ತಮಿಳುನಾಡು ಅಸೆಂಬ್ಲಿಯಲ್ಲಿ ಹೈಡ್ರಾಮಾ: ದಳಪತಿ ಸರ್ಕಾರಕ್ಕೆ ಶೇ.65 ರಷ್ಟು ಜನರ ಬೆಂಬಲವೇ ಇಲ್ಲ! ಉದಯನಿಧಿ ತೀವ್ರವಾಗ್ದಾಳಿ! Udhayanidhi Stalin

ವಿಶ್ವಾಸಮತ ಯಾಚನೆಯ ಮೇಲಿನ ಚರ್ಚೆಯಲ್ಲಿ ಮಾತನಾಡಿದ ಉದಯನಿಧಿ ಸ್ಟಾಲಿನ್, ಚುನಾವಣಾ ಫಲಿತಾಂಶದ ಆಳವಾದ ವಿಶ್ಲೇಷಣೆಯನ್ನು ಮುಂದಿಟ್ಟರು. ಈ ಚುನಾವಣೆಯಲ್ಲಿ ಸುಮಾರು 4.93 ಕೋಟಿ ಜನರು ಮತ ಚಲಾಯಿಸಿದ್ದಾರೆ. ಆದರೆ, ಆಡಳಿತ ಪಕ್ಷಕ್ಕೆ ಸಿಕ್ಕಿದ್ದು ಕೇವಲ 1.72 ಕೋಟಿ ಮತಗಳು ಮಾತ್ರ. ಉಳಿದ 3.21 ಕೋಟಿ ಜನರು ನಿಮ್ಮ ಪಕ್ಷದ ವಿರುದ್ಧ ಮತ ಚಲಾಯಿಸಿದ್ದಾರೆ. ಅಂದರೆ, ಶೇ. 65ರಷ್ಟು ಜನರಿಗೆ ನಿಮ್ಮ ಮೇಲೆ ನಂಬಿಕೆಯಿಲ್ಲ ಎಂದು ಗುಡುಗಿದ್ದಾರೆ.

ವಿಜಯ್ ಅವರ ಸರ್ಕಾರವು ಅಧಿಕಾರಕ್ಕಾಗಿ ತತ್ವ ಸಿದ್ಧಾಂತಗಳನ್ನು ಬಲಿಕೊಟ್ಟಿದೆ ಎಂದು ಉದಯನಿಧಿ ಆರೋಪಿಸಿದ್ದಾರೆ.

ಎಎಂಬಿಕೆ ಬೆಂಬಲ: ಚುನಾವಣಾ ಸಮಯದಲ್ಲಿ ಯಾರನ್ನು ಸೈದ್ಧಾಂತಿಕ ವೈರಿಗಳೆಂದು ಕರೆದಿದ್ದಿರೋ, ಅದೇ ಬಿಜೆಪಿ ಮೈತ್ರಿಕೂಟದ ಭಾಗವಾಗಿದ್ದ ಎಎಂಬಿಕೆ ಶಾಸಕ ಎಸ್. ಕಾಮರಾಜ್ ಅವರ ಬೆಂಬಲವನ್ನು ಇಂದು ಪಡೆದಿದ್ದೀರಿ. ಅಧಿಕಾರಕ್ಕಾಗಿ ಕುದುರೆ ವ್ಯಾಪಾರ ನಡೆಸುತ್ತಿದ್ದೀರಿ ಎಂದು ಟೀಕಿಸಿದ್ದಾರೆ.

ಎಐಎಡಿಎಂಕೆ ಜೊತೆ ನಂಟು: ಎಐಎಡಿಎಂಕೆಯ ಒಂದು ಬಣದ ನಾಯಕನ ಮನೆಗೆ ಹೊಸ ಸೋಫಾ ರವಾನೆಯಾದ ಬೆನ್ನಲ್ಲೇ ಮುಖ್ಯಮಂತ್ರಿಗಳು ಅಲ್ಲಿಗೆ ಭೇಟಿ ನೀಡಿರುವುದನ್ನು ಉಲ್ಲೇಖಿಸಿದ ಉದಯನಿಧಿ, ಚುನಾವಣೆ ವೇಳೆ ಭ್ರಷ್ಟ ಪಡೆ ಎಂದು ಕರೆದವರ ಜೊತೆಗೇ ಈಗ ಕೈಜೋಡಿಸಿರುವುದು ನಿಮ್ಮ ಸ್ವಚ್ಛ ಆಡಳಿತದ ಸಂಕೇತವೇ ಎಂದು ಉದಯನಿಧಿ ಪ್ರಶ್ನಿಸಿದ್ದಾರೆ.

ಹಿಂದಿನ ಡಿಎಂಕೆ ಸರ್ಕಾರ ಜಾರಿಗೆ ತಂದಿದ್ದ ಜನಪರ ಯೋಜನೆಗಳನ್ನು ಮುಂದುವರಿಸುವಂತೆ ಉದಯನಿಧಿ ಸರ್ಕಾರಕ್ಕೆ ಒತ್ತಾಯಿಸಿದರು.

