ವಿದೇಶ

ಭಾರತಕ್ಕಿಂತ ಪಾಕಿಸ್ತಾನದಲ್ಲೇ ಹಿಂದೂಗಳು ನೆಮ್ಮದಿಯಾಗಿದ್ದಾರೆ: ರಾಷ್ಟ್ರಾಧ್ಯಕ್ಷ ಜರ್ದಾರಿ ವಿವಾದ; ಜನಗಣತಿ ಹೇಳುವುದೇನು? Asif Ali Zardari on Hindu

ಪಾಕ್ ಅಧ್ಯಕ್ಷ ಆಸಿಫ್ ಅಲಿ ಜರ್ದಾರಿ ವಿವಾದಾತ್ಮಕ ಹೇಳಿಕೆ
ಪಾಕ್ ಅಧ್ಯಕ್ಷ ಆಸಿಫ್ ಅಲಿ ಜರ್ದಾರಿ ವಿವಾದಾತ್ಮಕ ಹೇಳಿಕೆ
Published on: 

ಪ್ರಮುಖ ಮುಖ್ಯಾಂಶಗಳು

  • ಪಾಕಿಸ್ತಾನದಲ್ಲಿ ಹಿಂದೂಗಳು ಭಾರತಕ್ಕಿಂತ ಹೆಚ್ಚು ಸ್ವತಂತ್ರರು ಹಾಗೂ ನೆಮ್ಮದಿಯಾಗಿದ್ದಾರೆ
  • ಪಾಕ್ ಅಧ್ಯಕ್ಷ ಆಸಿಫ್ ಅಲಿ ಜರ್ದಾರಿ ವಿವಾದಾತ್ಮಕ ಹೇಳಿಕೆ
  • ಆದರೆ ಜನಗಣತಿ ಹೇಳುವುದೇನು
ಇಸ್ಲಾಮಾಬಾದ್: ಪಾಕಿಸ್ತಾನದ ಅಲ್ಪಸಂಖ್ಯಾತರ ಬಗ್ಗೆ ರಾಷ್ಟ್ರಾಧ್ಯಕ್ಷ ಆಸಿಫ್ ಅಲಿ ಜರ್ದಾರಿ (Asif Ali Zardari on Hindu) ನೀಡಿರುವ ಹೇಳಿಕೆಯೊಂದು ಈಗ ಹೊಸ ಚರ್ಚೆಗೆ ಗ್ರಾಸವಾಗಿದೆ.
ಪಾಕಿಸ್ತಾನದಲ್ಲಿ ಮುಸ್ಲಿಮರು ಸಹನಶೀಲರಾಗಿದ್ದು, ಇಲ್ಲಿನ ಹಿಂದೂಗಳು ಅತ್ಯಂತ ಸ್ವತಂತ್ರವಾಗಿ ಬದುಕುತ್ತಿದ್ದಾರೆ ಎಂದು ಅವರು ಬಣ್ಣಿಸಿದ್ದಾರೆ. ಅಷ್ಟೇ ಅಲ್ಲದೆ, ಪಾಕಿಸ್ತಾನದ ಹಿಂದೂಗಳು ಭಾರತಕ್ಕಿಂತ ನಮ್ಮ ದೇಶದಲ್ಲೇ ನೆಮ್ಮದಿಯಾಗಿದ್ದಾರೆ ಎಂದು ಅವರು ಹೇಳಿಕೊಂಡಿದ್ದಾರೆ.

