ಭಯೋತ್ಪಾದನೆಗೆ ಧರ್ಮ, ರಾಷ್ಟ್ರೀಯತೆಯಿಲ್ಲ; ಪಾಕ್​ಗೆ ಕ್ಲೀನ್​ಚಿಟ್ ನೀಡಿದರೇ ರಾಜನಾಥ್ ಸಿಂಗ್; ಕಾಂಗ್ರೆಸ್ ಆರೋಪವೇನು? | Rajnath Singh

ನವದೆಹಲಿ: ಬಿಷ್ಕೆಕ್‌ನಲ್ಲಿ ಮಂಗಳವಾರ(ಏ. 28) ನಡೆದ ಶಾಂಘೈ ಸಹಕಾರಿ ಸಂಸ್ಥೆಯ ರಕ್ಷಣಾ ಸಚಿವರ ಶೃಂಗಸಭೆಯಲ್ಲಿ, ಭಯೋತ್ಪಾದನೆಗೆ ರಾಷ್ಟ್ರೀಯತೆ ಮತ್ತು ಧರ್ಮಶಾಸ್ತ್ರವಿಲ್ಲ ಎಂಬ ಕೇಂದ್ರ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಅವರ ಹೇಳಿಕೆಯನ್ನು ಟೀಕಿಸಿರುವ ಕಾಂಗ್ರೆಸ್, ಕೇಂದ್ರ ಸರ್ಕಾರ ಪಾಕಿಸ್ತಾನಕ್ಕೆ ಕ್ಲೀನ್​ ಚಿಟ್ ನೀಡಿದೆ ಎಂದು ಆರೋಪಿಸಿದೆ.

ಈ ಕುರಿತು ಎಕ್ಸ್​ನಲ್ಲಿ ಪೋಸ್ಟ್ ಮಾಡಿರುವ ಕಾಂಗ್ರೆಸ್ ನಾಯಕ ಜೈರಾಮ್ ರಮೇಶ್, ನಿನ್ನೆ ರಕ್ಷಣಾ ಸಚಿವರು ಸ್ಪಷ್ಟವಾಗಿ ಪ್ರಧಾನ ಮಂತ್ರಿಯವರ ಅನುಮೋದನೆ ಮತ್ತು ಸೂಚನೆಯ ಮೇರೆಗೆ ಬಿಷ್ಕೆಕ್‌ನಲ್ಲಿ ಮಾತನಾಡುವಾಗ ಪಾಕಿಸ್ತಾನಕ್ಕೆ ನಾಚಿಕೆಗೇಡಿನ ಕ್ಲೀನ್ ಚಿಟ್ ಎಂದು ವಾಗ್ದಾಳಿ ನಡೆಸಿದ್ದಾರೆ.

ಪಾಕಿಸ್ತಾನ ಭಯೋತ್ಪಾದನೆಯ ಕೇಂದ್ರಬಿಂದುವಲ್ಲವೇ? ಭಾರತವನ್ನು ಗುರಿಯಾಗಿಟ್ಟುಕೊಂಡು ಪಾಕಿಸ್ತಾನದಲ್ಲಿ ಯಾವುದೇ ಭಯೋತ್ಪಾದಕ ಶಿಬಿರಗಳಿಲ್ಲವೇ? ಪಾಕಿಸ್ತಾನದಲ್ಲಿ ಯಾವುದೇ ಸೈದ್ಧಾಂತಿಕ ಭಾರತ ವಿರೋಧಿ ಬೋಧನೆ ಇಲ್ಲವೇ? ಮುಂಬೈ ಮತ್ತು ಪಹಲ್ಗಾಮ್ ಭಯೋತ್ಪಾದಕ ದಾಳಿಗಳನ್ನು ಪಾಕಿಸ್ತಾನದ ಭಯೋತ್ಪಾದಕರು ರೂಪಿಸಿ ಕಾರ್ಯಗತಗೊಳಿಸಿರಲಿಲ್ಲವೇ ಎಂದು ಪ್ರಶ್ನಿಸಿದ್ದಾರೆ.

ಪಾಕಿಸ್ತಾನಕ್ಕೆ ಸಂಬಂಧಿಸಿದ ಈ ಹೊಸ ನಿಲುವು ಅಮೆರಿಕವನ್ನು ಸಮಾಧಾನಪಡಿಸುವ ಮತ್ತು ಚೀನಾಕ್ಕೆ ಶರಣಾಗುವ ಪ್ರಧಾನಿಯವರ ನೀತಿಯ ಭಾಗವಾಗಿದೆ ಎಂಬುದು ಸ್ಪಷ್ಟವಾಗಿದೆ. ಈ ಆಘಾತಕಾರಿ ಹೇಳಿಕೆಗಳು 2020 ಜೂನ್ 19ರಂದು ಪ್ರಧಾನಿಯವರು ಚೀನಾಕ್ಕೆ ವಿಲಕ್ಷಣ ಕ್ಲೀನ್ ಚಿಟ್ ನೀಡಿದಂತೆಯೇ ರಾಷ್ಟ್ರವಿರೋಧಿಯಾಗಿವೆ ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಕಿರ್ಗಿಸ್ತಾನ್‌ನ ರಾಜಧಾನಿ ಬಿಷ್ಕೆಕ್‌ನಲ್ಲಿ ಮಂಗಳವಾರ ನಡೆದ ಶಾಂಘೈ ಶೃಂಗಸಭೆಯನ್ನುದ್ದೇಶಿಸಿ ಮಾತನಾಡಿರುವ ರಾಜನಾಥ್ ಸಿಂಗ್, ಭಾರತ ನಡೆಸಿದ ಆಪರೇಷನ್ ಸಿಂಧೂರ್ ಕಾರ್ಯಾಚರಣೆ ಭಯೋತ್ಪಾದಕ ಕೇಂದ್ರ ಬಿಂದುಗಳಿಗೆ ನ್ಯಾಯಯುತ ಶಿಕ್ಷೆಯನ್ನು ವಿಧಿಸಲಾಗುವುದು ಎಂಬ ದೃಢ ಸಂಕಲ್ಪವನ್ನು ಪ್ರದರ್ಶಿಸಿದೆ ಎಂದು ಹೇಳಿದ್ದಾರೆ.

ಕಳೆದ ವರ್ಷದ ಟಿಯಾಂಜಿನ್ ಘೋಷಣೆಯು ಭಯೋತ್ಪಾದನೆಯ ವಿರುದ್ಧ ನಮ್ಮ ದೃಢ ಮತ್ತು ಸಾಮೂಹಿಕ ನಿಲುವನ್ನು ಹೊರತಂದಿದೆ. ಭಯೋತ್ಪಾದನೆ ಮತ್ತು ಅದರ ಅಪರಾಧಿಗಳ ಬಗ್ಗೆ ನಮ್ಮ ಶೂನ್ಯ ಸಹಿಷ್ಣುತೆಗೆ ಅದು ಸಾಕ್ಷಿಯಾಗಿದೆ. ಭಯೋತ್ಪಾದನೆಗೆ ಯಾವುದೇ ರಾಷ್ಟ್ರೀಯತೆ ಮತ್ತು ಧರ್ಮಶಾಸ್ತ್ರವಿಲ್ಲ ಎಂಬುದನ್ನು ನಾವು ಮರೆಯಬಾರದು ಎಂದು ಹೇಳಿದ್ದರು (ಏಜೆನ್ಸೀಸ್).