ನೇಪಾಳ ಪ್ರವಾಹದ ಬಳಿಕ ಬಿಹಾರಕ್ಕೆ ಬಂದ ‘ಅಪರಿಚಿತ ಮೀನು’: ತಿಂದವರಿಗೆ ಅನಾರೋಗ್ಯ; ಸರ್ಕಾರದಿಂದ ಖಡಕ್ ಆದೇಶ! Unknown Fish in Bihar

ಪಾಟ್ನಾ: ಕಳೆದ ಕೆಲ ದಿನಗಳಿಂದ ನೇಪಾಳದಲ್ಲಿ ರಣ ಭೀಕರ ಪ್ರವಾಹ ಕಂಡುಬರುತ್ತಿದ್ದು, ಈಗ ಇದರ ಹಾವಳಿ ಭಾರತದ ಬಿಹಾರವನ್ನು ತಲುಪಿದೆ. ನೇಪಾಳದ ಪ್ರವಾಹದಿಂದ ಬಿಹಾರಕ್ಕೆ (Unknown Fish in Bihar) ವಿಚಿತ್ರವಾದ ಮೀನಿನ ಆಗಮನವಾಗಿದ್ದು, ಈ ಮೀನನ್ನು ಸೇವಿಸಿದ ಕೆಲವರಲ್ಲಿ ಅನಾರೋಗ್ಯ ಕಂಡುಬಂದಿದ್ದು, ಬಿಹಾರದ ಆರೋಗ್ಯ ಇಲಾಖೆ ಎಚ್ಚರಿಕೆ ಸಲಹೆಯನ್ನು ಹೊರಡಿಸಿದೆ.

ನೇಪಾಳದಲ್ಲಿ ಸಂಭವಿಸಿರುವ ಪ್ರವಾಹದ ಅಬ್ಬರಕ್ಕೆ ಕೊಳಗಳು, ನದಿಗಳು, ಸರೋವರಗಳು ಹಾಗೂ ಇತರೆ ಜಲಮೂಲಗಳಲ್ಲಿದ್ದ ಮೀನುಗಳು ಹೊರಬಂದು ನೀರಿನ ಪ್ರವಾಹದೊಂದಿಗೆ ಮೈಲಿಗಟ್ಟಲೆ ದೂರ ಸಾಗುತ್ತವೆ. ಈ ಹಾದಿಯಲ್ಲಿ ಅವು ಸತ್ತ ಪ್ರಾಣಿಗಳ ಅವಶೇಷಗಳು, ಕೊಳಚೆ ನೀರು ಮತ್ತು ಹಾನಿಕಾರಕ ತ್ಯಾಜ್ಯಗಳ ಸಂಪರ್ಕಕ್ಕೆ ಬರುತ್ತವೆ.

ಇದರಿಂದಾಗಿ ಆ ಮೀನುಗಳಲ್ಲಿ ಮಾರಣಾಂತಿಕ ವೈರಸ್‌ಗಳು, ರೋಗಕಾರಕ ಬ್ಯಾಕ್ಟೀರಿಯಾಗಳು ಮತ್ತು ವಿಷಕಾರಿ ಅಂಶಗಳು ಸೇರಿಕೊಳ್ಳುತ್ತವೆ. ಪ್ರವಾಹದ ನೀರು ಸಂಪೂರ್ಣವಾಗಿ ಇಳಿದು, ಪರಿಸರ ಸಹಜ ಸ್ಥಿತಿಗೆ ಬರುವವರೆಗೆ ಇಂತಹ ಮೀನುಗಳನ್ನು ಹಿಡಿಯುವುದು ಅಥವಾ ತಿನ್ನುವುದನ್ನು ಕರಾರುವಕ್ಕಾಗಿ ನಿಲ್ಲಿಸಬೇಕು ಎಂದು ಇಲಾಖೆ ಎಚ್ಚರಿಸಿದೆ.