ಸ್ವಾತಂತ್ರ್ಯ ದಿನಾಚರಣೆಯ ಸಮಾರಂಭದಲ್ಲಿ ಮಾತು

ಆಗಸ್ಟ್ 14ರಂದು ಪಾಕಿಸ್ತಾನದ ಸ್ವಾತಂತ್ರ್ಯ ದಿನದ ಅಂಗವಾಗಿ ಇಸ್ಲಾಮಾಬಾದ್‌ನಲ್ಲಿ ನಡೆದ ಸಮಾರಂಭದಲ್ಲಿ ಪಾಲ್ಗೊಂಡು ಮಾತನಾಡಿದ ಜರ್ದಾರಿ, ಈ ವಿವಾದಾತ್ಮಕ ಹೇಳಿಕೆಗಳನ್ನು ನೀಡಿದ್ದಾರೆ. 2025ರ ಭಾರತ ಹಾಗೂ ಪಾಕಿಸ್ತಾನದ ಮಿಲಿಟರಿ ಸಂಘರ್ಷವನ್ನು ನೆನಪಿಸುವ ಸಲುವಾಗಿ ಪಾಕಿಸ್ತಾನ ಈ ಸ್ಮಾರಕವನ್ನು ನಿರ್ಮಿಸಿದೆ. ಈ ಕಾರ್ಯಕ್ರಮದಲ್ಲಿ ಭಾರತ ಮತ್ತು ಪಾಕಿಸ್ತಾನದ ನಡುವಿನ ಭಿನ್ನ ದೃಷ್ಟಿಕೋನಗಳ ಬಗ್ಗೆ ಅವರು ಮಾತನಾಡಿದ್ದಾರೆ.

ಭಾರತದ ವಿರುದ್ಧ ಜರ್ದಾರಿ ವಾಗ್ದಾಳಿ


ಭಾರತವು ಇಂದಿಗೂ ಅಖಂಡ ಭಾರತದ ಪರಿಕಲ್ಪನೆಯನ್ನು ನಂಬಿದೆ ಎಂದು ಆರೋಪಿಸಿದ ಜರ್ದಾರಿ, ಆದರೆ ಮುಸ್ಲಿಂ ರಾಷ್ಟ್ರವಾಗಿ ಪಾಕಿಸ್ತಾನದ ಅಸ್ತಿತ್ವದ ಕಥೆಯನ್ನು ಭಾರತ ಮರೆತುಬಿಡುತ್ತಿದೆ ಎಂದರು. ಭಾರತೀಯರ ಕಾರ್ಯಸೂಚಿಯೇ ಬೇರೆ ಇದೆ ಎಂದು ಹೇಳಿದ ಅವರು, ಭಾರತದ ದೃಷ್ಟಿಕೋನಕ್ಕೂ ಪಾಕಿಸ್ತಾನದ ಧೋರಣೆಗೂ ಬಹಳ ವ್ಯತ್ಯಾಸವಿದೆ ಎಂದು ಪ್ರತಿಪಾದಿಸಿದ್ದಾರೆ.

'ನಾವು ಸಹಿಸಿಕೊಳ್ಳುವ ಮನಸ್ಥಿತಿಯ ಮುಸ್ಲಿಮರು'

ದೇಶದ ಅಲ್ಪಸಂಖ್ಯಾತ ಹಿಂದೂ ಜನಸಂಖ್ಯೆಯ ಬಗ್ಗೆ ಮಾತನಾಡುತ್ತಾ ಜರ್ದಾರಿ ಅಚ್ಚರಿಯ ಹೇಳಿಕೆ ನೀಡಿದ್ದಾರೆ. ನಮ್ಮ ದೇಶದಲ್ಲಿ ಮೂರರಿಂದ ನಾಲ್ಕು ಶೇಕಡಾದಷ್ಟು ಹಿಂದೂ ಜನಸಂಖ್ಯೆಯಿದೆ. ಅವರು ಬೇರೆಲ್ಲಿಯೂ ಇರುವಂತೆ ನಮ್ಮ ದೇಶದಲ್ಲೂ ಅತ್ಯಂತ ಸ್ವತಂತ್ರರು ಮತ್ತು ನೆಮ್ಮದಿಯಾಗಿದ್ದಾರೆ ಎಂದು ಹೇಳಿದರು.
ಮುಂದುವರಿದು, ಪಾಕಿಸ್ತಾನದಲ್ಲಿರುವ ಹಿಂದೂಗಳಿಗೆ ಭಾರತದಲ್ಲಿರುವುದಕ್ಕಿಂತ ನಮ್ಮ ಜತೆಯೇ ಇರಲು ಹೆಚ್ಚು ಇಷ್ಟವಿದೆ. ನಾವು ಮುಸ್ಲಿಮರು, ಅವರು ಮುಸ್ಲಿಮರಲ್ಲ. ಆದರೆ ನಾವು ಇತರರನ್ನು ಸಹಿಸಿಕೊಳ್ಳುವ ಮನಸ್ಥಿತಿ ಹೊಂದಿರುವ ಮುಸ್ಲಿಮರು ಎಂದು ಜರ್ದಾರಿ ಸಮರ್ಥಿಸಿಕೊಂಡಿದ್ದಾರೆ.

