ಸ್ನಾನ ಮಾಡುವಾಗ ಮೊಳಗಿದ ಫೈರ್ ಅಲಾರ್ಮ್: ಆಸ್ಟ್ರೇಲಿಯಾದಲ್ಲಿ ಭಾರತೀಯ ಮಹಿಳೆಗೆ ಬಿತ್ತು 1.3 ಲಕ್ಷ ರೂ. ದಂಡ! Fire alarm

ಸಿಡ್ನಿ: ಸ್ನಾನದ ವೇಳೆ ಎದ್ದ ಆವಿಯಿಂದಾಗಿ ಬಿಲ್ಡಿಂಗ್‌ನ ಫೈರ್ ಅಲಾರ್ಮ್ ( Fire alarm ) ಸೌಂಡ್ ಆನ್​ ಆಗಿ, ಭಾರತೀಯ ಮಹಿಳೆಯೊಬ್ಬರಿಗೆ ಬರೋಬ್ಬರಿ 1.3 ಲಕ್ಷ ರೂಪಾಯಿ ದಂಡ ವಿಧಿಸಿರುವ ಆಘಾತಕಾರಿ ಘಟನೆಯು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ. ಆಸ್ಟ್ರೇಲಿಯಾದಲ್ಲಿ ನಡೆದ ಈ ಅಪರೂಪದ ಹಾಗೂ ಅಚ್ಚರಿಯ ಘಟನೆಯ ಸಂಪೂರ್ಣ ವಿವರ ಇಲ್ಲಿದೆ.

ಆಸ್ಟ್ರೇಲಿಯಾದಲ್ಲಿ ನೆಲೆಸಿರುವ ವಮಿಕಾ (Vamika) ಎಂಬ ಭಾರತೀಯ ಮಹಿಳೆ, ತಮಗೆ ಎದುರಾದ ಈ ಕಹಿ ಅನುಭವವನ್ನು ಇನ್‌ಸ್ಟಾಗ್ರಾಮ್ ವಿಡಿಯೋ ಮೂಲಕ ಹಂಚಿಕೊಂಡಿದ್ದಾರೆ. ಚಳಿ ಹೆಚ್ಚಿದ್ದ ಕಾರಣ ಸ್ನಾನ ಮಾಡುವಾಗ ಅವರು ಬಾತ್‌ರೂಮ್‌ನ ಎಕ್ಸಾಸ್ಟ್ ಫ್ಯಾನ್ (exhaust fan) ಆನ್ ಮಾಡಿರಲಿಲ್ಲ. ಆದರೆ ಕೆಲವೇ ನಿಮಿಷಗಳಲ್ಲಿ ಸ್ನಾನದ ಕೋಣೆಯಿಂದ ಹೊರಬಂದ ಆವಿಯು, ಬಾತ್‌ರೂಮ್ ಸಮೀಪದಲ್ಲೇ ಅಳವಡಿಸಲಾಗಿದ್ದ ಫೈರ್ ಅಲಾರ್ಮ್ ಅನ್ನು ಧ್ವನಿಸುವಂತೆ ಮಾಡಿದೆ.

ಆರಂಭದಲ್ಲಿ ಇದು ಎಂದಿನಂತೆ ಯಾವುದಾದರೂ ಅಗ್ನಿಶಾಮಕ ತಾಲೀಮು ಇರಬಹುದು ಎಂದುಕೊಂಡಿದ್ದ ವಮಿಕಾಗೆ, ಬಿಲ್ಡಿಂಗ್ ಮ್ಯಾನೇಜರ್ ನೇರವಾಗಿ ಅವರ ಅಪಾರ್ಟ್‌ಮೆಂಟ್‌ಗೆ ಬಂದಾಗ ಅಸಲಿ ವಿಷಯ ತಿಳಿದುಬಂದಿದೆ. ಕೇವಲ ಐದು ನಿಮಿಷಗಳ ಸಾಮಾನ್ಯ ಸ್ನಾನದ ಆವಿಯಿಂದಲೇ ಅಲಾರ್ಮ್ ಮೊಳಗಿದೆ ಎಂದು ತಿಳಿದು ಅವರು ಆಶ್ಚರ್ಯಚಕಿತರಾದರು. ಆದರೆ ಪರಿಸ್ಥಿತಿಯ ಗಂಭೀರತೆಯನ್ನು ಪರಿಗಣಿಸಿದ ಆಸ್ಟ್ರೇಲಿಯಾದ ಅಗ್ನಿಶಾಮಕ ಸೇವೆಗಳು, ಮುನ್ಸೂಚನೆ ನೀಡದೆ ನೇರವಾಗಿ 1,800 ಆಸ್ಟ್ರೇಲಿಯನ್ ಡಾಲರ್‌ಗಳಷ್ಟು (ಸುಮಾರು 1.3 ಲಕ್ಷ ರೂ.) ಭಾರಿ ಮೊತ್ತದ ದಂಡವನ್ನು ವಿಧಿಸಿವೆ.

ಈ ವಿಡಿಯೋ ವೈರಲ್ ಆದ ಬೆನ್ನಲ್ಲೇ ನೆಟ್ಟಿಗರ ನಡುವೆ ತೀವ್ರ ವಾಗ್ವಾದ ಆರಂಭವಾಗಿದೆ. ಸಾಮಾನ್ಯ ಸ್ನಾನದ ಆವಿಗೆ ಅಲಾರ್ಮ್ ಸಕ್ರಿಯಗೊಳ್ಳಲು ಬಿಲ್ಡಿಂಗ್ ವ್ಯವಸ್ಥೆಯ ದೋಷವೇ ಕಾರಣವೇ ಎಂಬ ಪ್ರಶ್ನೆ ಮೂಡಿದೆ. ಅಲ್ಲದೆ, ಮೊದಲ ಬಾರಿಗೆ ಇಂತಹ ಪ್ರಮಾದ ನಡೆದಾಗ ಎಚ್ಚರಿಕೆ ಅಥವಾ ವಾರ್ನಿಂಗ್ ನೀಡದೆ ನೇರವಾಗಿ ಭಾರೀ ದಂಡ ವಿಧಿಸಿರುವುದು ಎಷ್ಟು ಸರಿ ಎಂದು ಸಾರ್ವಜನಿಕರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ, (ಏಜೆನ್ಸೀಸ್​).