ದ್ವಾರಕಾ ಹಾರರ್; ಮಗನ ಹೆಣದ ಮುಂದೆ 4 ಗಂಟೆ ಕಾದಿದ್ದೇನೆ..! ಮುಗಿಲು ಮುಟ್ಟಿದ ಸಾಹಿಲ್​ ತಾಯಿಯ ಆಕ್ರಂದನ | Sahil Dhaneshra

ಫೆಬ್ರವರಿ 3 ರಂದು ಸಾಹಿಲ್ ಅವರ ಮೋಟಾರ್ ಸೈಕಲ್ ಭೀಕರ ಅಪಘಾತಕ್ಕೀಡಾಗಿತ್ತು. ವಾಹನದ ತುರ್ತು ಸಂಪರ್ಕ ಸಂಖ್ಯೆಯಾಗಿ ದಾಖಲಾಗಿದ್ದ ತಾಯಿ ಇನ್ಮಾ ಅವರಿಗೆ ಪೊಲೀಸರಿಂದ ಕರೆ ಬಂದಾಗ, ನಿಮ್ಮ ಮಗ ಸ್ಥಳದಲ್ಲೇ ಮೃತಪಟ್ಟಿದ್ದಾನೆ ಎಂಬ ಆಘಾತಕಾರಿ ಸುದ್ದಿ ಸಿಕ್ಕಿತ್ತು. ತಕ್ಷಣವೇ ಸ್ಥಳಕ್ಕೆ ಧಾವಿಸಿದ ತಾಯಿಗೆ ಕಂಡಿದ್ದು ರಸ್ತೆಯ ಮೇಲೆ ರಕ್ತದ ಮಡುವಿನಲ್ಲಿ ಬಿದ್ದಿದ್ದ ಮಗನ ದೇಹ.

ಈ ಬಗ್ಗೆ ಮಾತನಾಡಿರುವ ಇನ್ಮಾ ಮಕನ್, ಅಪಘಾತದ ನಂತರದ ಪರಿಸ್ಥಿತಿ ಮಗನ ಸಾವಿಗಿಂತಲೂ ಭೀಕರವಾಗಿತ್ತು ಎಂದು ಕಂಬನಿ ಮಿಡಿದಿದ್ದಾರೆ.

ನಾಲ್ಕು ಗಂಟೆಗಳ ಕಾಲ ಹೆಣದ ಮುಂದೆ ಕಾಯುವಿಕೆ: ನನ್ನ ಮಗನ ದೇಹವನ್ನು ನೀಡುವಂತೆ ನಾನು ನಾಲ್ಕು ಗಂಟೆಗಳ ಕಾಲ ಪೊಲೀಸರನ್ನು ಬೇಡಿಕೊಂಡೆ. ಆದರೆ ಅವರು ಕೇವಲ ಲಿಸ್ಟ್ ಮಾಡುವುದರಲ್ಲಿ ಮತ್ತು ಫಾರ್ಮಾಲಿಟಿ ಪೂರೈಸುವುದರಲ್ಲಿ ಬ್ಯುಸಿಯಾಗಿದ್ದರು ಎಂದು ಅಳಲು ತೋಡಿಕೊಂಡಿದ್ದಾರೆ.

ಆಂಬ್ಯುಲೆನ್ಸ್ ಇದ್ದರೂ ಸಿಗದ ನೆರವು: ಸ್ಥಳದಲ್ಲಿ ಆಂಬ್ಯುಲೆನ್ಸ್ ನಿಂತಿದ್ದರೂ, ಮಗನನ್ನು ಖಾಸಗಿ ಆಸ್ಪತ್ರೆಗೆ ಸಾಗಿಸಲು ಪೊಲೀಸರು ಅಥವಾ ಸಿಬ್ಬಂದಿ ಸಹಕರಿಸಲಿಲ್ಲ. ತಕ್ಷಣದ ವೈದ್ಯಕೀಯ ನೆರವು ಸಿಕ್ಕಿದ್ದರೆ ಮಗ ಬದುಕುತ್ತಿದ್ದನೇನೋ ಎಂಬ ಸಂಶಯ ಅವರನ್ನು ಕಾಡುತ್ತಿದೆ.

ಈ ಪ್ರಕರಣವು ಈಗ ವಿವಾದದ ಕೇಂದ್ರಬಿಂದುವಾಗಿದೆ. ಆರಂಭದಲ್ಲಿ ಪೊಲೀಸರು ಸಾಹಿಲ್ ತಪ್ಪು ದಾರಿಯಲ್ಲಿ ವಾಹನ ಚಲಾಯಿಸುತ್ತಿದ್ದ ಎಂದು ವರದಿ ನೀಡಿದ್ದರು. ಆದರೆ, ಇದನ್ನು ತಾಯಿ ಇನ್ಮಾ ಬಲವಾಗಿ ವಿರೋಧಿಸಿದ್ದಾರೆ. ಸುತ್ತಮುತ್ತಲಿನ ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿದಾಗ ಪೊಲೀಸರ ವಾದ ಸುಳ್ಳೆಂದು ಸಾಬೀತಾಗುತ್ತಿದೆ ಎಂದು ಇನ್ಮಾ ವಾದಿಸುತ್ತಿದ್ದಾರೆ. ಪೊಲೀಸರು ಅಪಘಾತದ ತನಿಖೆಯನ್ನು ಹಾದಿ ತಪ್ಪಿಸಲು ಪ್ರಯತ್ನಿಸುತ್ತಿದ್ದಾರೆ ಎಂಬುದು ಇನ್ಮಾ ನೇರವಾಗಿ ಆರೋಪಿಸಿದ್ದಾರೆ.

ತನ್ನ ಮಗನನ್ನು ಕಳೆದುಕೊಂಡ ನೋವಿನ ನಡುವೆಯೂ, ತಾಯಿ ಇನ್ಮಾ ಈಗ ಸತ್ಯಕ್ಕಾಗಿ ಹೋರಾಡುತ್ತಿದ್ದಾರೆ. ವ್ಯವಸ್ಥೆಯ ನಿರ್ಲಕ್ಷ್ಯ ಮತ್ತು ಮಗನ ಸಾವಿಗೆ ಕಾರಣವಾದ ನೈಜ ಸಂಗತಿಗಳನ್ನು ಹೊರತರುವಂತೆ ಅವರು ಸರ್ಕಾರವನ್ನು ಒತ್ತಾಯಿಸಿದ್ದಾರೆ,(ಏಜೆನ್ಸೀಸ್).