RCBಗೆ ಸತತ 2 ಕಪ್ ಗೆದ್ದುಕೊಟ್ಟರೂ ಟೀಮ್ ಇಂಡಿಯಾದಲ್ಲಿ ನೋ ಚಾನ್ಸ್! ರಜತ್ ಪಾಟೀದಾರ್ ಟಿ20 ಕರಿಯರ್‌ಗೆ ಬಿದ್ದಿತೇ ಶಾಶ್ವತ ಬ್ರೇಕ್? Rajat Patidar

ಸತತ 2 ಐಪಿಎಲ್ ಮುಕುಟ, ಆದರೂ ಟೀಮ್ ಇಂಡಿಯಾದಲ್ಲಿ ಒಂದೂ ಟಿ20 ಪಂದ್ಯ ಆಡುವ ಅವಕಾಶ ಸಿಗಲಿಲ್ಲ. ಈ ಹೆಡ್‌ಲೈನ್ ಕೇಳಲು ಎಷ್ಟು ಕ್ರೂರವಾಗಿದೆಯೋ, ಅಷ್ಟೇ ನಿಜ ಕೂಡ ಹೌದು. ಭಾರತೀಯ ಕ್ರಿಕೆಟ್‌ನಲ್ಲಿ ಸದ್ಯ ನಡೆಯುತ್ತಿರುವ ಯುವ ಪೀಳಿಗೆಯ ಸದ್ದಿನಲ್ಲಿ 33 ವರ್ಷದ ಪಾಟೀದಾರ್ ಅವರ ಅನುಭವ ಮೂಲೆಗುಂಪಾಗಿದೆ.

ಸಾಮಾನ್ಯವಾಗಿ ಯಾವುದೇ ದೊಡ್ಡ ಕಾರ್ಪೊರೇಟ್ ಕಂಪನಿಗಳಲ್ಲಿ ವಯಸ್ಸಾದವರಿಗಿಂತ ಹೆಚ್ಚಾಗಿ ಯುವಕರಿಗೆ ಆದ್ಯತೆ ನೀಡಲಾಗುತ್ತದೆ. ಯುವಕರಲ್ಲಿ ಸುದೀರ್ಘ ಭವಿಷ್ಯ ಇರುತ್ತದೆ ಎಂಬುದು ಅವರ ಲೆಕ್ಕಾಚಾರ. ಬಿಸಿಸಿಐ ಕೂಡ ಈಗ ಅದೇ ಹಾದಿ ಹಿಡಿದಿದೆ. ಇತ್ತೀಚಿನ ಐಪಿಎಲ್ ಸೀಸನ್‌ನಲ್ಲಿ 15 ವರ್ಷದ ವೈಭವ್ ಸೂರ್ಯವಂಶಿಯಂತಹ ಯುವ ಪ್ರತಿಭೆಗಳು ಮುಂಚೂಣಿಗೆ ಬರುತ್ತಿರುವುದರಿಂದ, 33ರ ಹರೆಯದ ಪಾಟೀದಾರ್ ಅವರ ಅನುಭವ, ಮೈದಾನದಲ್ಲಿನ ಶಾಂತತೆ ಮತ್ತು ಪ್ರಬುದ್ಧತೆಯನ್ನು ಆಯ್ಕೆಗಾರರು ಸಂಪೂರ್ಣವಾಗಿ ನಿರ್ಲಕ್ಷಿಸಿದ್ದಾರೆ.

ಭಾರತದಲ್ಲಿ ಐಐಟಿ ಸೀಟು ಸಿಗುವುದು ಎಷ್ಟು ಕಷ್ಟವೋ, ಭಾರತ ಸೀನಿಯರ್ ಕ್ರಿಕೆಟ್ ತಂಡದಲ್ಲಿ ಸ್ಥಾನ ಪಡೆಯುವುದು ಅಷ್ಟೇ ದುಸ್ತರವಾಗಿದೆ. ಜಗತ್ತಿನ ಬೇರೆ ಯಾವುದೇ ದೇಶದಲ್ಲಿದ್ದರೂ ಆರಾಮವಾಗಿ ಪ್ಲೇಯಿಂಗ್ ಇಲೆವೆನ್‌ನಲ್ಲಿ ಸ್ಥಾನ ಪಡೆಯುತ್ತಿದ್ದ ಪಾಟೀದಾರ್ ಅವರಿಗೆ ಭಾರತ ತಂಡದಲ್ಲಿ ಕನಿಷ್ಠ ಐರ್ಲೆಂಡ್ ಪ್ರವಾಸದ ಟಿಕೆಟ್ ಕೂಡ ಸಿಗದಿರುವುದು ದುರದೃಷ್ಟಕರವಾಗಿದೆ.

