ಅಮೆರಿಕಾದಲ್ಲಿ ಮತ್ತೊಬ್ಬ ವ್ಯಕ್ತಿಯನ್ನು ಕೊಂದ ಫೆಡರಲ್ ವಲಸೆ ಅಧಿಕಾರಿಗಳು: ವಿಡಿಯೋ ವೈರಲ್ | killed

ವಾಷಿಂಗ್ಟನ್​: ಅಮೆರಿಕಾದ ಮಿನ್ನಿಯಾಪೋಲಿಸ್​ನಲ್ಲಿ ಅಮೆರಿಕದ ವಲಸೆ ಮತ್ತು ಕಸ್ಟಮ್ಸ್ ಜಾರಿ ಅಧಿಕಾರಿಗಳು ವಾರದ ಹಿಂದೆ ವ್ಯಕ್ತಿಯೊಬ್ಬರನ್ನು ಕೊಲೆ ಮಾಡಿದ ಘಟನೆ ಮಾಸುವ ಮುನ್ನವೇ ಶನಿವಾರ(ಜ. 24) ಮತ್ತೊಬ್ಬ 37 ವರ್ಷದ ವ್ಯಕ್ತಿಯನ್ನು ಗುಂಡಿಕ್ಕಿ ಹತ್ಯೆ ಮಾಡಿದ್ದು, ಘಟನೆಯ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದೆ.

ಗುಂಡಿನ ದಾಳಿಯ ಸುತ್ತಲಿನ ವಿವರಗಳು ತಕ್ಷಣಕ್ಕೆ ಸ್ಪಷ್ಟವಾಗಿಲ್ಲ, ಆದರೆ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಸರ್ಕಾರದ ವಲಸೆ ವಿರೋಧಿ ನೀತಿ ಧಮನದ ಕ್ರಮವಾಗಿ ಈ ಘಟನೆ ನಡೆದಿದೆ ಎನ್ನಲಾಗಿದೆ. ಅಧಿಕಾರಿಗಳು ಆತನನ್ನು ಬಂಧಿಸಲು ಪ್ರಯತ್ನಿಸಿದಾಗ ಘಟನೆ ನಡೆದಿದೆ. ಸುಮಾರು 6-7 ಅಧಿಕಾರಿಗಳು ಸುತ್ತುವರಿದು 10 ಸುತ್ತು ಗುಂಡು ಹಾರಿಸುವುದು ವಿಡಿಯೋದಲ್ಲಿ ದಾಖಲಾಗಿದೆ.

ಮೃತನನ್ನು ಅಲೆಕ್ಸ್ ಪ್ರೆಟ್ಟಿ (37) ಎಂದು ಗುರುತಿಸಲಾಗಿದೆ. ಮಿನ್ನಿಯಾಪೋಲಿಸ್‌ನ VA ಆಸ್ಪತ್ರೆಯಲ್ಲಿ ICU ನರ್ಸ್ ಆಗಿ ಕೆಲಸ ಮಾಡುತ್ತಿದ್ದ ಎನ್ನಲಾಗಿದೆ. ಮಿನ್ನಿಯಾಪೊಲೀಸ್​ನಲ್ಲಿ ಈ ತಿಂಗಳಲ್ಲಿ ಫೆಡರಲ್ ಅಧಿಕಾರಿಗಳಿಂದ ಹತ್ಯೆಯಾದ ಎರಡನೇ ವ್ಯಕ್ತಿಯಾಗಿದ್ದಾರೆ.

ಈ ಕುರಿತು ಮಾಹಿತಿ ನೀಡಿರುವ ಹೋಮ್‌ಲ್ಯಾಂಡ್ ಸೆಕ್ಯುರಿಟಿ ಇಲಾಖೆಯ ವಕ್ತಾರೆ ಟ್ರಿಸಿಯಾ ಮೆಕ್‌ಲಾಫ್ಲಿನ್, ಟ್ರಂಪ್ ಆಡಳಿತದ ವಲಸೆ ಶಿಸ್ತುಕ್ರಮದ ಭಾಗವಾಗಿ ಫೆಡರಲ್ ಅಧಿಕಾರಿಗಳು ಕಾರ್ಯಾಚರಣೆ ನಡೆಸುತ್ತಿದ್ದಾರೆ. ಈ ವೇಳೆ ಕೈಯಲ್ಲಿ ಬಂದೂಕು ಹಿಡಿದ ವ್ಯಕ್ತಿಯೊಬ್ಬರು ಅವರನ್ನು ಸಮೀಪಿಸಿದ್ದಾರೆ. ಆಗ ಅಧಿಕಾರಿಗಳು ಅವರನ್ನು ನಿಶ್ಯಸ್ತ್ರಗೊಳಿಸಲು ಪ್ರಯತ್ನಿಸಿದ್ದು, ಸಂಘರ್ಷ ನಡೆದಿದೆ. ಈ ವೇಳೆ ರಕ್ಷಣಾತ್ಮಕವಾಗಿ ಅಧಿಕಾರಿಗಳು ಗುಂಡು ಹಾರಿಸಿದ್ದಾರೆ ಎಂದು ತಿಳಿಸಿದ್ದಾರೆ.

ಇನ್ನೂ ಘಟನೆ ಬಳಿಕ ಮಿನ್ನಿಯಾಪೋಲಿಸ್‌ನಲ್ಲಿ ಪ್ರತಿಭಟನೆಗಳು ಹೆಚ್ಚಾಗುತ್ತಿದ್ದು, ನಿವಾಸಿಗಳು ಮತ್ತು ಕಾನೂನು ಜಾರಿ ಅಧಿಕಾರಿಗಳ ನಡುವೆ ವಾಗ್ವಾಧ ಮತ್ತು ಘರ್ಷಣೆಗಳು ನಡೆದವು. ಗುಂಪನ್ನು ಚದುರಿಸಲು ಅಧಿಕಾರಿಗಳು ಅಶ್ರುವಾಯು ಮತ್ತು ಜನಸಂದಣಿ ನಿಯಂತ್ರಣ ತಂತ್ರಗಳನ್ನು ಬಳಸಿದ್ದಾರೆ.

2026 ಜ. 07ರಂದು ಇದೇ ರೀತಿ ವಲಸೆ ವಿರೋಧಿ ಕಾರ್ಯಾಚರಣೆ ನಡೆಸುವ ಸಮಯದಲ್ಲಿ ಕಾನ್ಸಾಸ್ ನಗರದ 37 ವರ್ಷದ ಯುಎಸ್ ನಾಗರಿಕ, ಮೂರು ಮಕ್ಕಳ ತಾಯಿ ರೆನೀ ನಿಕೋಲ್ ಗುಡ್ ಅವರನ್ನು ಅಧಿಕಾರಿಗಳು ಗುಂಡಿಕ್ಕಿ ಕೊಂದಿದ್ದರು (ಏಜೆನ್ಸೀಸ್).