ತಾತ್ಕಾಲಿಕ ಟೆಲಿಗ್ರಾಮ್ ಆ್ಯಪ್ ನಿಷೇಧ ವಿಚಾರ: ಕೇಂದ್ರ ಸರ್ಕಾರದ ಆದೇಶ ಎತ್ತಿ ಹಿಡಿದ ದೆಹಲಿ ಹೈಕೋರ್ಟ್​ | Delhi High Court

ನವದೆಹಲಿ: ಜೂ. 21ರಂದು ನಡೆಯುವ ನೀಟ್ ಯುಜಿ ಮರು ಪರೀಕ್ಷೆಗಳಿಗೂ ಮುನ್ನ ಭಾರತದಲ್ಲಿ ಪ್ರಮುಖ ಸಾಮಾಜಿಕ ಜಾಲತಾಣವಾದ ಟೆಲಿಗ್ರಾಮ್ ಅನ್ನು ತಾತ್ಕಾಲಿಕವಾಗಿ ನಿರ್ಬಂಧಿಸುವ ಕೇಂದ್ರ ಸರ್ಕಾರದ ನಿರ್ಧಾರವನ್ನು ದೆಹಲಿ ಹೈಕೋರ್ಟ್(Delhi High Court) ಶುಕ್ರವಾರ(ಜೂ. 19) ಎತ್ತಿಹಿಡಿದಿದೆ.

ಭಾರತದಲ್ಲಿ ಜೂ. 22ರವರೆಗೆ ಟೆಲಿಗ್ರಾಮ್ ನಿಷೇಧಿಸುವ ಕೇಂದ್ರ ಸರ್ಕಾರದ ನಿರ್ಧಾರ ಪ್ರಶ್ನಿಸಿ ದೆಹಲಿ ಹೈಕೋರ್ಟ್​ನಲ್ಲಿ ಟೆಲಿಗ್ರಾಮ್ ಕಂಪನಿ ಸಲ್ಲಿಸಿದ ಅರ್ಜಿ ವಿಚಾರಣೆ ನಡೆಸಿದ ನ್ಯಾ. ತೇಜಸ್ ಕರಿಯಾ ಅವರ ಪೀಠವು, ಮಾಹಿತಿ ತಂತ್ರಜ್ಞಾನ ಕಾಯ್ದೆಯಡಿಯಲ್ಲಿ ತನ್ನ ತುರ್ತು ಅಧಿಕಾರವನ್ನು ಚಲಾಯಿಸಲು ಕೇಂದ್ರವು ಸಾಕಷ್ಟು ಆಧಾರಗಳನ್ನು ಪ್ರದರ್ಶಿಸಿದೆ ಎಂದು ಅಭಿಪ್ರಾಯ ಪಟ್ಟಿದೆ.

ಟೆಲಿಗ್ರಾಮ್ ಪ್ರವೇಶವನ್ನು ನಿರ್ಬಂಧಿಸುವುದನ್ನು ನಿರ್ದೇಶಿಸಲು ಸೆಕ್ಷನ್ 69A ಅಡಿಯಲ್ಲಿ R1 (ಸರ್ಕಾರ) ಗೆ ಅಧಿಕಾರ ನೀಡಲಾಗಿದೆ. ಅನುಪಾತದ ಪರೀಕ್ಷೆಯು ತೃಪ್ತಿಕರವಾಗಿದೆ. ಸರ್ಕಾರದ ಕ್ರಮಗಳು ಕನಿಷ್ಠ ನಿರ್ಬಂಧಿತವಾಗಿವೆ. ಆದೇಶ ಸರಿಯಿಲ್ಲ ಎಂದು ಭಾವಿಸಲಾಗಲ್ಲ ಎಂದು ಹೇಳಿ ಪೀಠವು ಅರ್ಜಿಯನ್ನು ವಜಾಗೊಳಿಸಿದೆ.

ನೀಟ್-ಯುಜಿ ಮರು ಪರೀಕ್ಷೆಗಳ ಸುತ್ತಲಿನ ಸಂದರ್ಭಗಳನ್ನು ಗಮನದಲ್ಲಿಟ್ಟುಕೊಂಡು ಸರ್ಕಾರ ಉಲ್ಲೇಖಿಸಿದ ಕಾರಣಗಳು ತಾತ್ಕಾಲಿಕ ನಿರ್ಬಂಧವನ್ನು ಸಮರ್ಥಿಸುತ್ತವೆ. ಮಾಹಿತಿ ತಂತ್ರಜ್ಞಾನ ಕಾಯ್ದೆ 2000ರ ಸೆಕ್ಷನ್ 69A ಅಡಿಯಲ್ಲಿ ಸೂಚಿಸಲಾದ ಕಾರ್ಯವಿಧಾನವನ್ನು ಸರಿಯಾಗಿ ಅನುಸರಿಸಲಾಗಿದೆ. ಆದೇಶಗಳು ಮನಸ್ಸನ್ನು ಅನ್ವಯಿಸದ ಕಾರಣದಿಂದ ಬಳಲುತ್ತಿಲ್ಲ. ಐಟಿ ಕಾಯ್ದೆಯಡಿಯಲ್ಲಿ ವೇದಿಕೆಯನ್ನು ಮಾಹಿತಿಯ ವ್ಯಾಪ್ತಿಯಿಂದ ಹೊರಗಿಡಲು ಯಾವುದೇ ಕಾರಣವಿಲ್ಲ ಎಂದು ನಾವು ತೀರ್ಮಾನಿಸಿದ್ದೇವೆ ಎಂದು ಪೀಠ ಹೇಳಿದೆ.

ನೀಟ್-ಯುಜಿ ಪ್ರಶ್ನೆ ಪತ್ರಿಕೆ ಸೋರಿಕೆ ವಿವಾದಕ್ಕೆ ಸಂಬಂಧಿಸಿದ ಸಂಘಟಿತ ವಂಚನೆ ಜಾಲಗಳು ತಮ್ಮ ದುಷ್ಕೃತ್ಯಕ್ಕೆ ಅನುಕೂಲವಾಗುವಂತೆ ಟೆಲಿಗ್ರಾಮ್ ಅನ್ನು ಬಳಸಿಕೊಂಡಿವೆ ಎಂಬ ಕಳವಳವನ್ನು ಉಲ್ಲೇಖಿಸಿ ಮರು ಪರೀಕ್ಷೆ ಮುಗಿಯುವವರೆಗೂ ಕೇಂದ್ರ ಸರ್ಕಾರ ಭಾರತದಲ್ಲಿ ಟೆಲಿಗ್ರಾಮ್ ಮೇಲೆ ತಾತ್ಕಾಲಿಕ ನಿಷೇಧವನ್ನು ಹೇರಿದೆ (ಏಜೆನ್ಸೀಸ್).