ಎಐ ಡೇಟಾ ಸೆಂಟರ್‌ಗೆ ಸಿಗದ ಬ್ಯಾಂಕ್ ಸಾಲ! ಓರಾಕಲ್ ಸಂಸ್ಥೆಯಲ್ಲಿ 30 ಸಾವಿರ ಉದ್ಯೋಗ ಕಡಿತದ ಭೀತಿ.. Oracle

ನವದೆಹಲಿ:  ಜಾಗತಿಕವಾಗಿ ದೊಡ್ಡದಾಗಿ ಬೆಳೆದುಕೊಂಡಿರುವ ಐಟಿ ದೈತ್ಯ ಸಂಸ್ಥೆ ಓರಾಕಲ್ (Oracle) ತನ್ನ ಸಂಸ್ಥೆಯಲ್ಲಿ ಭಾರಿ ಪ್ರಮಾಣದ ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದು ಹಾಕಲು ಸಿದ್ಧತೆ ನಡೆಸಿದೆ.  ಕಂಪನಿಯ ಈ ನಿರ್ಧಾರದ ಹಿಂದೆ ಒಂದು ಮಹತ್ತರವಾದ ಉದ್ದೇಶ ಇದೆ ಎಂದು ವರದಿಯಾಗಿದೆ.

ವರದಿಗಳ ಪ್ರಕಾರ, ಸಾಮಾನ್ಯವಾಗಿ ಕಂಪನಿಗಳು ನಷ್ಟದಲ್ಲಿದ್ದಾಗ ಅಥವಾ ಪುನರ್ನಿರ್ಮಾಣದ ವೇಳೆ ಉದ್ಯೋಗಿಗಳನ್ನು ವಜಾಗೊಳಿಸುತ್ತವೆ. ಆದರೆ ಓರಾಕಲ್ ಪ್ರಕರಣದಲ್ಲಿ ಪರಿಸ್ಥಿತಿ ಭಿನ್ನವಾಗಿದೆ. ಕಂಪನಿಯು ಸುಮಾರು 30,000 ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದುಹಾಕಲು ನಿರ್ಧರಿಸಿದೆ. ತಂತ್ರಜ್ಞಾನ ವಲಯದಲ್ಲಿ ಎಐ (AI) ಅಲೆ ಜೋರಾಗಿರುವಾಗಲೇ ಓರಾಕಲ್ ಕೈಗೊಂಡಿರುವ ಈ ನಿರ್ಧಾರ ಐಟಿ ವಲಯದಲ್ಲಿ ತಲ್ಲಣ ಮೂಡಿಸಿದೆ.

ಕಳೆದ ಸೆಪ್ಟೆಂಬರ್‌ನಿಂದ ಬ್ಯಾಂಕುಗಳು ಓರಾಕಲ್ ಕಂಪನಿಗೆ ವಿಧಿಸುವ ಬಡ್ಡಿದರದ ಪ್ರೀಮಿಯಂ ಅನ್ನು ಸರಿಸುಮಾರು ಎರಡರಷ್ಟು ಹೆಚ್ಚಿಸಿವೆ. ಇದು ಸಾಲದ ವೆಚ್ಚವನ್ನು ಯಾವ ಮಟ್ಟಕ್ಕೆ ಕೊಂಡೊಯ್ದಿದೆ ಎಂದರೆ, ಸಾಮಾನ್ಯವಾಗಿ ಆರ್ಥಿಕವಾಗಿ ದುರ್ಬಲವಾಗಿರುವ ಕಂಪನಿಗಳಿಗೆ ವಿಧಿಸುವಂತಹ ಹೆಚ್ಚಿನ ಬಡ್ಡಿದರವನ್ನು ಈಗ ಓರಾಕಲ್ ನೀಡಬೇಕಾದ ಪರಿಸ್ಥಿತಿ ಬಂದಿದೆ. ಇದರ ಪರಿಣಾಮ ಏನು ಎಂದರೆ, ಓರಾಕಲ್ ಮಾತುಕತೆ ನಡೆಸುತ್ತಿದ್ದ ಹಲವಾರು ಡೇಟಾ ಸೆಂಟರ್ ಗುತ್ತಿಗೆಗಳು ಈಗ ಅರ್ಧಕ್ಕೆ ನಿಂತುಹೋಗಿವೆ. ಖಾಸಗಿ ಆಪರೇಟರ್‌ಗಳಿಗೆ ಹಣಕಾಸಿನ ನೆರವು ಸಿಗದ ಕಾರಣ ನಿರ್ಮಾಣ ಕಾರ್ಯ ಸ್ಥಗಿತಗೊಂಡಿದೆ. ಇದರಿಂದಾಗಿ, ಓರಾಕಲ್ ತನ್ನ ಗ್ರಾಹಕರಿಗೆ - ವಿಶೇಷವಾಗಿ OpenAI ಸಂಸ್ಥೆಗೆ - ಭರವಸೆ ನೀಡಿದ್ದ ಡೇಟಾ ಸಾಮರ್ಥ್ಯವನ್ನು ಒದಗಿಸಲು ಸಾಧ್ಯವಾಗುತ್ತಿಲ್ಲ. 

