ಪಕ್ಷ ಹಾಳಾದ್ರೂ ಪರವಾಗಿಲ್ಲ, ನಮ್ಮ ಹೊಟ್ಟೆ ತುಂಬಿದ್ರೆ ಸಾಕು!...ಸ್ವಪಕ್ಷೀಯ ನಾಯಕರ ವಿರುದ್ಧವೇ ಆಕ್ರೋಶ ಹೊರಹಾಕಿದ ಬಿಜೆಪಿ ಶಾಸಕ | Amarnath Sakha

ಪಶ್ಚಿಮ ಬಂಗಾಳದ ಬಾಂಕುರಾ ಜಿಲ್ಲೆಯ ಓಂಡಾ ಕ್ಷೇತ್ರದ ಬಿಜೆಪಿ ಶಾಸಕ ಸಾಖಾ ಫೇಸ್‌ಬುಕ್‌ನಲ್ಲಿ ಪೋಸ್ಟ್​​ವೊಂದನ್ನು ಹಂಚಿಕೊಂಡಿದ್ದು, ಅದರಲ್ಲಿ, ತಾವು ಹಲವು ವರ್ಷಗಳಿಂದ ಬಿಜೆಪಿಯಲ್ಲಿದ್ದು, ತಪ್ಪು ಕಂಡಾಗ ಸುಮ್ಮನಿರಲು ಸಾಧ್ಯವಿಲ್ಲ ಎಂದು ಬರೆದುಕೊಂಡಿದ್ದಾರೆ. ನಾನು ಯಾರನ್ನೂ ಮೆಚ್ಚಿಸಲು ಪ್ರಯತ್ನಿಸುವುದಿಲ್ಲ. ನನಗೆ ಯಾವುದು ತಪ್ಪು ಅನಿಸುತ್ತದೆಯೋ ಅದನ್ನು ಪ್ರತಿಭಟಿಸುತ್ತೇನೆ, ಇದರಿಂದಾಗಿ ನಾನು ಅನೇಕ ಶತ್ರುಗಳನ್ನು ಮಾಡಿಕೊಂಡಿದ್ದೇನೆ. ಅದು ನನಗೆ ಮುಖ್ಯವಲ್ಲ ಎಂದು ಬಂಗಾಳಿ ಭಾಷೆಯಲ್ಲಿ ಬರೆದ ಫೇಸ್‌ಬುಕ್ ಪೋಸ್ಟ್‌ನಲ್ಲಿ ಸಾಖಾ ತಿಳಿಸಿದ್ದಾರೆ.

ಎಡರಂಗವನ್ನು ಗುರಿಯಾಗಿಸಿಕೊಂಡು ಮಾತನಾಡಿದ ಸಾಖಾ, ಬಂಗಾಳದಲ್ಲಿ ಬಿಜೆಪಿ ಅಧಿಕಾರಕ್ಕೆ ಬಂದಾಗಿನಿಂದ ಕಮ್ಯುನಿಸ್ಟ್ ಪಕ್ಷಗಳು ಜನರನ್ನು ಪ್ರಚೋದಿಸುತ್ತಿವೆ ಹಾಗೂ ಸರ್ಕಾರದ ವಿರುದ್ಧ ಎತ್ತಿಕಟ್ಟುತ್ತಿವೆ, ಆಶ್ಚರ್ಯದ ಸಂಗತಿಯೆಂದರೆ ನಮ್ಮ ಹಿರಿಯ ನಾಯಕರ್ಯಾರೂ ಇದನ್ನು ಪ್ರತಿಭಟಿಸುತ್ತಿಲ್ಲ ಎಂದು ಶಾಖಾ ಫೇಸ್‌ಬುಕ್‌ನಲ್ಲಿ ಬರೆದಿದ್ದಾರೆ. ಸಿಪಿಐ(ಎಂ), ಸಿಪಿಐ, ಫಾರ್ವರ್ಡ್ ಬ್ಲಾಕ್ ಸೇರಿದಂತೆ ಹಲವು ಎಡಪಕ್ಷಗಳು ಈ ಮೈತ್ರಿಯಲ್ಲಿವೆ.

