ಡಿಜಿಟಲ್ ಎಡವಟ್ಟು; ಪ್ರಧಾನಿ ಮೋದಿ ಸಂದೇಶವನ್ನೇ ತಪ್ಪಾಗಿ ಅರ್ಥೈಸಿದ Grok AI: ರಾಜತಾಂತ್ರಿಕ ವಲಯದಲ್ಲಿ ಸಂಚಲನ | Maldives Controversy

ಮಾಲ್ಡೀವ್ಸ್‌ನೊಂದಿಗಿನ ದ್ವಿಪಕ್ಷೀಯ ಸಂಬಂಧಗಳನ್ನು ಬಲಪಡಿಸುವ ನಿಟ್ಟಿನಲ್ಲಿ ಪ್ರಧಾನಿ ಮೋದಿಯವರು ಹಂಚಿಕೊಂಡಿದ್ದ ಅಧಿಕೃತ ಸಂದೇಶವನ್ನು Grok AI ತನ್ನ ವೇದಿಕೆಯಲ್ಲಿ ಅನುವಾದಿಸುವಾಗ ಗಂಭೀರ ತಪ್ಪು ಮಾಡಿದೆ. ಈ ಅನುವಾದವು ಸಂದೇಶದ ಮೂಲ ಅರ್ಥವನ್ನೇ ಬದಲಿಸಿದ್ದು, ಇದು ಮಾಲ್ಡೀವ್ಸ್ ವಿರೋಧಿ ಅಥವಾ ವಿವಾದಾತ್ಮಕ ಧಾಟಿಯಲ್ಲಿ ಕಂಡುಬಂದಿದೆ ಎಂದು ಬಳಕೆದಾರರು ಕಿಡಿಕಾರಿದ್ದಾರೆ.

ಈ ಘಟನೆಯನ್ನು ಗಂಭೀರವಾಗಿ ಪರಿಗಣಿಸಿರುವ ಭಾರತ ಸರ್ಕಾರವು 'X' ಪ್ಲಾಟ್‌ಫಾರ್ಮ್‌ಗೆ ಕಠಿಣ ಎಚ್ಚರಿಕೆ ನೀಡಿದೆ. ಎಐ ವ್ಯವಸ್ಥೆಗಳು ಜವಾಬ್ದಾರಿಯುತವಾಗಿ ಕಾರ್ಯನಿರ್ವಹಿಸಬೇಕು. ತಪ್ಪು ಮಾಹಿತಿಯನ್ನು ಹರಡುವುದು ಅಥವಾ ಗಂಭೀರ ಸಂದೇಶಗಳನ್ನು ಹಾದಿ ತಪ್ಪಿಸುವುದು ಸ್ವೀಕಾರಾರ್ಹವಲ್ಲ ಎಂದು ಮಾಹಿತಿ ತಂತ್ರಜ್ಞಾನ ಸಚಿವಾಲಯ ಹೇಳಿದೆ. ಈ ಕುರಿತು ಕೈಗೊಂಡ ಕ್ರಮಗಳ ವರದಿ(Action Taken Report) ಸಲ್ಲಿಸುವಂತೆ ಕಂಪನಿಗೆ ಸೂಚಿಸಲಾಗಿದೆ.

ಕೇವಲ ಅನುವಾದವಲ್ಲದೆ, ಇತ್ತೀಚೆಗೆ ಈ ಎಐ ಸಾಧನವು ಮಹಿಳೆಯರ ಕುರಿತಾದ ಅಸಭ್ಯ ಚಿತ್ರಗಳನ್ನು ಸೃಷ್ಟಿಸುತ್ತಿದೆ ಎಂಬ ಆರೋಪವೂ ಕೇಳಿಬಂದಿತ್ತು. ಈಗ ಪ್ರಧಾನಿಯವರ ಸಂದೇಶವನ್ನೇ ತಪ್ಪಾಗಿ ಅನುವಾದಿಸಿರುವುದು ಅದರ ವಿಶ್ವಾಸಾರ್ಹತೆಯ ಮೇಲೆ ದೊಡ್ಡ ಪ್ರಶ್ನಾರ್ಥಕ ಚಿಹ್ನೆ ಮೂಡಿಸಿದೆ. X ಕಂಪನಿಯು ಈ ತಾಂತ್ರಿಕ ದೋಷವನ್ನು ಸರಿಪಡಿಸಲು ಮುಂದಾಗಿದ್ದು, ನಮ್ಮ ಎಐ ಮಾದರಿಯು ಇನ್ನೂ ಕಲಿಯುವ ಹಂತದಲ್ಲಿದೆ ಎಂಬ ಹಳೆಯ ಸಮರ್ಥನೆಯನ್ನೇ ನೀಡುತ್ತಿದೆ.

ಟ್ವಿಟರ್‌ನಲ್ಲಿ ಈ ವಿಷಯವು ಟ್ರೆಂಡಿಂಗ್‌ನಲ್ಲಿದ್ದು, ರಾಜತಾಂತ್ರಿಕ ವಿಷಯಗಳಲ್ಲಿ ಎಐ ಬಳಸುವಾಗ ಎಚ್ಚರಿಕೆ ಬೇಕು ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಈ ಎಡವಟ್ಟು ಭಾರತ ಮತ್ತು ಮಾಲ್ಡೀವ್ಸ್ ನಡುವೆ ಇತ್ತೀಚೆಗಷ್ಟೇ ಹಳಿಗೆ ಬರುತ್ತಿರುವ ಸಂಬಂಧಕ್ಕೆ ಅಡ್ಡಿಯಾಗಬಾರದು ಎಂಬುದು ಜನರ ಆಶಯವಾಗಿದೆ,(ಏಜೆನ್ಸೀಸ್).