ಶಮಿಗೆ ಅವಕಾಶ ಡೌಟ್​! ಇಬ್ಬರಿಗೆ ರೆಸ್ಟ್​? ನ್ಯೂಜಿಲೆಂಡ್​ ವಿರುದ್ಧದ ಸರಣಿಗೆ ಟೀಮ್ ಇಂಡಿಯಾದಲ್ಲಿ ಸಾಕಷ್ಟು ಬದಲಾವಣೆ

ನವದೆಹಲಿ: ಇದೇ ಜ.11ರಿಂದ ನ್ಯೂಜಿಲೆಂಡ್ ವಿರುದ್ಧದ ಮೂರು ಪಂದ್ಯಗಳ ಏಕದಿನ ಸರಣಿ ಆರಂಭವಾಗಲಿದ್ದು, ಬಿಸಿಸಿಐ ನಾಳೆ (ಜ.03) ತಂಡವನ್ನು ಅಧಿಕೃತವಾಗಿ ಘೋಷಿಸಲಿದೆ. ಒಂದು ತಿಂಗಳ ಬ್ರೇಕ್​ ಬಳಿಕ ಭಾರತ ತಂಡ 50 ಓವರ್‌ಗಳ ಪಂದ್ಯವನ್ನಾಡಲಿದೆ. ಒಂದೆಡೆ 'ರೋಕೊ' ಜೋಡಿ ಮತ್ತೆ ಅಖಾಡಕ್ಕಿಳಿಯುತ್ತಿರುವುದು ಅಭಿಮಾನಿಗಳಲ್ಲಿ ಅತೀವ ಖುಷಿ ತಂದರೆ, ತಂಡದಲ್ಲಿ ಸಾಕಷ್ಟು ಬದಲಾವಣೆಗಳು ಆಗುವ ಸಾಧ್ಯತೆಗಳು ಕಂಡುಬಂದಿವೆ.

ಕುತ್ತಿಗೆ ನೋವಿನಿಂದ ಕೆಲವು ಸಮಯ ತಂಡದಿಂದ ಹೊರಗಿದ್ದ ಏಕದಿನ ತಂಡದ ನಾಯಕ ಶುಭಮನ್ ಗಿಲ್, ಇದೀಗ ನ್ಯೂಜಿಲೆಂಡ್​ ವಿರುದ್ಧದ ಸರಣಿಯಲ್ಲಿ ಟೀಮ್ ಇಂಡಿಯಾವನ್ನು ನಾಯಕನಾಗಿ ಮುನ್ನಡೆಸಲಿದ್ದಾರೆ.

ಈ ಸರಣಿಯಲ್ಲಿ ಸ್ಟಾರ್​ ಆಲ್​ರೌಂಡರ್​ ಹಾರ್ದಿಕ್ ಪಾಂಡ್ಯ ಮತ್ತು ವೇಗಿ ಜಸ್ಪ್ರೀತ್ ಬುಮ್ರಾಗೆ ವಿಶ್ರಾಂತಿ ಕೊಡುವ ಎಲ್ಲ ಸಾಧ್ಯತೆಗಳಿವೆ. ವರದಿಗಳ ಪ್ರಕಾರ, ಇವರಿಬ್ಬರಿಗೂ ರೆಸ್ಟ್​ ನೀಡುವ ಮೂಲಕ ಐದು ಪಂದ್ಯಗಳ ಟಿ20 ಸರಣಿಗೆ ಉಪಯೋಗಿಸಿಕೊಳ್ಳಲು ಟೀಮ್ ಮ್ಯಾನೇಜ್​ಮೆಂಟ್​ ಮುಂದಾಗಿದೆ. ಮತ್ತೊಂದೆಡೆ, ಉಪನಾಯಕ ಶ್ರೇಯಸ್ ಅಯ್ಯರ್ ಕೂಡ ಇಂಜುರಿಯಿಂದ ಸಂಪೂರ್ಣವಾಗಿ ಚೇತರಿಸಿಕೊಂಡು, ತಂಡ ಸೇರುವ ನಿರೀಕ್ಷೆಯಿದೆ.

ವೇಗಿ ಮೊಹಮ್ಮದ್​ ಶಮಿ ಅವರಿಗೆ ಏಕದಿನ, ಟಿ20 ಮತ್ತು ಟೆಸ್ಟ್ ತಂಡಗಳಲ್ಲಿ ಇಲ್ಲಿಯವರೆಗೆ ಸ್ಥಾನ ಕೊಡದ ಬಿಸಿಸಿಐ, ಪದೇ ಪದೇ ಅವರನ್ನು ಸ್ಕ್ಯಾಡ್​ನಿಂದ ಕೈಬಿಡುತ್ತಿರುವುದು ಹಲವರ ಪ್ರಶ್ನೆಗೆ ಕಾರಣವಾಗಿದೆ. ಇದು ಬಿಸಿಸಿಐಗೂ ದೊಡ್ಡ ತಲೆನೋವಾಗಿ ಪರಿಣಮಿಸಿದೆ. ಯಾಕಾಗಿ, ಶಮಿಗೆ ಅವಕಾಶ ಕೊಡುತ್ತಿಲ್ಲ ಎಂಬುದು ಕ್ರಿಕೆಟ್​ ಪ್ರಿಯರ ಬೆಂಬಿಡದೆ ಪ್ರಶ್ನೆಯಾಗಿದೆ. ಇದಕ್ಕೆ ಉತ್ತರಿಸುವುದು ಕಷ್ಟಕರವಾಗಿದೆ.