ನಾಸಿಕ್ TCS ಮತಾಂತರ ಪ್ರಕರಣ: ಗರ್ಭಿಣಿ ಆರೋಪಿ ನಿದಾ ಖಾನ್​ಗೆ ಮಾನವೀಯತೆ ಆಧಾರದಲ್ಲಿ ಜಾಮೀನು ನೀಡಿದ ನ್ಯಾಯಾಲಯ! Nida Khan Bail

ನಾಸಿಕ್​: ಕಳೆದ ಕೆಲ ತಿಂಗಳಿನಿಂದ ಮಹಾರಾಷ್ಟ್ರದ ನಾಸಿಕ್‌ನಲ್ಲಿ ಭಾರಿ ಸಂಚಲನ ಸೃಷ್ಟಿಸಿರುವ ಟಾಟಾ ಕನ್ಸಲ್ಟೆನ್ಸಿ ಸರ್ವಿಸಸ್ (TCS) ಘಟಕದ ಲೈಂಗಿಕ ಕಿರುಕುಳ ಮತ್ತು ಧಾರ್ಮಿಕ ಮತಾಂತರ ಯತ್ನ ಪ್ರಕರಣದ ಪ್ರಮುಖ ಆರೋಪಿ ನಿದಾ ಖಾನ್‌ಗೆ ಸ್ಥಳೀಯ ನ್ಯಾಯಾಲಯ ಜಾಮೀನು (Nida Khan Bail) ಮಂಜೂರು ಮಾಡಿದೆ.

ಐದು ತಿಂಗಳ ಗರ್ಭಿಣಿಯಾಗಿರುವ ನಿದಾ ಖಾನ್‌ಗೆ ಮಾನವೀಯತೆಯ ಆಧಾರದ ಮೇಲೆ ನಾಸಿಕ್ ರಸ್ತೆ ನ್ಯಾಯಾಲಯದ ಹೆಚ್ಚುವರಿ ಸೆಷನ್ಸ್ ನ್ಯಾಯಾಧೀಶರಾದ ಕೆ. ಜಿ. ಜೋಶಿ ಜಾಮೀನು ನೀಡಿದ್ದಾರೆ.

ಇದನ್ನೂ ಓದಿ: ಬಿರುಕು ಬಿಟ್ಟ ದೀದಿ ಕೋಟೆ: TMC ತೊರೆದು BJP ಸೇರಿದ ಮೂವರು ಸಂಸದರು; ಕೇಸರಿ ಧ್ವಜ ಹಿಡಿದ ಸುಷ್ಮಿತಾ, ಸುಖೇಂದು ಶೇಖರ್ ಹಾಗೂ ಪ್ರಕಾಶ್ ಬರೈಕ್! TMC MPs Joins BJP

ಅರ್ಜಿದಾರರ ಪರ ವಕೀಲ ರಾಹುಲ್ ಕಸ್ಲಿವಾಲ್, ನಿದಾ ಖಾನ್ ಸದ್ಯ 5 ತಿಂಗಳ ಗರ್ಭಿಣಿಯಾಗಿದ್ದು, ಆಕೆ ನಿರಪರಾಧಿಯಾಗಿದ್ದಾರೆ. ಈಗಾಗಲೇ ತನಿಖೆ ಪೂರ್ಣಗೊಂಡು ಚಾರ್ಜ್‌ಶೀಟ್ ಸಲ್ಲಿಕೆಯಾಗಿರುವುದರಿಂದ ಆಕೆಯನ್ನು ಇನ್ನು ಮುಂದೆ ಬಂಧನದಲ್ಲಿಡುವುದು ಸರಿಯಲ್ಲ ಎಂದು ವಾದ ಮಂಡಿಸಿದ್ದರು.

ಈ ವಾದವನ್ನು ಪುರಸ್ಕರಿಸಿದ ನ್ಯಾಯಾಧೀಶ ಕೆ. ಜಿ. ಜೋಶಿ, ಯಾವುದೇ ಮಹಿಳೆಗೆ ಜೈಲಿನಲ್ಲಿ ಮಗುವಿಗೆ ಜನ್ಮ ನೀಡುವುದು ಅಸಹನೀಯ ನೋವು ಮತ್ತು ಸಾಮಾಜಿಕ ಕಳಂಕವನ್ನು ತರುತ್ತದೆ. ಇದು ಶ್ರೀಕೃಷ್ಣನ ಜನನದ ಸಂದರ್ಭದಂತೆಯೇ ಕಷ್ಟಕರವಾದ ಪರಿಸ್ಥಿತಿ.

