ಐಫೋನ್​ ಇಎಂಐ ಅನ್ನೋದೇ ಕಟ್ಟು ಕಥೆ... ಬೆಟ್ಟದಿಂದ ಬಿದ್ದು ಪ್ರಾಣಬಿಟ್ಟ ಮೂವರ ಬಗ್ಗೆ ಸಂಬಂಧಿ ಸ್ಫೋಟಕ ಹೇಳಿಕೆ

ಮಹಾರಾಷ್ಟ್ರ: ಮೊನ್ನೆ ಮೊನ್ನೆಯಷ್ಟೇ ಬೆಟ್ಟದಿಂದ ಕೆಳಗೆ ಬಿದ್ದು ದುರಂತ ಅಂತ್ಯ ಕಂಡ ಕುನಾಲ್ ಚಂದವಾಡೆ (18), ಸತತ ಮೂರು ಗಂಟೆಗೂ ಹೆಚ್ಚು ಕಾಲ ಪಾಲಕರು ಮತ್ತು ಇಡೀ ಗ್ರಾಮಸ್ಥರನ್ನು ಗಾಬರಿಗೊಳಿಸಿದ್ದಲ್ಲದೇ, ತನ್ನ ಸಾವಿನಲ್ಲಿ ತಂದೆ-ತಾಯಿಯನ್ನೂ ಬಲಿ ಪಡೆದ ದಾರುಣ ಘಟನೆಗೆ ಇಡೀ ದೇಶ ಬೆಚ್ಚಿಬಿದ್ದಿದೆ. ಒಂದು ಐಫೋನ್​ಗಾಗಿ ಜೀವ ಕಳೆದುಕೊಳ್ಳುವ ಮನಸ್ಥಿತಿ ಹೇಗೆ ಬಂತು? ಎಂದು ಅನೇಕರು ಜಾಲತಾಣಗಳಲ್ಲಿ ಪ್ರಶ್ನೆಗಳ ಸುರಿಮಳೆ ಹಾಕಿದ ಬೆನ್ನಲ್ಲೇ ಮೃತ ಸಂಗೀತಾಳ ಸಂಬಂಧಿಕರೊಬ್ಬರು ಸ್ಫೋಟಕ ಸಂಗತಿಗಳನ್ನು ಬಹಿರಂಗಪಡಿಸಿದ್ದಾರೆ.

ಕೆಲವು ದಿನಗಳ ಹಿಂದೆಯಷ್ಟೇ ಹೊಸ ಹಾಗೂ ದುಬಾರಿ ಐಫೋನ್ ಮೊಬೈಲ್‌ ಅನ್ನು ಇಎಮ್‌ಐ (ಕಂತು) ಮೂಲಕ ಖರೀದಿ ಮಾಡಿದ್ದ ಕುನಾಲ್​, ತನಗೆ ಕಂತುಗಳನ್ನು ಕಟ್ಟಲು ಹಣ ಕೊಡುವಂತೆ ತಂದೆ ಮತ್ತು ತಾಯಿಯೊಡನೆ ಜಟಾಪಟಿ ನಡೆಸಿದ್ದ. ಇದಕ್ಕೆ ಒಪ್ಪದ ಆತನ ತಾಯಿ ಸಂಗೀತಾ, ಯಾವುದೇ ಕಾರಣಕ್ಕೂ ಬೇಡ ಅರ್ಥ ಮಾಡಿಕೋ ಎಂದು ಮನವೋಲಿಸಲು ಪ್ರಯತ್ನಿಸಿದ್ದರು. ಆದ್ರೆ, ಇದ್ಯಾವುದಕ್ಕೂ ತಲೆ ಆಡಿಸದ ಕುನಾಲ್​, ತಾನು ಸಾವಿಗೆ ಶರಣಾಗುವುದರ ಜತೆ ಪೋಷಕರನ್ನು ಕರೆದುಕೊಂಡ ಎಂದು ವಿವರಿಸಲಾಗಿದೆ. ಆದ್ರೆ, ಮೃತ ಸಂಗೀತಾ ಸಹೋದರಿ ಪಲ್ಲವಿ ಪಾಟೀಲ್ ಇದು ಸುಳ್ಳು ಎಂದು ವಾದಿಸಿದ್ದಾರೆ.

