ಭಾರತದೊಂದಿಗೆ ಸ್ನೇಹ ಕಡಿದುಕೊಂಡರೆ ಅಮೆರಿಕಕ್ಕೆ ಸಂಕಷ್ಟ: ಟ್ರಂಪ್‌ಗೆ ರಿಚ್ ಮೆಕಾರ್ಮಿಕ್ ಖಡಕ್ ಸಂದೇಶ | Rich McCormick

ಈ ಬಗ್ಗೆ ಸೆಂಟರ್ ಫಾರ್ ಸ್ಟ್ರಾಟೆಜಿಕ್ ಅಂಡ್ ಇಂಟರ್ನ್ಯಾಷನಲ್ ಸ್ಟಡೀಸ್ (CSIS) ನಲ್ಲಿ ಮಾತನಾಡಿದ ರಿಪಬ್ಲಿಕನ್ ಶಾಸಕರು, ಭಾರತವು ಅಮೆರಿಕದಲ್ಲಿ ಹೂಡಿಕೆ ಮತ್ತು ಪ್ರತಿಭೆಯ ಪ್ರಮುಖ ಚಾಲಕನಾಗಿದ್ದರೂ, ಪಾಕಿಸ್ತಾನವು ಇದೇ ರೀತಿಯ ಆರ್ಥಿಕ ಮೌಲ್ಯವನ್ನು ತರುವಲ್ಲಿ ವಿಫಲವಾಗಿದೆ ಎಂದು ತಿಳಿಸಿದ್ದಾರೆ.

ದ್ವಿಪಕ್ಷೀಯ ಸಂಬಂಧಗಳಲ್ಲಿನ ಮೂಲಭೂತ ವ್ಯತ್ಯಾಸವನ್ನು ಮೆಕ್‌ಕಾರ್ಮಿಕ್ ಬಗ್ಗೆ ಹೇಳಿದ್ದು, ಪಾಕಿಸ್ತಾನವು 300 ಮಿಲಿಯನ್ ಜನರನ್ನು ಹೊಂದಿರುವ ದೇಶವಾಗಿದೆ. ಆದರೆ ಅದು ಅಮೆರಿಕಕ್ಕೆ ಹೂಡಿಕೆಗಳನ್ನು ತರುವುದನ್ನು ನೀವು ನೋಡುತ್ತಿಲ್ಲ ಎಂದು ಮೆಕ್‌ಕಾರ್ಮಿಕ್ ಟೀಕಿಸಿದ್ದಾರೆ. ಭಾರತವು ಹೂಡಿಕೆಯನ್ನು ಮಾತ್ರ ತೆಗೆದುಕೊಳ್ಳುವುದಿಲ್ಲ. ಅದು ಅಮೆರಿಕಕ್ಕೂ ಹೂಡಿಕೆಗಳನ್ನು ತರುತ್ತದೆ. ಪ್ರತಿಭೆ ಮುಖ್ಯ, ಮತ್ತು ಭಾರತವು ಅಪಾರ ಪ್ರಮಾಣದ ಪ್ರತಿಭೆಗಳನ್ನು ಪೂರೈಸುತ್ತಿದೆ ಎಂದು ಹೇಳಿದ್ದಾರೆ.

ಅವರ ಹೇಳಿಕೆಗಳಿಗೆ ಡೆಮಾಕ್ರಟಿಕ್ ಕಾಂಗ್ರೆಸ್ ಸದಸ್ಯ ಅಮಿ ಬೆರಾ ಕೂಡ ಧ್ವನಿಗೂಡಿಸಿದರು, ಅಮೆರಿಕವು ಪಾಕ್​ ಜೊತೆ ರಾಜತಾಂತ್ರಿಕ ಸಂಬಂಧಗಳನ್ನು ಉಳಿಸಿಕೊಂಡರೂ, ಭಾರತದಂತೆಯೇ ಕಾರ್ಯತಂತ್ರದ ಪಾಲುದಾರಿಕೆಯನ್ನು ಅನುಸರಿಸುತ್ತಿಲ್ಲ ಎಂದು ಹೇಳಿದ್ದಾರೆ. ಅಲ್ಲದೆ, ಅಮೆರಿಕದ ಕಂಪನಿಗಳಿಂದ ಬಹು-ಶತಕೋಟಿ ಡಾಲರ್ ಹೂಡಿಕೆಗಳು ಬಹುತೇಕ ಭಾರತದ ಕಡೆಗೆ ಮಾತ್ರ ಹರಿಯುತ್ತಿವೆ ಎಂದು ಬೆರಾ ಸ್ಪಷ್ಟಪಡಿಸಿದ್ದಾರೆ.

