ನಿಮ್ಮ ಪಿಎಫ್ ಖಾತೆಗೆ 8.25% ಬಡ್ಡಿ ಹಣ ಬಂತಾ? ಬ್ಯಾಲೆನ್ಸ್ ಚೆಕ್ ಮಾಡುವುದು ಹೇಗೆ? ಇಲ್ಲಿದೆ ಸುಲಭ ಮಾರ್ಗ... EPFO

ನವದೆಹಲಿ: ಉದ್ಯೋಗಿಗಳ ಭವಿಷ್ಯ ನಿಧಿ ಸಂಸ್ಥೆಯು (EPFO) ತನ್ನ ಸದಸ್ಯರ ಖಾತೆಗಳಿಗೆ ವಾರ್ಷಿಕ ಬಡ್ಡಿಯನ್ನು ಜಮಾ ಮಾಡುವ ಪ್ರಕ್ರಿಯೆಯನ್ನು ಪ್ರಾರಂಭಿಸಿದೆ. ಈಗಾಗಲೇ ಹಲವು ಚಂದಾದಾರರ ಖಾತೆಗಳಲ್ಲಿ ಬಡ್ಡಿಯ ಹಣ ಜಮೆಯಾಗಿದ್ದು, ಉಳಿದ ಸದಸ್ಯರಿಗೂ ಹಂತ-ಹಂತವಾಗಿ ಹಣ ಜಮಾ ಆಗಲಿದೆ ಎಂದು ವರದಿಯಾಗಿದೆ. ಈ ಹಿನ್ನೆಲೆಯಲ್ಲಿ, ತಮ್ಮ ಖಾತೆಗಳಿಗೆ ಬಡ್ಡಿಯ ಹಣ ಬಂದಿದೆಯೇ ಇಲ್ಲವೇ ಎಂದು ತಿಳಿಯಲು ಇಪಿಎಫ್ ಸದಸ್ಯರು ಅತ್ಯಂತ ಕುತೂಹಲದಿಂದ ಕಾಯುತ್ತಿದ್ದಾರೆ.

ಕೇಂದ್ರ ಹಣಕಾಸು ಸಚಿವಾಲಯದ ಅಂತಿಮ ಅನುಮೋದನೆಯ ಮೇರೆಗೆ, ಇಪಿಎಫ್‌ಒ (EPFO) ಇತ್ತೀಚಿನ ಆರ್ಥಿಕ ವರ್ಷದ ಇಪಿಎಫ್ ಠೇವಣಿಗಳಿಗೆ ಶೇ. 8.25 ರಷ್ಟು ಬಡ್ಡಿ ನೀಡಲು ನಿರ್ಧರಿಸಿದ್ದು, ಪ್ರಸ್ತುತ ಬಡ್ಡಿ ಜಮಾ ಮಾಡುವ ಪ್ರಕ್ರಿಯೆಯು ಅತ್ಯಂತ ವೇಗವಾಗಿ ನಡೆಯುತ್ತಿದೆ. ಜುಲೈ ಮೊದಲ ವಾರದಿಂದಲೇ ಸದಸ್ಯರ ಖಾತೆಗಳಿಗೆ ಬಡ್ಡಿಯ ಮೊತ್ತವನ್ನು ಜಮಾ ಮಾಡಲಾಗುತ್ತಿದ್ದು, ಎಲ್ಲರಿಗೂ ಏಕಕಾಲದಲ್ಲಿ ಜಮೆಯಾಗುವ ಬದಲಿಗೆ ಹಂತ-ಹಂತವಾಗಿ ಖಾತೆಗಳಿಗೆ ಕಳುಹಿಸಲಾಗುತ್ತಿದೆ, ಹೀಗಾಗಿ ಈಗಾಗಲೇ ಕೆಲವು ಸದಸ್ಯರ ಖಾತೆಗಳಲ್ಲಿ ಹಣ ಕಾಣಿಸಿಕೊಂಡಿದ್ದು, ಇನ್ನುಳಿದವರಿಗೂ ಮುಂಬರುವ ದಿನಗಳಲ್ಲಿ ಬಡ್ಡಿಯ ಮೊತ್ತ ಸಿಗಲಿದೆ.

