14ನೇ ವಯಸ್ಸಿನಲ್ಲೇ AI ಕಂಪನಿ ಸ್ಥಾಪನೆ: ಬುರ್ಜ್ ಖಲೀಫಾದಲ್ಲಿ ಕಚೇರಿ! ಜೈನಮ್ ಜೈನ್ ಯಾರು?

AI ಕ್ಷೇತ್ರದಲ್ಲಿ ಹೊಸ ಆಲೋಚನೆಗಳನ್ನು ಜಾರಿಗೆ ತರುವ ಮೂಲಕ ಜೈನಮ್ ಸಾಮಾಜಿಕ ಜಾಲತಾಣಗಳಲ್ಲೂ ವ್ಯಾಪಕ ಚರ್ಚೆಗೆ ಕಾರಣರಾಗಿದ್ದಾರೆ. ಅವರ ಸಾಧನೆ ಚಿಕ್ಕ ವಯಸ್ಸಿನಲ್ಲೇ ಉದ್ಯಮಶೀಲತೆಯ ಮೂಲಕ ಯಶಸ್ಸು ಸಾಧಿಸಲು ಸಾಧ್ಯ ಎಂಬುದನ್ನು ತೋರಿಸಿದೆ.

ಜೈನಮ್ ಜೈನ್ ಭಾರತೀಯ ಮೂಲದ ಯುವ ಉದ್ಯಮಿಯಾಗಿದ್ದು, ದುಬೈನಲ್ಲಿ ನೆಲೆಸಿದ್ದಾರೆ. ಅವರು TEDx ಸ್ಪೀಕರ್‌ ಆಗಿದ್ದು, ಎರಡು ಪೇಟೆಂಟ್‌ಗಳನ್ನು ಹೊಂದಿದ್ದಾರೆ. ಅಲ್ಲದೆ ಒಂದು ಪುಸ್ತಕವನ್ನು ಬರೆದಿದ್ದು, 1.45 ಲಕ್ಷಕ್ಕೂ ಹೆಚ್ಚು ಚಂದಾದಾರರನ್ನು ಹೊಂದಿರುವ ಯೂಟ್ಯೂಬ್‌ ಸಮುದಾಯವನ್ನೂ ನಿರ್ಮಿಸಿದ್ದಾರೆ.

'ಕರ್ಲಿ ಟೇಲ್ಸ್ ಮಿಡಲ್ ಈಸ್ಟ್‌'ಗೆ ನೀಡಿದ ಸಂದರ್ಶನದಲ್ಲಿ ಜೈನಮ್, ತಾವು ಕೇವಲ ಆರು ವರ್ಷದವರಿದ್ದಾಗ ತಂದೆ ಮೊದಲ ಬಾರಿಗೆ ವ್ಯವಹಾರ ಸಭೆಗೆ ಕರೆದೊಯ್ದಿದ್ದರು ಎಂದು ಹೇಳಿದ್ದಾರೆ.

ಆ ಅನುಭವವೇ ಉದ್ಯಮಶೀಲತೆಯ ಬಗ್ಗೆ ಆಸಕ್ತಿ ಮೂಡಿಸಿತು. ನಂತರ ವಿವಿಧ ಕಾರ್ಯಕ್ರಮಗಳಲ್ಲಿ ಭಾಗವಹಿಸುವುದು, ಉದ್ಯಮಿಗಳನ್ನು ಭೇಟಿ ಮಾಡುವುದು ಹಾಗೂ ಹೊಸ ಅನುಭವಗಳಿಂದ ವ್ಯವಹಾರದ ಬಗ್ಗೆ ಕಲಿಯಲು ಆರಂಭಿಸಿದೆ ಎಂದು ಅವರು ತಿಳಿಸಿದ್ದಾರೆ.

ಜೈನಮ್ 13ನೇ ವಯಸ್ಸಿನಲ್ಲೇ IGCSE 10ನೇ ತರಗತಿ ಪರೀಕ್ಷೆಯನ್ನು ಕೇವಲ 105 ದಿನಗಳಲ್ಲಿ ಪೂರ್ಣಗೊಳಿಸಿದ್ದಾರೆ. ನಂತರ ತಮ್ಮ ಉದ್ಯಮಶೀಲ ಗುರಿಗಳ ಮೇಲೆ ಹೆಚ್ಚು ಗಮನಹರಿಸಲು ವಿಭಿನ್ನ ಕಲಿಕೆಯ ಮಾರ್ಗವನ್ನು ಆಯ್ಕೆ ಮಾಡಿಕೊಂಡಿದ್ದಾರೆ.

