ಬಂಗಾಳದಲ್ಲಿ ಬಾಂಗ್ಲಾ, ರೋಹಿಂಗ್ಯಾ ನುಸುಳುಕೋರರಿಗೆ ಕಾದಿದೆ ಗಂಡಾಂತರ! ಡಿಟೆನ್ಷನ್ ಕ್ಯಾಂಪ್‌ ಸ್ಥಾಪಿಸಲು ಸಿಎಂ ಸುವೇಂದು ಸರ್ಕಾರ ಆದೇಶ! Detention Camps In West Bengal

ಇದು ಪಶ್ಚಿಮ ಬಂಗಾಳದಲ್ಲಿ ಮುಖ್ಯಮಂತ್ರಿ ಸುವೇಂದು ಅಧಿಕಾರಿ ನೇತೃತ್ವದ ಪ್ರಥಮ ಬಿಜೆಪಿ ಸರ್ಕಾರ ಅಸ್ತಿತ್ವಕ್ಕೆ ಬಂದ ಕೇವಲ ಒಂದು ತಿಂಗಳೊಳಗೆ ಜಾರಿಗೆ ತಂದಿರುವ ಮಹತ್ವದ ಆದೇಶವಾಗಿದೆ. ಮೂರು ದಿನಗಳ ಹಿಂದಷ್ಟೇ ಸಿಎಂ ಸುವೇಂದು ಅಧಿಕಾರಿ ಅವರು ಅಕ್ರಮ ನುಸುಳುಕೋರರ ವಿರುದ್ಧ ಡಿಟೆಕ್ಟ್, ಡಿಲೀಟ್ ಮತ್ತು ಡಿಪೋರ್ಟ್ ಎಂಬ ಅತ್ಯಂತ ಕಠಿಣ ನೀತಿಯನ್ನು ಘೋಷಿಸಿದ್ದರು.

ಅಕ್ರಮ ಬಾಂಗ್ಲಾದೇಶಿ ವಲಸಿಗರ ವಿರುದ್ಧ ಇಂತಹ ಕಠಿಣ ಸೌಲಭ್ಯಗಳನ್ನು ಮತ್ತು ಬಂಧನ ಕೇಂದ್ರಗಳನ್ನು ಸ್ಥಾಪಿಸುತ್ತಿರುವ ಭಾರತದ ಎರಡನೇ ಬಿಜೆಪಿ ಆಡಳಿತದ ರಾಜ್ಯ ಎಂಬ ಹೆಗ್ಗಳಿಕೆಗೆ ಪಶ್ಚಿಮ ಬಂಗಾಳ ಈಗ ಪಾತ್ರವಾಗಿದೆ. ಇದಕ್ಕೂ ಮುನ್ನ ಅಸ್ಸಾಂ ರಾಜ್ಯದಲ್ಲಿ ಇಂತಹ ವ್ಯವಸ್ಥೆಯನ್ನು ಜಾರಿಗೊಳಿಸಲಾಗಿದ್ದು, 2023 ರಲ್ಲಿ ಅಲ್ಲಿನ ಮೊದಲ ಟ್ರಾನ್ಸಿಟ್ ಕ್ಯಾಂಪ್ ಅಧಿಕೃತವಾಗಿ ಕಾರ್ಯಾರಂಭ ಮಾಡಿತ್ತು.

ರಾಜ್ಯದ ಗೃಹ ಇಲಾಖೆಯು ಎಲ್ಲಾ ಜಿಲ್ಲಾ ಮ್ಯಾಜಿಸ್ಟ್ರೇಟ್‌ಗಳಿಗೆ (DMs) ಕಳುಹಿಸಿರುವ ಅಧಿಕೃತ ಅಧಿಸೂಚನೆಯಲ್ಲಿ, ಭಾರತದಲ್ಲಿ ಕಾನೂನುಬಾಹಿರವಾಗಿ ವಾಸಿಸುತ್ತಿರುವ ಬಾಂಗ್ಲಾದೇಶಿ ಪ್ರಜೆಗಳು ಮತ್ತು ರೋಹಿಂಗ್ಯಾಗಳನ್ನು ಗಡೀಪಾರು ಮಾಡುವ ಕುರಿತು ಕೇಂದ್ರ ಗೃಹ ಸಚಿವಾಲಯ (MHA) 2025ರ ಮೇ 2ರಂದು ಹೊರಡಿಸಿದ್ದ ರಾಷ್ಟ್ರೀಯ ಮಾರ್ಗಸೂಚಿಗಳನ್ನು ಕಟ್ಟುನಿಟ್ಟಾಗಿ ಪಾಲಿಸುವಂತೆ ಸೂಚಿಸಲಾಗಿದೆ.

