ಆಗಸದಲ್ಲಿ ಹಾರದೆ ಕಾಡಿನಲ್ಲಿ ರಾಜನಂತೆ ಸಂಚರಿಸುವ ದೈತ್ಯ ಪಕ್ಷಿ: ಇದರ ವಿಶೇಷತೆ ಕೇಳಿದ್ರೆ ಅಚ್ಚರಿಯಾಗುತ್ತೆ...! Cassowary

Cassowary : ಪಕ್ಷಿಗಳ ಜಗತ್ತು ನೋಡಲು ಎಷ್ಟು ಸುಂದರವೋ, ಅಷ್ಟೇ ಅಚ್ಚರಿಯ ಸಂಗತಿಗಳಿಂದ ಕೂಡಿದೆ. ಕೆಲವು ಪಕ್ಷಿಗಳು ಆಕಾಶದಲ್ಲಿ ಸಾವಿರಾರು ಕಿಲೋಮೀಟರ್‌ ಹಾರಿದರೆ, ಇನ್ನೂ ಕೆಲವು ಹಾರಲು ಸಾಧ್ಯವಾಗದಿದ್ದರೂ ತಮ್ಮದೇ ಆದ ವಿಶೇಷ ಗುಣಗಳಿಂದ ಪ್ರಾಣಿ ಪ್ರಿಯರ ಗಮನವನ್ನು ಸೆಳೆಯುತ್ತವೆ. ಅಂತಹ ಅಪರೂಪದ ಪಕ್ಷಿಗಳಲ್ಲಿ ಕ್ಯಾಸೋವರಿ ಕೂಡ ಒಂದು.

ದೈತ್ಯಾಕಾರದ ದೇಹ, ನೀಲಿ-ಕೆಂಪು ಬಣ್ಣದ ಕುತ್ತಿಗೆ ಹಾಗೂ ತಲೆಯ ಮೇಲಿನ ಹೆಲ್ಮೆಟ್‌ನಂತಿರುವ ರಚನೆಯಿಂದ ಈ ಪಕ್ಷಿ ಎಲ್ಲರ ಕುತೂಹಲ ಕೆರಳಿಸುತ್ತದೆ. ಇದರ ವಿಶಿಷ್ಟ ದೇಹ ರಚನೆ ಮಾತ್ರವಲ್ಲ, ಕಾಡಿನ ಪರಿಸರ ವ್ಯವಸ್ಥೆಯಲ್ಲಿಯೂ ಕ್ಯಾಸೋವರಿ ಮಹತ್ವದ ಪಾತ್ರ ವಹಿಸುತ್ತದೆ. ಹಣ್ಣುಗಳ ಬೀಜಗಳನ್ನು ಹರಡುವ ಮೂಲಕ ಮಳೆಕಾಡಿನ ಸಸ್ಯಗಳ ಬೆಳವಣಿಗೆಗೆ ಇದು ನೆರವಾಗುತ್ತದೆ.