ಸಿಪಿಐ(ಎಂ) ಚಟುವಟಿಕೆಗಳಿಗೆ ತಿರುಗೇಟು ನೀಡಿ ಪಕ್ಷ ಕಟ್ಟುವ ಬದಲು, ಬಿಜೆಪಿ ನಾಯಕರು ತಮ್ಮ ಪ್ರಚಾರದಲ್ಲೇ ಮುಳುಗಿದ್ದಾರೆ ಎಂದು ಸಾಖಾ ಆರೋಪಿಸಿದರು. ಬೆಳಿಗ್ಗೆಯಿಂದ ರಾತ್ರಿವರೆಗೆ ಸ್ವಯಂ ಪ್ರಚಾರದಲ್ಲೇ ಕಾಲಹರಣ ಮಾಡುತ್ತಿದ್ದು, ಎಡಪಕ್ಷಗಳ ವಿರುದ್ಧ ಯಾವುದೇ ಪ್ರತಿಭಟನೆಯನ್ನೂ ನಡೆಸುತ್ತಿಲ್ಲ ಎಂದು ಅವರು ದೂರಿದ್ದಾರೆ. ಈ ವರ್ಷದ ಮೇ ತಿಂಗಳಲ್ಲಿ ಹೊರಬಿದ್ದ ವಿಧಾನಸಭಾ ಚುನಾವಣೆ ಫಲಿತಾಂಶದಲ್ಲಿ ಪಕ್ಷವು ಅಭೂತಪೂರ್ವ ಜಯಗಳಿಸಿ ಅಧಿಕಾರಕ್ಕೆ ಬಂದ ನಂತರ, ರಾಜ್ಯದ ಬಿಜೆಪಿ ನಾಯಕರು ವೈಯಕ್ತಿಕ ಲಾಭಗಳ ಮೇಲೆಯೇ ಹೆಚ್ಚು ಗಮನ ಹರಿಸುತ್ತಿದ್ದಾರೆ ಎಂದು ಅವರು ಟೀಕಿಸಿದ್ದಾರೆ.

ಪಕ್ಷ ಅಧಿಕಾರಕ್ಕೆ ಬಂದಿರುವುದರಿಂದ ಎಲ್ಲರೂ ಸೌಲಭ್ಯಗಳನ್ನು ಅನುಭವಿಸುವುದರಲ್ಲೇ ನಿರತರಾಗಿದ್ದಾರೆ. ತಮ್ಮ ಸ್ವಂತ ಹೊಟ್ಟೆ ತುಂಬಿದರೆ ಸಾಕು, ಪಕ್ಷ ಹಾಳಾಗಿ ಹೋದರೂ ಪರವಾಗಿಲ್ಲ ಎಂದು ಸಾಖಾ ಫೇಸ್‌ಬುಕ್‌ನಲ್ಲಿ ಬರೆದುಕೊಂಡಿದ್ದಾರೆ. ಅಲ್ಲದೆ, ಅಂತಹ ನಾಯಕರ ಬದ್ಧತೆಯನ್ನು ಪ್ರಶ್ನಿಸಿರುವ ಅವರು, ಅವರು ಮೊದಲು ಹೇಗಿದ್ದರು, ಈಗ ಏನಾಗಿದ್ದಾರೆ..? ಎಂದು ಕುಟುಕಿದ್ದಾರೆ. ವ್ಯಕ್ತಿಗತ ನಾಯಕರಗಿಂತ ಪಕ್ಷಕ್ಕೆ ಮೊದಲ ಆದ್ಯತೆ ನೀಡುವಂತೆ ಬಿಜೆಪಿ ಕಾರ್ಯಕರ್ತರಲ್ಲಿ ಮನವಿ ಮಾಡಿರುವ ಶಾಖಾ, ಯಾವೊಬ್ಬ ನಾಯಕನ ಅನುಯಾಯಿಗಳಾಗುವ ಬದಲು, ಪಕ್ಷದ ಅನುಯಾಯಿಗಳಾಗಿ. ನಾಯಕರು ಬರುತ್ತಾರೆ ಹೋಗುತ್ತಾರೆ, ಆದರೆ ಪಕ್ಷ ಉಳಿಯುತ್ತದೆ ಎಂದು ಅವರು ಬರೆದಿದ್ದಾರೆ.

ತಮ್ಮ ರಾಜಕೀಯ ಪಯಣವನ್ನು ಉಲ್ಲೇಖಿಸಿದ ಶಾಸಕರು, ಬಿಜೆಪಿಗಾಗಿ ನನ್ನ ಜೀವನ, ಯೌವನ, ಕುಟುಂಬ ಹಾಗೂ ಪ್ರೀತಿಪಾತ್ರರನ್ನು ಪಕ್ಕಕ್ಕೆ ತಳ್ಳಿದ್ದೇನೆ. ಸಿಪಿಐ(ಎಂ)ನ 34 ವರ್ಷಗಳ ರಕ್ತಪಾತ, ಭಯೋತ್ಪಾದನೆ ಹಾಗೂ ತೃಣಮೂಲ ಕಾಂಗ್ರೆಸ್‌ನ ದೌರ್ಜನ್ಯಗಳನ್ನು ಸಹಿಸಿಕೊಂಡಿದ್ದೇನೆ. ಜನರು ನಮ್ಮನ್ನು ನಂಬಿ ಬೆಂಬಲಿಸಿದರು. ಆದರೆ, ಕೆಲವು ನಾಯಕರ ಸ್ವಾರ್ಥ ನಡವಳಿಕೆಯಿಂದಾಗಿ ಈಗ ಪಕ್ಷಕ್ಕೆ ಹಾನಿಯಾಗುತ್ತಿದೆ ಎಂದು ಆಕ್ರೋಶ ಹೊರಹಾಕಿದ್ದಾರೆ.

