ಹೋರ್ಮುಜ್ ಬಂದ್; ಟ್ರಂಪ್ ನಿರ್ಧಾರಕ್ಕೆ ಸೌದಿ ಗರಂ? ಅಮೆರಿಕದ ಬ್ಲಾಕೇಡ್ ಪ್ಲ್ಯಾನ್‌ಗೆ ಬ್ರೇಕ್! ದೊಡ್ಡಣ್ಣನ ಮೇಲೆ ಒತ್ತಡ ಹೇರುತ್ತಿರುವುದೇಕೆ ರಿಯಾದ್? Saudi Arabia

ದಶಕಗಳಿಂದ ಸ್ಥಿರವಾಗಿದ್ದ ಮಧ್ಯಪ್ರಾಚ್ಯದ ತೈಲ ಮತ್ತು ಅನಿಲ ರಾಜತಾಂತ್ರಿಕತೆಯು ಈಗ ಅಯೋಮಯವಾಗಿದೆ. ಇರಾನ್‌ನ ಬಂದರುಗಳನ್ನು ಮುಚ್ಚುವ ಟ್ರಂಪ್ ನಿರ್ಧಾರವು ಪರಿಸ್ಥಿತಿಯನ್ನು ಮತ್ತಷ್ಟು ಹದಗೆಡಿಸಬಹುದು ಎಂದು ರಿಯಾದ್ ಹೆದರುತ್ತಿದೆ. ಅಲ್ಲದೆ, ಅಮೆರಿಕದ ದಿಗ್ಬಂಧನಕ್ಕೆ ಪ್ರತಿಯಾಗಿ ಇರಾನ್ ಮತ್ತಷ್ಟು ಆಕ್ರಮಣಕಾರಿ ಹೆಜ್ಜೆ ಇಟ್ಟರೆ, ಅದು ಕೇವಲ ಹೋರ್ಮುಜ್ ಜಲಸಂಧಿಗೆ ಸೀಮಿತವಾಗದೆ ಇತರ ಪ್ರಮುಖ ಹಡಗು ಮಾರ್ಗಗಳ ಮೇಲೂ ಪರಿಣಾಮ ಬೀರಲಿದೆ ಎಂದು ವಾಲ್ ಸ್ಟ್ರೀಟ್ ಜರ್ನಲ್ ವರದಿ ಮಾಡಿದೆ.

ವಿಶೇಷವಾಗಿ, ಇರಾನ್ ತನ್ನ ಮಿತ್ರಪಡೆಯಾದ ಯೆಮನ್‌ನ ಹೌತಿ ಬಂಡುಕೋರರನ್ನು ಬಳಸಿಕೊಂಡು ಬಾಬ್ ಅಲ್-ಮಂದಬ್ ಜಲಸಂಧಿಯನ್ನು ಮುಚ್ಚಬಹುದು ಎಂಬುದು ಸೌದಿಯ ಪ್ರಬಲ ಆತಂಕವಾಗಿದೆ. ಇದು ಕೆಂಪು ಸಮುದ್ರದ ಮೂಲಕ ನಡೆಯುವ ತೈಲ ರಫ್ತಿಗೆ ಅತಿ ದೊಡ್ಡ ಹೊಡೆತ ನೀಡಲಿದೆ.

ಕಳೆದ ಆರು ವಾರಗಳಿಂದ ನಡೆಯುತ್ತಿರುವ ಸಂಘರ್ಷವು ಅರಬ್ ರಾಷ್ಟ್ರಗಳ ಆರ್ಥಿಕ ತಳಹದಿಯನ್ನೇ ನಡುಗಿಸಿದೆ. ಹೋರ್ಮುಜ್ ಜಲಸಂಧಿಯ ಮೇಲೆ ಇರಾನ್ ಹೊಂದಿರುವ ಹಿಡಿತದಿಂದಾಗಿ ದಿನವೊಂದಕ್ಕೆ ಸುಮಾರು 13 ಮಿಲಿಯನ್ ಬ್ಯಾರೆಲ್ ತೈಲ ರಫ್ತು ಸ್ಥಗಿತಗೊಂಡಿದೆ. ಇದರ ನೇರ ಪರಿಣಾಮವಾಗಿ ಜಾಗತಿಕ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ಬೆಲೆ ಪ್ರತಿ ಬ್ಯಾರೆಲ್‌ಗೆ 100 ಡಾಲರ್ ಗಡಿ ದಾಟಿದೆ.