'ಟೆಕ್‌ಕ್ರಂಚ್‌'ಗೆ ನೀಡಿದ ಸಂದರ್ಶನದಲ್ಲಿ ಜೈನಮ್, ತಮ್ಮ ಮ್ಯಾಂಗೋ ಎಂಜಿನ್ (Mango Engine) ಕಂಪನಿಯು ಮಾರ್ಕೆಟಿಂಗ್‌, ಲೀಡ್‌ ಮ್ಯಾನೇಜ್‌ಮೆಂಟ್‌, ಸುದ್ದಿಪತ್ರ (Newsletter) ನಿರ್ವಹಣೆ ಹಾಗೂ ಗ್ರಾಹಕರೊಂದಿಗೆ ಸಂವಹನ ಸೇರಿದಂತೆ ಹಲವು ವ್ಯವಹಾರ ಕಾರ್ಯಗಳನ್ನು AI ಮೂಲಕ ಸರಳಗೊಳಿಸುವ ಗುರಿ ಹೊಂದಿದೆ ಎಂದು ತಿಳಿಸಿದ್ದಾರೆ. ಈ ವೇದಿಕೆ ಪ್ರಸ್ತುತ ಬೀಟಾ (ಪರೀಕ್ಷಾ) ಹಂತದಲ್ಲಿದ್ದು, ಹಲವು ಕಂಪನಿಗಳು ಆಸಕ್ತಿ ತೋರಿವೆ ಎಂದು ಹೇಳಿದ್ದಾರೆ.

10ನೇ ವಯಸ್ಸಿನಿಂದಲೇ ಜೈನಮ್ ತಮ್ಮನ್ನು ತಾವು ವಿವಿಧ ಸವಾಲುಗಳಿಗೆ ಒಳಪಡಿಸಿಕೊಂಡಿದ್ದಾರೆ. 50 ಪುಸ್ತಕಗಳನ್ನು ಓದುವುದು, 50 ನೆಟ್‌ವರ್ಕಿಂಗ್ ಕಾರ್ಯಕ್ರಮಗಳಲ್ಲಿ ಭಾಗವಹಿಸುವುದು ಹಾಗೂ ಉದ್ಯಮಿಗಳನ್ನು ಭೇಟಿ ಮಾಡಿ ಅವರಿಂದ ಕಲಿಯಲು ಸುಮಾರು 6,000 ಕಿಲೋಮೀಟರ್ ಪ್ರಯಾಣಿಸುವ ಗುರಿಗಳನ್ನು ಅವರು ನಿಗದಿಪಡಿಸಿಕೊಂಡಿದ್ದರು.

ಶಿಕ್ಷಣವು ಕೇವಲ ತರಗತಿ ಕೊಠಡಿಗೆ ಸೀಮಿತವಲ್ಲ. ಜನರೊಂದಿಗೆ ಸಂವಹನ, ಹೊಸ ಅನುಭವಗಳು ಹಾಗೂ ನಿರಂತರ ಕಲಿಕೆಯೇ ಯಶಸ್ಸಿನ ಪ್ರಮುಖ ಅಂಶಗಳು ಎಂಬುದನ್ನು ಜೈನಮ್ ತಮ್ಮ ಅನುಭವದ ಮೂಲಕ ಹೇಳಿಕೊಂಡಿದ್ದಾರೆ.

ಬುರ್ಜ್ ಖಲೀಫಾದಲ್ಲಿರುವ ಕಚೇರಿ ಹಾಗೂ AI ಕ್ಷೇತ್ರದಲ್ಲಿನ ಸಾಧನೆಯ ಮೂಲಕ ಜೈನಮ್ ಜೈನ್, ಚಿಕ್ಕ ವಯಸ್ಸಿನಲ್ಲೇ ದೊಡ್ಡ ಕನಸು ಕಾಣುವ ಯುವಕರಿಗೆ ಸ್ಫೂರ್ತಿಯಾಗಿದ್ದಾರೆ,(ಏಜೆನ್ಸೀಸ್​).