ಅರುಣಾಚಲ ಪ್ರದೇಶ ಭಾರತದ ಅವಿಭಾಜ್ಯ ಅಂಗ; ಚೀನಾಗೆ ತಿರುಗೇಟು ನೀಡಿದ ಕೇಂದ್ರ ಸರ್ಕಾರ | Central government

ನವದೆಹಲಿ: ಶಾಂಘೈ ವಿಮಾನ ನಿಲ್ದಾಣದಲ್ಲಿ ಅರುಣಾಚಲ ಪ್ರದೇಶದ ಮಹಿಳೆಯೊಬ್ಬರಿಗೆ ಬಂಧಿಸಿ ಕಿರುಕುಳ ನೀಡಿ, ಅರುಣಾಚಲ ಪ್ರದೇಶ ಭಾರತದ ಭಾಗ ಎಂದು ಒಪ್ಪಿಕೊಂಡಿಲ್ಲ ಎಂದು ಉದ್ದಟತನ ತೋರಿದ್ದ ಚೀನಾಗೆ, ಕೇಂದ್ರ ಸರ್ಕಾರ(Central government) ತಿರುಗೇಟು ಕೊಟ್ಟಿದ್ದು, ಅರುಣಾಚಲ ಪ್ರದೇಶ ಭಾರತದ ಅವಿಭಾಜ್ಯ ಅಂಗ, ನಮ್ಮಿಂದ ಬೇರ್ಪಡಿಸಲಾಗದ ಭಾಗ, ಇದು ಸ್ಪಷ್ಟ ಸತ್ಯ. ಚೀನಾದ ಕಡೆಯಿಂದ ಎಷ್ಟೇ ನಿರಾಕರಣೆ ಬಂದರೂ ಈ ನಿರ್ವಿವಾದದ ವಾಸ್ತವ ಬದಲಾಗುವುದಿಲ್ಲ ಎಂದು ಪ್ರತಿಪಾದಿಸಿದೆ.

ಮಂಗಳವಾರ(ನ. 25) ವಿದೇಶಾಂಗ ವ್ಯವಹಾರಗಳ ಸಚಿವಾಲಯ ವಕ್ತಾರ ರಣದೀರ್ ಜೈಸ್ವಾಲ್ ಮಾತನಾಡಿದ್ದು, ಮಹಿಳೆಯ ಬಂಧನದ ವಿಷಯ ಅಂತರರಾಷ್ಟ್ರೀಯ ವಿಮಾನ ಪ್ರಯಾಣವನ್ನು ನಿಯಂತ್ರಿಸುವ ಹಲವಾರು ಸಂಪ್ರದಾಯಗಳನ್ನು ಉಲ್ಲಂಘಿಸುವ ಅವರ ಕ್ರಮಗಳಿಗೆ ಚೀನಾದ ಅಧಿಕಾರಿಗಳಿಗೆ ಇನ್ನೂ ವಿವರಣೆ ನೀಡಲು ಸಾಧ್ಯವಾಗಿಲ್ಲ ಎಂದು ಹೇಳಿದ್ದಾರೆ.

ಚೀನಾದ ಕ್ರಮವು ಎಲ್ಲಾ ದೇಶಗಳ ಪ್ರಜೆಗಳಿಗೆ 24 ಗಂಟೆಗಳವರೆಗೆ ವೀಸಾ ಮುಕ್ತ ಸಾರಿಗೆಯನ್ನು ಅನುಮತಿಸುವ ತಮ್ಮದೇ ಆದ ನಿಯಮಗಳನ್ನು ಉಲ್ಲಂಘಿಸಿದೆ. ಅರುಣಾಚಲ ಪ್ರದೇಶದ ಭಾರತೀಯ ಪ್ರಜೆಯೊಬ್ಬರು ಮಾನ್ಯ ಪಾಸ್‌ಪೋರ್ಟ್ ಹೊಂದಿದ್ದು, ಜಪಾನ್‌ಗೆ ಪ್ರಯಾಣ ಬೆಳೆಸುವಾಗ ಶಾಂಘೈ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದ ಮೂಲಕ ಸಾಗುತ್ತಿದ್ದಾಗ ಅವರನ್ನು ಏಕಪಕ್ಷೀಯವಾಗಿ ಬಂಧಿಸಲಾಗಿದೆ ಎಂದಿದ್ದಾರೆ.

ಮಹಿಳೆಯನ್ನು ಬಂಧಿಸಲಾಗಿದೆ ಅಥವಾ ಕಿರುಕುಳ ನೀಡಲಾಗಿದೆ ಎಂಬುದನ್ನು ನಿರಾಕರಿಸಿದ ಚೀನಾದ ವಿದೇಶಾಂಗ ಸಚಿವಾಲಯ, ಒಂದು ದೇಶಕ್ಕೆ ಪ್ರವೇಶಿಸುವ ಮತ್ತು ನಿರ್ಗಮಿಸುವ ಜನರ ಮೇಲೆ ಗಡಿ ತಪಾಸಣೆ ನಡೆಸುವುದು ಮತ್ತು ಪ್ರವೇಶ ಅಥವಾ ನಿರ್ಗಮನದ ನಿರ್ದಿಷ್ಟ ಪರಿಸ್ಥಿತಿಗೆ ಅನುಗುಣವಾಗಿ ಕಾನೂನು ಜಾರಿ ಮಾಡುವುದು ದೇಶಗಳ ಗಡಿ ಜಾರಿ ಅಧಿಕಾರಿಗಳ ಸಾಮಾನ್ಯ ಅಭ್ಯಾಸ ಎಂದು ಹೇಳಿತ್ತು.

ಇನ್ನೂ ಝಂಗ್ನಾನ್ ಚೀನಾದ ಭೂಪ್ರದೇಶ. ಭಾರತವು ಕಾನೂನುಬಾಹಿರವಾಗಿ ಸ್ಥಾಪಿಸಿರುವ 'ಅರುಣಾಚಲ ಪ್ರದೇಶ'ವನ್ನು ಚೀನಾ ಎಂದಿಗೂ ಗುರುತಿಸಿಲ್ಲ ಎಂದು ಚೀನಾದ ವಿದೇಶಾಂಗ ಸಚಿವಾಲಯದ ವಕ್ತಾರರು ತಗಾದೆ ತೆಗೆದಿದ್ದರು (ಏಜೆನ್ಸೀಸ್).