ವಿಡಿಯೋದಲ್ಲಿ ಮಾತನಾಡಿದ ಪಲ್ಲವಿ​, ಐಫೋನ್ ಕಂತಿನ ಕಥೆಯೇ ದೊಡ್ಡ ಹಾಗೂ ಶುದ್ಧ ಸುಳ್ಳು. ಈ ರೀತಿಯ ವದಂತಿಗಳನ್ನು ಯಾರೂ ಹಬ್ಬಿಸಬೇಡಿ. ಮೃತರು ನನ್ನ ಅಕ್ಕ ಸಂಗೀತಾ, ಭಾವ ಮುರುಳಿಧರ್ ಮತ್ತು ಅವರ ಮಗ ಕುನಾಲ್. ಅವರ ಚಿತಾಭಸ್ಮವನ್ನು ತೆಗೆದುಕೊಂಡು ಬರುವಾಗ ಸೋಷಿಯಲ್ ಮೀಡಿಯಾದಲ್ಲಿ ಹರಿದಾಡುತ್ತಿರುವ ಇಂತಹ ಸುಳ್ಳು ಸುದ್ದಿಗಳನ್ನು ನೋಡಿ ಮನಸ್ಸಿಗೆ ತುಂಬಾ ದುಃಖವಾಯಿತು. ಪರಿಸ್ಥಿತಿ ಏನು ಅಥವಾ ಏನಾಗಿದೆ ಎಂಬುದನ್ನು ಅರಿಯದೆ ಸುಮ್ಮನೆ ಹೀಗೆಲ್ಲ ಹೇಳುವುದು ಸರಿಯಲ್ಲ ಎಂದು ಕಣ್ಣೀರಿಟ್ಟರು.

ಏನೂ ತಿಳಿಯದ ಜನರು ಐಫೋನ್ ಕಂತಿನ ಗಲಾಟೆಯಿಂದ ಹೀಗಾಯ್ತು ಎಂದು ವದಂತಿ ಹಬ್ಬಿಸುತ್ತಿದ್ದಾರೆ. ನಮಗಾದ ಈ ನಷ್ಟದ ಸತ್ಯಾಸತ್ಯತೆ ಬಗ್ಗೆ ನಿಮಗೇನು ಗೊತ್ತು? ಮನೆಯಲ್ಲಿ 75 ವಯಸ್ಸಾಗಿರುವ ಹೆತ್ತವರಿದ್ದಾರೆ. ಇದು ಅವರಿಗೆ ಎಷ್ಟು ಸಂಕಟ, ಕಣ್ಣೀರು ತರುತ್ತಿದೆ ಅನ್ನೋದನ್ನು ಮೊದಲು ಆಲೋಚಿಸಿ ಎಂದು ಜನರಲ್ಲಿ ಮನವಿ ಮಾಡಿಕೊಂಡಿದ್ದಾರೆ. ಇದೇ ಸಮಯದಲ್ಲಿ, ಕುಟುಂಬದ ಹಳೆಯ ಜಗಳ ಮತ್ತು ಸಂಗೀತಾ ಅವರಿಗೆ ಸಂಬಂಧಿಸಿದ ವಿಡಿಯೋವೊಂದು ಪೊಲೀಸರ ತನಿಖೆಯಲ್ಲಿ ದೊರೆತಿದೆ.

ಪೊಲೀಸರ ಮಾಹಿತಿ ಪ್ರಕಾರ, ಮುರುಳಿಧರ್​ ಹಾಗೂ ಸಂಗೀತಾ ದಂಪತಿಯ ಹಿರಿಯ ಮಗ 6 ವರ್ಷಗಳ ಹಿಂದೆಯಷ್ಟೇ ಆರೋಗ್ಯ ಸಮಸ್ಯೆಯಿಂದ ಸಾವಿಗೀಡಾದ. ಬಳಿಕ ಮನೆಯಲ್ಲಿ ಮನಸ್ತಾಪ ಮತ್ತು ಜಗಳಗಳು ಶುರುವಾದ ಕಾರಣ ಮುರುಳಿಧರ್​ ಹೆಚ್ಚಾಗಿ ಮನೆಯಲ್ಲಿ ಇರುತ್ತಿರಲಿಲ್ಲ. ಕಳೆದ ಮೂರು ತಿಂಗಳಿನಿಂದ ಹೊರಗಿದ್ದ ಕುನಾಲ್​ ತಂದೆ, ದುರಂತಕ್ಕೂ ಎರಡು ದಿನಗಳ ಮುಂಚೆಯಷ್ಟೇ ಮನೆಗೆ ಬಂದಿದ್ದು, ಮತ್ತೆ ಜಗಳ ನಡೆದಿತ್ತು ಎನ್ನಲಾಗಿದೆ.