ಜನಗಣತಿ ಹೇಳುವುದೇ ಬೇರೆ!

ಪಾಕಿಸ್ತಾನದ ಅಧ್ಯಕ್ಷರು ತಮ್ಮ ದೇಶದಲ್ಲಿ ಮೂರರಿಂದ ನಾಲ್ಕು ಪ್ರತಿಶತದಷ್ಟು ಹಿಂದೂಗಳಿದ್ದಾರೆ ಎಂದು ಹೇಳಿದ್ದರೂ, ಪಾಕಿಸ್ತಾನ್ ಬ್ಯೂರೋ ಆಫ್ ಸ್ಟ್ಯಾಟಿಸ್ಟಿಕ್ಸ್ ಬಿಡುಗಡೆ ಮಾಡಿರುವ 2023ರ ಅಧಿಕೃತ ಜನಗಣತಿ ವರದಿ ಸಂಪೂರ್ಣ ಭಿನ್ನವಾದ ಚಿತ್ರಣ ನೀಡಿದೆ.

ಆ ವರದಿಯ ಪ್ರಕಾರ, ಪಾಕಿಸ್ತಾನದಲ್ಲಿ ಒಟ್ಟು 38,67,729 ಹಿಂದೂಗಳಿದ್ದು (ಶೇ. 1.61), ಪ್ರತ್ಯೇಕವಾಗಿ ಪರಿಶಿಷ್ಟ ಜಾತಿಯಡಿ 13,49,487 ಮಂದಿ (ಶೇ. 0.56) ಇದ್ದಾರೆ. ಈ ಎರಡೂ ಗುಂಪುಗಳನ್ನು ಒಟ್ಟುಗೂಡಿಸಿದರೂ ಪಾಕಿಸ್ತಾನದ ಒಟ್ಟು ಜನಸಂಖ್ಯೆಯಲ್ಲಿ ಹಿಂದೂಗಳ ಪ್ರಮಾಣ ಶೇ. 2.17 ಮಾತ್ರ ಆಗುತ್ತದೆ. ಹೀಗಾಗಿ ಜರ್ದಾರಿ ಹೇಳಿರುವ ಅಂಕಿಅಂಶಗಳಿಗೂ ಅಧಿಕೃತ ಜನಗಣತಿಗೂ ವ್ಯತ್ಯಾಸವಿರುವುದು ಸ್ಪಷ್ಟವಾಗಿದೆ.


ಅಲ್ಲದೆ, ಪಾಕಿಸ್ತಾನದಲ್ಲಿರುವ ಬಹುತೇಕ ಹಿಂದೂಗಳು ಸಿಂಧ್ ಪ್ರಾಂತ್ಯದಲ್ಲೇ ನೆಲೆಸಿದ್ದು, ಅಲ್ಲಿ ಒಟ್ಟು ಜನಸಂಖ್ಯೆಯ ಶೇ. 6.43ರಷ್ಟು ಹಿಂದೂಗಳಿದ್ದಾರೆ. ಒಟ್ಟಿನಲ್ಲಿ, ನೆರೆ ರಾಷ್ಟ್ರದ ಅಧ್ಯಕ್ಷರ ಈ ಮಾತುಗಳು ಈಗ ರಾಜಕೀಯ ವಲಯದಲ್ಲಿ ಹಾಗೂ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದೆ, (ಏಜನ್ಸೀಸ್​).
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net