ಮಿಸ್ ಆದ ರೈಲನ್ನು ಮುಂದಿನ ನಿಲ್ದಾಣಗಳಲ್ಲಿ ಹತ್ತಲು ಅವಕಾಶ? ಅದೇ ಟಿಕೆಟ್​ನಲ್ಲಿ ಪ್ರಯಾಣಕ್ಕೆ ಇದ್ಯಾ ಅನುಮತಿ? ಹೀಗಿದೆ ರೈಲ್ವೆ ರೂಲ್ಸ್​ | Railway Rules

ಬೆಂಗಳೂರು: ಪ್ರಸ್ತುತ ರೈಲು ಪ್ರಯಾಣದ ಮೇಲೆ ದೇಶದ ಜನತೆ ಹೆಚ್ಚು ಅವಲಂಬಿತರಾಗಿದ್ದಾರೆ ಎಂಬುದರಲ್ಲಿ ಅನುಮಾನವೇ ಇಲ್ಲ (Railway Rules). ದಿನನಿತ್ಯ ಸಾವಿರಾರು ಕಿ.ಮೀ.ಗಳನ್ನು ಕ್ರಮಿಸುವ ಟ್ರೈನ್​ಗಳಲ್ಲಿ ಕೈಗೆಟುಕುವ ದರದಲ್ಲಿ ನಿಶ್ಚಿತೆಯಿಂದೆ ಪ್ರಯಾಣಿಸುವ ಮಂದಿ, ಉದ್ಯೋಗ ಮತ್ತು ತಮಿಷ್ಟದ ಸ್ಥಳಗಳಿಗೆ ಹೋಗಲು ರೈಲು ಪ್ರಯಾಣವನ್ನೇ ಆಯ್ಕೆ ಮಾಡಿಕೊಳ್ಳುತ್ತಾರೆ. ಕೆಲವೊಮ್ಮೆ, ತುರ್ತು ಕಾರಣಗಳಿಂದಾಗಿ ಅಥವಾ ತಡವಾಗಿ ಬಂದ ಹಿನ್ನಲೆ ರೈಲನ್ನು ಮಿಸ್​ ಮಾಡಿಕೊಂಡು ಪರದಾಡುವುದು ತೀರ ಸಾಮಾನ್ಯ ಸಮಸ್ಯೆಯೇ. ಆದ್ರೆ, ಇದಕ್ಕೆ ಸಂಬಂಧಿಸಿದಂತೆ ಇಂದಿಗೂ ಹಲವರಿಗೆ ಕೆಲವು ಗೊಂದಲಗಳಿವೆ.

ರೈಲು ಮಿಸ್ ಆದಾಗ, ಅದೇ ಟಿಕೆಟ್ ಬಳಸಿ ಬೇರೆ ರೈಲಿನಲ್ಲಿ ಪ್ರಯಾಣಿಸುವ ಮಂದಿ ನಮ್ಮಲ್ಲಿ ಹೆಚ್ಚಿದ್ದಾರೆ. ಕಾರಣ, ಸರಿಯಾದ ಸಮಯಕ್ಕೆ ಹೊರಡುವ ಆಯಾ ರೈಲುಗಳನ್ನು ಮಿಸ್ ಮಾಡಿಕೊಂಡಾಗ, ಬೇರೆ ದಾರಿಯಲ್ಲದೆ, ಅದೇ ಟಿಕೆಟ್​ ಇಟ್ಟುಕೊಂಡು ಮತ್ತೊಂದು ರೈಲಿಗೆ ಹತ್ತುವ ಜನರೇ ಹೆಚ್ಚು. ಹೀಗೆ ಮಾಡುವುದರಿಂದ ತಮ್ಮ ಗಮ್ಯ ಸ್ಥಳಗಳಿಗೆ ತಲುಪಬಹುದು. ಆದರೆ, ಎಲ್ಲ ಸಮಯದಲ್ಲೂ ಅಧಿಕಾರಿಗಳ ಕಣ್ತಪ್ಪಿಸಿ, ನಿಯಮಗಳನ್ನು ಉಲ್ಲಂಘಿಸಲು ಸಾಧ್ಯವೇ ಇಲ್ಲ. ಮಿಸ್​ ಮಾಡಿಕೊಂಡ ರೈಲಿನ ಟಿಕೆಟ್ ಹಣ ವಾಪಸ್ ಪಡೆಯಬಹುದಾ ಅಥವಾ ಅದರ ಹಿಂದೆಯೇ ಬರುವ ಮತ್ತೊಂದು ರೈಲಿನಲ್ಲಿ, ಅದೇ ಟಿಕೆಟ್​ನಲ್ಲಿ ಪ್ರಯಾಣಿಸಬಹುದಾ ಎಂಬ ಗೊಂದಲಗಳಿಗೆ ಭಾರತೀಯ ರೈಲ್ವೆ ಇಲಾಖೆಯ ನಿಯಮಗಳು ಹೇಳುವುದೇನು? ಎಂಬುದರ ಸಂಪೂರ್ಣ ಮಾಹಿತಿ ಇಲ್ಲಿದೆ ನೋಡಿ.