ಮಾರುಕಟ್ಟೆಗಳಲ್ಲಿ ಪ್ರವಾಹದ ನೀರಿನಿಂದ ಹಿಡಿದು ತಂದಿರುವ ಅಥವಾ ವಿಚಿತ್ರವಾಗಿ ಕಾಣುವ ಮೀನುಗಳನ್ನು ಮಾರಾಟ ಮಾಡುವುದನ್ನು ಹಾಗೂ ತಿನ್ನುವುದನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿದೆ. ಯಾವ ಮೀನು ಯಾವುದು ಎಂದೇ ಗುರುತಿಸಲು ಸಾಧ್ಯವಿಲ್ಲವೋ ಅಥವಾ ಸ್ಥಳೀಯ ಆಡಳಿತದಿಂದ ಸುರಕ್ಷಿತ ಎಂದು ದೃಢೀಕರಿಸಲ್ಪಡದ ಹೊರತು ಅಂತಹ ಮೀನುಗಳನ್ನು ಯಾರೂ ತಿನ್ನಬಾರದು ಎಂದು ಸರ್ಕಾರ ಕಟ್ಟುನಿಟ್ಟಾಗಿ ಹೇಳಿದೆ.

ಪ್ರವಾಹದ ನೀರಲ್ಲಿ ಸಿಕ್ಕ ಮೀನುಗಳನ್ನು ತಿಂದು ನಿಮಗೆ ವಾಂತಿ, ಅತಿಸಾರ, ತೀವ್ರ ಹೊಟ್ಟೆ ನೋವು, ತಲೆತಿರುಗುವಿಕೆ ಅಥವಾ ಉಸಿರಾಟದ ತೊಂದರೆ ಕಂಡುಬಂದರೆ ತಕ್ಷಣ ಆಸ್ಪತ್ರೆಗೆ ಹೋಗಿ ವೈದ್ಯರ ಸಲಹೆ ಪಡೆಯಬೇಕು. ಒಂದು ವೇಳೆ ನಿಮ್ಮ ಸುತ್ತಮುತ್ತ ಅಂತಹ ಅಪರಿಚಿತ ಮೀನುಗಳು ಕಂಡುಬಂದರೆ, ಕೂಡಲೇ ಸ್ಥಳೀಯ ಆಡಳಿತಕ್ಕೆ ಅಥವಾ ಮೀನುಗಾರಿಕೆ ಇಲಾಖೆಗೆ ಮಾಹಿತಿ ನೀಡಿ ಎಂದು ಇಲಾಖಾ ಸುತ್ತೋಲೆ ತಿಳಿಸಿದೆ.

ಪ್ರವಾಹದ ನೀರು ಎಂದರೆ ಅದು ಕೇವಲ ಮಳೆ ನೀರಲ್ಲ; ಅದರಲ್ಲಿ ಚರಂಡಿ ನೀರು, ಕಸ-ಕಡ್ಡಿ, ಪ್ರಾಣಿಗಳ ಶವಗಳು ಮತ್ತು ರೋಗ ಹಬ್ಬಿಸುವ ಕೊಳೆತ ವಸ್ತುಗಳೆಲ್ಲವೂ ಸೇರಿರುತ್ತವೆ. ಅಂತಹ ಕಲುಷಿತ ನೀರಿನಲ್ಲಿ ಈಜಾಡುವ ಮೀನುಗಳು ಹಾನಿಕಾರಕ ಸೂಕ್ಷ್ಮಾಣುಗಳ ಆವಾಸಸ್ಥಾನವಾಗಿ ಬದಲಾಗುತ್ತವೆ.

ಪ್ರವಾಹ ಪೀಡಿತ ಪ್ರದೇಶಗಳಲ್ಲಿ ಜನರಿಗೆ ಈಗಾಗಲೇ ಶುದ್ಧ ಕುಡಿಯುವ ನೀರು ಮತ್ತು ಸುರಕ್ಷಿತ ಆಹಾರ ಸಿಗುವುದೇ ಕಷ್ಟವಾಗಿರುವ ಈ ಸಮಯದಲ್ಲಿ, ಈ ಕಲುಷಿತ ಮೀನುಗಳನ್ನು ತಿಂದು ಹೊಸದಾಗಿ ಆರೋಗ್ಯ ಸಮಸ್ಯೆಗಳನ್ನು ಮೈಮೇಲೆ ಎಳೆದುಕೊಳ್ಳಬೇಡಿ ಎಂದು ಎಚ್ಚರಿಕೆ ನೀಡಲಾಗಿದೆ, (ಏಜನ್ಸೀಸ್​).