ಬಿಹಾರದಲ್ಲಿ ಹೈ-ಡ್ರಾಮಾ: Z+ ಭದ್ರತೆ ಕಡಿತಕ್ಕೆ ಕೆರಳಿದ ಲಾಲು-ರಾಬ್ರಿ! ಸರ್ಕಾರಿ ಸೆಕ್ಯೂರಿಟಿ ವಾಪಸ್ ಕಳಿಸಿ ಲಾಠಿ ಹಿಡಿದು ನಿಂತ ಆರ್‌ಜೆಡಿ ಕಾರ್ಯಕರ್ತರು! Lalu-Rabri Security Downgrade

ಸರ್ಕಾರಿ ಭದ್ರತೆಯನ್ನು ತಿರಸ್ಕರಿಸಿದ ಬೆನ್ನಲ್ಲೇ, ಪಟ್ನಾದ ೧೦, ಸರ್ಕ್ಯುಲರ್ ರೋಡ್‌ನಲ್ಲಿರುವ ರಾಬ್ರಿ ದೇವಿ ಅವರ ನಿವಾಸದ ಮುಂದೆ ನೂರಾರು ಆರ್‌ಜೆಡಿ ಕಾರ್ಯಕರ್ತರು ಕೈಯಲ್ಲಿ ಲಾಠಿ ಹಿಡಿದು ಜಮಾಯಿಸಿದ್ದಾರೆ. ತಮ್ಮ ನಾಯಕರ ರಕ್ಷಣೆಯನ್ನು ತಾವೇ ಮಾಡಿಕೊಳ್ಳುವುದಾಗಿ ಘೋಷಿಸಿರುವ ಕಾರ್ಯಕರ್ತರು ಬಂಗಲೆಯ ಸುತ್ತಲೂ ಅನೌಪಚಾರಿಕವಾಗಿ ಕಾವಲು ನಿಂತಿದ್ದು, ಬಿಹಾರದಲ್ಲಿ ಸದ್ಯ ಉದ್ವಿಗ್ನ ವಾತಾವರಣ ನಿರ್ಮಾಣವಾಗಿದೆ.

ಬಿಹಾರದ ಗೃಹ ಇಲಾಖೆಯು ಇತ್ತೀಚೆಗೆ ವಿಐಪಿಗಳ ಭದ್ರತೆಯನ್ನು ಪರಿಷ್ಕರಿಸಿದ್ದು, ಲಾಲು ಪ್ರಸಾದ್, ರಾಬ್ರಿ ದೇವಿ ಮಾತ್ರವಲ್ಲದೆ ಅವರ ಮಗ, ವಿಧಾನಸಭೆಯ ವಿಪಕ್ಷದ ನಾಯಕ ತೇಜಸ್ವಿ ಯಾದವ್ ಅವರ ಭದ್ರತೆಯನ್ನೂ ಕಡಿತಗೊಳಿಸಿದೆ. ತೇಜಸ್ವಿ ಯಾದವ್ ಕೂಡ ತಮಗೆ ನೀಡಲಾದ 'Y' ದರ್ಜೆಯ ಸೆಕ್ಯೂರಿಟಿಯನ್ನು ತಿರಸ್ಕರಿಸಿದ್ದಾರೆ.

ಸರ್ಕಾರದ ವಿರುದ್ಧ ಮುಗಿಬಿದ್ದಿರುವ ಆರ್‌ಜೆಡಿ ವಕ್ತಾರ ಶಕ್ತಿ ಯಾದವ್, ಬಿಜೆಪಿ-ಜೆಡಿಯು ಸರ್ಕಾರವು ನಮ್ಮ ಹಿರಿಯ ನಾಯಕರಿಗೆ ನಿರಂತರವಾಗಿ ಅಪಮಾನ ಮಾಡುತ್ತಿದೆ. ಭದ್ರತೆ ಹಾಗೂ ಬಂಗಲೆಯ ಹೆಸರಿನಲ್ಲಿ ದ್ವೇಷದ ರಾಜಕಾರಣ ಮಾಡುತ್ತಿದೆ. ನಮ್ಮ ನಾಯಕರನ್ನು ಕೊಲ್ಲಲು ಸರ್ಕಾರ ಸಂಚು ಹೂಡಿದೆ ಅನಿಸುತ್ತಿದೆ. ಅವರ ರಕ್ಷಣೆಗೆ ಸರ್ಕಾರ ಬೇಡ, ನಮ್ಮ ಕಾರ್ಯಕರ್ತರೇ ಸಾಕು. ನಾವು ನಮ್ಮ ನಾಯಕರನ್ನು ಕಣ್ಣಿಗೆ ಎಣ್ಣೆ ಬಿಟ್ಟುಕೊಂಡು ಕಾಯುತ್ತೇವೆ ಎಂದು ಗುಡುಗಿದ್ದಾರೆ.