ಈ ಕಡೆ ಆಯ್ಕೆ ಸಮಿತಿ ಕಠೋರ ನಿರ್ಧಾರ ಕೈಗೊಂಡಿದ್ದರೆ, ಆ ಕಡೆ ರಜತ್ ಪಾಟೀದಾರ್ ಮಾತ್ರ ಯಾವುದೇ ಹಪಹಪಿಕೆ ಇಲ್ಲದೆ ಶಾಂತವಾಗಿದ್ದಾರೆ. ಆರ್​ಸಿಬಿಯ ಯೂಟ್ಯೂಬ್ ಚಾನೆಲ್‌ನಲ್ಲಿ ಮಾತನಾಡಿದ್ದ ಅವರು, ನಾನು ರಾಷ್ಟ್ರೀಯ ತಂಡದ ಆಯ್ಕೆಯ ಬಗ್ಗೆ ಎಂದಿಗೂ ತಲೆಕೆಡಿಸಿಕೊಳ್ಳುವುದಿಲ್ಲ. ಇಲ್ಲಿ ಚೆನ್ನಾಗಿ ಆಡಿದರೆ ಭಾರತ ಟಿ20 ತಂಡದಲ್ಲಿ ಸೀಟು ಸಿಗುತ್ತದೆ ಎಂದು ನಾನು ಅಂದುಕೊಂಡೂ ಇಲ್ಲ. ಅವರಿಗೆ ನನ್ನ ಅಗತ್ಯವಿದ್ದರೆ ಆಯ್ಕೆ ಮಾಡಲಿ, ಇಲ್ಲದಿದ್ದರೆ ಬೇಡ ಎಂದು ಹೇಳುವ ಮೂಲಕ ತಮ್ಮ ಅದ್ಭುತ ಆತ್ಮವಿಶ್ವಾಸ ಮತ್ತು ಮಾನಸಿಕ ನೆಮ್ಮದಿಯನ್ನು ಪ್ರದರ್ಶಿಸಿದ್ದಾರೆ. ಬಿಸಿಸಿಐನಿಂದ ತಮಗೆ ಮನ್ನಣೆ ಸಿಗುವುದಿಲ್ಲ ಎಂಬ ಸತ್ಯ ಅವರಿಗೆ ಮೊದಲೇ ಗೊತ್ತಿತ್ತೇನೋ ಎಂಬಂತೆ ಅವರ ಮಾತುಗಳಿದ್ದವು.

ಪಾಟೀದಾರ್ ಅವರ ಈ ಕಡೆಗಣನೆಯನ್ನು ಕ್ರಿಕೆಟ್ ಪಂಡಿತರಿಗೆ ಅರಗಿಸಿಕೊಳ್ಳಲು ಸಾಧ್ಯವಾಗುತ್ತಿಲ್ಲ. ಏಕೆಂದರೆ ಅವರು ಕೇವಲ ನಾಯಕನಾಗಿ ಮಾತ್ರವಲ್ಲ, ಬ್ಯಾಟರ್ ಆಗಿಯೂ ಈ ಬಾರಿ ಅಬ್ಬರಿಸಿದ್ದಾರೆ. ಸ್ಪಿನ್ ಮತ್ತು ವೇಗದ ಬೌಲಿಂಗ್ ಎರಡನ್ನೂ ಧೂಳೀಪಟ ಮಾಡಿರುವ ಅವರು, 2026ರ ಐಪಿಎಲ್ ಸೀಸನ್‌ನಲ್ಲಿ 14 ಇನ್ನಿಂಗ್ಸ್‌ಗಳಿಂದ ಬರೋಬ್ಬರಿ 192.69ರ ಸ್ಟ್ರೈಕ್ ರೇಟ್‌ನಲ್ಲಿ 501 ರನ್ ಚಚ್ಚಿದ್ದಾರೆ.

ಇತ್ತೀಚೆಗಷ್ಟೇ ಟಿ20 ವಿಶ್ವಕಪ್ ಗೆದ್ದುಕೊಟ್ಟ ನಾಯಕ ಸೂರ್ಯಕುಮಾರ್ ಯಾದವ್ ಅವರನ್ನೇ ಫಾರ್ಮ್ ಕೊರತೆಯಿಂದಾಗಿ ತಂಡದಿಂದ ಕೈಬಿಟ್ಟು ಶ್ರೇಯಸ್ ಅಯ್ಯರ್ ಅವರಿಗೆ ಮನ್ನಣೆ ನೀಡಲಾಗಿದೆ. ಪಂಜಾಬ್ ಕಿಂಗ್ಸ್ ತಂಡದಲ್ಲಿ ವಿವಾದಗಳ ನಡುವೆ ಸಿಲುಕಿದ್ದ ಅಯ್ಯರ್ ಅವರ ಆಟಕ್ಕಿಂತ, ಕಪ್ ಗೆದ್ದು ಬೀಗಿದ ಪಾಟೀದಾರ್ ಆಟ ಅತ್ಯುತ್ತಮವಾಗಿತ್ತು. ಆದರೆ ಸೆಲೆಕ್ಟರ್ಸ್ ಮಾತ್ರ ಪಾಟೀದಾರ್ ಕೈಬಿಟ್ಟಿದ್ದಾರೆ.