ನೀವು ಕಾಯ್ದಿರಿಸಿದ (Reserved) ರೈಲನ್ನು ಮಿಸ್ ಮಾಡಿಕೊಂಡಾಗ, ಅದೇ ಟಿಕೆಟ್ ಬಳಸಿ ಮತ್ತೊಂದು ರೈಲಿನಲ್ಲಿ ಪ್ರಯಾಣಿಸುವುದು ರೈಲ್ವೆ ನಿಯಮಗಳ ಪ್ರಕಾರ ಅಪರಾಧ. ಒಂದು ವೇಳೆ ಬೇರೆ ರೈಲು ಹತ್ತಿದರೆ, ಟಿಟಿಇ (ಟಿಕೆಟ್​ ಕಲೆಕ್ಟರ್​) ನಿಮ್ಮನ್ನು ಟಿಕೆಟ್ ಇಲ್ಲದ ಪ್ರಯಾಣಿಕ ಎಂದು ಪರಿಗಣಿಸಿ, ಟಿಕೆಟ್ ದರದ ಜೊತೆಗೆ ಹೆಚ್ಚುವರಿ ದಂಡವನ್ನು ವಿಧಿಸುವ ಸಾಧ್ಯತೆಗಳು ಹೆಚ್ಚು. ಅದೇ, ಸಾಮಾನ್ಯ (General) ಟಿಕೆಟ್‌ನಲ್ಲಿ ಪ್ರಯಾಣಿಸುವ ಮಂದಿಗೆ ಈ ನಿಯಮದಲ್ಲಿ ಸ್ವಲ್ಪ ಸಡಿಲಿಕೆ ಇರುತ್ತದೆ.

ನಿಮ್ಮ ಬೋರ್ಡಿಂಗ್ ಪಾಯಿಂಟ್‌ನಲ್ಲಿ ರೈಲು ಮಿಸ್ ಆದ ತಕ್ಷಣವೇ ಟಿಟಿಇ ನಿಮ್ಮ ಸೀಟನ್ನು (Berth) ಮತ್ತೊಬ್ಬರಿಗೆ ಹಂಚಿಕೆ ಮಾಡುವುದಿಲ್ಲ. ಕಾರಣ, ಆ ಪ್ರಯಾಣಿಕರು ರಸ್ತೆ ಮಾರ್ಗವಾಗಿ ಅಥವಾ ಬೇರೆ ಮಾರ್ಗವಾಗಿ ಪ್ರಯಾಣಿಸಿ, ಮುಂದಿನ ಒಂದೆರಡು ನಿಲ್ದಾಣ ತಲುಪಿ, ಅದೇ ರೈಲನ್ನು ಹತ್ತುವ ಅವಕಾಶವಿರುತ್ತದೆ. ಹೀಗಾಗಿ, ರಿಸರ್ವ್​ ಮಾಡಲಾದ ಸೀಟುಗಳನ್ನು ಯಾವುದೇ ಕಾರಣಕ್ಕೂ ಇನ್ನೊಬ್ಬರಿಗೆ ಕೊಡುವುದಿಲ್ಲ. ಅಲ್ಲಿಗೆ, ಟಿಕೆಟ್​ ಮುಂಗಡ ಬುಕ್ಕಿಂಗ್ ಮಾಡಿ, ಸೀಟು ಖಚಿತಪಡಿಸಿದ್ದರೆ, ಮುಂದಿನ ನಿಲ್ದಾಣಗಳಲ್ಲಿ ಹತ್ತುವ ಅವಕಾಶವಿದೆ.

