ಕೇಂದ್ರದ ಡಿಲಿಮಿಟೇಷನ್ ಬೆಂಬಲಿಸುವ ಯಾರೇ ಆದ್ರೂ ಅವರು ತಮಿಳುನಾಡಿಗೆ ದ್ರೋಹ ಬಗೆದಂತೆ: ರಾಹುಲ್ ಗಾಂಧಿ | Rahul Gandhi

ಚೆನ್ನೈ: ಸಂಸತ್​ನಲ್ಲಿ ಕೇಂದ್ರ ಸರ್ಕಾರ ಮತ್ತೆ ಡಿಲಿಮಿಟೇಷನ್ ಬಿಲ್ ಮಂಡಿಸುವ ಬಗ್ಗೆ ಯೋಚಿಸುತ್ತಿರುವ ಮಧ್ಯೆ, ಕಾಂಗ್ರೆಸ್ ನಾಯಕ ಮತ್ತು ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ(Rahul Gandhi) ಶನಿವಾರ(ಆ. 01), ಡಿಲಿಮಿಟೇಷನ್ ಬೆಂಬಲಿಸುವ ಯಾರೇ ಆದ್ರೂ ಅವರು ತಮಿಳುನಾಡಿಗೆ ದ್ರೋಹ ಬಗೆದಂತೆ ಎಂದು ಹೇಳಿದ್ದಾರೆ.

ತಮಿಳುನಾಡು ಪ್ರವಾಸದಲ್ಲಿರುವ ಅವರು, ಮಹಾಬಲಿಪುರಂನಲ್ಲಿ ಸುದ್ದಿಗಾರರೊಂದಿಗೆ ಈ ಕುರಿತು ಮಾತನಾಡಿದ್ದು, ಪ್ರಸ್ತಾವಿತ ಕ್ಷೇತ್ರ ಪುನರ್ವಿಂಗಡಣೆ ಪ್ರಕ್ರಿಯೆಯನ್ನು ತಮಿಳುನಾಡಿನ ರಾಜಕೀಯ ಅಧಿಕಾರವನ್ನು ಕಿತ್ತುಕೊಳ್ಳಲು ಆಡಳಿತಾರೂಢ ಬಿಜೆಪಿ ನೇತೃತ್ವದ ಕೇಂದ್ರ ಸರ್ಕಾರ ನಡೆಸಿದ ಪಿತೂರಿ ಎಂದು ಬಣ್ಣಿಸಿದ್ದಾರೆ.

ಕ್ಷೇತ್ರ ಪುನರ್ವಿಂಗಡಣೆಯನ್ನು ಬೆಂಬಲಿಸುವ ಯಾರಾದರೂ ತಮಿಳುನಾಡಿಗೆ ದ್ರೋಹ ಮಾಡಿದಂತೆ, ತಮಿಳುನಾಡಿನ ಭವಿಷ್ಯಕ್ಕೆ ದ್ರೋಹ ಮಾಡುತ್ತಿದ್ದಾರೆ. ಮತ್ತು ಆರ್‌ಎಸ್‌ಎಸ್ ಮತ್ತು ಬಿಜೆಪಿಗೆ ತಮಿಳುನಾಡಿನ ಜನರ ಭವಿಷ್ಯದ ಮೇಲೆ ದಾಳಿ ಮಾಡಲು ಅವಕಾಶ ನೀಡುತ್ತಿದ್ದಾರೆ. ಅಂತಹವರನ್ನು ತಮಿಳಿನಲ್ಲಿ ದ್ರೋಹದ ಸಂಕೇತವಾಗಿ ಕರೆಯುವ ಎಟ್ಟಪ್ಪನ್ ಎನ್ನಬಹುದು ಎಂದಿದ್ದಾರೆ.

ಯಾವುದೇ ತಮಿಳು ವ್ಯಕ್ತಿ ಸೀಮಾ ನಿರ್ಣಯವನ್ನು ಬೆಂಬಲಿಸಬಾರದು. ಪ್ರತಿಯೊಬ್ಬ ತಮಿಳು ವ್ಯಕ್ತಿ ಸೀಮಾ ನಿರ್ಣಯವನ್ನು ವಿರೋಧಿಸಬೇಕು. ಪ್ರತಿಯೊಂದು ತಮಿಳು ಪಕ್ಷ ಮತ್ತು ಪ್ರತಿಯೊಂದು ರಾಷ್ಟ್ರೀಯ ಪಕ್ಷವು ಸದನದಲ್ಲಿ ಸೀಮಾ ನಿರ್ಣಯವನ್ನು ಸೋಲಿಸಬೇಕು ಎಂದು ಅವರು ಕರೆ ನೀಡಿದ್ದಾರೆ.

ಲೋಕಸಭೆಯಲ್ಲಿ ಸ್ಥಾನಗಳ ಸಂಖ್ಯೆಯನ್ನು 850ಕ್ಕೆ ಹೆಚ್ಚಿಸುವ ಮತ್ತು ಶಾಸನ ಸಭೆಗಳಲ್ಲಿ ಮಹಿಳೆಯರಿಗೆ ಶೇಕಡಾ 33ರಷ್ಟು ಮೀಸಲಾತಿ ನೀಡುವ ನಾರಿ ಶಕ್ತಿ ವಂದನ ಅಧಿನಿಯಂ-2023 ಅನ್ನು ಜಾರಿಗೆ ತರುವ ಸಂವಿಧಾನ (131ನೇ ತಿದ್ದುಪಡಿ) ಮಸೂದೆಯನ್ನು ಕಳೆದ ಅಧಿವೇಶನದಲ್ಲಿ ಮಂಡಿಸಲಾಗಿತ್ತು. ಆದರೆ ವಿಪಕ್ಷಗಳು ಆ ಮಸೂದೆಯನ್ನು ಸೋಲಿಸಿದ್ದವು. ಈಗ ಮಳೆಗಾಲದ ಅಧಿವೇಶನದಲ್ಲೂ ಮತ್ತೆ ಮಂಡಿಸಲು ಕೇಂದ್ರ ನಿರ್ಧರಿಸಿದೆ ಎಂದು ವರದಿಯಾಗಿದೆ (ಏಜೆನ್ಸೀಸ್).