ಮಹಿಳೆಯರ ಹಕ್ಕು ಮೊತ್ತ: 'ಮಹಿಳಾ ಹಕ್ಕು ಮೊತ್ತ ಯೋಜನೆಯಡಿ ಕೋಟಿಗೂ ಹೆಚ್ಚು ಮಹಿಳೆಯರು ಮುಂದಿನ ತಿಂಗಳು 1,000 ರೂ.ಗಾಗಿ ಕಾಯುತ್ತಿದ್ದಾರೆ.

ಬೆಳಗಿನ ಉಪಹಾರ: ಜೂನ್ 2 ರಂದು ಶಾಲೆಗಳು ಆರಂಭವಾಗಲಿದ್ದು, ಮಕ್ಕಳು ಸ್ಟಾಲಿನ್ ಸರ್ಕಾರ ಜಾರಿಗೆ ತಂದಿದ್ದ ಉಪಹಾರ ಯೋಜನೆಗಾಗಿ ಕಾಯುತ್ತಿದ್ದಾರೆ.

ಉಚಿತ ಬಸ್ ಪ್ರಯಾಣ: ಮಹಿಳೆಯರಿಗೆ ಉಚಿತ ಬಸ್ ಪ್ರಯಾಣ ಯೋಜನೆಯನ್ನು ಯಾವುದೇ ಕಾರಣಕ್ಕೂ ಸ್ಥಗಿತಗೊಳಿಸಬಾರದು ಎಂದು ಅವರು ಆಗ್ರಹಿಸಿದರು.

ಚುನಾವಣಾ ಪ್ರಣಾಳಿಕೆಯಲ್ಲಿ ವಿಜಯ್ ಅವರು ಆರು ಎಲ್‌ಪಿಜಿ ಸಿಲಿಂಡರ್ ಉಚಿತ ಹಾಗೂ ಮಹಿಳೆಯರಿಗೆ ಮಾಸಿಕ ಧನಸಹಾಯದ ಭರವಸೆ ನೀಡಿದ್ದರು. ನಮ್ಮ ತಂದೆ ಎಂ.ಕೆ. ಸ್ಟಾಲಿನ್ ಅವರು ಮುಖ್ಯಮಂತ್ರಿಯಾದ ಕೂಡಲೇ ಮಹಿಳೆಯರ ಉಚಿತ ಬಸ್ ಪ್ರಯಾಣದ ಫೈಲ್‌ಗೆ ಮೊದಲ ಸಹಿ ಹಾಕಿದ್ದರು. ಆದರೆ, ವಿಜಯ್ ಅವರು ಅಧಿಕಾರ ವಹಿಸಿಕೊಂಡ ನಂತರ ಇಂತಹ ಯಾವುದೇ ಪ್ರಮುಖ ಭರವಸೆಗಳ ಜಾರಿಗೆ ಮುಂದಾಗಿಲ್ಲ ಎಂದು ಉದಯನಿಧಿ ಲೇವಡಿ ಮಾಡಿದ್ದಾರೆ.

ವಿಶ್ವಾಸಮತ ಪ್ರಕ್ರಿಯೆಯಲ್ಲಿ ಪಾಲ್ಗೊಳ್ಳಲು ನಿರಾಕರಿಸಿದ ಡಿಎಂಕೆ ಸದಸ್ಯರು, ಉದಯನಿಧಿ ಭಾಷಣದ ನಂತರ ಸದನದಿಂದ ಹೊರನಡೆದರು. ನಿಮ್ಮನ್ನು ಗೆಲ್ಲಿಸಿದವರೇ ಇಂದು ಪಶ್ಚಾತ್ತಾಪ ಪಡುತ್ತಿದ್ದಾರೆ. ಜನರ ಈ ಅಸಮಾಧಾನವನ್ನು ವ್ಯಕ್ತಪಡಿಸಲು ನಾವು ಮತದಾನದಲ್ಲಿ ಭಾಗವಹಿಸದೆ ಸಭಾತ್ಯಾಗ ಮಾಡುತ್ತಿದ್ದೇವೆ ಎಂದು ಉದಯನಿಧಿ ಘೋಷಿದ್ದಾರೆ.

ತಮಿಳುನಾಡಿನ ರಾಜಕೀಯ ಈಗ ದಳಪತಿ ವರ್ಸಸ್ ಉದಯ ಎಂಬಂತಾಗಿದ್ದು, ಮುಂದಿನ ದಿನಗಳಲ್ಲಿ ಅಸೆಂಬ್ಲಿ ಕಲಾಪಗಳು ಮತ್ತಷ್ಟು ಕಾವೇರುವ ಲಕ್ಷಣಗಳು ಗೋಚರಿಸುತ್ತಿವೆ,(ಏಜೆನ್ಸೀಸ್).