ಟಿಎಂಸಿಗೆ ಸಾಯೋನಿ ಘೋಷ್ ಶಾಕ್!...ದೀದಿ ಮುಂದಿನ ಪ್ರಧಾನಿ ಅಂದಿದ್ದ ಸಂಸದೆ ಈಗ ರೆಬೆಲ್ಸ್​​ ಟೀಮ್​​ಗೆ ಶಿಫ್ಟ್..? | Saayoni Ghosh

ಪಕ್ಷದ ಮುಖ್ಯಸ್ಥೆ ಮಮತಾ ಬ್ಯಾನರ್ಜಿ ಅವರ ಕಟ್ಟಾ ಬೆಂಬಲಿಗರಾಗಿ ಗುರುತಿಸಿಕೊಂಡಿದ್ದ ಮತ್ತು ಬಿಜೆಪಿ ವಿರುದ್ಧ ಸದಾ ವಾಗ್ದಾಳಿ ನಡೆಸುತ್ತಿದ್ದ ಜಾದವ್‌ಪುರ ಸಂಸದೆ ಸಾಯೋನಿ ಘೋಷ್, ಟಿಎಂಸಿ ಬಿಕ್ಕಟ್ಟಿನ ಕುರಿತು ಇನ್ನೂ ಬಹಿರಂಗವಾಗಿ ಯಾವುದೇ ಹೇಳಿಕೆ ನೀಡಿಲ್ಲವಾದರೂ, ಅವರು ಈಗಾಗಲೇ ಬಂಡಾಯಗಾರರ ಪರ ನಿಲ್ಲಲು ನಿರ್ಧರಿಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ಇತ್ತೀಚಿನ ವಿಧಾನಸಭಾ ಚುನಾವಣೆಯಲ್ಲಿ ಎದುರಾದ ಹಿನ್ನಡೆಯ ಬೆನ್ನಲ್ಲೇ, ತೃಣಮೂಲ ಕಾಂಗ್ರೆಸ್‌ ಪಕ್ಷವನ್ನು ವಿಭಜಿಸಲು ಮುಂದಾಗಿರುವ 20 ಸಂಸದರ ಬಣದಲ್ಲಿ ಸಾಯೋನಿ ಘೋಷ್ ಕೂಡ ಗುರುತಿಸಿಕೊಂಡಿದ್ದಾರೆ. ಲೋಕಸಭಾ ಸಂಸದೆ ಕಾಕೋಲಿ ಘೋಷ್ ದಸ್ತಿದಾರ್ ನೇತೃತ್ವದ ಈ 20 ಸಂಸದರ ತಂಡವು, ಸಂಸತ್ತಿನಲ್ಲಿ ಪ್ರತ್ಯೇಕ ಬಣ ರಚಿಸಲು ಅನುಮತಿ ಕೋರಿ ಮತ್ತು ಕೇಂದ್ರದ ಎನ್‌ಡಿಎ ಮೈತ್ರಿಕೂಟಕ್ಕೆ ಬೆಂಬಲ ನೀಡುವ ಇಂಗಿತ ವ್ಯಕ್ತಪಡಿಸಿ ಸ್ಪೀಕರ್‌ಗೆ ಪತ್ರ ಬರೆದಿದೆ.

ಸಂಸದೆ ಸಾಯೋನಿ ಘೋಷ್ ಅವರು ದಸ್ತಿದಾರ್ ಅವರನ್ನು ಸಂಪರ್ಕಿಸಿದ್ದು, ಬಂಡಾಯಗಾರರನ್ನು ಬೆಂಬಲಿಸುವ ಅಧಿಕೃತ ದಾಖಲೆಗಳಿಗೆ ಸಹಿ ಹಾಕಿದ್ದಾರೆ ಎಂದು ವರದಿಗಳು ಉಲ್ಲೇಖಿಸಿವೆ. ಸದ್ಯ ಸಾಯೋನಿ ಬಂಡಾಯ ಸಂಸದರು ದೆಹಲಿಯಲ್ಲೇ ಬೀಡುಬಿಟ್ಟಿದ್ದು, ಇವರಷ್ಟೇ ಅಲ್ಲದೆ ಮಮತಾ ಬ್ಯಾನರ್ಜಿ ಆಪ್ತ ವಲಯದಲ್ಲಿ ಗುರುತಿಸಿಕೊಂಡಿದ್ದ ಮತ್ತೊಬ್ಬ ಸಂಸದೆ ಮಾಲಾ ರಾಯ್ ಕೂಡ ದೆಹಲಿಗೆ ತೆರಳಿ ಬಂಡಾಯ ಬಣವನ್ನು ಸೇರಿಕೊಂಡಿದ್ದಾರೆ ಎನ್ನಲಾಗಿದೆ.

