3 ಲಕ್ಷದ ಗಿಫ್ಟ್ ತಗೊಂಡ ಮರುದಿನವೇ ಬ್ರೇಕಪ್‌ ಹೇಳಿದ Girlfriend: ಮೋಸ ಹೋದ ಯುವಕ ಮಾಡಿದ್ದೇನು ಗೊತ್ತಾ?

ಯುವಕ ಮತ್ತು ಆತನ ಗರ್ಲ್‌ಫ್ರೆಂಡ್ ಕಳೆದ 3 ವರ್ಷಗಳಿಂದ ಪ್ರೀತಿಸುತ್ತಿದ್ದರು. ಆಕೆಗೆ ಗೇಮಿಂಗ್ ಕಂಪ್ಯೂಟರ್ ಎಂದರೆ ತುಂಬಾ ಇಷ್ಟವಾಗಿತ್ತು. ಇದೇ ಕಾರಣಕ್ಕೆ ಯುವಕ ಆಕೆಯ ಹುಟ್ಟುಹಬ್ಬದ ದಿನ ಸುಮಾರು 3.1 ಲಕ್ಷ ರೂಪಾಯಿ (£2500) ಬೆಲೆಯ ದುಬಾರಿ ಗೇಮಿಂಗ್ ಪಿಸಿಯನ್ನು (Gaming PC) ಗಿಫ್ಟ್ ಆಗಿ ನೀಡಿದ್ದನು. ಆದರೆ, ಗಿಫ್ಟ್ ಸಿಕ್ಕ ಮರುದಿನವೇ ಆಕೆ ಬ್ರೇಕಪ್ ಹೇಳಿ ಆತನಿಗೆ ಶಾಕ್ ನೀಡಿದ್ದಾಳೆ.

"ನನಗೆ ಬ್ರೇಕಪ್ ವಿಷಯ ಕೇಳಿ ತುಂಬಾ ಬೇಸರವಾಯಿತು. ಯಾರೂ ನನ್ನನ್ನು ಈ ರೀತಿ ಬಳಸಿಕೊಂಡಿರಲಿಲ್ಲ" ಎಂದು ಆ ಯುವಕ ರೆಡ್ಡಿಟ್ (Reddit) ಜಾಲತಾಣದಲ್ಲಿ ತನ್ನ ಅಳಲು ತೋಡಿಕೊಂಡಿದ್ದಾನೆ. ನಂತರ ಆಕೆಯ ಸ್ನೇಹಿತರ ಮೂಲಕ ಯುವಕನಿಗೆ ಅಸಲಿ ವಿಷಯ ಗೊತ್ತಾಗಿದೆ. ಆಕೆ ಕಳೆದ ಕೆಲವು ತಿಂಗಳುಗಳಿಂದಲೇ ಬ್ರೇಕಪ್ ಮಾಡಿಕೊಳ್ಳಲು ಪ್ಲಾನ್ ಮಾಡಿದ್ದಳಂತೆ. ಆದರೆ ಈ ದುಬಾರಿ ಕಂಪ್ಯೂಟರ್ ಸಿಗಲಿ ಎಂದೇ ಕಾಯುತ್ತಿದ್ದಳು ಎಂಬ ರಹಸ್ಯ ವಾಟ್ಸಾಪ್ ಚಾಟ್ ಸ್ಕ್ರೀನ್‌ಶಾಟ್‌ಗಳ ಮೂಲಕ ಯುವಕನಿಗೆ ಸಿಕ್ಕಿದೆ.

ಯುಕೆಯ ಕಾನೂನಿನ ಪ್ರಕಾರ, ಒಮ್ಮೆ ಪ್ರೀತಿಯಿಂದ ಕೊಟ್ಟ ಗಿಫ್ಟ್ ಅನ್ನು ಮರಳಿ ಪಡೆಯಲು ಬರುವುದಿಲ್ಲ. ಅದು ಆ ಯುವತಿಯ ಸ್ವತ್ತಾಗಿರುತ್ತದೆ. ಆದರೆ, "ಆಕೆ ನನ್ನ ಗರ್ಲ್‌ಫ್ರೆಂಡ್ ಆಗಿಲ್ಲದೇ ಹೋಗಿದ್ದರೆ ನಾನು ಅಷ್ಟು ಹಣ ಖರ್ಚು ಮಾಡುತ್ತಿರಲಿಲ್ಲ. ಆಕೆ ಮೊದಲೇ ಪ್ಲಾನ್ ಮಾಡಿ ನನಗೆ ಮೋಸ ಮಾಡಿದ್ದಾಳೆ. ಹೀಗಾಗಿ ಆ ಕಂಪ್ಯೂಟರ್ ಅನ್ನು ವಾಪಸ್ ಪಡೆಯಲು ಬೇರೆನಾದರೂ ದಾರಿಯಿದೆಯೇ?" ಎಂದು ಯುವಕ ನೆಟ್ಟಿಗರ ಬಳಿ ಕಾನೂನು ಸಲಹೆ ಕೇಳಿದ್ದಾನೆ.

ಈ ಪೋಸ್ಟ್ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರು ಯುವಕನಿಗೆ ಧೈರ್ಯ ತುಂಬಿದ್ದಾರೆ. "ಆಕೆ ಮಾಡಿದ್ದು ದೊಡ್ಡ ತಪ್ಪು, ಆದರೆ ಕಾನೂನುಬದ್ಧವಾಗಿ ಆ ಕಂಪ್ಯೂಟರ್ ಅವಳಿಗೆ ಸೇರುತ್ತದೆ. ಕೋರ್ಟ್‌ಗೆ ಹೋದರೆ ಕಂಪ್ಯೂಟರ್ ಬೆಲೆಗಿಂತ ವಕೀಲರ ಖರ್ಚೇ ಜಾಸ್ತಿಯಾಗುತ್ತದೆ. ಇಂತಹ ಕೆಟ್ಟ ಗುಣದ ಹುಡುಗಿ ನಿಮ್ಮ ಜೀವನದಿಂದ ದೂರವಾಗಿದ್ದಕ್ಕೆ 3 ಲಕ್ಷ ರೂಪಾಯಿಯನ್ನು ಕ್ಯಾನ್ಸಲೇಶನ್ ಫೀಸ್ ಎಂದು ಅಂದುಕೊಂಡು ಸುಮ್ಮನಾಗಿಬಿಡಿ" ಎಂದು ಹಲವರು ಸಲಹೆ ನೀಡಿದ್ದಾರೆ. ಇನ್ನು ಕೆಲವರು, "ಕೋರ್ಟ್ ಮೆಟ್ಟಿಲೇರಿ ಆಕೆಯ ಮುಖವಾಡವನ್ನು ಎಲ್ಲರ ಮುಂದೆ ಕಳಚಿ" ಎಂದಿದ್ದಾರೆ,(ಏಜೆನ್ಸೀಸ್).