ಸೌದಿ ಅರೇಬಿಯಾ ತನ್ನ ತೈಲ ರಫ್ತನ್ನು ಮರುಸ್ಥಾಪಿಸಲು ಮರುಭೂಮಿಯ ಮೂಲಕ ಪೈಪ್‌ಲೈನ್ ಅಳವಡಿಸಿ ಕೆಂಪು ಸಮುದ್ರಕ್ಕೆ ತಲುಪಿಸುವ ಸಾಹಸ ಮಾಡಿದೆ. ಆದರೆ, ಈಗ ಇರಾನ್ ಕೆಂಪು ಸಮುದ್ರದ ಪ್ರವೇಶ ದ್ವಾರವನ್ನೇ ಮುಚ್ಚುವ ಬೆದರಿಕೆ ಹಾಕಿರುವುದು ಸೌದಿಯ ಪರ್ಯಾಯ ವ್ಯವಸ್ಥೆಗೂ ಕುತ್ತು ತಂದಿದೆ.

ಇರಾನ್‌ನ ರೆವಲ್ಯೂಷನರಿ ಗಾರ್ಡ್ಸ್‌ಗೆ ಹತ್ತಿರವಿರುವ ತಸ್ನಿಮ್ ಸುದ್ದಿ ಸಂಸ್ಥೆಯ ಪ್ರಕಾರ, ಅಮೆರಿಕ ತನ್ನ ಬಂದರುಗಳನ್ನು ತಡೆದರೆ ತಾನು ಸುಮ್ಮನಿರುವುದಿಲ್ಲ ಎಂದು ಇರಾನ್ ಸ್ಪಷ್ಟಪಡಿಸಿದೆ. ಇರಾನ್ ಪರಮೋಚ್ಚ ನಾಯಕನ ಸಲಹೆಗಾರ ಅಲಿ ಅಕ್ಬರ್ ವೇಲಾಯತಿ, ಯುಎಸ್​ ಮೂರ್ಖತನದ ನಿರ್ಧಾರ ಕೈಗೊಂಡರೆ, ಜಾಗತಿಕ ಇಂಧನ ಹರಿವನ್ನು ಒಂದೇ ಒಂದು ಸಂಕೇತದ ಮೂಲಕ ನಾವು ಸ್ಥಗಿತಗೊಳಿಸಬಲ್ಲೆವು ಎಂದು ಎಚ್ಚರಿಸಿದ್ದಾರೆ. ಅಷ್ಟೇ ಅಲ್ಲದೆ, ಇರಾನ್‌ನ ಬಂದರುಗಳು ಅಸುರಕ್ಷಿತವಾದರೆ, ಪರ್ಷಿಯನ್ ಕೊಲ್ಲಿಯ ಯಾವುದೇ ಬಂದರು ಸುರಕ್ಷಿತವಾಗಿರಲು ಬಿಡುವುದಿಲ್ಲ ಎಂದು ಇರಾನ್ ಸಶಸ್ತ್ರ ಪಡೆಗಳು ಗುಡುಗಿವೆ.

