ಸೋಲಿನ ಕಣ್ಣೀರು... ಗೆಲುವಿನ ಅಬ್ಬರ! ICC ಫೈನಲ್ಸ್‌ನಲ್ಲಿ ಭಾರತದ 'ವಿಜಯ'ದ ಕಂಪ್ಲೀಟ್ ರಿಪೋರ್ಟ್ ಇಲ್ಲಿದೆ..

ಭಾರತೀಯ ಕ್ರಿಕೆಟ್‌ನ ದಿಕ್ಕನ್ನೇ ಬದಲಿಸಿದ್ದು 1983ರ ಏಕದಿನ ವಿಶ್ವಕಪ್. ಲಾರ್ಡ್ಸ್ ಮೈದಾನದಲ್ಲಿ ಅಂದು ಅಜೇಯ ವೆಸ್ಟ್ ಇಂಡೀಸ್ ತಂಡವನ್ನು ಮಣಿಸಿ ಕಪಿಲ್ ದೇವ್ ಪಡೆ ಮೊದಲ ಬಾರಿಗೆ ವಿಶ್ವವಿಜೇತರ ಪಟ್ಟ ಅಲಂಕರಿಸಿತು. ಅದಾದ ಸರಿಯಾಗಿ 28 ವರ್ಷಗಳ ನಂತರ, 2011ರಲ್ಲಿ ಮಹೇಂದ್ರ ಸಿಂಗ್ ಧೋನಿ ಅವರ ಐತಿಹಾಸಿಕ ಸಿಕ್ಸರ್ ಮೂಲಕ ಮುಂಬೈನ ವಾಂಖೆಡೆ ಕ್ರೀಡಾಂಗಣದಲ್ಲಿ ಭಾರತ ಎರಡನೇ ಬಾರಿ ಏಕದಿನ ವಿಶ್ವಕಪ್ ಎತ್ತಿ ಹಿಡಿಯಿತು.

ಐಸಿಸಿ ಚಾಂಪಿಯನ್ಸ್ ಟ್ರೋಫಿಯಲ್ಲಿ (CT) ಭಾರತ ಸದಾ ಬಲಿಷ್ಠ ತಂಡವಾಗಿ ಗುರುತಿಸಿಕೊಂಡಿದೆ. 2002ರಲ್ಲಿ ಶ್ರೀಲಂಕಾ ವಿರುದ್ಧದ ಫೈನಲ್ ಪಂದ್ಯ ಮಳೆಯಿಂದಾಗಿ ರದ್ದಾದ ಕಾರಣ ಭಾರತವನ್ನು ಜಂಟಿ ವಿಜೇತ ಎಂದು ಘೋಷಿಸಲಾಯಿತು. 2013ರಲ್ಲಿ ಇಂಗ್ಲೆಂಡ್ ವಿರುದ್ಧ ಧೋನಿ ಪಡೆ ಭರ್ಜರಿ ಜಯ ಸಾಧಿಸಿ ಟ್ರೋಫಿ ಗೆದ್ದರೆ, ಇತ್ತೀಚೆಗೆ 2025ರ ಚಾಂಪಿಯನ್ಸ್ ಟ್ರೋಫಿ ಫೈನಲ್‌ನಲ್ಲಿ ಜಯ ಸಾಧಿಸುವ ಮೂಲಕ ಭಾರತ ತನ್ನ ಪಾರಮ್ಯವನ್ನು ಮುಂದುವರೆಸಿದೆ.

ಗೆಲುವಿನ ಸಿಹಿ ಎಷ್ಟು ಹಿತವೋ, ಫೈನಲ್‌ನಲ್ಲಿ ಅನುಭವಿಸಿದ ಸೋಲು ಅಷ್ಟೇ ಕಹಿಯಾಗಿದೆ. ಟೀಮ್ ಇಂಡಿಯಾ 14 ಫೈನಲ್‌ಗಳಲ್ಲಿ 7 ಬಾರಿ ರನ್ನರ್-ಅಪ್ ಸ್ಥಾನಕ್ಕೆ ತೃಪ್ತಿಪಡಬೇಕಾಯಿತು.

2021 & 2023 WTC ಫೈನಲ್ಸ್: ಟೆಸ್ಟ್ ವಿಶ್ವಕಪ್‌ನ ಸತತ ಎರಡು ಫೈನಲ್‌ಗಳಲ್ಲಿ ಭಾರತ ಕ್ರಮವಾಗಿ ನ್ಯೂಜಿಲೆಂಡ್ ಮತ್ತು ಆಸ್ಟ್ರೇಲಿಯಾ ವಿರುದ್ಧ ಸೋಲನುಭವಿಸಿತು.

2023 ಏಕದಿನ ವಿಶ್ವಕಪ್: ಭಾರತದಲ್ಲೇ ನಡೆದ ಈ ಟೂರ್ನಿಯಲ್ಲಿ ಅಜೇಯವಾಗಿ ಫೈನಲ್ ತಲುಪಿದ್ದರೂ, ಅಂತಿಮ ಪಂದ್ಯದಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಸೋತು ಕೋಟ್ಯಂತರ ಅಭಿಮಾನಿಗಳು ಕಣ್ಣೀರು ಹಾಕುವಂತಾಯಿತು.

ಸೋಲು-ಗೆಲುವುಗಳನ್ನು ಸಮಾನವಾಗಿ ಸ್ವೀಕರಿಸುತ್ತಾ ಮುನ್ನಡೆಯುತ್ತಿರುವ ಭಾರತ, ವಿಶ್ವ ಕ್ರಿಕೆಟ್‌ನಲ್ಲಿ ಅತಿ ಹೆಚ್ಚು ಫೈನಲ್ ಆಡಿದ ತಂಡಗಳಲ್ಲಿ ಒಂದಾಗಿದೆ. ತಂಡದಲ್ಲಿರುವ ಯುವ ಪ್ರತಿಭೆಗಳು ಮತ್ತು ಹಿರಿಯ ಆಟಗಾರರ ಸಮನ್ವಯವು ಮುಂಬರುವ ಐಸಿಸಿ ಟೂರ್ನಿಗಳಲ್ಲಿ ಭಾರತಕ್ಕೆ ಮತ್ತಷ್ಟು ಕೀರ್ತಿ ತರುವುದರಲ್ಲಿ ಸಂಶಯವಿಲ್ಲ,(ಏಜೆನ್ಸೀಸ್​).