ಆಟೋಮ್ಯಾಟಿಕ್ ರಿಫಂಡ್ ಸಾಧ್ಯವಿಲ್ಲ. ರೈಲು ಮಿಸ್ ಆದ ತಕ್ಷಣ ಅಥವಾ ಕೆಲವೇ ಗಂಟೆಗಳಲ್ಲಿ ನಿಮ್ಮ ಹಣ ಖಾತೆಗೆ ಜಮೆಯಾಗುವುದಿಲ್ಲ. ರೈಲ್ವೆ ನಿಯಮಾವಳಿಗಳ ಪ್ರಕಾರ, ನಿಗದಿತ ಸಮಯದೊಳಗೆ 'ಟಿಫಿಕೇಟ್ ಡೆಪಾಸಿಟ್ ರಶೀದಿ' ಅಥವಾ ಟಿಡಿಆರ್​ (Ticket Deposit Receipt) ಸಲ್ಲಿಸಿದರೆ ಮಾತ್ರ ಹಣ ವಾಪಸ್ ಪಡೆಯಲು ಅವಕಾಶ. 3 ತಾಸು ಕಳೆದ ಬಳಿಕ ನಿಮ್ಮ ಬ್ಯಾಂಕ್​ ಖಾತೆಗೆ ಹಣ ವಾಪಾಸ್​. ಅದರಲ್ಲೂ, ರೈಲು 3 ಗಂಟೆಗಿಂತ ಹೆಚ್ಚು ತಡವಾಗಿ ಬಂದು, ನಿಮ್ಮ ಪ್ರಯಾಣ ರದ್ದುಗೊಂಡರೆ, ಸಂಪೂರ್ಣ ಟಿಕೆಟ್ ಮೊತ್ತ ರಿಫಂಡ್ ಆಗುತ್ತದೆ.

ನಿಗದಿತ ಸಮಯದೊಳಗೆ ಟಿಡಿಆರ್​ ಫೈಲ್ ಮಾಡದಿದ್ದರೆ ಯಾವುದೇ ಕಾರಣಕ್ಕೂ ಹಣ ವಾಪಸ್ ಸಿಗುವುದಿಲ್ಲ. ನಿಮ್ಮ ರೈಲು ಮಿಸ್ ಆದಾಗ ಗಾಬರಿಗೊಳ್ಳದೆ, ಮುಂದಿನ ನಿಲ್ದಾಣದಲ್ಲಿ ಅದೇ ರೈಲನ್ನು ಹಿಡಿಯಲು ಪ್ರಯತ್ನಿಸಿ ಅಥವಾ ಹಣ ನಷ್ಟವಾಗದಂತೆ ತಕ್ಷಣವೇ ಟಿಡಿಆರ್ ಫೈಲ್ ಮಾಡಿ, ಟಿಕೆಟ್​ಗೆ ಪಾವತಿ ಮಾಡಿದ್ದ ಹಣವನ್ನು ವಾಪಾಸ್​ ಪಡೆಯಲು ರಿಫಂಡ್​ಗೆ ಅರ್ಜಿ ಸಲ್ಲಿಸಿ,(ಏಜೆನ್ಸೀಸ್).