ಕ್ಯಾಸೋವರಿ ವಿಶ್ವದ ಅತಿ ದೊಡ್ಡ ಹಾರಲಾಗದ ಪಕ್ಷಿಗಳಲ್ಲಿ ಒಂದಾಗಿದೆ. ವಯಸ್ಕ ಕ್ಯಾಸೋವರಿಯ ಎತ್ತರ ಸಾಮಾನ್ಯವಾಗಿ 1.5 ರಿಂದ 1.8 ಮೀಟರ್‌ವರೆಗೆ ಬೆಳೆಯಬಹುದು. ಗಾತ್ರದಲ್ಲಿ ಇದು ಮನುಷ್ಯನ ಎತ್ತರಕ್ಕೆ ಸಮೀಪವಾಗಿರುವುದರಿಂದ ದೂರದಿಂದ ನೋಡಿದಾಗ ಇನ್ನಷ್ಟು ಭವ್ಯವಾಗಿ ಕಾಣುತ್ತದೆ. ಇದರ ದೇಹವು ಬಲಿಷ್ಠವಾಗಿದ್ದು, ಉದ್ದವಾದ ಕುತ್ತಿಗೆ ಮತ್ತು ಗಟ್ಟಿಯಾದ ಕಾಲುಗಳನ್ನು ಹೊಂದಿದೆ. ಹೆಣ್ಣು ಕ್ಯಾಸೋವರಿಗಳು ಸಾಮಾನ್ಯವಾಗಿ ಗಂಡು ಪಕ್ಷಿಗಳಿಗಿಂತ ದೊಡ್ಡದಾಗಿರುತ್ತವೆ. ಹಾರಲು ಸಾಧ್ಯವಿಲ್ಲದಿದ್ದರೂ, ಬಲಿಷ್ಠ ಕಾಲುಗಳ ನೆರವಿನಿಂದ ವೇಗವಾಗಿ ಓಡಬಲ್ಲದು. ಕ್ಯಾಸೋವರಿಯ ದೇಹದ ಗಾತ್ರಕ್ಕೆ ಹೋಲಿಸಿದರೆ ಅದರ ರೆಕ್ಕೆಗಳು ಬಹಳ ಚಿಕ್ಕದಾಗಿವೆ. ಆದ್ದರಿಂದ ಇವು ಹಾರಾಟಕ್ಕಿಂತ ಓಡುವುದು, ಈಜುವುದು ಮತ್ತು ದಟ್ಟ ಕಾಡಿನಲ್ಲಿ ಸಂಚರಿಸುವುದಕ್ಕೆ ಹೆಚ್ಚು ಹೊಂದಿಕೊಂಡಿವೆ.

ಕ್ಯಾಸೋವರಿ ಪಕ್ಷಿ ಮುಖ್ಯವಾಗಿ ಆಸ್ಟ್ರೇಲಿಯಾದ ಈಶಾನ್ಯ ಕ್ವೀನ್ಸ್‌ಲ್ಯಾಂಡ್‌, ನ್ಯೂ ಗಿನಿಯಾ ಮತ್ತು ಸಮೀಪದ ಕೆಲವು ದ್ವೀಪಗಳ ದಟ್ಟ ಮಳೆಕಾಡುಗಳಲ್ಲಿ ಕಂಡುಬರುತ್ತದೆ. ಇದು ದಟ್ಟವಾದ ಕಾಡು, ಜೌಗು ಪ್ರದೇಶಗಳು, ನದಿಗಳು ಮತ್ತು ಉಷ್ಣವಲಯದ ಅರಣ್ಯಗಳ ಸುತ್ತಮುತ್ತ ವಾಸಿಸುತ್ತದೆ. ವಿಶೇಷವಾಗಿ ಹಣ್ಣುಗಳು ಹೇರಳವಾಗಿ ಸಿಗುವ ಪ್ರದೇಶಗಳು ಕ್ಯಾಸೋವರಿಗೆ ಅನುಕೂಲಕರವಾಗಿವೆ. ಆಸ್ಟ್ರೇಲಿಯಾದಲ್ಲಿ ಕಂಡುಬರುವ ಸದರ್ನ್ ಕ್ಯಾಸೋವರಿ (Southern Cassowary) ಅಪರೂಪದ ಪಕ್ಷಿಯಾಗಿದ್ದು, ಅದರ ಸಂರಕ್ಷಣೆಗೆ ಹಲವು ಪ್ರಯತ್ನಗಳು ನಡೆಯುತ್ತಿವೆ.

