ಮೈಸೂರಿನಲ್ಲಿ 1952ರಲ್ಲಿ ಜಿ.ಕೆ.ವೆಂಕಟೇಶ್ ಆಯೋಜಿಸಿದ್ದ ಸಂಗೀತ ಕಾರ್ಯಕ್ರಮದಲ್ಲಿ ಪಿ.ಬಿ.ಶ್ರೀನಿವಾಸ್ ಅವರೊಂದಿಗೆ ಜಾನಕಿ ಹಾಡಿದ್ದರು. ಆ ಕಾರ್ಯಕ್ರಮ ವೀಕ್ಷಿಸಲು ಭಾರಿ ಸಂಖ್ಯೆಯಲ್ಲಿ ಸಂಗೀತಪ್ರಿಯರು ಸೇರಿದ್ದರು. ಆ ಬಳಿಕ ಜಾನಕಿ ಮೈಸೂರಿನಲ್ಲಿ ಹಾಡಿರಲಿಲ್ಲ. ಮತ್ತೆ ಅವರು ಮೈಸೂರಿನಲ್ಲಿ ಹಾಡಿದ್ದು 2017ರ ಅ.28ರ ಸಂಜೆ. ಮಾನಸ ಗಂಗೋತ್ರಿಯ ಬಯಲು ರಂಗಮಂದಿರದಲ್ಲಿ ನಡೆದ ಆ ಕಾರ್ಯಕ್ರಮವೇ ಅವರ ಹಾಡುಗಾರಿಕೆಯ ಕೊನೆಯ ಕಾರ್ಯಕ್ರಮವಾಯಿತು. ಅನೇಕ ಗಣ್ಯ ಅತಿಥಿಗಳು, ಚಲನಚಿತ್ರ ರಂಗದ ನಟ/ನಟಿಯರು, ಸಂಗೀತ ನಿರ್ದೇಶಕರು, ಎಸ್.ಜಾನಕಿಯವರ ಸಾವಿರಾರು ಅಭಿಮಾನಿಗಳು ಸೇರಿದ್ದ ಮೈಸೂರಿನ ಮಾನಸಗಂಗೋತ್ರಿಯ ಬಯಲು ರಂಗಮಂದಿರದಲ್ಲಿ ಅದೊಂದು ಭಾವುಕ ಕಾರ್ಯಕ್ರಮ. ಜಾನಕಿಯವರ ಕಂಠಸಿರಿಯಿಂದ ‘ಪೂಜಿಸಲೆಂದೇ ಹೂಗಳ ತಂದೆ’, ‘ಇಂದು ಎನಗೆ ಗೋವಿಂದ’, ‘ನೀ ನಡೆವ ಹಾದಿಯಲ್ಲಿ’, ‘ಮಗುವೆ ನಿನ್ನ ಹೂನಗೆ’, ‘ಬಾನಲ್ಲು ನೀನೆ ಭುವಿಯಲ್ಲೂ ನೀನೆ’, ‘ನಗುನಗುತಾ ನೀ ಬರುವೆ’... ಹೀಗೆ ಹಲವಾರು ಕನ್ನಡದ ಹಾಡುಗಳ ಜತೆಗೆ ತಮಿಳು, ತೆಲುಗು, ಹಿಂದಿಯ ಕೆಲವು ಹಾಡುಗಳೂ ಮೂಡಿಬಂದವು. ಬಯಲುಮಂದಿರ ಕಿಕ್ಕಿರಿದು ತುಂಬಿದ್ದು ಜಾನಕಿಯವರ ಬಗ್ಗೆ ಜನರಿಗಿರುವ ಅಭಿಮಾನಕ್ಕೆ ಸಾಕ್ಷಿಯಾಯಿತು. ಈ ಮಧ್ಯೆಯೂ ಅವರು ಆಗಾಗ ಮೈಸೂರಿಗೆ ಬರುತ್ತಿದ್ದರು. ಬಳಿಕ ಮೈಸೂರಿನಲ್ಲೇ ನೆಲೆಸಿದರು. ಮೆಟ್ಟಿಲುಗಳ ಮೂಲಕ ಬೆಟ್ಟವನ್ನು ಹತ್ತಿ ತಾಯಿ ಚಾಮುಂಡೇಶ್ವರಿ ದೇವಿಯ ದರ್ಶನ ಪಡೆಯುತ್ತಿದ್ದರು. ಅರಮನೆ, ಕೆಆರ್ಎಸ್ಗೂ ಭೇಟಿ ನೀಡುತ್ತಿದ್ದರು.
