ಛತ್ತೀಸ್‌ಗಢದಲ್ಲಿ ನಕ್ಸಲಿಸಂ ಅಂತ್ಯ; ಸುದೀರ್ಘ ಕಾರ್ಯಾಚರಣೆಯ ಮಹತ್ವದ ಮೈಲಿಗಲ್ಲಿನ ಕಥೆ ಬಿಚ್ಚಿಟ್ಟ ಅಮಿತ್​ ಷಾ | Amit Shah

ಸುಮಾರು ಎರಡುವರೆ ವರ್ಷಗಳ ಹಿಂದೆ ನಡೆದ ಆಂತರಿಕ ಸಭೆಯಲ್ಲಿ 2026ರ ಮಾರ್ಚ್ 31 ರೊಳಗೆ ನಕ್ಸಲಿಸಂ ಅನ್ನು ಸಂಪೂರ್ಣವಾಗಿ ನಿರ್ಮೂಲನೆ ಮಾಡುವ ಗುರಿಯನ್ನು ಹೊಂದಲಾಗಿತ್ತು. ಹಲವು ವಲಯಗಳಿಂದ ಈ ಬಗ್ಗೆ ಆರಂಭದಲ್ಲಿ ಅನುಮಾನಗಳು ವ್ಯಕ್ತವಾಗಿದ್ದರೂ, ಈಗ ಆ ಗುರಿಯನ್ನು ಯಶಸ್ವಿಯಾಗಿ ತಲುಪಲಾಗಿದೆ ಎಂದು ಷಾ ನೆನಪಿಸಿಕೊಂಡಿದ್ದಾರೆ.

2024 ಜನವರಿ 21 ರಂದು ನಾವು ಮುಚ್ಚಿದ ಕೋಣೆಯೊಳಗೆ ನಕ್ಸಲಿಸಂ ಕೊನೆಗೊಳಿಸಲು ನಿರ್ಧರಿಸಿದ್ದೆವು. ವೈಯಕ್ತಿಕ ಚರ್ಚೆಗಳಲ್ಲೂ ಇದು ಸಾಧ್ಯವಿಲ್ಲ ಎಂದು ಹಲವರು ನಮಗೆ ಎಚ್ಚರಿಸಿದ್ದರು. ಆದರೆ ನಾವು ಸ್ಪಷ್ಟವಾದ ಯೋಜನೆಯನ್ನು ರೂಪಿಸಿ, ಅದನ್ನು ಕಟ್ಟುನಿಟ್ಟಾಗಿ ಜಾರಿಗೊಳಿಸಿದೆವು. ದಂತೇಶ್ವರಿ ತಾಯಿಯ ಕೃಪೆಯಿಂದ ಇಂದು ನಾವು ಕೊನೆಗೂ ನಕ್ಸಲ್ ಮುಕ್ತ ಬಸ್ತಾರ್ ದಿನವನ್ನು ತಲುಪಿದ್ದೇವೆ ಎಂದು ಷಾ ತಿಳಿಸಿದ್ದಾರೆ.

ನಕ್ಸಲಿಸಂ ವಿರುದ್ಧದ ಹೋರಾಟದಲ್ಲಿ ನಮ್ಮ ದೇಶದ ಯೋಧರು ಬಲಿದಾನ ಮಾಡದ ಯಾವುದೇ ಭಾಗ ಇರಲಿಕ್ಕಿಲ್ಲ. 1971 ರಿಂದ 2026 ಮಾರ್ಚ್ 31 ರವರೆಗಿನ ಈ ಸುದೀರ್ಘ ಅವಧಿಯನ್ನು ದೇಶದ ಜನರು ಒಂದು ದುಸ್ವಪ್ನದಂತೆ ಕಳೆದಿದ್ದಾರೆ. ನಕ್ಸಲ್ ಪೀಡಿತ ಪ್ರದೇಶಗಳ ಜನರಿಗೆ ಇದು ತೀವ್ರ ರಕ್ತಪಾತ, ಅಭಿವೃದ್ಧಿಯ ಶೂನ್ಯತೆ ಮತ್ತು ಯುವಕರ ಕತ್ತಲೆಯ ಭವಿಷ್ಯವನ್ನು ತಂದೊಡ್ಡಿತ್ತು. ಎಂದು ಅಮಿತ್ ಷಾ ವಿವರಿಸಿದ್ದಾರೆ.

ನಕ್ಸಲಿಸಂ ಕೇವಲ ಸ್ಥಳೀಯ ಸಮಸ್ಯೆಯಾಗಿರಲಿಲ್ಲ, ನನ್ನ ತವರು ರಾಜ್ಯವಾದ ಗುಜರಾತ್ ಸೇರಿದಂತೆ ಇತರ ಹಲವು ರಾಜ್ಯಗಳು ಇದನ್ನು ತೀವ್ರ ಕಳಕಳಿ ಮತ್ತು ಸೂಕ್ಷ್ಮತೆಯಿಂದ ಗಮನಿಸುತ್ತಿದ್ದವು. ಇದು ಸಣ್ಣ ಅವಧಿಯಲ್ಲ, ಮೂರು ತಲೆಮಾರುಗಳು ಇದರ ನೆರಳಿನಲ್ಲಿಯೇ ಬದುಕಿವೆ. ಆದರೆ, ಇಡೀ ಜೀವಿತಾವಧಿಯಲ್ಲಿ ಸಾಧಿಸಲು ಅಸಾಧ್ಯವೆಂದು ಭಾವಿಸಲಾಗಿದ್ದ ಗುರಿಯನ್ನು ಇಂದು ಯಶಸ್ವಿಯಾಗಿ ಸಾಧಿಸಿರುವುದಕ್ಕೆ ನನಗೆ ಅತ್ಯಂತ ಸಂತೋಷವಾಗಿದೆ ಎಂದು ಷಾ ಹರ್ಷ ವ್ಯಕ್ತಪಡಿಸಿದ್ದಾರೆ(ಏಜೆನ್ಸೀಸ್​​).