ಮಸ್ಕತ್‌ಗೆ ಸೇವೆಗಳನ್ನು ಪುನರಾರಂಭಿಸಿತು. ಬಜೆಟ್ ಕ್ಯಾರಿಯರ್ ಆಕಾಶ ಏರ್ ಜೆಡ್ಡಾಗೆ ಆಯ್ದ ವಿಮಾನಗಳನ್ನು ಘೋಷಿಸಿದರೆ, ಸ್ಪೈಸ್‌ಜೆಟ್ ಯುಎಇಯ ಫುಜೈರಾದಿಂದ ನಾಲ್ಕು ವಿಶೇಷ ವಿಮಾನಗಳನ್ನು ನಿಗದಿಪಡಿಸಿದೆ. ದುಬೈ ಮತ್ತು ಅಬುಧಾಬಿಯಿಂದ ದೆಹಲಿ, ಮುಂಬೈ ಮತ್ತು ಬೆಂಗಳೂರಿಗೆ ವಿಮಾನಗಳು ಸೋಮವಾರ ರಾತ್ರಿ ಪುನರಾರಂಭಗೊಂಡವು, ಇದು ಸಾವಿರಾರು ಜನರಿಗೆ ಪರಿಹಾರವನ್ನು ತಂದಿತು. ವಿಮಾನ ನಿಲ್ದಾಣದ ಅಧಿಕಾರಿಗಳು ಮತ್ತು ವಿಮಾನಯಾನ ಅಧಿಕಾರಿಗಳ ನಡುವಿನ ಬಿಗಿ ಸಮನ್ವಯದ ನಡುವೆ ದುಬೈನಿಂದ ಮುಂಬೈಗೆ ಎಮಿರೇಟ್ಸ್ ವಿಮಾನವು ಮಂಗಳವಾರ ಛತ್ರಪತಿ ಶಿವಾಜಿ ಮಹಾರಾಜ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಸುರಕ್ಷಿತವಾಗಿ ಇಳಿಯಿತು.

ಗಲ್ಫ್ ವಾಯುಪ್ರದೇಶವನ್ನು ಭಾಗಶಃ ಮತ್ತೆ ತೆರೆದಿದ್ದರೂ ಮಂಗಳವಾರ ಕೆಲವು ವಿಮಾನಗಳ ಹಾರಾಟದಲ್ಲಿ ಅಡಚಣೆಗಳು ಮುಂದುವರೆದವು. ದೆಹಲಿಯ ಇಂದಿರಾ ಗಾಂಧಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಮತ್ತು ಕೋಲ್ಕತ್ತಾದ ನೇತಾಜಿ ಸುಭಾಷ್ ಚಂದ್ರ ಬೋಸ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಪ್ರಮುಖ ವಿಮಾನಗಳು ರದ್ದಾಗಿರುವುದಾಗಿ ವರದಿಯಾಗಿದೆ. ಪಶ್ಚಿಮ ಏಷ್ಯಾದಲ್ಲಿ ಹೆಚ್ಚುತ್ತಿರುವ ಸಂಘರ್ಷಕ್ಕೆ ಸಂಬಂಧಿಸಿದ ಕಾರ್ಯಾಚರಣೆಯ ನಿರ್ಬಂಧಗಳಿಂದಾಗಿ ಮಂಗಳವಾರ ಬೆಳಗ್ಗೆ ದೆಹಲಿ ವಿಮಾನ ನಿಲ್ದಾಣದಲ್ಲಿ ಕನಿಷ್ಠ 80 ಅಂತಾರಾಷ್ಟ್ರೀಯ ವಿಮಾನಗಳು, 36 ನಿರ್ಗಮನಗಳು ಮತ್ತು 44 ಆಗಮನಗಳನ್ನು ರದ್ದುಗೊಳಿಸಲಾಯಿತು.

ಫ್ಲೈಟ್‌ರಾಡಾರ್ 24 ಪ್ರಕಾರ, ದುಬೈಗೆ ತೆರಳುತ್ತಿದ್ದ ಎಮಿರೇಟ್ಸ್ ವಿಮಾನ (EK513) ವಾಯುಪ್ರದೇಶದ ನಿರ್ಬಂಧಗಳಿಂದಾಗಿ ದೆಹಲಿಗೆ ಮರಳಿತು. ಆದಾಗ್ಯೂ, ದುಬೈನಿಂದ ಬಂದ EK512 ವಿಮಾನವು ಬೆಳಗ್ಗೆ ನಂತರ ರಾಷ್ಟ್ರ ರಾಜಧಾನಿಯಲ್ಲಿ ಸುರಕ್ಷಿತವಾಗಿ ಇಳಿಯಿತು. ಕೋಲ್ಕತ್ತಾದಲ್ಲಿ ಕನಿಷ್ಠ 10 ಅಂತಾರಾಷ್ಟ್ರೀಯ ವಿಮಾನಗಳನ್ನು ರದ್ದುಗೊಳಿಸಲಾಯಿತು. ಕತಾರ್ ಏರ್‌ವೇಸ್, ಎತಿಹಾದ್ ಏರ್‌ವೇಸ್ ಮತ್ತು ಏರ್ ಅರೇಬಿಯಾ ಸೇರಿದಂತೆ ವಿಮಾನಯಾನ ಸಂಸ್ಥೆಗಳು ಕೋಲ್ಕತವನ್ನು ಪ್ರಮುಖ ಪಶ್ಚಿಮ ಏಷ್ಯಾದ ರಾಷ್ಟ್ರಗಳೊಂದಿಗೆ ಸಂಪರ್ಕಿಸುವ ಸೇವೆಗಳನ್ನು ಸ್ಥಗಿತಗೊಳಿಸಿದವು. ಪ್ರಾದೇಶಿಕ ಪರಿಸ್ಥಿತಿ ಹದಗೆಡುತ್ತಿರುವ ಕಾರಣ ಸೋಮವಾರ ಕೋಲ್ಕತ್ತಾ ವಿಮಾನ ನಿಲ್ದಾಣದಲ್ಲಿ ಕನಿಷ್ಠ 20 ಅಂತಾರಾಷ್ಟ್ರೀಯ ವಿಮಾನಗಳನ್ನು ಸ್ಥಗಿತಗೊಳಿಸಲಾಗಿದೆ. ಬೆಂಗಳೂರಿನಲ್ಲಿ ಇದುವರೆಗೆ 44 ವಿಮಾನಗಳನ್ನು ರದ್ದುಗೊಳಿಸಲಾಗಿದೆ. ಈ ಮಧ್ಯೆ, ವಿಳಂಬದ ಹೊರತಾಗಿಯೂ ಉತ್ತರ ಅಮೆರಿಕ ಮತ್ತು ಯುರೋಪ್‌ಗೆ ವಿಮಾನಗಳು ಕಾರ್ಯನಿರ್ವಹಿಸುತ್ತಿವೆ.