ಯೆಮನ್‌ನ ಕರಾವಳಿ ಪ್ರದೇಶದ ಮೇಲೆ ನಿಯಂತ್ರಣ ಹೊಂದಿರುವ ಹೌತಿಗಳು ಇರಾನ್‌ನ ಪ್ರತಿರೋಧದ ಅಕ್ಷ ಭಾಗವಾಗಿದ್ದಾರೆ. ಗಾಜಾ ಸಂಘರ್ಷದ ಸಮಯದಲ್ಲಿ ಹೌತಿಗಳು ಸಮುದ್ರ ಮಾರ್ಗದಲ್ಲಿ ನಡೆಸಿದ ದಾಳಿಗಳು ಅವರ ಸಾಮರ್ಥ್ಯವನ್ನು ಜಗತ್ತಿಗೆ ತೋರಿಸಿವೆ. ಈಗ ಇರಾನ್ ಒತ್ತಡ ಹೇರಿದರೆ ಹೌತಿಗಳು ಬಾಬ್ ಅಲ್-ಮಂದಬ್ ಜಲಸಂಧಿಯನ್ನು ಸುಲಭವಾಗಿ ಬಂದ್ ಮಾಡಬಲ್ಲರು ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಸೌದಿಯ ಇಷ್ಟೆಲ್ಲಾ ಆತಂಕಗಳ ನಡುವೆಯೂ ಶ್ವೇತಭವನವು ತನ್ನ ನಿರ್ಧಾರಕ್ಕೆ ಅಂಟಿಕೊಂಡಿದೆ. ಅಧ್ಯಕ್ಷ ಟ್ರಂಪ್ ಅವರು ಹೋರ್ಮುಜ್ ಜಲಸಂಧಿಯನ್ನು ಮುಕ್ತವಾಗಿಡಲು ಬದ್ಧರಾಗಿದ್ದಾರೆ ಮತ್ತು ಇರಾನ್ ಅಮೆರಿಕವನ್ನು ಅಥವಾ ಇತರ ಯಾವುದೇ ದೇಶವನ್ನು ಬ್ಲ್ಯಾಕ್‌ಮೇಲ್ ಮಾಡಲು ಬಿಡುವುದಿಲ್ಲ ಎಂದು ಶ್ವೇತಭವನದ ವಕ್ತಾರರು ತಿಳಿಸಿದ್ದಾರೆ. ಆದರೆ, ವಾಸ್ತವದಲ್ಲಿ ಅಮೆರಿಕಕ್ಕೆ ಈ ಜಲಸಂಧಿಯನ್ನು ಬಲವಂತವಾಗಿ ತೆರೆದಿಡುವುದು ದೊಡ್ಡ ಸವಾಲಾಗಿ ಪರಿಣಮಿಸಿದೆ.

ಇಷ್ಟು ದಿನ ಇರಾನ್ ಮತ್ತು ಅದರ ನೆರೆಯ ರಾಷ್ಟ್ರಗಳಾದ ಯುಎಇ, ಕತಾರ್, ಬಹ್ರೇನ್ ಮತ್ತು ಇರಾಕ್ ನಡುವೆ ಒಂದು ಅಲಿಖಿತ ಒಪ್ಪಂದವಿತ್ತು. ಯಾವುದೇ ಯುದ್ಧ ನಡೆದರೂ ಅದು ಆರ್ಥಿಕ ಹಿತಾಸಕ್ತಿಗೆ ಧಕ್ಕೆ ತರಬಾರದು ಎಂಬುದು ಈ ರಾಷ್ಟ್ರಗಳ ಆಶಯವಾಗಿತ್ತು. ಆದರೆ ಈಗ ಹೋರ್ಮುಜ್ ಜಲಸಂಧಿಯ ಇತಿಹಾಸದಲ್ಲಿ ಮೊದಲ ಬಾರಿಗೆ ಬಂದ್ ಆಗಿರುವುದು ಈ ಎಲ್ಲಾ ಸಂಬಂಧಗಳನ್ನು ಪುಡಿಪುಡಿ ಮಾಡಿದೆ.

ಒಟ್ಟಾರೆಯಾಗಿ, ಈ ಯುದ್ಧವು ಇರಾನ್‌ನ ಹಿಡಿತದೊಂದಿಗೆ ಅಂತ್ಯಗೊಳ್ಳಬಾರದು ಎಂಬುದು ಗಲ್ಫ್ ರಾಷ್ಟ್ರಗಳ ಇಚ್ಛೆ. ಆದರೆ ಅದೇ ಸಮಯದಲ್ಲಿ, ಪೂರ್ಣ ಪ್ರಮಾಣದ ಆರ್ಥಿಕ ವಿನಾಶವನ್ನು ತಡೆಯಲು ಅವು ಅಮೆರಿಕದ ಮೇಲೆ ರಾಜತಾಂತ್ರಿಕ ಒತ್ತಡವನ್ನು ಮುಂದುವರಿಸಿವೆ. ಮುಂದಿನ ದಿನಗಳಲ್ಲಿ ಟ್ರಂಪ್ ಆಡಳಿತವು ಈ ಒತ್ತಡಕ್ಕೆ ಮಣಿಯುತ್ತದೆಯೇ ಅಥವಾ ಯುದ್ಧ ಮತ್ತೊಂದು ಹಂತಕ್ಕೆ ತಲುಪುತ್ತದೆಯೇ ಎಂಬುದನ್ನು ಕಾದು ನೋಡಬೇಕಿದೆ,(ಏಜೆನ್ಸೀಸ್).