ಇಪಿಎಫ್‌ಒ (EPFO) ಲಕ್ಷಾಂತರ ಖಾತೆಗಳನ್ನು ಪರಿಶೀಲಿಸಬೇಕಿರುವುದರಿಂದ ಎಲ್ಲಾ ಸದಸ್ಯರ ಖಾತೆಗಳಿಗೆ ಏಕಕಾಲದಲ್ಲಿ ಬಡ್ಡಿಯನ್ನು ಜಮಾ ಮಾಡುವುದಿಲ್ಲ, ಬದಲಿಗೆ ಈ ಪ್ರಕ್ರಿಯೆಯು ಹಂತ-ಹಂತವಾಗಿ ಮುಂದುವರಿಯಲಿದೆ. ಲಭ್ಯವಿರುವ ಮಾಹಿತಿಯ ಪ್ರಕಾರ, ಮುಂಬರುವ ಎರಡು ವಾರಗಳಲ್ಲಿ ಈ ಪ್ರಕ್ರಿಯೆಯು ಪೂರ್ಣಗೊಳ್ಳುವ ಸಾಧ್ಯತೆಯಿದೆ; ಆದ್ದರಿಂದ ಪ್ರಸ್ತುತ ನಿಮ್ಮ ಖಾತೆಯಲ್ಲಿ ಬಡ್ಡಿಯ ಹಣ ಕಾಣಿಸದಿದ್ದರೆ ಚಿಂತಿಸುವ ಅಗತ್ಯವಿಲ್ಲ. ಸ್ವಲ್ಪ ದಿನಗಳ ನಂತರ ನೀವು ಮತ್ತೊಮ್ಮೆ ಬ್ಯಾಲೆನ್ಸ್ ಪರಿಶೀಲಿಸಿದರೆ, ಬಡ್ಡಿ ಜಮೆಯಾಗಿರುವ ಇತ್ತೀಚಿನ ವಿವರಗಳು ನವೀಕರಣಗೊಳ್ಳುವ ಸಾಧ್ಯತೆಯಿದೆ.

ಇತ್ತೀಚಿನ ತಾಂತ್ರಿಕ ನವೀಕರಣದ (Technical Upgrade) ಕಾರಣದಿಂದಾಗಿ ಇಪಿಎಫ್‌ಒ (EPFO) ಆನ್‌ಲೈನ್ ಸೇವೆಗಳಲ್ಲಿ ಅಡಚಣೆ ಉಂಟಾಗಿದೆ. ಇದರಿಂದಾಗಿ ಅನೇಕ ಸದಸ್ಯರಿಗೆ ತಮ್ಮ ಖಾತೆಯ ಬ್ಯಾಲೆನ್ಸ್ ಪರಿಶೀಲಿಸಲು ಸಾಧ್ಯವಾಗುತ್ತಿಲ್ಲ, ವಿಶೇಷವಾಗಿ ಪಾಸ್‌ಬುಕ್ ಸೇವೆ ಲಭ್ಯವಿಲ್ಲದ ಕಾರಣ ತೊಂದರೆಯಾಗಿದೆ. ಆದಾಗ್ಯೂ, ಬ್ಯಾಲೆನ್ಸ್ ತಿಳಿಯಲು ಎರಡು ಸುಲಭ ಪರ್ಯಾಯ ಮಾರ್ಗಗಳಿವೆ.