ಇಂಡಿಗೋ ವಿಮಾನಯಾನ ಸಂಸ್ಥೆಯು ಇಂದು ( ಮಾರ್ಚ್ 3) ಸೌದಿ ಅರೇಬಿಯಾದ ಜೆದ್ದಾಹ್‌ನಿಂದ ಭಾರತಕ್ಕೆ 10 ವಿಶೇಷ ಪರಿಹಾರ ಕಾರ್ಯಾಚರಣೆಗಳಿಗೆ ಪ್ಲಾನ್​ ಮಾಡಿದೆ. ಇದರಿಂದ, ಅರಬ್​ ದೇಶದಲ್ಲಿ ಸಿಲುಕಿರುವ ಪ್ರಯಾಣಿಕರು ಮರಳಿ ಬರಲು ಸಹಾಯವಾಗುತ್ತದೆ. ಆದರೆ, ಈ ಕಾರ್ಯಾಚರಣೆಯು ಅಗತ್ಯವಾದ ಅನುಮತಿಗಳು ಮತ್ತು ಪ್ರಸ್ತುತ ವಾಯುಪ್ರದೇಶದ ಸ್ಥಿತಿಗಳನ್ನು ಅವಲಂಬಿಸಿರುತ್ತದೆ. ಇಂಡಿಗೋ ಜೆದ್ದಾಹ್‌ನಲ್ಲಿರುವ ಭಾರತದ ದೂತವಾಸ ಕಚೇರಿಯೊಂದಿಗೆ ಸಮನ್ವಯ ಸಾಧಿಸಿ ಪ್ರಯಾಣಿಕರ ಸೌಲಭ್ಯಕ್ಕಾಗಿ ಕಾರ್ಯನಿರ್ವಹಿಸುತ್ತಿದೆ. ಭಾರತ ಮತ್ತು ಗಲ್ಫ್ ಪ್ರದೇಶದ ನಡುವೆ ಕಾರ್ಯನಿರ್ವಹಿಸುವ ವಿದೇಶಿ ವಿಮಾನಯಾನ ಸಂಸ್ಥೆಗಳು ಸಹ ಕಾರ್ಯಾಚರಣೆ ಮತ್ತು ವಾಯುಪ್ರದೇಶದ ಪರಿಗಣನೆಗಳನ್ನು ಅವಲಂಬಿಸಿ ಸೀಮಿತ ಕಾರ್ಯಾಚರಣೆಗಳನ್ನು ಕೈಗೊಳ್ಳುತ್ತಿವೆ. ಪ್ರಯಾಣಿಕರ ಸುರಕ್ಷತೆಯೇ ಅತ್ಯುನ್ನತ ಆದ್ಯತೆಯಾಗಿದ್ದು, ಎಲ್ಲಾ ವಿಮಾನಯಾನ ಸಂಸ್ಥೆಗಳಿಗೆ ಪ್ರಯಾಣಿಕರೊಂದಿಗೆ ಪಾರದರ್ಶಕ ಸಂವಹನವನ್ನು ಕಾಯ್ದುಕೊಳ್ಳಲು ಮತ್ತು ಮರುಪಾವತಿ, ಮರುಬುಕಿಂಗ್ ಹಾಗೂ ಪ್ರಯಾಣಿಕ ಸಹಾಯಕ್ಕೆ ಸಂಬಂಧಿಸಿದ ನಿಯಮಾವಳಿಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಲು ಸೂಚನೆ ನೀಡಲಾಗಿದೆ.

ಇನ್ನು ನಾಗರಿಕ ವಿಮಾನಯಾನ ಸಚಿವಾಲಯದಲ್ಲಿ ಸ್ಥಾಪಿಸಲಾದ ಪ್ರಯಾಣಿಕರ ಸಹಾಯ ನಿಯಂತ್ರಣ ಕೊಠಡಿಯು ಪ್ರಯಾಣಿಕರ ಕಳವಳಗಳನ್ನು ಪರಿಹರಿಸಲು ಮತ್ತು ದೂರುಗಳನ್ನು ಪರಿಹರಿಸಲು ಸಕ್ರಿಯವಾಗಿದೆ. ನಾಗರಿಕ ವಿಮಾನಯಾನ ಸಚಿವಾಲಯದ ಸಾಮಾಜಿಕ ಜಾಲತಾಣ ಮತ್ತು ವಾಯು ಸೇವಾ ಪೋರ್ಟಲ್‌ನಲ್ಲಿ ದೂರುಗಳನ್ನು ಸಲ್ಲಿಸಬಹುದಾಗಿದೆ, (ಏಜೆನ್ಸೀಸ್​).