ಮುಸ್ಲಿಮರ ಚಿತ್ರ ಗುರಿಯಾಗಿಸಿ ಗನ್ ಪಾಯಿಂಟ್; ವಿವಾದದ ಕಿಡಿಹೊತ್ತಿಸಿದ ಸಿಎಂ ಹಿಮಂತ ಬಿಸ್ವಾ ಶರ್ಮಾ ವಿಡಿಯೋ ಕ್ಲಿಪ್; ಕಾಂಗ್ರೆಸ್ ವಾಗ್ದಾಳಿ | Gunpoint

ಗುವಾಹಟಿ: ಅಸ್ಸಾಂ ಸಿಎಂ ಹಿಮಂತ ಬಿಸ್ವಾ ಶರ್ಮಾ ಅವರು ಮುಸ್ಲಿಮರ ಚಿತ್ರಗಳಿಗೆ ಗನ್ ಗುರಿ ಪಾಯಿಂಟ್ ಮಾಡ್ತಿರುವ ವಿಡಿಯೋವನ್ನು ಅಸ್ಸಾಂ ಬಿಜೆಪಿ ಘಟಕ ತನ್ನ ಎಕ್ಸ್​ ಖಾತೆಯಲ್ಲಿ ಹಂಚಿಕೊಂಡಿದ್ದು ರಾಜಕೀಯ ವಿವಾದದ ಕಿಡಿ ಹೊತ್ತಿಸಿದೆ. ವಿರೋಧ ಪಕ್ಷಗಳಿಂದ ಭಾರಿ ಟೀಕೆ ವ್ಯಕ್ತವಾಗುತ್ತಿದ್ದಂತೆ ಅದನ್ನು ಅಳಿಸಿ ಹಾಕಲಾಗಿದೆ.

ಅಸ್ಸಾಂ ಬಿಜೆಪಿ ಘಟಕ ತನ್ನ ಎಕ್ಸ್​ ಖಾತೆಯಲ್ಲಿ ಪೋಸ್ಟ್ ಮಾಡಿದ್ದ ವಿಡಿಯೋದಲ್ಲಿ,  ಅಸ್ಸಾಂ ಕಾಂಗ್ರೆಸ್ ಮುಖ್ಯಸ್ಥ ಗೌರವ್ ಗೊಗೊಯ್ ಮತ್ತು ಮುಸ್ಲಿಂ ವ್ಯಕ್ತಿಯೊಬ್ಬರ ಟೋಪಿ ಧರಿಸಿದ ಚೌಕಟ್ಟಿನ ಛಾಯಾಚಿತ್ರವನ್ನು ಸಿಎಂ ಶರ್ಮಾ ಶೂಟ್ ಮಾಡುತ್ತಿರುವ ರೀತಿ ತೋರಿಸಲಾಗಿದೆ. ಫೋಟೋವನ್ನು ನೇತುಹಾಕಲಾಗಿದ್ದ ಗೋಡೆಯ ಮೇಲೆ ‘ನೋ ಕರುಣೆ’ ಎಂದು ಬರೆದಿದ್ದು,  ಪೋಸ್ಟ್‌ಗೆ ’ಪಾಯಿಂಟ್ ಬ್ಲಾಂಕ್ ಶಾಟ್’ ಎಂಬ ಶೀರ್ಷಿಕೆ ನೀಡಿತ್ತು.

ದೇಶದ ಎಲ್ಲಾ ವಿರೋಧ ಪಕ್ಷಗಳಿಂದ ಟೀಕೆಗೆ ಗುರಿಯಾಗುತ್ತಿದ್ದಂತೆ ಅಸ್ಸಾಂ ಬಿಜೆಪಿ ಘಟಕ ಅದನ್ನು ತನ್ನ ಖಾತೆಯಿಂದ ಡಿಲಿಟ್ ಮಾಡಿದೆ. ಆದರೆ ಇದನ್ನೂ ಟ್ರೋಲ್ ಎಂದು ಪರಿಗಣಿಸಬೇಡಿ, ಇದು ಮುಸ್ಲಿಮರ ನರಮೇಧಕ್ಕೆ ಕರೆ ನೀಡುವ, ಪ್ಯಾಸಿಸ್ಟ್ ಆಡಳಿತ ದಶಕದಿಂದ ಕಂಡಿರುವ ಕನಸು ಎಂದು ಕಾಂಗ್ರೆಸ್ ವಾಗ್ದಾಳಿ ನಡೆಸಿದೆ.

ಈ ಕುರಿತು ಕಾಂಗ್ರೆಸ್ ಎಕ್ಸ್​ನಲ್ಲಿ ಪೋಸ್ಟ್ ಮಾಡಿದ್ದು, ಅಸ್ಸಾಂ ಬಿಜೆಪಿಯ ಅಧಿಕೃತ ಎಕ್ಸ್ ಖಾತೆಯಿಂದ, ಅಲ್ಪಸಂಖ್ಯಾತರ ಹತ್ಯೆಯನ್ನು ವೈಭವೀಕರಿಸುವ ವೀಡಿಯೊವನ್ನು ಪೋಸ್ಟ್ ಮಾಡಲಾಗಿದೆ. ಇದು ತೀವ್ರ ಅಸಹ್ಯಕರ ಮತ್ತು ಗೊಂದಲದ ಸಂಗತಿಯಾಗಿದ್ದು, ಇದನ್ನು ಯಾದೃಚ್ಛಿಕ ಟ್ರೋಲ್ ವಿಷಯವೆಂದು ತಳ್ಳಿಹಾಕಲಾಗುವುದಿಲ್ಲ. ಇದು ಸಾಮೂಹಿಕ ಹಿಂಸಾಚಾರ ಮತ್ತು ನರಮೇಧಕ್ಕೆ ಕರೆ ನೀಡುತ್ತದೆ ಎಂದು ಕಿಡಿಕಾರಿದೆ.