ಪೊಲೀಸ್ ತನಿಖೆಯಲ್ಲಿ ಸಂಗೀತಾ ಅವರ ಹಳೆಯ ವಿಡಿಯೋ ಒಂದನ್ನು ವಶಪಡಿಸಿಕೊಳ್ಳಲಾಗಿದ್ದು, ಅದರಲ್ಲಿ ಅವರು, "ಆಸ್ತಿಗಾಗಿ ನನ್ನ ಮತ್ತು ನನ್ನ ಮಗನ ಹಕ್ಕನ್ನು ಕಸಿದುಕೊಂಡಿದ್ದೀರಿ. ನನ್ನ ನೆಮ್ಮದಿಯ ಸಂಸಾರವನ್ನು ಹಾಳು ಮಾಡಿದ್ದೀರಿ. ಪುತ್ರನನ್ನು ಹೆತ್ತವರಿಂದ ದೂರ ಮಾಡಿದ ನಿಮ್ಮ ಈ ಪಾಪಕ್ಕೆ ಮುಂದಿನ ಏಳು ತಲೆಮಾರು ನರಕ ಅನುಭವಿಸುತ್ತೆ. ಇದೇ ನನ್ನ ಶಾಪ" ಎಂದು ಹೇಳಿರುವುದು ಕಂಡುಬಂದಿದೆ. ಅಸಲಿಗೆ, ಇದನ್ನು ಯಾರಿಗೆ ಹೇಳಿರುವುದು, ಯಾಕಾಗಿ ಈ ವಿಡಿಯೋ ಮಾಡಿದರು ಎಂಬುದನ್ನು ಭೇದಿಸಲು ಸದ್ಯ ಖಾಕಿ ಪಡೆ ಮುಂದಾಗಿದೆ.

ಮೃತ ಸಂಗೀತಾ ಅವರು 29,000ಕ್ಕೂ ಹೆಚ್ಚು ಚಂದಾದಾರರನ್ನು ಹೊಂದಿದ್ದ ಯೂಟ್ಯೂಬರ್ ಆಗಿದ್ದರು ಎಂಬುದು ಇಲ್ಲಿ ಗಮನಾರ್ಹ. ಈ ದುರಂತಕ್ಕೂ ಕೆಲವು ದಿನಗಳ ಹಿಂದೆಯಷ್ಟೇ ಅವರು ಸಂಬಂಧಗಳ ಮೌಲ್ಯದ ಬಗ್ಗೆ ಒಂದು ವಿಡಿಯೋ ಹಂಚಿಕೊಂಡಿದ್ದರು. ಅದರಲ್ಲಿ, 'ಒಬ್ಬ ವ್ಯಕ್ತಿ ನಿಮ್ಮನ್ನು ಮತ್ತು ನಿಮ್ಮ ಪ್ರೀತಿಯನ್ನು ಗೌರವಿಸದಿದ್ದರೆ, ಅಂತಹ ಸಂಬಂಧದಲ್ಲಿ ಇರುವುದರಲ್ಲಿ ಯಾವುದೇ ಅರ್ಥವಿಲ್ಲ, ಹೊರಬರುವುದೇ ಲೇಸು" ಎಂದು ಮರಾಠಿ ಭಾಷೆಯಲ್ಲಿ ಹೇಳಿದ್ದರು.

ಮೃತ ಕುನಾಲ್ ಕಳೆದ ವರ್ಷವೂ ಇದೇ ಬೆಟ್ಟದ ತುತ್ತ ತುದಿಗೆ ಹೋಗಿ ಆತ್ಮಹತ್ಯೆಗೆ ಯತ್ನಿಸಿದ್ದ. ಆದರೆ, ಅಂದು ಪೊಲೀಸರು ಆತನನ್ನು ರಕ್ಷಿಸಿ, ಕೌನ್ಸೆಲಿಂಗ್​ಗೆ ಒಳಪಡಿಸಿ ಮನೆಗೆ ವಾಪಾಸ್​ ಕಳುಹಿಸಿದ್ದರು ಎಂದು ಖಾಕಿ ಮೂಲಗಳು ತಿಳಿಸಿವೆ,(ಏಜೆನ್ಸೀಸ್).