ಹಲವು ರಾಜ್ಯಗಳಲ್ಲಿ ಜೆನ್ ಜೀ ಪ್ರತಿಭಟನೆಗಳ ನಂತರ ಸೋಶಿಯಲ್ ಮೀಡಿಯಾದಲ್ಲಿ ಸಕ್ರಿಯರಾಗುವಂತೆ ನಾಯಕರಿಗೆ ಪ್ರಧಾನಿ ಮೋದಿ ಸೇರಿದಂತೆ ಹಿರಿಯರು ಸಲಹೆ ನೀಡಿದ್ದರು. ಇದರ ಬೆನ್ನಲ್ಲೇ ಶಾಸಕ ಸಾಖಾ ಈ ಫೇಸ್‌ಬುಕ್ ಪೋಸ್ಟ್ ಮಾಡಿದ್ದಾರೆ. ಇನ್ನೊಂದೆಡೆ, ರಾಜ್ಯ ಬಿಜೆಪಿಯ ಹಿರಿಯ ನಾಯಕ ಸಮೀಕ್ ಭಟ್ಟಾಚಾರ್ಯ ಅವರು ಪಕ್ಷದ ಪದಾಧಿಕಾರಿಗಳ ಸುಲಿಗೆ ಹಾಗೂ ಕಟ್-ಮನಿ ವಸೂಲಿ ಬಗ್ಗೆ ಎಚ್ಚರಿಸಿದ್ದ ಬೆನ್ನಲ್ಲೇ ಈ ಆರೋಪಗಳು ಹೊರಬಿದ್ದಿರುವುದು ತೀವ್ರ ಸಂಚಲನ ಮೂಡಿಸಿದೆ.

ಪೋಸ್ಟ್ ಕುರಿತು ಪ್ರತಿಕ್ರಿಯಿಸಿದ ಹಿರಿಯ ಜಿಲ್ಲಾ ಬಿಜೆಪಿ ನಾಯಕರೊಬ್ಬರು, ಸಾಖಾ ಅವರು ಹಿರಿಯ ನಾಯಕರಾಗಿದ್ದು, ತಮ್ಮ ಕಳವಳಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳುವ ಬದಲು ಪಕ್ಷದ ಆಂತರಿಕ ವೇದಿಕೆಯಲ್ಲಿ ಮಂಡಿಸಬೇಕಿತ್ತು. ಅವರ ಅಭಿಪ್ರಾಯಗಳು ಅತ್ಯಂತ ಪ್ರಮುಖವಾಗಿದ್ದು, ಅವುಗಳನ್ನು ನಾವು ಪರಿಶೀಲಿಸುತ್ತೇವೆ ಎಂದು ಹೇಳಿರುವುದಾಗಿ ಪಿಟಿಐ ವರದಿ ಮಾಡಿದೆ.

ಬಂಗಾಳದ ಎಡರಂಗವು ಯುವ ನಾಯಕರನ್ನು ಮುಂಚೂಣಿಗೆ ತಂದು ಬೀದಿ ಹೋರಾಟಗಳನ್ನು ತೀವ್ರಗೊಳಿಸುವ ಮೂಲಕ ಪಕ್ಷ ಸಂಘಟನೆಗೆ ಯತ್ನಿಸುತ್ತಿರುವ ವೇಳೆಯಲ್ಲೇ ಸಾಖಾ ಅವರ ಈ ಟೀಕೆ ಬಂದಿದೆ. ಆದಾಗ್ಯೂ, ಈ ಪ್ರಯತ್ನಗಳು ಚುನಾವಣಾ ಜಯವಾಗಿ ಬದಲಾಗಿಲ್ಲ. ಇತ್ತೀಚಿನ ವಿಧಾನಸಭಾ ಚುನಾವಣೆಯಲ್ಲಿ ಎಡರಂಗ ಮೈತ್ರಿಕೂಟವು ಕೇವಲ ಎರಡು ಸ್ಥಾನಗಳನ್ನು ಗೆದ್ದಿದ್ದು, 2021 ಮತ್ತು 2026ರ ಚುನಾವಣೆಗಳ ನಡುವೆ ಅದರ ಮತಗಳ ಶೇಕಡಾವಾರು ಸುಮಾರು 4% ನಷ್ಟು ಕುಸಿದಿದೆ(ಏಜೆನ್ಸೀಸ್​).