ನಿಮ್ಮ ಯುಎನ್ (UAN) ಸಂಖ್ಯೆಗೆ ಲಿಂಕ್ ಆಗಿರುವ ಮೊಬೈಲ್ ಸಂಖ್ಯೆಯಿಂದ 9966044425 ಗೆ ಮಿಸ್ಡ್ ಕಾಲ್ ನೀಡಿ. ಎರಡು ರಿಂಗ್ ಆದ ನಂತರ ಕರೆ ಸ್ವಯಂಚಾಲಿತವಾಗಿ ಕಡಿತಗೊಳ್ಳುತ್ತದೆ. ಕೆಲವೇ ಕ್ಷಣಗಳಲ್ಲಿ ನಿಮ್ಮ ಪಿಎಫ್ ಬ್ಯಾಲೆನ್ಸ್, ಕೊನೆಯ ವಂತಿಗೆ ಮತ್ತು ಇತರ ವಿವರಗಳು ಎಸ್‌ಎಮ್‌ಎಸ್ (SMS) ರೂಪದಲ್ಲಿ ನಿಮಗೆ ಲಭ್ಯವಾಗುತ್ತವೆ.

ನಿಮ್ಮ ನೋಂದಾಯಿತ ಮೊಬೈಲ್‌ನಿಂದ EPFOHO UAN LAN ಮಾದರಿಯಲ್ಲಿ 9966044425 ನಂಬರ್​ಗೆ ಸಂದೇಶ ಕಳುಹಿಸಿ. ಇಲ್ಲಿ 'LAN' ಬದಲಿಗೆ ನಿಮ್ಮ ಭಾಷೆಯ ಕೋಡ್ ಅನ್ನು ನಮೂದಿಸಬೇಕು. ಉದಾಹರಣೆಗೆ, ಇಂಗ್ಲಿಷ್‌ಗಾಗಿ ENG ಅಥವಾ ಲಭ್ಯವಿದ್ದರೆ ಇತರ ಭಾಷಾ ಕೋಡ್‌ಗಳನ್ನು ಬಳಸಬಹುದು. ಹೀಗೆ ಸಂದೇಶ ಕಳುಹಿಸಿದ ತಕ್ಷಣ ನಿಮ್ಮ ಖಾತೆಯ ವಿವರಗಳು ಎಸ್‌ಎಮ್‌ಎಸ್ ರೂಪದಲ್ಲಿ ನಿಮಗೆ ತಲುಪುತ್ತವೆ.

ಇಪಿಎಫ್‌ಒ ತನ್ನ ಡಿಜಿಟಲ್ ವ್ಯವಸ್ಥೆಯನ್ನು ಆಧುನೀಕರಿಸಲು ಇತ್ತೀಚೆಗೆ ದೊಡ್ಡ ಮಟ್ಟದ ಸಿಸ್ಟಮ್ ನವೀಕರಣವನ್ನು ಕೈಗೊಂಡಿತ್ತು. ಈ ಕಾರಣದಿಂದಾಗಿ, ವೆಬ್‌ಸೈಟ್ ಮತ್ತು ಯುಎನ್ ಸೇವೆಗಳು ಕೆಲವು ದಿನಗಳವರೆಗೆ ಪೂರ್ಣ ಪ್ರಮಾಣದಲ್ಲಿ ಲಭ್ಯವಿರಲಿಲ್ಲ. ಪ್ರಸ್ತುತ ವೆಬ್‌ಸೈಟ್ ಪುನರಾರಂಭಗೊಂಡಿದ್ದರೂ, ಮೆಂಬರ್ ಲಾಗಿನ್ ಮತ್ತು ಪಾಸ್‌ಬುಕ್‌ನಂತಹ ಕೆಲವು ಸೇವೆಗಳು ಇನ್ನು ಸಾಗುತ್ತಿವೆ. ತಾಂತ್ರಿಕ ಕೆಲಸಗಳು ಮುಗಿದಂತೆ ಉಳಿದ ಸೇವೆಗಳನ್ನು ಹಂತ-ಹಂತವಾಗಿ ಲಭ್ಯವಾಗುವಂತೆ ಮಾಡಲಾಗುವುದು ಎಂದು ಇಪಿಎಫ್‌ಒ ತಿಳಿಸಿದೆ, (ಏಜೆನ್ಸೀಸ್​).