ಕೇಂದ್ರ ಸರ್ಕಾರದ ಮಾರ್ಗಸೂಚಿಗಳ ಅನ್ವಯ ಈ ಡಿಟೆನ್ಷನ್ ಕ್ಯಾಂಪ್‌ಗಳು ಪ್ರಮುಖವಾಗಿ ಎರಡು ವರ್ಗದ ವಿದೇಶಿ ಪ್ರಜೆಗಳನ್ನು ನಿಯಂತ್ರಿಸಲಿವೆ.

ದೇಶದ ಒಳಗೆ ಭದ್ರತಾ ಸಂಸ್ಥೆಗಳಿಂದ ಅಕ್ರಮವಾಗಿ ಓಡಾಡುವಾಗ ಸಿಕ್ಕಿಬಿದ್ದ ವಿದೇಶಿಗರು.

ಭಾರತದ ವಿವಿಧ ಜೈಲುಗಳಲ್ಲಿ ಶಿಕ್ಷಾವಧಿ ಮುಗಿಸಿ, ತಮ್ಮ ಸ್ವದೇಶಕ್ಕೆ ಮರಳಿ ಹೋಗಲು ಕಾಯುತ್ತಿರುವ ವಿದೇಶಿ ಕೈದಿಗಳು.

ಭಾರತೀಯ ಪೌರತ್ವ ಕಾಯ್ದೆಯ ಪ್ರಕಾರ, ಯಾವುದೇ ವಿದೇಶಿ ಪ್ರಜೆಯು ಸಿಂಧುವಾದ ಪ್ರವಾಸ ದಾಖಲೆಗಳು (ವೀಸಾ, ಪಾಸ್‌ಪೋರ್ಟ್) ಇಲ್ಲದೆ ಭಾರತದ ಗಡಿ ಪ್ರವೇಶಿಸಿದರೆ ಅಥವಾ ಸಿಂಧುವಾದ ದಾಖಲೆಗಳೊಂದಿಗೆ ಬಂದು ಅನುಮತಿಸಲಾದ ಅವಧಿ ಮುಗಿದ ನಂತರವೂ ದೇಶದಲ್ಲಿ ನೆಲೆಸಿದ್ದರೆ ಅವರನ್ನು ಅಕ್ರಮ ವಲಸಿಗ ಎಂದು ಪರಿಗಣಿಸಲಾಗುತ್ತದೆ. ಕಳೆದ ಏಪ್ರಿಲ್‌ನಲ್ಲಿ ನಡೆದ ಭೀಕರ ಬಂಗಾಳ ವಿಧಾನಸಭಾ ಚುನಾವಣೆಯ ಸಂದರ್ಭದಲ್ಲಿ ಬಿಜೆಪಿಯು ಅಕ್ರಮ ನುಸುಳುಕೋರರನ್ನು ದೇಶದಿಂದ ಓಡಿಸುವುದನ್ನೇ ತನ್ನ ಮುಖ್ಯ ಚುನಾವಣಾ ಅಸ್ತ್ರವನ್ನಾಗಿ ಮಾಡಿಕೊಂಡಿತ್ತು.