ರಿಪಬ್ಲಿಕನ್ ಪಕ್ಷದ ಸದಸ್ಯರಾಗಿದ್ದರೂ, ವ್ಯಾಪಾರ ಘರ್ಷಣೆಯ ಅಪಾಯಗಳ ಬಗ್ಗೆ ಶ್ವೇತಭವನಕ್ಕೆ ಸ್ಪಷ್ಟ ಸಂದೇಶವನ್ನು ಕಳುಹಿಸಲು ಮೆಕ್‌ಕಾರ್ಮಿಕ್ ಈ ವೇದಿಕೆಯನ್ನು ಬಳಸಿಕೊಂಡಿದ್ದಾರೆ. ಅಲ್ಲದೆ, ಭಾರತವು ರಷ್ಯಾದ ತೈಲವನ್ನು ನಿರಂತರವಾಗಿ ಖರೀದಿಸುತ್ತಿರುವುದಕ್ಕೆ ಪ್ರತಿಕ್ರಿಯೆಯಾಗಿ ಭಾರತೀಯ ಸರಕುಗಳ ಮೇಲೆ ಶೇ.50ರಷ್ಟು ಸುಂಕವನ್ನು ವಿಧಿಸುವ ಟ್ರಂಪ್ ಆಡಳಿತದ ನಿರ್ಧಾರದಿಂದ ಸಂಬಂಧಗಳು ಇತ್ತೀಚೆಗೆ ಹದಗೆಟ್ಟಿವೆ.

ಅಮೆರಿಕ ಭಾರತೀಯರನ್ನು ಸ್ನೇಹಿತರನ್ನಾಗಿ ಸ್ವೀಕರಿಸಿದರೆ, ನಮಗೆ ಶಾಂತಿ ಮತ್ತು ಸಮೃದ್ಧಿ ಇರುತ್ತದೆ. ನಾವು ಅವರನ್ನು ದೂರವಿಟ್ಟರೆ, ಅದು ನಮಗೆಲ್ಲರಿಗೂ ದೊಡ್ಡ ತೊಂದರೆಯಾಗುತ್ತದೆ ಎಂದು ಮೆಕ್‌ಕಾರ್ಮಿಕ್ ಟ್ರಂಪ್​ಗೆ ಎಚ್ಚರಿಸಿದ್ದಾರೆ. ಪ್ರಧಾನಿ ನರೇಂದ್ರ ಮೋದಿಯವರನ್ನು ಉತ್ತಮ ರೀತಿಯಲ್ಲಿ ಅತ್ಯಂತ ರಾಷ್ಟ್ರೀಯವಾದಿ ಎಂದು ಬಣ್ಣಿಸಿದ ಅವರು, ವಾಷಿಂಗ್ಟನ್ ರಷ್ಯಾದ ತೈಲ ಒಪ್ಪಂದವನ್ನು ದ್ವೇಷಿಸುತ್ತದೆ. ಆದರೆ ಮೋದಿ ತಮ್ಮ ರಾಷ್ಟ್ರದ ಅತ್ಯುತ್ತಮ ಆರ್ಥಿಕ ಹಿತಾಸಕ್ತಿಗಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ ಎಂದು ಹೇಳಿದ್ದಾರೆ,(ಏಜೆನ್ಸೀಸ್).