ಕೇವಲ 1 ಮತದ ಅಂತರದಲ್ಲಿ ತಮಿಳುನಾಡು ಸಚಿವ ಪೆರಿಯಕರುಪ್ಪನ್ ಮಣಿಸಿದ ಟಿವಿಕೆ ಅಭ್ಯರ್ಥಿ..Tamil Nadu Election Results

ಹೌದು, ಶಿವಗಂಗಾ ಜಿಲ್ಲೆಯ ತಿರುಪ್ಪತ್ತೂರು ಕ್ಷೇತ್ರದಲ್ಲಿ ತಮಿಳುನಾಡು ಸಚಿವ ಹಾಗೂ ಹಿರಿಯ ಡಿಎಂಕೆ ನಾಯಕ ಕೆ.ಆರ್. ಪೆರಿಯಕರುಪ್ಪನ್ ಅವರು ಕೇವಲ ಒಂದೇ ಒಂದು ಮತದ ಅಂತರದಿಂದ ಪರಾಭವಗೊಂಡಿದ್ದಾರೆ. ಮತ ಎಣಿಕೆಯ ಬಹುತೇಕ ಸುತ್ತುಗಳಲ್ಲಿ ಮುನ್ನಡೆಯಲ್ಲಿದ್ದ ಸಚಿವರಿಗೆ ಅಂತಿಮ ಸುತ್ತು ಭಾರಿ ಹಿನ್ನಡೆ ತಂದುಕೊಟ್ಟು ದೊಡ್ಡ ಅಘಾತವನ್ನೇ ಕೊಟ್ಟಿತು.

ಹಿರಿಯ ನಾಯಕ ಮತ್ತು ಸಚಿವ ಪೆರಿಯಕರುಪ್ಪನ್​ ಅವರು 83,364 ಮತಗಳನ್ನು ಪಡೆದುಕೊಂಡಿದ್ದರೆ, ಅವರ ಎದುರಾಳಿ ಶ್ರೀನಿವಾಸ್​ ಸೇತುಪತಿ ಅವರು 83,365 ಮತಗಳನ್ನು ಗಳಿಸುವ ಮೂಲಕ ಜಯಭೇರಿ ಬಾರಿಸಿದರು. ಮೊದಲ ಸುತ್ತಿನ ಮತ ಎಣಿಕೆಯಲ್ಲಿ ಪೆರಿಯಕರುಪ್ಪನ್​ ಅವರೇ ಮುನ್ನಡೆ ಸಾಧಿಸಿದ್ದರು..ಆದರೆ, ಕಡೆಯ ಹಂತದಲ್ಲಿ ಎಲ್ಲವು ಬದಲಾಗಿತ್ತು.

ಅಂತಿಮ ಸುತ್ತಿನ ಮೊದಲು ಪೆರಿಯಕರುಪ್ಪನ್​ ಅವರು 30 ಮತಗಳ ಮುನ್ನಡೆಯಲ್ಲಿದ್ದರು. ಆದರೆ, ಅಂತಿಮದಲ್ಲಿ ಫಲಿತಾಂಶ ಅದಲುಬದಲಾಗಿದ್ದು...ರಾಜಕೀಯ ಇತಿಹಾಸದಲ್ಲಿ ತೀರಾ ಕಡಿಮೆ. ಒಂದೇ ಒಂದು ವೋಟಿನಿಂದ ಪದವಿ ಕಳೆದುಕೊಂಡ ಪೆರಿಯಕರುಪ್ಪನ್​ ಅವರು ಅಘಾತಕ್ಕೊಳಗಾಗಿ ಮರು ಎಣಿಕೆಗೆ ಒತ್ತಾಯಿಸಿದರು. ಇನ್ನುಳಿದಂತೆ ಬಿಜೆಪಿಯ ಕೆ.ಸಿ. ತಿರುಮಾರನ್ ಅವರು 29,054 ಮತಗಳನ್ನು ಪಡೆಯುವ ಮೂಲಕ ಮೂರನೇ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿದ್ದಾರೆ.

ತಮಿಳುನಾಡಿನಲ್ಲಿ ವಿಜಯ್​ ಮೊದಲ ಬಾರಿಗೆ ಚುನಾವಣೆಗೆ ನಿಂತು, ಭರ್ಜರಿ ಜಯವನ್ನು ಕಂಡಿದ್ದಾರೆ. ಬರೋಬ್ಬರಿ 108 ಸ್ಥಾನಗಳನ್ನು ಗೆಲ್ಲುವ ಮೂಲಕ ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮಿದೆ, ಡಿಎಂಕೆ 59 ಸ್ಥಾನವನ್ನು ಗೆದ್ದುಕೊಂಡಿದ್ದರೆ, ಎಐಎಡಿಎಂಕೆ 47 ಸ್ಥಾನವನ್ನು ಪಡೆದುಕೊಂಡಿದೆ. ಇನ್ನು ಕಾಂಗ್ರೆಸ್​​5 ಸ್ಥಾನಕ್ಕೆ ತೃಪ್ತಿಪಟ್ಟುಕೊಲ್ಳಬೇಕಾಗಿದ್ದು, ಪಿಎಂಕೆ ನಾಲ್ಕು ಸ್ಥಾನಗಳನ್ನು ಪಡೆದುಕೊಂಡಿದೆ, (ಏಜೆನ್ಸೀಸ್​​).