ಕೇಂದ್ರ ಗೃಹ ಸಚಿವಾಲಯದ (MHA) ನಿಯಮಾವಳಿಗಳ ಪ್ರಕಾರ, ಭಾರತದ ಭೂ ಗಡಿ ಅಥವಾ ಕಡಲ ಗಡಿಗಳನ್ನು ದಾಟಿ ಅಕ್ರಮವಾಗಿ ದೇಶದೊಳಗೆ ನುಸುಳುವಾಗ ಸಿಕ್ಕಿಬೀಳುವ ಬಾಂಗ್ಲಾದೇಶಿ ಅಥವಾ ರೋಹಿಂಗ್ಯಾಗಳ ಫಿಂಗರ್‌ಪ್ರಿಂಟ್‌ಗಳು ಮತ್ತು ಮುಖದ ಫೋಟೋಗಳು ಸೇರಿದಂತೆ ಸಂಪೂರ್ಣ ಬಯೋಮೆಟ್ರಿಕ್ಸ್ ಮಾಹಿತಿಯನ್ನು ತಕ್ಷಣವೇ ಸಂಗ್ರಹಿಸಬೇಕು. ಗೃಹ ಸಚಿವಾಲಯದ ವಿದೇಶಿಗರ ಗುರುತಿನ ಪೋರ್ಟಲ್​ನಲ್ಲಿ ಇವುಗಳನ್ನು ದಾಖಲಿಸಿದ ತಕ್ಷಣವೇ ಅವರನ್ನು ಗಡಿಯಿಂದಲೇ ವಾಪಸ್ ಕಳುಹಿಸಬೇಕು.

ಇನ್ನು ಈಗಾಗಲೇ ಭಾರತದ ಗಡಿಯೊಳಗೆ ನುಗ್ಗಿ ದೇಶದ ವಿವಿಧ ಭಾಗಗಳಲ್ಲಿ, ವಿಶೇಷವಾಗಿ ಬಂಗಾಳದ ಹಳ್ಳಿ ಮತ್ತು ನಗರಗಳಲ್ಲಿ ವಾಸವಾಗಿರುವ ಅಕ್ರಮ ವಲಸಿಗರನ್ನು ಪತ್ತೆಹಚ್ಚಲು ರಾಜ್ಯದ ಪ್ರತಿಯೊಂದು ಜಿಲ್ಲೆಯಲ್ಲೂ ಅಲ್ಲಿನ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿಗಳ ಅಡಿಯಲ್ಲಿ ಒಂದು ವಿಶೇಷ ಟಾಸ್ಕ್ ಫೋರ್ಸ್ ರಚಿಸುವಂತೆ ಆದೇಶಿಸಲಾಗಿದೆ. ಈ ಟಾಸ್ಕ್ ಫೋರ್ಸ್ ನಿರಂತರ ದಾಳಿಗಳನ್ನು ನಡೆಸಿ ಅಕ್ರಮ ವಲಸಿಗರನ್ನು ಗುರುತಿಸಿ ಗಡೀಪಾರು ಮಾಡಲಿದೆ.

ಮಮತಾ ಬ್ಯಾನರ್ಜಿ ಅವರ ಸುದೀರ್ಘ ಆಡಳಿತದ ನಂತರ ಬಂಗಾಳದಲ್ಲಿ ಅಧಿಕಾರ ಹಿಡಿದಿರುವ ಸುವೇಂದು ಅಧಿಕಾರಿ ಅವರ ಈ ಅತ್ಯಂತ ಕಟ್ಟುನಿಟ್ಟಿನ ಮತ್ತು ಬಿಗುವಿನ ಕ್ರಮವು ದೇಶದ ಜಾಗತಿಕ ಮತ್ತು ಆಂತರಿಕ ಭದ್ರತೆಯ ದೃಷ್ಟಿಯಿಂದ ಭಾರಿ ಮಹತ್ವ ಪಡೆದುಕೊಂಡಿದ್ದು, ಮುಂದಿನ ದಿನಗಳಲ್ಲಿ ಪಶ್ಚಿಮ ಬಂಗಾಳದ ರಾಜಕೀಯ ಅಖಾಡದಲ್ಲಿ ಮತ್ತಷ್ಟು ಸಂಚಲನ ಸೃಷ್ಟಿಸುವುದು ಖಚಿತವಾಗಿದೆ,(ಏಜೆನ್ಸೀಸ್​).