ಪೊಲೀಸರ ಕೈಗೆ ಸಿಗದೇ ಎಸ್ಕೇಪ್​ ಆಗ್ತಿದ್ದ ಕುಡುಕನನ್ನು ಹಿಡಿದುಕೊಟ್ಟ ಮೊಸಳೆಗೆ ವರ್ಷದ ಅತ್ಯುತ್ತಮ ಪ್ರಶಸ್ತಿ! Crocodile

Crocodile : ಅಮೆರಿಕದ ಲೂಸಿಯಾನಾದಲ್ಲಿ ಭಾನುವಾರ ಕುಡಿದು ವಾಹನ ಚಲಾಯಿಸುತ್ತಿದ್ದ ಚಾಲಕನೊಬ್ಬನನ್ನು ಬಂಧಿಸಲು ಪೊಲೀಸರು ಹೋದಾಗ ಸ್ಥಳದಲ್ಲಿ ಭಾರಿ ಹೈಡ್ರಾಮಾ ನಡೆದಿದೆ. ಅಲ್ಲದೆ, ಇಡೀ ಘಟನೆಯ ಕೇಂದ್ರಬಿಂದು ಒಂದು ಮೊಸಳೆ ಅನ್ನೋದೆ ಇಲ್ಲಿನ ರೋಚಕ ಸಂಗತಿಯಾಗಿದೆ.

ಟೊಯೋಟಾ ಕಾರೊಂದನ್ನು ವಿಪರೀತ ವೇಗದಲ್ಲಿ ಚಲಾಯಿಸುತ್ತಿದ್ದ 40 ವರ್ಷದ ವಿಕ್ಟರ್ ರಿವಾಸ್ ಎಂಬಾತ, ನಿಯಂತ್ರಣ ತಪ್ಪಿ ರಸ್ತೆಯ ಕಾಂಕ್ರೀಟ್ ತಡೆಗೋಡೆಗೆ ಡಿಕ್ಕಿ ಹೊಡೆದಿದ್ದಾನೆ. ಈ ಅಪಘಾತದಿಂದಾಗಿ ಕಾರು ಜಖಂಗೊಂಡು ಅದರ ಒಂದು ಟೈರ್ ಕೂಡ ಪಂಕ್ಚರ್ ಆಗಿತ್ತು. ಲೂಸಿಯಾನಾ ಸ್ಟೇಟ್ ಪೊಲೀಸರು ಮಾಹಿತಿ ಪಡೆದು ಸ್ಥಳಕ್ಕೆ ಧಾವಿಸುತ್ತಿದ್ದಂತೆ, ಚಾಲಕ ವಿಕ್ಟರ್ ಕಾರಿನಿಂದ ಕೆಳಗಿಳಿದು ತಪ್ಪಿಸಿಕೊಳ್ಳಲು ಸಮೀಪದಲ್ಲೇ ಇದ್ದ ಜೌಗು ಪ್ರದೇಶದೊಳಗೆ ಓಡಿಹೋಗಿದ್ದಾನೆ.

ಜೌಗು ಪ್ರದೇಶಕ್ಕೆ ಓಡಿಹೋದ ವಿಕ್ಟರ್‌ನನ್ನು ಹುಡುಕಲು ಪೊಲೀಸರು ತಕ್ಷಣವೇ ಜಂಟಿ ಕಾರ್ಯಾಚರಣೆ ಆರಂಭಿಸಿದರು. ಈ ನಡುವೆ ಆತ ಸಮೀಪದ ಹೆದ್ದಾರಿಯೊಂದರ ಬಳಿ ನಡೆದುಕೊಂಡು ಹೋಗುತ್ತಿರುವುದು ಪೊಲೀಸರ ಕಣ್ಣಿಗೆ ಬಿದ್ದಿದೆ. ಪೊಲೀಸರನ್ನು ನೋಡುತ್ತಿದ್ದಂತೆ ಗಾಬರಿಗೊಂಡ ವಿಕ್ಟರ್, ಮತ್ತೆ ತಪ್ಪಿಸಿಕೊಳ್ಳಲು ಜೌಗು ಪ್ರದೇಶದ ನೀರಿನೊಳಗೆ ನುಗ್ಗಿದ್ದಾನೆ. ಆತ ನೀರಿಗೆ ಇಳಿಯುತ್ತಿದ್ದಂತೆ ಅಲ್ಲೇ ಹೊಂಚು ಹಾಕಿ ಕುಳಿತಿದ್ದ ಬೃಹತ್ ಮೊಸಳೆಯೊಂದು ಆತನ ಮೇಲೆ ತೀವ್ರವಾಗಿ ದಾಳಿ ನಡೆಸಿ, ಆತನ ಎರಡೂ ಕೈಗಳನ್ನು ಕಚ್ಚಿ ತುಂಡರಿಸಿದೆ. ಈ ಭೀಕರ ದೃಶ್ಯಗಳು ಪೊಲೀಸರ ಬಾಡಿ ಕ್ಯಾಮೆರಾದಲ್ಲಿ ಸ್ಪಷ್ಟವಾಗಿ ದಾಖಲಾಗಿದ್ದು, ವಿಡಿಯೋ ಬಿಡುಗಡೆಯಾದ ಬಳಿಕವೇ ಈ ಘಟನೆ ಬೆಳಕಿಗೆ ಬಂದಿದೆ.

