ಪತ್ನಿ ವಿರುದ್ಧ ವಿದೇಶಿ ಆಸ್ತಿ ಆರೋಪದ ಬಳಿಕ ಅಸ್ಸಾಂ ಸಿಎಂ ಭಯಗೊಂಡಿದ್ದು, ತಮ್ಮ ಕೂದಲು ಕಿತ್ತುಕೊಳ್ತಿದ್ದಾರೆ; ಗೌರವ್ ಗೊಗೊಯ್ | Gaurav Gogoi

ಗುವಾಹಟಿ: ಅಸ್ಸಾಂ ಸಿಎಂ ಪತ್ನಿ ರಿನಿಕಿ ಭೂಯಾನ್ ಶರ್ಮಾ ಅವರು ಮೂರು ವಿದೇಶಿ ಪಾಸ್​ಪೋರ್ಟ್ ಮತ್ತು ವಿದೇಶದಲ್ಲಿ ಆಸ್ತಿ ಮಾಡಿದ್ದಾರೆ ಎಂದು ಕಾಂಗ್ರೆಸ್ ಆರೋಪಿಸಿದ ಬಳಿಕ ಸಿಎಂ ಹಿಮಂತ ಬಿಸ್ವಾ ಶರ್ಮಾ ಭಯಬೀತರಾಗಿದ್ದು, ತಮ್ಮ ಕೂದಲನ್ನು ಕಿತ್ತುಕೊಳ್ತಿದ್ದಾರೆ ಎಂದು ಕಾಂಗ್ರೆಸ್ ರಾಜ್ಯಾಧ್ಯಕ್ಷ ಗೌರವ್ ಗೊಗೊಯ್(Gaurav Gogoi) ವ್ಯಂಗ್ಯವಾಡಿದ್ದಾರೆ.

ಪಿಟಿಐ ಜೊತೆ ಮಾತನಾಡಿರುವ ಅವರು, ಪವನ್ ಖೇರಾ ಅವರ ಪತ್ರಿಕಾಗೋಷ್ಠಿಯ ನಂತರ ಹಿಮಂತ ಬಿಸ್ವಾ ಶರ್ಮಾ ಸಂಪೂರ್ಣವಾಗಿ ಭಯಭೀತರಾಗಿದ್ದಾರೆ. ಅಂದಿನಿಂದ ಅವರು ಅಕ್ಷರಶಃ ತಮ್ಮ ಕೂದಲನ್ನು ಕಿತ್ತುಕೊಳ್ತಿದ್ದಾರೆ. ನಿಂದನಾತ್ಮಕ ಹೇಳಿಕೆಗಳನ್ನು ನೀಡುತ್ತಿದ್ದು, ಪತ್ರಕರ್ತರು ಮತ್ತು ಮಾಲೀಕರಿಗೆ ಬೆದರಿಕೆ ಹಾಕುತ್ತಿದ್ದಾರೆ ಎಂದು ಆರೋಪಿಸಿದ್ದಾರೆ.

ಕೇವಲ ಕೂಗಾಡುವುದರಿಂದ ಸತ್ಯಗಳು ಕಾಲ್ಪನಿಕವಾಗುವುದಿಲ್ಲ. ಮತ್ತು ಯಾರನ್ನಾದರೂ ಹುಡುಕಿಕೊಂಡು ಪೊಲೀಸರನ್ನು ಕಳುಹಿಸುವುದರಿಂದ ಸತ್ಯವನ್ನು ಮುಚ್ಚಿಡಲು ಸಾಧ್ಯವಿಲ್ಲ. ಮುಂದಿನ ದಿನಗಳಲ್ಲಿ ಮತ್ತಷ್ಟು ಸತ್ಯ ಹೊರಬರುತ್ತದೆ ಮತ್ತು ಹೆಚ್ಚಿನ ವಿವರಗಳು ಬಹಿರಂಗಗೊಳ್ಳುತ್ತವೆ ಎಂದು ಹೇಳಿದ್ದಾರೆ.

ಮುಖ್ಯಮಂತ್ರಿಯವರು ತಮ್ಮ ನಿಲುವಿನ ಬಗ್ಗೆ ಅಷ್ಟೊಂದು ವಿಶ್ವಾಸ ಹೊಂದಿದ್ದರೆ, ಅವರು ಇಷ್ಟೊಂದು ಹತಾಶರಾಗುತ್ತಿರಲಿಲ್ಲ. ಕಳೆದ ಒಂದು ವಾರದಲ್ಲಿ ಅವರು ಎಷ್ಟು ಭಯಭೀತರಾಗಿದ್ದಾರೆಂದು ಅಸ್ಸಾಂನ ಪ್ರತಿಯೊಬ್ಬರೂ ಗಮನಿಸಿದ್ದಾರೆ ಎಂದು ಪ್ರತಿಪಾದಿಸಿದ್ದಾರೆ.

ಏ. 04ರಂದು ಸುದ್ದಿಗೋಷ್ಠಿ ನಡೆಸಿದ್ದ ಕಾಂಗ್ರೆಸ್ ನಾಯಕ ಪವನ್ ಖೇರಾ, ಸಿಎಂ ಹಿಮಂತ ಬಿಸ್ವಾ ಶರ್ಮಾ ಅವರು ದುಬೈ, ಈಜಿಪ್ಟ್ ಸೇರಿ ಮೂರು ವಿದೇಶಿ ಪಾಸ್​ಪೋರ್ಟ್​ಗಳನ್ನು ಹೊಂದಿದ್ದು, ದುಬೈನಲ್ಲಿ ಐಷರಾಮಿ ಆಸ್ತಿಗಳನ್ನು ಖರೀದಿಸಿದ್ದಾರೆ. ಹಾಗೆಯೇ ಅಮೆರಿಕದಲ್ಲಿ ಕೋಟ್ಯಂತರ ರೂಪಾಯಿಗಳನ್ನು ಹೂಡಿಕೆ ಮಾಡಿದ್ದಾರೆ ಎಂದು ಆರೋಪಿಸಿದ್ದರು.

ಖೇರಾ ಆರೋಪಗಳನ್ನು ನಿರಾಕರಿಸಿದ್ದ ಸಿಎಂ ಪತ್ನಿ ರಿನಿಕಿ ಭುಯಾನ್ ಶರ್ಮಾ ಅವರು ಪೊಲೀಸ್ ಠಾಣೆಗೆ ದೂರು ನೀಡಿದ್ದರು. ದೂರಿನನ್ವಯ ಎಫ್​ಐಆರ್ ದಾಖಲಿಸಿದ್ದ ಅಸ್ಸಾಂ ಪೊಲೀಸರು ಖೇರಾ ಅವರನ್ನು ಪ್ರಶ್ನಿಸಲು ಅವರ ದೆಹಲಿ ಮನೆ ಮೇಲೆ ದಾಳಿ ಮಾಡಿದ್ದರು. ಸದ್ಯ ಖೇರಾ ಅವರಿಗೆ ತೆಲಂಗಾಣ ಹೈಕೋರ್ಟ್​ ನಿರೀಕ್ಷಣಾ ಜಾಮೀನು ನೀಡಿದೆ (ಏಜೆನ್ಸೀಸ್).