ದಶಕಗಳಿಂದ ಈ ದ್ವೇಷವನ್ನು ಇಟ್ಟುಕೊಂಡು ಕಳೆದ 11 ವರ್ಷಗಳಲ್ಲಿ ಅದನ್ನು ಸಾಮಾನ್ಯಗೊಳಿಸಲು ಪ್ರಯತ್ನಿಸಿದ ಈ ಫ್ಯಾಸಿಸ್ಟ್ ಆಡಳಿತದ ನಿಜವಾದ ಮುಖದ ಪ್ರತಿಬಿಂಬವಾಗಿದೆ. ವಿಷಯದ ಗಂಭೀರತೆಯನ್ನು ಪರಿಗಣಿಸಿ, ಸಮಾಜದಲ್ಲಿ ಅಸಾಮರಸ್ಯ ಮತ್ತು ವಿಷವನ್ನು ಹರಡುವ ಈ ಕೃತ್ಯದ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಬೇಕು ಎಂದು ಕಾಂಗ್ರೆಸ್ ಒತ್ತಾಯಿಸಿದೆ.

ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ಕೆ.ಸಿ.ವೇಣುಗೋಪಾಲ್ ಎಕ್ಸ್​ನಲ್ಲಿ ಪೋಸ್ಟ್ ಮಾಡಿದ್ದು, ಅಸ್ಸಾಂ ಬಿಜೆಪಿ ಘಟಕ ಪೋಸ್ಟ್ ಮಾಡಿರುವ ಸಿಎಂ ಶರ್ಮಾ ವಿಡಿಯೋ ಅನ್ನು ಟ್ರೋಲ್ ವಿಷಯವೆಂದು ನಿರ್ಲಕ್ಷಿಸಬಹುದಾದ ನಿರುಪದ್ರವಿ ವೀಡಿಯೊ ಅಲ್ಲ, ಇದು ಮೇಲಿನಿಂದ ಹರಡಿದ ವಿಷ, ಮತ್ತು ಇದಕ್ಕೆ ಪರಿಣಾಮಗಳು ಉಂಟಾಗಬೇಕು. ನ್ಯಾಯಾಂಗ ಇದರ ಬಗ್ಗೆ ಕ್ರಮಕೈಗೊಳ್ಳಬೇಕು ಎಂದು ವಾಗ್ದಾಳಿ ನಡೆಸಿದ್ದಾರೆ.

ತೃಣಮೂಲ ಕಾಂಗ್ರೆಸ್ ಕೂಡ ಅಸ್ಸಾಂ ಬಿಜೆಪಿ ಘಟಕ ಮತ್ತು ಸಿಎಂ ಹಿಮಂತ ಬಿಸ್ವಾ ಶರ್ಮಾ ವಿರುದ್ಧ ಕ್ರಮಕೈಗೊಳ್ಳುವಂತೆ ಒತ್ತಾಯಿಸಿದ್ದು, ಈ ಪೋಸ್ಟ್ ಭಾರತೀಯ ರಾಜಕೀಯವನ್ನು ರಕ್ತದಾಹಾ, ಸಾಮಾನ್ಯೀಕರಣಗೊಂಡ ದ್ವೇಷವನ್ನು ಪ್ರತಿಬಿಂಬಿಸುತ್ತದೆ. ಇದೇ ವ್ಯಕ್ತಿ ಈ ಹಿಂದೆ ಅಲ್ಪಸಂಖ್ಯಾತರನ್ನು ರಿಕ್ಷಾ ಶುಲ್ಕ ಕಡಿಮೆ ನೀಡುವ ಮೂಲಕ ಕಿರುಕುಳ ನೀಡುವಂತೆ, ರಾಜಕೀಯ ಆಚರಣೆಯಾಗಿ ನಾಗರಿಕರಿಗೆ ಸಣ್ಣಪುಟ್ಟ ಕ್ರೌರ್ಯದಲ್ಲಿ ತರಬೇತಿ ನೀಡುವಂತೆ ಒತ್ತಾಯಿಸಿದ್ದ. ಆದರೆ ಈಗ ಕ್ರೌರ್ಯವು ಬೃಹತ್ ಪ್ರಮಾಣದಲ್ಲಿ ಹೋಗಿದೆ.  ಅವರು ರಕ್ತಕ್ಕಾಗಿ ಹಂಬಲಿಸುತ್ತಿದ್ದಾರೆ ಎಂದು ಆಕ್ರೋಶ ವ್ಯಕ್ತಪಡಿಸಿದೆ (ಏಜೆನ್ಸೀಸ್).