ಮೊಸಳೆ ಅಷ್ಟು ಘೋರವಾಗಿ ದಾಳಿ ಮಾಡಿದರೂ ಸಹ, ವಿಕ್ಟರ್ ಹೇಗೋ ಹೋರಾಡಿ ಅಲ್ಲಿಂದ ಪ್ರಾಣಾಪಾಯದಿಂದ ಪಾರಾಗಿ ದಡ ಸೇರಿದ್ದಾನೆ. ತಕ್ಷಣವೇ ಕಾರ್ಯಪ್ರವೃತ್ತರಾದ ಪೊಲೀಸರು ಸ್ಥಳಕ್ಕೆ ಧಾವಿಸಿ ತೀವ್ರವಾಗಿ ಗಾಯಗೊಂಡಿದ್ದ ಆತನನ್ನು ವಶಕ್ಕೆ ಪಡೆದಿದ್ದಾರೆ. ಪ್ರಾಣ ಉಳಿಸಿಕೊಂಡರೂ ಕುಡಿತದ ಮತ್ತಿನಲ್ಲಿ ಪೊಲೀಸರಿಂದ ತಪ್ಪಿಸಿಕೊಳ್ಳಲು ಹೋಗಿ ಆತ ತನ್ನ ಎರಡೂ ಕೈಗಳನ್ನು ಕಳೆದುಕೊಳ್ಳುವಂತಾಯಿತು. ಬಂಧನದ ಬಳಿಕ ತೀವ್ರವಾಗಿ ಗಾಯಗೊಂಡಿದ್ದ ವಿಕ್ಟರ್‌ನನ್ನು ತಕ್ಷಣವೇ ಸಮೀಪದ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಿಸಲಾಯಿತು ಮತ್ತು ನಂತರ ಆತ ಗುಣಮುಖನಾಗಿ ಬಿಡುಗಡೆಯಾಗಿದ್ದಾನೆ.

ಇನ್ನು ಈ ವಿಲಕ್ಷಣ ಘಟನೆಯ ಬಗ್ಗೆ ಸ್ಥಳೀಯ ಸೇಂಟ್ ಚಾರ್ಲ್ಸ್ ಪ್ಯಾರಿಷ್ ಶೆರಿಫ್ ಕಚೇರಿಯು ತನ್ನ ಸಾಮಾಜಿಕ ಜಾಲತಾಣದ ಖಾತೆಯಲ್ಲಿ ಅತ್ಯಂತ ಹಾಸ್ಯಭರಿತ ಪೋಸ್ಟ್ ಒಂದನ್ನು ಹಂಚಿಕೊಂಡಿದೆ. ಪೊಲೀಸರ ಯೂನಿಫಾರ್ಮ್ ಧರಿಸಿರುವ ಮೊಸಳೆಯೊಂದು 'ವರ್ಷದ ಅತ್ಯುತ್ತಮ ಡೆಪ್ಯುಟಿ' ಪ್ರಶಸ್ತಿ ಫಲಕವನ್ನು ಸ್ವೀಕರಿಸುತ್ತಿರುವಂತಹ ಕೃತಕ ಬುದ್ಧಿಮತ್ತೆ ಸೃಷ್ಟಿತ ಚಿತ್ರವನ್ನು ಹಂಚಿಕೊಳ್ಳುವ ಮೂಲಕ ಇಲಾಖೆಯು ಈ ಘಟನೆಯನ್ನು ತಮಾಷೆಯಾಗಿ ಬಿಂಬಿಸಿದೆ, (ಏಜೆನ್ಸೀಸ್​​).