ಜಾಮೀನು ನೀಡಲಾಗಿದ್ದರೂ, ಆರೋಪಿ ನಿದಾ ಖಾನ್ ಪ್ರಕರಣದಲ್ಲಿ ವಹಿಸಿದ್ದ ಪಾತ್ರದ ಬಗ್ಗೆ ನ್ಯಾಯಾಧೀಶರು ತೀವ್ರ ಕಳವಳ ವ್ಯಕ್ತಪಡಿಸಿದ್ದಾರೆ. ಸಹ-ಆರೋಪಿಗಳ ಜೊತೆ ಸೇರಿಕೊಂಡು ನಿಡಾ ಖಾನ್ ಸಂತ್ರಸ್ತೆಯ ಬ್ರೈನ್‌ವಾಶ್ ಮಾಡಲು ಯತ್ನಿಸಿದ್ದಾರೆ ಮತ್ತು ಆಕೆಯ ಸೈದ್ಧಾಂತಿಕ ಹಾಗೂ ಧಾರ್ಮಿಕ ದೃಷ್ಟಿಕೋನವನ್ನು ಬದಲಾಯಿಸಲು ಪ್ರಯತ್ನಿಸಿದ್ದಾರೆ ಎಂದು ತನಿಖೆಯಿಂದ ತಿಳಿದುಬಂದಿದೆ ಎಂದು ಕೋರ್ಟ್ ಹೇಳಿದೆ.

ಅಷ್ಟೇ ಅಲ್ಲದೆ, ಸಂತ್ರಸ್ತೆಯ ಮೊಬೈಲ್‌ನಲ್ಲಿ ಇಸ್ಲಾಂ ಧರ್ಮಕ್ಕೆ ಸಂಬಂಧಿಸಿದ ಆ್ಯಪ್‌ಗಳನ್ನು ಇನ್‌ಸ್ಟಾಲ್ ಮಾಡಿ, ಆಕೆಯ ಮನೆಗೆ ಭೇಟಿ ನೀಡಿ ನಮಾಜ್ ಮಾಡುವುದು ಮತ್ತು ಹಿಜಾಬ್ ಧರಿಸುವುದನ್ನು ಹೇಳಿಕೊಡುತ್ತಿದ್ದರು ಎಂಬ ಗಂಭೀರ ಆರೋಪ ಎಫ್‌ಐಆರ್‌ನಲ್ಲಿದೆ.

ನಾಸಿಕ್‌ನ ಟಿಸಿಎಸ್ ಘಟಕದಲ್ಲಿ ಮಹಿಳಾ ಉದ್ಯೋಗಿಗಳಿಗೆ ಮಾನಸಿಕ ಕಿರುಕುಳ, ಶೋಷಣೆ ಮತ್ತು ಬಲವಂತದ ಮತಾಂತರ ಯತ್ನಕ್ಕೆ ಸಂಬಂಧಿಸಿದಂತೆ ಒಟ್ಟು 9 ಪ್ರಕರಣಗಳು ದಾಖಲಾಗಿದ್ದು, ಇವುಗಳ ತನಿಖೆಯನ್ನು ಪೊಲೀಸರ ವಿಶೇಷ ತನಿಖಾ ತಂಡ ನಡೆಸುತ್ತಿದೆ. ಪ್ರಸ್ತುತ ಪ್ರಕರಣವು ಡಿಯೋಲಾಲಿ ಕ್ಯಾಂಪ್ ಪೊಲೀಸ್ ಠಾಣೆಯಲ್ಲಿ ಭಾರತೀಯ ನ್ಯಾಯ ಸಂಹಿತೆ (BNS) ಸೆಕ್ಷನ್ 69, 65, 299 ಮತ್ತು ಎಸ್‌ಸಿ/ಎಸ್‌ಟಿ ದೌರ್ಜನ್ಯ ತಡೆ ಕಾಯ್ದೆಯಡಿ ದಾಖಲಾಗಿದೆ.

ಈ ಹಗರಣ ಬೆಳಕಿಗೆ ಬರುತ್ತಿದ್ದಂತೆ ಎಚ್ಚೆತ್ತಿರುವ ಟಿಸಿಎಸ್ ಸಂಸ್ಥೆಯು, ಇಂತಹ ಕಿರುಕುಳಗಳ ವಿರುದ್ಧ ತಾನು ಶೂನ್ಯ ಸಹಿಷ್ಣುತೆ ನೀತಿ ಹೊಂದಿರುವುದಾಗಿ ಸ್ಪಷ್ಟಪಡಿಸಿದೆ ಮತ್ತು ಆರೋಪಿತ ಉದ್ಯೋಗಿಗಳನ್ನು ತಕ್ಷಣವೇ ಅಮಾನತುಗೊಳಿಸಿದೆ, (ಏಜನ್ಸೀಸ್​).