ಕ್ಯಾಸೋವರಿಯ ರೆಕ್ಕೆಗಳು ಚಿಕ್ಕದಾಗಿರುವುದರಿಂದ ಅದು ಇತರ ಅನೇಕ ಪಕ್ಷಿಗಳಂತೆ ಆಕಾಶದಲ್ಲಿ ಹಾರಲು ಸಾಧ್ಯವಿಲ್ಲ. ಆದರೆ, ಹಾರಲು ಸಾಧ್ಯವಿಲ್ಲದಿರುವುದನ್ನು ಅದರ ಬಲಿಷ್ಠ ಕಾಲುಗಳು ಸರಿದೂಗಿಸುತ್ತವೆ. ದೊಡ್ಡ, ಗಟ್ಟಿಯಾದ ಕಾಲುಗಳು ಮತ್ತು ಮೂರು ಬೆರಳುಗಳು ಹೊಂದಿರುವ ಕ್ಯಾಸೋವರಿ ದಟ್ಟ ಕಾಡಿನಲ್ಲಿಯೂ ವೇಗವಾಗಿ ಓಡಬಲ್ಲದು. ಅಪಾಯ ಎದುರಾದಾಗ ಇದು ಓಡುವುದರ ಜೊತೆಗೆ ದಟ್ಟವಾದ ಸಸ್ಯಗಳ ನಡುವೆ ಸುಲಭವಾಗಿ ದಾರಿ ಮಾಡಿಕೊಂಡು ತಪ್ಪಿಸಿಕೊಳ್ಳುತ್ತದೆ. ನೀರಿನಲ್ಲಿಯೂ ಉತ್ತಮವಾಗಿ ಈಜಬಲ್ಲದು. ಹೀಗಾಗಿ ಹಾರಾಟದ ಬದಲು ಓಡುವುದು ಮತ್ತು ಈಜುವುದು ಕ್ಯಾಸೋವರಿಯ ಪ್ರಮುಖ ಚಲನೆಯ ಸಾಮರ್ಥ್ಯಗಳಾಗಿವೆ.

ದಟ್ಟ ಕಾಡಿನಲ್ಲಿ ಕ್ಯಾಸೋವರಿಗೆ ಹುಲಿ, ಕಾಡುನಾಯಿ ಸೇರಿದಂತೆ ಕೆಲವು ಪರಭಕ್ಷಕಗಳಿಂದ ಅಪಾಯ ಎದುರಾಗಬಹುದು. ಇಂತಹ ಸಂದರ್ಭದಲ್ಲಿ ಸಾಮಾನ್ಯವಾಗಿ ಮೊದಲು ಓಡಿ ತಪ್ಪಿಸಿಕೊಳ್ಳಲು ಪ್ರಯತ್ನಿಸುತ್ತದೆ. ಆದರೆ ಸಿಕ್ಕಿಹಾಕಿಕೊಂಡರೆ ತನ್ನ ಬಲಿಷ್ಠ ಕಾಲುಗಳನ್ನು ಬಳಸಿ ರಕ್ಷಿಸಿಕೊಳ್ಳಬಹುದು. ಕ್ಯಾಸೋರಿಯ ಪ್ರತಿ ಕಾಲಿನ ಮೂರು ಬೆರಳುಗಳಲ್ಲಿ ಒಳಭಾಗದ ಬೆರಳಿಗೆ ಉದ್ದವಾದ, ಚೂಪಾದ ಉಗುರು ಇರುತ್ತದೆ. ಅಪಾಯ ಎದುರಾದಾಗ ಅದು ಕಾಲಿನಿಂದ ಬಲವಾಗಿ ಒದೆಯುವ ಮೂಲಕ ಎದುರಾಳಿಯನ್ನು ದೂರವಿಡಲು ಪ್ರಯತ್ನಿಸುತ್ತದೆ. ಜೊತೆಗೆ ದಟ್ಟ ಸಸ್ಯಗಳ ನಡುವೆ ವೇಗವಾಗಿ ಓಡುವುದು ಮತ್ತು ನೀರಿಗೆ ಇಳಿದು ಈಜುವುದು ಕೂಡ ಅದರ ರಕ್ಷಣಾ ತಂತ್ರಗಳಲ್ಲಿ ಸೇರಿವೆ. ಕ್ಯಾಸೋವರಿ ಸಾಮಾನ್ಯವಾಗಿ ಮನುಷ್ಯರನ್ನು ಹುಡುಕಿ ದಾಳಿ ಮಾಡುವುದಿಲ್ಲ, ದೂರದಿಂದಲೇ ಇರಲು ಬಯಸುತ್ತದೆ, (ಏಜೆನ್ಸೀಸ್​).