ಈ ಕುರಿತು ಇಂಡಿಯಾ ಟುಡೇ ವಾಹಿನಿಯಲ್ಲಿ ಮಾತನಾಡಿದ ಕ್ರಿಕೆಟ್ ದಿಗ್ಗಜ ಸುನಿಲ್ ಗವಾಸ್ಕರ್, "ನಾಯಕತ್ವದ ರೇಸ್‌ನಲ್ಲಿ ರಜತ್ ಪಾಟೀದಾರ್ ಮತ್ತು ಶ್ರೇಯಸ್ ಅಯ್ಯರ್ ನಡುವೆ ತೀವ್ರ ಪೈಪೋಟಿ ಇತ್ತು. ಆದರೆ ಶ್ರೇಯಸ್ ಅವರಿಗೆ 3-4 ಐಪಿಎಲ್ ಫ್ರಾಂಚೈಸಿಗಳನ್ನು ಮುನ್ನಡೆಸಿದ ಹೆಚ್ಚಿನ ಅನುಭವ ಇರುವುದರಿಂದ ಅವರಿಗೆ ಮನ್ನಣೆ ಸಿಕ್ಕಿದೆ. ರಜತ್ ನಿಜಕ್ಕೂ ಅನ್‌ಲಕ್ಕಿ" ಎಂದಿದ್ದಾರೆ. ಇತ್ತ ಮುಖ್ಯ ಆಯ್ಕೆಗಾರ ಅಜಿತ್ ಅಗರ್ಕರ್ ಕೂಡ "ಯಾರಾದರೂ ಒಬ್ಬರು ಹೊರಗುಳಿಯಲೇಬೇಕು, ನಾವು ಕೇವಲ 15 ಆಟಗಾರರನ್ನು ಮಾತ್ರ ಆರಿಸಬಲ್ಲೆವು" ಎಂದು ತಮ್ಮ ನಿರ್ಧಾರವನ್ನು ಸಮರ್ಥಿಸಿಕೊಂಡಿದ್ದಾರೆ.

ಟೀಮ್ ಇಂಡಿಯಾದಲ್ಲಿ ಸ್ಥಾನ ಸಿಗದೇ ಇರುವುದು ರಜತ್ ಪಾಟೀದಾರ್ ಅವರ ವೈಯಕ್ತಿಕ ಸೋಲಲ್ಲ. ಭಾರತದ ಪರ ಆಡಿದ ಶೇ. 99ರಷ್ಟು ಕ್ರಿಕೆಟಿಗರಿಗೆ ಸಾಧ್ಯವಾಗದ ಸಾಧನೆಯನ್ನು ಅವರು ಮಾಡಿದ್ದಾರೆ. ಇಡೀ ವಿಶ್ವದಲ್ಲೇ ಅತಿ ಹೆಚ್ಚು ಒತ್ತಡ ಮತ್ತು ಟ್ರೋಫಿಗಾಗಿ ಹಸಿದಿದ್ದ ಆರ್​ಸಿಬಿ ತಂಡವನ್ನು ಮುನ್ನಡೆಸಿ, ಸತತ ಎರಡು ಬಾರಿ ಚಾಂಪಿಯನ್ ಪಟ್ಟ ತಂದುಕೊಟ್ಟಿದ್ದಾರೆ.

ಅವರ ಹೆಸರು ಎಂದಿಗೂ ಅಂತಾರಾಷ್ಟ್ರೀಯ ಕ್ರಿಕೆಟ್ ಇತಿಹಾಸದ ಬೋರ್ಡ್ ಮೇಲೆ ಇರಲಿಕ್ಕಿಲ್ಲ, ಆದರೆ ಸತತ ಎರಡು ಐಪಿಎಲ್ ಟ್ರೋಫಿಗಳನ್ನು ಹಿಡಿದು ನಿಂತಿರುವ 33ರ ಹರೆಯದ ಪಾಟೀದಾರ್ ಅವರಿಗೆ ಇನ್ನು ಯಾವುದೇ ಅಂತಾರಾಷ್ಟ್ರೀಯ ಸರ್ಟಿಫಿಕೇಟ್ ಬೇಕಾಗಿಲ್ಲ. ಕೋಟ್ಯಂತರ ಆರ್​ಸಿಬಿ ಅಭಿಮಾನಿಗಳ ಹೃದಯದಲ್ಲಿ ಅವರು ಈಗಾಗಲೇ ‘ಅಮರ’ ನಾಯಕನಾಗಿ ಉಳಿದುಬಿಟ್ಟಿದ್ದಾರೆ,(ಏಜೆನ್ಸೀಸ್).