ಸಾಯೋನಿ ಘೋಷ್ ಅವರ ಈ ನಡೆ ತೃಣಮೂಲ ಕಾಂಗ್ರೆಸ್‌ಗೆ ಭಾರಿ ಆಘಾತ ನೀಡಿದೆ. ಇತ್ತೀಚೆಗಷ್ಟೇ ಪಕ್ಷದ ಯುವ ಘಟಕದ ಅಧ್ಯಕ್ಷೆಯಾಗಿ ನೇಮಕಗೊಂಡಿದ್ದ ಸಾಯೋನಿ, ಮಮತಾ ಬ್ಯಾನರ್ಜಿ ಅವರನ್ನು ದೇಶದ ಮುಂದಿನ ಪ್ರಧಾನಿ ಅಭ್ಯರ್ಥಿ ಎಂದು ಬಿಂಬಿಸಿದ್ದರು. ಚುನಾವಣಾ ಪ್ರಚಾರದ ವೇಳೆ ಮಾಧ್ಯಮಗಳೊಂದಿಗೆ ಮಾತನಾಡುತ್ತಾ, ದೀದಿ ಗೆದ್ದರೆ ಬಂಗಾಳ ಗೆದ್ದಂತೆ ಎಂದು ಹೇಳಿದ್ದಲ್ಲದೆ, ತಾವೆಂದಿಗೂ ಮಮತಾ ಬ್ಯಾನರ್ಜಿ ಅವರ ಕೈಬಿಡುವುದಿಲ್ಲ ಎಂದು ಪ್ರತಿಜ್ಞೆ ಮಾಡಿದ್ದರು.

ಸಾಯೋನಿ ಘೋಷ್​ರ ಈ ರಾಜಕೀಯ ಪಲ್ಲಟ ಎಲ್ಲರಿಗೂ ಆಶ್ಚರ್ಯ ತಂದಿರುವುದಕ್ಕೆ ಮುಖ್ಯ ಕಾರಣ, ಅವರು ಸದಾ ಬಿಜೆಪಿ ಮತ್ತು ಎನ್‌ಡಿಎ ನೀತಿಗಳನ್ನು ಕಟುವಾಗಿ ವಿರೋಧಿಸುತ್ತಾ ಬಂದಿರುವುದು. ಮಹಿಳಾ ಮೀಸಲಾತಿ ಮಸೂದೆ ಸೇರಿದಂತೆ ಕೇಂದ್ರದ ಹಲವು ನಿರ್ಧಾರಗಳನ್ನು ಅವರು ಸಂಸತ್ತಿನಲ್ಲಿ ಬಲವಾಗಿ ಖಂಡಿಸಿದ್ದರು. ಅಷ್ಟೇ ಅಲ್ಲದೆ, ಇತ್ತೀಚಿನ ಚುನಾವಣಾ ಸೋಲಿಗೆ ಬಿಜೆಪಿಯು ಮತ ಕಳ್ಳತನ ಮತ್ತು ಅಕ್ರಮ ಎಸಗಿರುವುದೇ ಕಾರಣ ಎಂದು ಆರೋಪಿಸಿದ್ದರು. ನಾವು ಸೋತಿಲ್ಲ, ಆದರೆ ಮತಗಳ ಲೂಟಿಯ ಮೂಲಕ ಮಮತಾ ಬ್ಯಾನರ್ಜಿಯವರನ್ನು ಸೋಲಿಸಲಾಗಿದೆ. ಇದಕ್ಕೆ 2029 ಮತ್ತು 2031ರ ಚುನಾವಣೆಗಳಲ್ಲಿ ಬಂಗಾಳದ ಜನತೆ ತಕ್ಕ ಉತ್ತರ ನೀಡಲಿದ್ದಾರೆ ಎಂದು ಅವರು ಆಕ್ರೋಶ ಹೊರಹಾಕಿದ್ದರು.

ತಮ್ಮ ಅದ್ಭುತ ಭಾಷಣಗಳ ಮೂಲಕವೇ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದ ಸಾಯೋನಿ ಘೋಷ್, ವಿವಾದಗಳಿಂದೇನೂ ದೂರ ಉಳಿದಿರಲಿಲ್ಲ. ಬೆಂಗಾಲಿಯಲ್ಲಿ ಮೂಡಿಬಂದಿದ್ದ ಅವರ ಪ್ರಚಾರದ ಗೀತೆಯೊಂದರ ನನ್ನ ಹೃದಯದಲ್ಲಿ ಕಾಬಾ, ಕಣ್ಣುಗಳಲ್ಲಿ ಮದೀನಾ ಎಂಬ ಸಾಲುಗಳು ತೀವ್ರ ರಾಜಕೀಯ ವಿವಾದ ಮತ್ತು ಸಾರ್ವಜನಿಕ ಆಕ್ರೋಶಕ್ಕೆ ಕಾರಣವಾಗಿದ್ದವು. ಇಂತಹ ಫೈರ್‌ಬ್ರಾಂಡ್ ನಾಯಕಿ ಈಗ ಮಮತಾ ಬಣದಿಂದ ಹೊರಬಂದಿರುವುದು ಪಶ್ಚಿಮ ಬಂಗಾಳ ರಾಜಕೀಯದಲ್ಲಿ ಹೊಸ ಸಂಚಲನ ಮೂಡಿಸಿದೆ(ಏಜೆನ್ಸೀಸ್​).