ಕೆಲವು ಏಷ್ಯಾದ ಬ್ಯಾಂಕುಗಳು ಸಾಲ ನೀಡಲು ಮುಂದೆ ಬಂದಿವೆಯಾದರೂ, ಅದು ಅಮೆರಿಕದಲ್ಲಿನ ತಕ್ಷಣದ ಸಮಸ್ಯೆಯನ್ನು ಬಗೆಹರಿಸುತ್ತಿಲ್ಲ. ಏಕೆಂದರೆ ಓರಾಕಲ್‌ನ ಹೆಚ್ಚಿನ ವಿಸ್ತರಣಾ ಯೋಜನೆಗಳು ಅಮೆರಿಕದಲ್ಲೇ ಕೇಂದ್ರೀಕೃತವಾಗಿವೆ.

ಓರಾಕಲ್ ತನ್ನ ಎಐ ಡೇಟಾ ಸೆಂಟರ್‌ಗಳ ನಿರ್ಮಾಣಕ್ಕಾಗಿ ದೊಡ್ಡ ಮಟ್ಟದ ಹೂಡಿಕೆ ಮಾಡಲು ಯೋಜಿಸಿದೆ ಎನ್ನಲಾಗಿದೆ.  ಈ ಯೋಜನೆಗಳಿಗೆ ಧನಸಹಾಯ ಮಾಡಲು  ಕೆಲವು ಬ್ಯಾಂಕುಗಳು ಹಿಂದೇಟು ಹಾಕಿರುವುದರಿಂದ ಬೇರೆ ಮಾರ್ಗವಿಲ್ಲದೆ ಕಂಪನಿ ಈ ಉದ್ಯೋಗ ಕಡಿತಕ್ಕೆ ಮುಂದಾಗಿದೆ ಎನ್ನಲಾಗಿದೆ.

ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನಕ್ಕಾಗಿ ಹೆಚ್ಚಿನ ಮೂಲಸೌಕರ್ಯದ ಅಗತ್ಯವಿದೆ. ಆದರೆ ಬ್ಯಾಂಕುಗಳು ಎಐ ಡೇಟಾ ಸೆಂಟರ್‌ಗಳ ಮೇಲಿನ ಹೂಡಿಕೆಯನ್ನು ಅಪಾಯಕಾರಿ ಎಂದು ಪರಿಗಣಿಸಿ ಹಣಕಾಸು ನೆರವನ್ನು ಹಿಂತೆಗೆದುಕೊಳ್ಳುತ್ತಿವೆ. ಹಣಕಾಸಿನ ಮುಗ್ಗಟ್ಟನ್ನು ಎದುರಿಸಲು ಮತ್ತು ಕಂಪನಿಯ ಆರ್ಥಿಕ ಸ್ಥಿರತೆಯನ್ನು ಕಾಯ್ದುಕೊಳ್ಳಲು ಉದ್ಯೋಗಿಗಳ ಸಂಖ್ಯೆಯನ್ನು ಕಡಿತಗೊಳಿಸುವುದು ಅನಿವಾರ್ಯವಾಗಿದೆ ಎಂದು ಮೂಲಗಳು ತಿಳಿಸಿವೆ.