ಆರ್‌ಜೆಡಿ ತನ್ನ ಅಧಿಕೃತ 'X' ಖಾತೆಯಲ್ಲಿ, ಸರ್ವಾಧಿಕಾರಿಯ ಅಹಂಕಾರ ಪ್ರಜಾಪ್ರಭುತ್ವದ ಮೌಲ್ಯಗಳ ಕುಸಿತಕ್ಕೆ ಕಾರಣವಾಗುತ್ತದೆ. ಸಂವಿಧಾನದಲ್ಲಿ ಆಡಳಿತ ಪಕ್ಷದಷ್ಟೇ ವಿರೋಧ ಪಕ್ಷಕ್ಕೂ ಗೌರವವಿದೆ. ಆದರೆ ಸರ್ವಾಧಿಕಾರಿಗಳಿಗೆ ಇದು ಜೀರ್ಣಿಸಿಕೊಳ್ಳಲು ಆಗುತ್ತಿಲ್ಲ ಎಂದು ಪೋಸ್ಟ್ ಮಾಡಿದೆ.

ಆರ್‌ಜೆಡಿಯ ಈ ಗಂಭೀರ ಆರೋಪಗಳನ್ನು ಆಡಳಿತಾರೂಢ ಎನ್‌ಡಿಎ ನಾಯಕರು ತಳ್ಳಿಹಾಕಿದ್ದಾರೆ. ರಾಜ್ಯ ಬಿಜೆಪಿ ಅಧ್ಯಕ್ಷ ಸಂಜಯ್ ಸರಾಫ್ ಮಾತನಾಡಿ, ರಾಜ್ಯದಲ್ಲಿ ಭದ್ರತೆ ಪರಿಶೀಲನೆ ನಡೆಸಲು ಒಂದು ವಿಶೇಷ ಸಮಿತಿ ಇರುತ್ತದೆ. ಆ ಸಮಿತಿಯ ನಿರ್ಧಾರದಂತೆಯೇ ಮಾಜಿ ಮುಖ್ಯಮಂತ್ರಿಗಳಿಗೆ ಸಿಗಬೇಕಾದ ಕಾನೂನಾತ್ಮಕ ಭದ್ರತೆಯನ್ನು ನೀಡಲಾಗಿದೆ. ಇದರಲ್ಲಿ ರಾಜಕೀಯ ಎಲ್ಲಿದೆ ಎಂದು ಪ್ರಶ್ನಿಸಿದ್ದಾರೆ.

ಜೆಡಿಯು ರಾಷ್ಟ್ರೀಯ ವಕ್ತಾರ ರಾಜೀವ್ ರಂಜನ್ ಪ್ರಸಾದ್ ಕೂಡ ಸರ್ಕಾರದ ಕ್ರಮವನ್ನು ಸಮರ್ಥಿಸಿಕೊಂಡಿದ್ದು, ವ್ಯಕ್ತಿಗಳ ಮೇಲಿರುವ ಜೀವಬೆದರಿಕೆಯ ಮೌಲ್ಯಮಾಪನ ನಡೆಸಿ ಭದ್ರತೆ ನಿಗದಿಪಡಿಸಲಾಗುತ್ತದೆ. ಇದರಲ್ಲಿ ರಾಬ್ರಿ ದೇವಿ ಅವರೊಬ್ಬರೇ ವಿನಾಯಿತಿಯಲ್ಲ, ಅವರು ಸರ್ಕಾರದ ಆದೇಶವನ್ನು ಗೌರವಿಸಬೇಕು ಎಂದು ತಿಳಿಸಿದ್ದಾರೆ. ಒಟ್ಟಿನಲ್ಲಿ ಬಿಹಾರದಲ್ಲಿ ಭದ್ರತೆಯ ಸುತ್ತ ಸುತ್ತುತ್ತಿರುವ ಈ ರಾಜಕೀಯ ಹಗ್ಗಜಗ್ಗಾಟ ಮುಂದಿನ ದಿನಗಳಲ್ಲಿ ಯಾವ ತಿರುವು ಪಡೆದುಕೊಳ್ಳಲಿದೆ ಎಂಬುದನ್ನು ಕಾದು ನೋಡಬೇಕಿದೆ,(ಏಜೆನ್ಸೀಸ್​).