48 ಕಟ್ಸ್​... ಸೆನ್ಸಾರ್​ ಮಂಡಳಿಗೆ ನಾನೇ ರಾಯಭಾರಿ! 'ಜನ ನಾಯಗನ್' ಸಂಕಷ್ಟಕ್ಕೆ ಪ್ರತಿಕ್ರಿಯಿಸಿದ ನಟ ಜೀವಾ | Censor Row

ತಮಿಳುನಾಡು: ಕಾಲಿವುಡ್​ ಸ್ಟಾರ್​ ನಟ, ಟಿವಿಕೆ ಪಕ್ಷದ ನಾಯಕ ದಳಪತಿ ವಿಜಯ್ ಅಭಿನಯದ ಕೊನೆಯ ಬಹುನಿರೀಕ್ಷಿತ ಸಿನಿಮಾ 'ಜನನಾಯಗನ್'​ ರಿಲೀಸ್​ಗೆ ಸದ್ಯ ಸೆನ್ಸಾರ್​ ಮಂಡಳಿಯಿಂದ ಅಡಚಣೆ ಉಂಟಾಗಿದೆ. ​ಕೋರ್ಟ್​ ಮೆಟ್ಟಿಲೇರಿದ ಚಿತ್ರತಂಡಕ್ಕೆ ಸದ್ಯಕ್ಕೆ ಬಿಡುಗಡೆ ಭಾಗ್ಯ ಸಿಗದಿರುವುದು ಇದೀಗ ಚಿತ್ರರಂಗದ ಸದಸ್ಯರು ಹಾಗೂ ನಟನ ಅಭಿಮಾನಿಗಳ ಅಸಮಾಧಾನಕ್ಕೆ ಕಾರಣವಾಗಿದೆ. ಈ ವಿಚಾರಕ್ಕೆ ಸಂಬಂಧಿಸಿದಂತೆ ತಮಿಳು ನಟ ಜೀವಾ ಪ್ರತಿಕ್ರಿಯಿಸಿದ್ದಾರೆ.

ಸೆನ್ಸಾರ್ ಮಂಡಳಿಯ ವಿವಾದದಿಂದಾಗಿ ವಿಜಯ್ ಅವರ 'ಜನ ನಾಯಗನ್' ಚಿತ್ರಕ್ಕೆ ಸಂಕಷ್ಟ ಎದುರಾಗಿದ್ದು, ಸದ್ಯದ ಮಟ್ಟಿಗೆ ರಿಲೀಸ್​ ಮುಂದೂಡಿಕೆಯಾಗಿದೆ. ಇದರ ಲಾಭ ಪಡೆದುಕೊಂಡಿರುವ ಹಲವು ಚಿತ್ರಗಳು ಸಂಕ್ರಾಂತಿ ಹಬ್ಬದ ಸಾಲು ರಜಾ ದಿನಗಳನ್ನು ಸದುಪಯೋಗ ಪಡೆದುಕೊಳ್ಳಲು ಬಿಡುಗಡೆ ದಿನಾಂಕಗಳನ್ನು ದಿಢೀರ್​ ಬದಲಿಸಿಕೊಂಡಿವೆ. ಆ ಪೈಕಿ ನಟ ಜೀವಾ ಅಭಿನಯದ 'ತಲೈವರ್ ತಂಬಿ ತಲೈಮೈಯಿಲ್' ಕೂಡ ಒಂದು. ಆರಂಭದಲ್ಲಿ ಜ.30ಕ್ಕೆ ನಿಗದಿಯಾಗಿದ್ದ ಈ ಚಿತ್ರ, ಈಗ ಜ.15ರಂದು ರಿಲೀಸ್​ಗೆ ಸಜ್ಜಾಗಿದೆ.

ಚೆನ್ನೈನಲ್ಲಿ ಆಯೋಜಿಸಿದ್ದ ಚಿತ್ರದ ಸುದ್ದಿಗೋಷ್ಠಿ ವೇಳೆ ಮಾತನಾಡಿದ ಜೀವಾ, "ಸೆನ್ಸಾರ್​ ಮಂಡಳಿಯ ತೊಂದರೆ ಕುರಿತು ತಮ್ಮ ಅಭಿಪ್ರಾಯ ಹಾಗೂ ಅನುಭವವನ್ನು ಹಂಚಿಕೊಂಡರು. ನನ್ನ ಚಿತ್ರಕ್ಕೂ ಸಿಬಿಎಫ್​ಸಿಯಿಂದ ದೊಡ್ಡ ಮಟ್ಟದ ತೊಂದರೆಯಾಗಿದೆ. ಜಿಪ್ಸಿ ಎಂಬ ಚಿತ್ರದಲ್ಲಿ ನಾನು ಅಭಿನಯಿಸಿದ್ದೆ. ಈ ಸಿನಿಮಾಗೆ 48 ಕಟ್ಸ್ ವಿಧಿಸಿದ್ದರು. ಅಂತಿಮವಾಗಿ, ಎಲ್ಲಾ ಮುಗಿಸಿ ಕ್ಲಿಯರೆನ್ಸ್​ ಪಡೆಯುವ ವೇಳೆಗೆ ಕೋವಿಡ್​ ಬಂದಿತ್ತು. ಹಾಗೆ ನೋಡುವುದಾದರೆ, ಇದರಲ್ಲಿ ಅತಿ ಹೆಚ್ಚು ಅನುಭವ ನನಗೇ ಇರೋದು" ಎಂದು ಹೇಳಿದ್ದಾರೆ.

ಎಚ್. ವಿನೋತ್ ನಿರ್ದೇಶನದ ಈ ಚಿತ್ರದಲ್ಲಿ ವಿಜಯ್​ ಮತ್ತು ಪೂಜಾ ಹೆಗ್ಡೆ ಮುಖ್ಯಭೂಮಿಕೆಯಲ್ಲಿ ಅಭಿನಯಿಸಿದ್ದು, ನಟನ ಕೊನೆಯ ಸಿನಿಮಾವನ್ನು ಕಣ್ತುಂಬಿಕೊಳ್ಳಲು ಸಿನಿಪ್ರಿಯರು ತುದಿಗಾಲಿನಲ್ಲಿದ್ದರು. ಆದರೆ, ಸೆನ್ಸಾರ್​ ಮಂಡಳಿ ಅಡಚಣೆ ಉಂಟು ಮಾಡಿದ ಬೆನ್ನಲ್ಲೇ ಚಿತ್ರದ ನಿರ್ಮಾಪಕರು ಹೈಕೋರ್ಟ್​ ಮೆಟ್ಟಿಲೇರಿದರು. ಅಲ್ಲಿಂದ ಕೋರ್ಟ್​ ತೀರ್ಪು ಕೂಡ ಸಿನಿಮಾ ವಿರುದ್ಧ ಬಂದ ಬೆನ್ನಲ್ಲೇ ಜ.09ರಂದು ತೆರೆಗೆ ಬರಬೇಕಿದ್ದ ಜನನಾಯಗನ್​ ಚಿತ್ರವು ಇದೀಗ ತಾತ್ಕಾಲಿಕವಾಗಿ ಮುಂದೂಡಿಕೆಯಾಗಿದೆ. ಇದರ ಹಿಂದೆ ರಾಜಕೀಯ ಸೇಡು, ಪಿತೂರಿಗಳಿವೆ ಎಂಬ ಆರೋಪಗಳು ಕೇಳಿಬಂದಿರುವುದು ಗಮನಾರ್ಹ,(ಏಜೆನ್ಸೀಸ್).