ಶಬರಿಮಲೆ ಕೇಸ್‌ಗೆ ಬಿಗ್​ ಟ್ವಿಸ್ಟ್.. ಸೋನಿಯಾ ಗಾಂಧಿ ಜೊತೆಗಿದ್ದ ಆರೋಪಿಗಳ ಫೋಟೋ ಹಂಚಿಕೊಂಡು ಪಿಣರಾಯಿ ವಿಜಯನ್​ ಗುಡುಗು | Pinarayi Vijayan

ಮಾಧ್ಯಮಗಳನ್ನುದ್ದೇಶಿಸಿ ಮಾತನಾಡಿದ ಸಿಎಂ ವಿಜಯನ್, ಶಬರಿಮಲೆ ಚಿನ್ನ ಕಳವು ಪ್ರಕರಣದ ಪ್ರಮುಖ ಆರೋಪಿಯಾಗಿರುವ ಉನ್ನಿಕೃಷ್ಣನ್ ಪೊಟ್ಟಿ ಸೋನಿಯಾ ಗಾಂಧಿ ಜೊತೆಯಲ್ಲಿದ್ದಾರೆ ಎನ್ನಲಾದ ಫೋಟೋವನ್ನು ಉಲ್ಲೇಖಿಸಿ , ಆರೋಪಿಗಳಾದವರು ದೊಡ್ಡ ಮಟ್ಟದ ಭದ್ರತೆ ಇರುವಂತಹ ನಾಯಕರನ್ನು ಭೇಟಿಯಾಗಿದ್ದು ಹೇಗೆ ಎಂದು ಪ್ರಶ್ನಿಸಿದ್ದಾರೆ.

ವಂಚಕರಾದವರು ದೇಶದ ಅತ್ಯುನ್ನತ ಮಟ್ಟದ ಭದ್ರತೆಯನ್ನು ಹೊಂದಿರುವ ನಾಯಕಿ ಸೋನಿಯಾ ಗಾಂಧಿಯವರಿಗೆ ಹತ್ತಿರವಾಗಲು ಸಾಧ್ಯವಾಗಿದ್ದು ಹೇಗೆ..? ಈ ಭೇಟಿಗೆ ಅವಕಾಶ ನೀಡಲು ಯಾರು ಜವಾಬ್ದಾರರು? ಮೊದಲು ಉತ್ತರಿಸಬೇಕಾದ ಪ್ರಶ್ನೆಗಳು ಇವು ಎಂದಿರುವ ವಿಜಯನ್, ಫೋಟೋದಲ್ಲಿ ಯುಡಿಎಫ್ ಸಂಚಾಲಕ ಅಡೂರ್ ಪ್ರಕಾಶ್ ಮತ್ತು ಪಟ್ಟಣಂತಿಟ್ಟ ಸಂಸದ ಆಂಟೋ ಆಂಟನಿ ಇದ್ದಾರೆ ಎಂದು ಉಲ್ಲೇಖಿಸಿ, ಚಿತ್ರದಲ್ಲಿರುವ ಇತರ ವ್ಯಕ್ತಿಗಳಲ್ಲಿ ಒಬ್ಬರು ಪ್ರಕರಣದ ಪ್ರಮುಖ ಆರೋಪಿ ಪಾಟಿ ಇನ್ನೊಬ್ಬರು ಕದ್ದ ಚಿನ್ನವನ್ನು ಖರೀದಿಸಿದ ವ್ಯಕ್ತಿ ಎಂದು ಆರೋಪಿಸಿದರು.

ಹೈಕೋರ್ಟ್ ಮೇಲ್ವಿಚಾರಣೆಯಲ್ಲಿರುವ ವಿಶೇಷ ತನಿಖಾ ತಂಡ (ಎಸ್‌ಐಟಿ) ತನಿಖೆಯಲ್ಲಿ ಸಿಎಂಒ ಹಸ್ತಕ್ಷೇಪ ಮಾಡಿದೆ ಎಂಬ ಕಾಂಗ್ರೆಸ್‌ನ ಆರೋಪಗಳನ್ನು ತಿರಸ್ಕರಿಸಿದ ವಿಜಯನ್​, ವಿಪಕ್ಷಗಳು ಮುಖ್ಯಮಂತ್ರಿ ಕಚೇರಿ ವಿರುದ್ಧ ಆರೋಪ ಮಾಡುವ ಬದಲು, ನನ್ನ ಈ ಪ್ರಶ್ನೆಗಳಿಗೆ ಉತ್ತರಿಸಬೇಕು ಎಂದರು. ತನಿಖೆ ಸರಿಯಾಗಿ ನಡೆಯುತ್ತಿದ್ದು, ಇದಕ್ಕೆ ಸಂಬಂಧಪಟ್ಟಂತೆ ಯಾವುದೇ ದೂರು ಬಂದಿಲ್ಲ, ಈ ವಿಷಯದಲ್ಲಿ ನಾನಾಗಲಿ, ನನ್ನ ಕಚೇರಿಯಾಗಲಿ ಹಸ್ತಕ್ಷೇಪ ಮಾಡಿಲ್ಲ ಎಂದು ಸ್ಪಷ್ಟಪಡಿಸಿದರು.

ಮಾಜಿ ಸಚಿವ ಸುರೇಂದ್ರನ್ ವಿಚಾರಣೆಯನ್ನು ರಹಸ್ಯವಾಗಿಡಲಾಗಿತ್ತು ಎಂಬ ಹೇಳಿಕೆಗಳನ್ನು ತಳ್ಳಿಹಾಕಿದ್ದು, ಎಸ್‌ಐಟಿ ಯಾರನ್ನು ಪ್ರಶ್ನಿಸುತ್ತಿದೆ ಎಂಬುದನ್ನು ಮುಂಚಿತವಾಗಿ ಘೋಷಿಸುವುದಿಲ್ಲ, ಯಾರನ್ನೂ ವಿಚಾರಣೆ ಮಾಡಲು ಸರ್ಕಾರದ ಅನುಮತಿ ಅಗತ್ಯವಿಲ್ಲ ಎಂದರು.

ಮಾಧ್ಯಮ ವರದಿಗಳ ಮೂಲಕ ಪ್ರಸ್ತಾವಿತ ವಿಚಾರಣೆಯ ಬಗ್ಗೆ ತಿಳಿದುಕೊಂಡೆ ಎಂದು ಯುಡಿಎಫ್ ಸಂಚಾಲಕ ಅಡೂರ್ ಪ್ರಕಾಶ್ ಹೇಳಿಕೆ ನೀಡಿದ್ದು, ಈ ಬೆಳವಣಿಗೆಗಳ ಹಿಂದೆ ಮುಖ್ಯಮಂತ್ರಿಯವರ ರಾಜಕೀಯ ಕಾರ್ಯದರ್ಶಿ ಪಿ. ಶಶಿ ಕೈವಾಡವಿದೆ ಎಂದು ಆರೋಪಿಸಿದರು. ಎಸ್‌ಐಟಿ ತನಿಖೆ ಸಹಕರಿಸಲು ಸಿದ್ಧರಿದ್ದು, ವಿಚಾರಣೆಯ ಸಮಯದಲ್ಲಿ ಮಾಧ್ಯಮದ ಉಪಸ್ಥಿತಿಯನ್ನು ಕೋರುವುದಾಗಿ ತಿಳಿಸಿದರು(ಏಜೆನ್ಸೀಸ್​).