ಪಾಕ್​ನಲ್ಲಿ ನಿಲ್ಲದ ಉಗ್ರರ ಬೇಟೆ: 'ಅಪರಿಚಿತ' ನ ಗುಂಡಿಗೆ ಬಲಿಯಾದ ಜೈಶ್​ ಕಮಾಂಡರ್​ ಸಲ್ಮಾನ್​ ಅಜರ್​! Maulana Salman Azhar

ಇಸ್ಲಾಮಾಬಾದ್​: ಜಾಗತಿಕ ಭಯೋತ್ಪಾದನಾ ಸಂಘಟನೆ ಎಂದು ಗುರುತಿಸಿ ಕೊಂಡಿರುವ ಪಾಕಿಸ್ತಾನದ ಜೈಶ್​-ಎ-ಮೊಹಮ್ಮದ್​ ಸಂಘಟನೆಯ ಪ್ರಮುಖ ಕಮಾಂಡರ್​ ಮೌಲಾನಾ ಸಲ್ಮಾನ್​ ಅಜರ್ (Maulana Salman Azhar)​ನನ್ನು ಬುಧವಾರ (ಏ.29) ಪಾಕಿಸ್ತಾನದ ಭಾವಲ್​ಪುರ್​ದಲ್ಲಿ ಅಪರಿಚಿನ ಬಂದೂಕುದಾರಿಗಳು ಹತ್ಯೆ ಮಾಡಿದ್ದಾರೆ ಎಂದು ವರದಿಯಾಗಿದೆ.

ಮೃತ ಉಗ್ರ ಮೌಲಾನಾ ಸಲ್ಮಾನ್​ ಅಜರ್​, ಮೌಲಾನಾ ಮಸೂರ್​ ಅಜರ್​ನ ಸಹೋದರ ಸಂಬಂಧಿ ಎಂದು ಸಹ ಹೇಳಲಾಗುತ್ತಿದೆ. ಈತ ಪಂಜಾಬ್​ ಭಾಗದಲ್ಲಿ ಭಯೋತ್ಪಾದನೆಯನ್ನು ಹೆಚ್ಚಿಸುವ ಜವಾಬ್ದಾರಿ ಹೊಂದಿದ್ದ ಎಂಬ ಮಾಹಿತಿಯಿದೆ.

ಕಳೆದ ಕೆಲ ವರ್ಷಗಳಿಂದ ಪಾಕಿಸ್ತಾನದಲ್ಲಿ ಕುಳಿತು ಕೊಂಡು ಭಾರತದ ವಿರುದ್ಧ ಸಂಚನ್ನು ರೂಪಿಸುತ್ತಿದ್ದ ಭಯೋತ್ಪಾದಕರ ಬೇಟೆ ತೀವ್ರಗತಿಯಲ್ಲಿ ನಡೆಯುತ್ತಿದೆ.

ಕಳೆದ ತಿಂಗಳು, ಲಷ್ಕರ್​-ಎ-ತೊಯ್ಬಾ ಸಂಘಟನೆಯ ಸಹ ಸಂಸ್ಥಾಪಕನಾದ ಅಮೀರ್​ ಹಮ್ಜಾನನ್ನು ಲಾಹೋರಿನ ನಡು ರಸ್ತೆಯಲ್ಲಿ ಅಪರಿಚಿತ ಬಂದೂಕುದಾರಿಗಳು ಗುಂಡಿನ ದಾಳಿ ನಡೆಸಿದ್ದು, ಆತ ಆಸ್ಪತ್ರೆಯಲ್ಲಿ ಸಾವು-ಬದುಕಿನ ಹೋರಾಟವನ್ನು ಮುಂದುವರೆಸಿದ್ದಾನೆ.

ಈ ದಾಳಿಯೂ ಮೊದಲು ಜೈಶ್-ಎ-ಮೊಹಮ್ಮದ್ ಸಂಘಟನೆಯ ಮೌಲಾನಾ ಮಸೂದ್​ ಅಜರ್​ನ ಸಹೋದರ, ಮೊಹಮ್ಮದ್​ ತಾಹೀರ್​ ಅನ್ವರ್​ ಸಹ ನಿಗೂಢವಾಗಿ ಸಾವನ್ನಪ್ಪಿದ್ದನು. ಕಳೆದ ವರ್ಷ ಮಾರ್ಚ್​ನಲ್ಲಿ, 26/11 ಗೆ ಕಾರಣನಾದ ಅಬು ಕತಲ್​ ಅಲಿಯಾಸ್​ ಕತಲ್​ ಸಿಂಧಿಯನ್ನು ಅಪರಿಚಿತರು ಗುಂಡಿಕ್ಕಿ ಕೊಂದಿದ್ದರು.

2026 ಒಂದೇ ವರ್ಷ ಪಾಕಿಸ್ತಾನದಲ್ಲಿ ಸುಮಾರು 30 ಭಯೋತ್ಪಾದಕರನ್ನು ಅಪರಿಚಿತ ಬಂದೂಕುದಾರಿಗಳು ಕೊಂದಿರುವುದು ವರದಿಯಾಗಿದೆ. ಸಾವನ್ನಪ್ಪಿರುವ ಬಹುತೇಕರು ಲಷ್ಕರ್​-ಎ-ತೊಯ್ಬಾ, ಜೈಶ್​-ಎ-ಮೊಹಮ್ಮದ್​ ಮತ್ತು ಹಿಜ್ಬುಲ್​ ಮುಜಾಹಿದ್ದಿನ್​ ಸಂಘಟನೆಗೆ ಸೇರಿದವರಾಗಿದ್ದಾರೆ. ಈ ದಾಳಿಯ ಹಿಂದೆ ಭಾರತದ ಕೈವಾಡವಿದೆ ಎಂದು ಪಾಕಿಸ್ತಾನದ ಮಾಧ್ಯಮಗಳು ಅನುಮಾನ ವ್ಯಕ್ತ ಪಡಿಸುತ್ತಿವೆ. ಆದರೆ ಭಾರತ ಈ ಕುರಿತು ಯಾವುದೇ ಅಧಿಕೃತ ಹೇಳಿಕೆಗಳನ್ನು ಇಲ್ಲಿವರೆಗೆ ನೀಡಿಲ್ಲ, (ಏಜನ್ಸೀಸ್).